గోకర్ణేశ్వర స్తోత్రం

శ్రీబృహదంబాధిపతే బ్రహ్మపురోగాః సురాః స్తువంతి త్వాం .
వ్యుష్టా రజనీ శయనాదుత్థాయైషామనుగ్రహః క్రియతాం ..

గోకర్ణనాథ గౌర్యా సహసుతయారుహ్య పాదుకే హైమే .
మౌక్తికమంటపమేహి స్నాతుమవష్టభ్య మామకం హస్తం ..

తైలైః సప్తమహార్ణవీపరిమితైస్తావద్భిరుష్ణోదకై -
రాజ్యక్షీరదధీక్షుచూతరససత్క్షౌద్రైస్తథాన్యైరపి .
స్నానార్హైరభిషేచయామి చతురో వేదాన్ పఠన్ భక్తితః
స్వామిన్ శ్రీబృహదంబికేశ కృపయా తత్ సర్వమంగీకురు ..

అండభిత్తిపరివేష్టనయోగ్యాన్ హంసచిత్రితదశానుపవీతైః .
అర్పయామి భవతే బృహదంబాధీశ ధత్స్వ నవపీతపటాంస్త్వం ..

భస్మోద్ధూలనపూర్వకం శివ భవద్దేహం త్రిపుండ్రైరలం-
కృత్యాదావను చందనైర్మలయజైః కర్పూరసంవాసితైః .
సర్వాంగం తవ భూషయామి తిలకేనాలీకమప్యాదరాత్
పశ్యాత్మానమనేకమన్మథసమచ్ఛాయం స్వమాదర్శగం ..

యావంతస్త్రిజగత్సు రత్ననికరా యావద్ధిరణ్యం చ తై-
స్తేనాపీశ తవాంగకేషు రచయామ్యాపాదకేశం హృదా .
యోగ్యం భూషణజాతమద్య బృహదంబేశ త్వయాథాంబికా-
పుత్రేణ ప్రతిగృహ్యతాం మయి కృపాదృష్టిశ్చ విస్తార్యతాం ..

నందనచైత్రరథాదిషు దేవోద్యానేషు యాని పుష్పాణి .
తైర్భూషయామి నాగాభరణ బృహన్నాయికేశ తే గాత్రం ..

కోటికోటిగుణితైః శివ బిల్వైః కోమలైర్వకులవృక్షవనేశ .
స్వర్ణపుష్పసహితైః శ్రుతిభిస్త్వాం పూజయామి పదయోః ప్రతిమంత్రం ..

గుగ్గుళుభారసహస్రైర్బాడవవహ్నౌ ప్రధూపితో ధూపః .
చకులవనేశ స్వామిన్నగరుసమేతస్తవాస్తు మోదాయ ..

బిసతంతువర్తివిహితాః సగోఘృతాః శతకోటికోటిగణనోపరి స్థితాః
ప్రభయాధరీకృతరవీందుపావకా వకులాటవీశ తవ సంతు దీపికాః ..

శాల్యన్నం కనకాభసూపసహితం సద్యోఘృతైరన్వితం
సోష్ణం హాటకభాజనస్థమచలస్పర్ధాలు సవ్యంజనం .
గోకర్ణేశ్వర గృహ్యతాం కరుణయా సచ్ఛర్కరాన్నం తథా
ముద్గాన్నం కృసరాన్నమప్యతిసుధం పానీయమప్యంతరా ..

కృసరమనోహరలడ్డుకమోదకశష్కుల్యపూపవటకాదీన్ .
సప్తసముద్రమితాన్ శ్రీవకులవనాధీశ భుంక్ష్వ భక్ష్యాంస్త్వం ..

క్షోణీసంస్థైః సమస్తైః పనసఫలబృహన్నాలికేరామ్రరంభా-
ద్రాక్షాఖర్జూరజంబూబదరఫలలసన్మాతులంగైః కపిత్యైః .
నారంగైరిక్షుఖండైరపి నిజజఠరం పూర్యతాం మామకం చా-
భీష్టం గోకర్ణసంజ్ఞస్థలనిలయ మహాదేవ సర్వజ్ఞ శంభో ..

క్షీరాంభోధిగతం పయస్తదుచితే పాత్రే సమర్యోపరి
ప్రక్షిప్యార్జునశర్కరాశ్చణకగోధూమాన్ సహైలానపి .
పక్కం పాయససంజ్ఞమద్భుతతమం మధ్వాజ్యసమ్మ్మిశ్రితం
భక్త్యాహం వితరామి తేన బృహదమ్వేశాతిసంతుప్యతాం ..

