ಗೋಕರ್ಣೇಶ್ವರ ಸ್ತೋತ್ರ
ಶ್ರೀಬೃಹದಂಬಾಧಿಪತೇ ಬ್ರಹ್ಮಪುರೋಗಾಃ ಸುರಾಃ ಸ್ತುವಂತಿ ತ್ವಾಂ .
ವ್ಯುಷ್ಟಾ ರಜನೀ ಶಯನಾದುತ್ಥಾಯೈಷಾಮನುಗ್ರಹಃ ಕ್ರಿಯತಾಂ ..
ಗೋಕರ್ಣನಾಥ ಗೌರ್ಯಾ ಸಹಸುತಯಾರುಹ್ಯ ಪಾದುಕೇ ಹೈಮೇ .
ಮೌಕ್ತಿಕಮಂಟಪಮೇಹಿ ಸ್ನಾತುಮವಷ್ಟಭ್ಯ ಮಾಮಕಂ ಹಸ್ತಂ ..
ತೈಲೈಃ ಸಪ್ತಮಹಾರ್ಣವೀಪರಿಮಿತೈಸ್ತಾವದ್ಭಿರುಷ್ಣೋದಕೈ -
ರಾಜ್ಯಕ್ಷೀರದಧೀಕ್ಷುಚೂತರಸಸತ್ಕ್ಷೌದ್ರೈಸ್ತಥಾನ್ಯೈರಪಿ .
ಸ್ನಾನಾರ್ಹೈರಭಿಷೇಚಯಾಮಿ ಚತುರೋ ವೇದಾನ್ ಪಠನ್ ಭಕ್ತಿತಃ
ಸ್ವಾಮಿನ್ ಶ್ರೀಬೃಹದಂಬಿಕೇಶ ಕೃಪಯಾ ತತ್ ಸರ್ವಮಂಗೀಕುರು ..
ಅಂಡಭಿತ್ತಿಪರಿವೇಷ್ಟನಯೋಗ್ಯಾನ್ ಹಂಸಚಿತ್ರಿತದಶಾನುಪವೀತೈಃ .
ಅರ್ಪಯಾಮಿ ಭವತೇ ಬೃಹದಂಬಾಧೀಶ ಧತ್ಸ್ವ ನವಪೀತಪಟಾಂಸ್ತ್ವಂ ..
ಭಸ್ಮೋದ್ಧೂಲನಪೂರ್ವಕಂ ಶಿವ ಭವದ್ದೇಹಂ ತ್ರಿಪುಂಡ್ರೈರಲಂ-
ಕೃತ್ಯಾದಾವನು ಚಂದನೈರ್ಮಲಯಜೈಃ ಕರ್ಪೂರಸಂವಾಸಿತೈಃ .
ಸರ್ವಾಂಗಂ ತವ ಭೂಷಯಾಮಿ ತಿಲಕೇನಾಲೀಕಮಪ್ಯಾದರಾತ್
ಪಶ್ಯಾತ್ಮಾನಮನೇಕಮನ್ಮಥಸಮಚ್ಛಾಯಂ ಸ್ವಮಾದರ್ಶಗಂ ..
ಯಾವಂತಸ್ತ್ರಿಜಗತ್ಸು ರತ್ನನಿಕರಾ ಯಾವದ್ಧಿರಣ್ಯಂ ಚ ತೈ-
ಸ್ತೇನಾಪೀಶ ತವಾಂಗಕೇಷು ರಚಯಾಮ್ಯಾಪಾದಕೇಶಂ ಹೃದಾ .
ಯೋಗ್ಯಂ ಭೂಷಣಜಾತಮದ್ಯ ಬೃಹದಂಬೇಶ ತ್ವಯಾಥಾಂಬಿಕಾ-
ಪುತ್ರೇಣ ಪ್ರತಿಗೃಹ್ಯತಾಂ ಮಯಿ ಕೃಪಾದೃಷ್ಟಿಶ್ಚ ವಿಸ್ತಾರ್ಯತಾಂ ..
ನಂದನಚೈತ್ರರಥಾದಿಷು ದೇವೋದ್ಯಾನೇಷು ಯಾನಿ ಪುಷ್ಪಾಣಿ .
ತೈರ್ಭೂಷಯಾಮಿ ನಾಗಾಭರಣ ಬೃಹನ್ನಾಯಿಕೇಶ ತೇ ಗಾತ್ರಂ ..
ಕೋಟಿಕೋಟಿಗುಣಿತೈಃ ಶಿವ ಬಿಲ್ವೈಃ ಕೋಮಲೈರ್ವಕುಲವೃಕ್ಷವನೇಶ .
ಸ್ವರ್ಣಪುಷ್ಪಸಹಿತೈಃ ಶ್ರುತಿಭಿಸ್ತ್ವಾಂ ಪೂಜಯಾಮಿ ಪದಯೋಃ ಪ್ರತಿಮಂತ್ರಂ ..
