కపాలీశ్వర స్తోత్రం
కపాలినామధేయకం కలాపిపుర్యధీశ్వరం
కలాధరార్ధశేఖరం కరీంద్రచర్మభూషితం .
కృపారసార్ద్రలోచనం కులాచలప్రపూజితం
కుబేరమిత్రమూర్జితం గణేశపూజితం భజే ..
భజే భుజంగభూషణం భవాబ్ధిభీతిభంజనం
భవోద్భవం భయాపహం సుఖప్రదం సురేశ్వరం .
రవీందువహ్నిలోచనం రమాధవార్చితం వరం
హ్యుమాధవం సుమాధవీసుభూషితం మహాగురుం ..
గురుం గిరీంద్రధన్వినం గుహప్రియం గుహాశయం
గిరిప్రియం నగప్రియాసమన్వితం వరప్రదం .
సురప్రియం రవిప్రభం సురేంద్రపూజితం ప్రభుం
నరేంద్రపీఠదాయకం నమామ్యహం మహేశ్వరం ..
మహేశ్వరం సురేశ్వరం ధనేశ్వరప్రియేశ్వరం
వనేశ్వరం విశుద్ధచిత్తవాసినం పరాత్పరం .
ప్రమత్తవేషధారిణం ప్రకృష్టచిత్స్వరూపిణం
విరుద్ధకర్మకారిణం సుశిక్షకం స్మరామ్యహం ..
స్మరామ్యహం స్మరాంతకం మురారిసేవితాంఘ్రికం
పరారినాశనక్షమం పురారిరూపిణం శుభం .
స్ఫురత్సహస్రభానుతుల్యతేజసం మహౌజసం
సుచండికేశపూజితం మృడం సమాశ్రయే సదా ..
సదా ప్రహృష్టరూపిణం సతాం ప్రహర్షవర్షిణం
భిదా వినాశకారణ ప్రమాణగోచరం పరం .
ముదా ప్రవృత్తనర్తనం జగత్పవిత్రకీర్తనం
నిదానమేకమద్భుతం నితాంతమాశ్రయేహ్యహం ..
అహమ్మమాదిదూషణం మహేంద్రరత్నభూషణం
మహావృషేంద్రవాహనం హ్యహీంద్రభూషణాన్వితం .
వృషాకపిస్వరూపిణం మృషాపదార్థధారిణం
మృకండుసూనుసంస్తుతం హ్యభీతిదం నమామి తం ..
నమామి తం మహామతిం నతేష్టదానచక్షణం
నతార్తిభంజనోద్యతం నగేంద్రవాసినం విభుం .
అగేంద్రజాసమన్వితం మృగేంద్రవిక్రమాన్వితం
ఖగేంద్రవాహనప్రియం సుఖస్వరూపమవ్యయం ..
సుకల్పకాంబికాపతిప్రియం త్విదం మనోహరం
సుగూడకాంచిరామకృష్ణయోగిశిష్యసంస్తుతం .
మహాప్రదోషపుణ్యకాలకీర్తనాత్ శుభప్రదం
భజామహే సదా ముదా కపాలిమంగలాష్టకం ..
కపాలి తుష్టిదాయకం మహాపదిప్రపాలకం
త్వభీష్టసిద్ధిదాయకం విశిష్టమంగలాష్టకం .
పఠేత్సకృత్సుభక్తితః కపాలిసన్నిధౌ క్రమాత్
అవాప్య సర్వమాయురాది మోదతే సుమంగలం ..
Other stotras