మల్లీపుష్పసమానకాంతిమృదులానన్నాచలానంబుధౌ
దఘ్నస్తద్వదమర్త్యధేనుదధిజాన్ హైయంగవీనాచలాన్ .
క్షిప్త్వా శ్రీబృహదంబికేశ లవణైః కించిత్ సమేతం మయా
దాస్యామోఽపిచుమందచూర్ణసహితం దధ్యోదనం భుజ్యతాం ..

అర్ఘ్యాం చాచమనీయం పానీయం క్షాలనీయమప్యంబు .
స్వామిన్ వకులవనేశ స్వఃసరిదద్భిః సుధాభిరపి దద్యాం ..

హర్మ్యే రత్నపరిష్కృతే మరతకస్తంభాయుతాలంకృతే
దీప్యద్ధేమఘటైరలంకృతశిరస్యాలంబిముక్తాసరే .
దివ్యైరాస్తరణైర్విభూషితమహామంచేఽభితో వాసితే
సాకం శ్రీబృహృదంబయా సకుతుకం సంవిశ్య విశ్రమ్యతాం ..

పంచాక్షరేణ మనునా పంచమహాపాపభంజనప్రభుణా .
పంచపరార్ధ్యైర్బిల్వైర్దక్షిణగోకర్ణనాయకార్చామి ..

ఏలాక్రముకకర్పూరజాతికాజాతిపత్రిభిః .
తాంబూలం చూర్ణసంయుక్తం గోకర్ణేశ్వర గృహ్యతాం ..

బృహదంబాపతే హేమపాత్రయిత్వా మహీతలం .
కర్పూరయిత్వా హేమాద్రిం తవ నీరాజయామ్యహం ..

ఛత్రం తే శశిమండలేన రచయామ్యాకాశగంగాఝరైః
శ్వేతం చామరమష్టదిక్కరిఘటాకర్ణానిలైర్బీజనం .
ఆదర్శం రవిమండలేన జలదారావేణ భేరీరవం
గంధర్వాప్సరసాం గణైర్వకులభూవాసేశ తౌర్యత్రికం ..

కల్యాణాచలవర్చసో రథవరాన్ కార్తస్వరాలంకృతాన్
కైలాసాద్రినిభానిభానతిమరుద్వేగాంస్తురంగానపి .
కామాభీప్సితరూపపౌరుషజుషః సంఖ్యావిహీనాన్ భటా-
నాలోక్యాంబికయోరరీకురు బృహన్మాతుః ప్రియేశాదరాత్ ..

కాశ్మీరచోలదేశానపి నిజవిభవైర్వినిందతః శశ్వత్ .
సంతతఫలదాన్ దేశాన్ శ్రీబృహదంబేశ చిత్తజాన్ ప్రదదే ..

స్వర్గం భర్త్సయతో నిమీలితదృశః సత్యం హ్రియాలోకితుం
వైకుంఠం హసతః కచాకచిజుషః కైలాసధామ్నా తవ .
అత్యాశ్చర్యయుతాన్ గృహానభిమతానుత్పాద్య బుద్ధయా స్వయా
భక్త్యాహం వితరామి దేవ వకులారణ్యాశ్రయాంగీకురు ..

విశ్వస్యాంతర్బహిరపి విభో వర్తసే తేన తే స్తః
తత్ త్వాం నంతుం క్రమితుమభితోఽసంభవాన్నాస్మి శక్తః .
భక్తాధీనస్త్వమసి బకులాటవ్యధీశోపచారాన్
సర్వాన్ కుర్వే ప్రణమనముఖానాశయేనానిశం తే ..

శ్రీమన్మంగలతీర్థపశ్చిమతటప్రాసాదభద్రాసనా-
జస్రావాసకృతాంతరంగమహనీయాంగేందుగంగాధర .
స్తోత్రం తే కలయామి శశ్వదఖిలామ్నాయైః సహాంగైః పునః
సర్వైశ్చోపనిషత్పురాణకవితాగుంభైర్భవచ్ఛంసిభిః ..

సకలత్రపుత్రపౌత్రం సహపరివారం సహోపకరణం చ .
ఆత్మానమర్పయామి శ్రీబృహదంబేశ పాహి మాం కృపయా ..

కాయకృతం వచనకృతం హృదయకృతం చాపి మామకం మంతుం .
పరిహృత్య మామజస్రం త్వయి కృతభారం మహేశ పరిపాహి ..

Ramaswamy Sastry and Vighnesh Ghanapaathi

85.4K

12.8K