ಗುಗ್ಗುಳುಭಾರಸಹಸ್ರೈರ್ಬಾಡವವಹ್ನೌ ಪ್ರಧೂಪಿತೋ ಧೂಪಃ .
ಚಕುಲವನೇಶ ಸ್ವಾಮಿನ್ನಗರುಸಮೇತಸ್ತವಾಸ್ತು ಮೋದಾಯ ..
ಬಿಸತಂತುವರ್ತಿವಿಹಿತಾಃ ಸಗೋಘೃತಾಃ ಶತಕೋಟಿಕೋಟಿಗಣನೋಪರಿ ಸ್ಥಿತಾಃ
ಪ್ರಭಯಾಧರೀಕೃತರವೀಂದುಪಾವಕಾ ವಕುಲಾಟವೀಶ ತವ ಸಂತು ದೀಪಿಕಾಃ ..
ಶಾಲ್ಯನ್ನಂ ಕನಕಾಭಸೂಪಸಹಿತಂ ಸದ್ಯೋಘೃತೈರನ್ವಿತಂ
ಸೋಷ್ಣಂ ಹಾಟಕಭಾಜನಸ್ಥಮಚಲಸ್ಪರ್ಧಾಲು ಸವ್ಯಂಜನಂ .
ಗೋಕರ್ಣೇಶ್ವರ ಗೃಹ್ಯತಾಂ ಕರುಣಯಾ ಸಚ್ಛರ್ಕರಾನ್ನಂ ತಥಾ
ಮುದ್ಗಾನ್ನಂ ಕೃಸರಾನ್ನಮಪ್ಯತಿಸುಧಂ ಪಾನೀಯಮಪ್ಯಂತರಾ ..
ಕೃಸರಮನೋಹರಲಡ್ಡುಕಮೋದಕಶಷ್ಕುಲ್ಯಪೂಪವಟಕಾದೀನ್ .
ಸಪ್ತಸಮುದ್ರಮಿತಾನ್ ಶ್ರೀವಕುಲವನಾಧೀಶ ಭುಂಕ್ಷ್ವ ಭಕ್ಷ್ಯಾಂಸ್ತ್ವಂ ..
ಕ್ಷೋಣೀಸಂಸ್ಥೈಃ ಸಮಸ್ತೈಃ ಪನಸಫಲಬೃಹನ್ನಾಲಿಕೇರಾಮ್ರರಂಭಾ-
ದ್ರಾಕ್ಷಾಖರ್ಜೂರಜಂಬೂಬದರಫಲಲಸನ್ಮಾತುಲಂಗೈಃ ಕಪಿತ್ಯೈಃ .
ನಾರಂಗೈರಿಕ್ಷುಖಂಡೈರಪಿ ನಿಜಜಠರಂ ಪೂರ್ಯತಾಂ ಮಾಮಕಂ ಚಾ-
ಭೀಷ್ಟಂ ಗೋಕರ್ಣಸಂಜ್ಞಸ್ಥಲನಿಲಯ ಮಹಾದೇವ ಸರ್ವಜ್ಞ ಶಂಭೋ ..
ಕ್ಷೀರಾಂಭೋಧಿಗತಂ ಪಯಸ್ತದುಚಿತೇ ಪಾತ್ರೇ ಸಮರ್ಯೋಪರಿ
ಪ್ರಕ್ಷಿಪ್ಯಾರ್ಜುನಶರ್ಕರಾಶ್ಚಣಕಗೋಧೂಮಾನ್ ಸಹೈಲಾನಪಿ .
ಪಕ್ಕಂ ಪಾಯಸಸಂಜ್ಞಮದ್ಭುತತಮಂ ಮಧ್ವಾಜ್ಯಸಮ್ಮ್ಮಿಶ್ರಿತಂ
ಭಕ್ತ್ಯಾಹಂ ವಿತರಾಮಿ ತೇನ ಬೃಹದಮ್ವೇಶಾತಿಸಂತುಪ್ಯತಾಂ ..
ಮಲ್ಲೀಪುಷ್ಪಸಮಾನಕಾಂತಿಮೃದುಲಾನನ್ನಾಚಲಾನಂಬುಧೌ
ದಘ್ನಸ್ತದ್ವದಮರ್ತ್ಯಧೇನುದಧಿಜಾನ್ ಹೈಯಂಗವೀನಾಚಲಾನ್ .
ಕ್ಷಿಪ್ತ್ವಾ ಶ್ರೀಬೃಹದಂಬಿಕೇಶ ಲವಣೈಃ ಕಿಂಚಿತ್ ಸಮೇತಂ ಮಯಾ
ದಾಸ್ಯಾಮೋಽಪಿಚುಮಂದಚೂರ್ಣಸಹಿತಂ ದಧ್ಯೋದನಂ ಭುಜ್ಯತಾಂ ..
ಅರ್ಘ್ಯಾಂ ಚಾಚಮನೀಯಂ ಪಾನೀಯಂ ಕ್ಷಾಲನೀಯಮಪ್ಯಂಬು .
ಸ್ವಾಮಿನ್ ವಕುಲವನೇಶ ಸ್ವಃಸರಿದದ್ಭಿಃ ಸುಧಾಭಿರಪಿ ದದ್ಯಾಂ ..
ಹರ್ಮ್ಯೇ ರತ್ನಪರಿಷ್ಕೃತೇ ಮರತಕಸ್ತಂಭಾಯುತಾಲಂಕೃತೇ
ದೀಪ್ಯದ್ಧೇಮಘಟೈರಲಂಕೃತಶಿರಸ್ಯಾಲಂಬಿಮುಕ್ತಾಸರೇ .
ದಿವ್ಯೈರಾಸ್ತರಣೈರ್ವಿಭೂಷಿತಮಹಾಮಂಚೇಽಭಿತೋ ವಾಸಿತೇ
ಸಾಕಂ ಶ್ರೀಬೃಹೃದಂಬಯಾ ಸಕುತುಕಂ ಸಂವಿಶ್ಯ ವಿಶ್ರಮ್ಯತಾಂ ..
ಪಂಚಾಕ್ಷರೇಣ ಮನುನಾ ಪಂಚಮಹಾಪಾಪಭಂಜನಪ್ರಭುಣಾ .
ಪಂಚಪರಾರ್ಧ್ಯೈರ್ಬಿಲ್ವೈರ್ದಕ್ಷಿಣಗೋಕರ್ಣನಾಯಕಾರ್ಚಾಮಿ ..
ಏಲಾಕ್ರಮುಕಕರ್ಪೂರಜಾತಿಕಾಜಾತಿಪತ್ರಿಭಿಃ .
ತಾಂಬೂಲಂ ಚೂರ್ಣಸಂಯುಕ್ತಂ ಗೋಕರ್ಣೇಶ್ವರ ಗೃಹ್ಯತಾಂ ..
ಬೃಹದಂಬಾಪತೇ ಹೇಮಪಾತ್ರಯಿತ್ವಾ ಮಹೀತಲಂ .
ಕರ್ಪೂರಯಿತ್ವಾ ಹೇಮಾದ್ರಿಂ ತವ ನೀರಾಜಯಾಮ್ಯಹಂ ..
ಛತ್ರಂ ತೇ ಶಶಿಮಂಡಲೇನ ರಚಯಾಮ್ಯಾಕಾಶಗಂಗಾಝರೈಃ
ಶ್ವೇತಂ ಚಾಮರಮಷ್ಟದಿಕ್ಕರಿಘಟಾಕರ್ಣಾನಿಲೈರ್ಬೀಜನಂ .
ಆದರ್ಶಂ ರವಿಮಂಡಲೇನ ಜಲದಾರಾವೇಣ ಭೇರೀರವಂ
ಗಂಧರ್ವಾಪ್ಸರಸಾಂ ಗಣೈರ್ವಕುಲಭೂವಾಸೇಶ ತೌರ್ಯತ್ರಿಕಂ ..
ಕಲ್ಯಾಣಾಚಲವರ್ಚಸೋ ರಥವರಾನ್ ಕಾರ್ತಸ್ವರಾಲಂಕೃತಾನ್
ಕೈಲಾಸಾದ್ರಿನಿಭಾನಿಭಾನತಿಮರುದ್ವೇಗಾಂಸ್ತುರಂಗಾನಪಿ .
ಕಾಮಾಭೀಪ್ಸಿತರೂಪಪೌರುಷಜುಷಃ ಸಂಖ್ಯಾವಿಹೀನಾನ್ ಭಟಾ-
ನಾಲೋಕ್ಯಾಂಬಿಕಯೋರರೀಕುರು ಬೃಹನ್ಮಾತುಃ ಪ್ರಿಯೇಶಾದರಾತ್ ..
ಕಾಶ್ಮೀರಚೋಲದೇಶಾನಪಿ ನಿಜವಿಭವೈರ್ವಿನಿಂದತಃ ಶಶ್ವತ್ .
ಸಂತತಫಲದಾನ್ ದೇಶಾನ್ ಶ್ರೀಬೃಹದಂಬೇಶ ಚಿತ್ತಜಾನ್ ಪ್ರದದೇ ..
ಸ್ವರ್ಗಂ ಭರ್ತ್ಸಯತೋ ನಿಮೀಲಿತದೃಶಃ ಸತ್ಯಂ ಹ್ರಿಯಾಲೋಕಿತುಂ
ವೈಕುಂಠಂ ಹಸತಃ ಕಚಾಕಚಿಜುಷಃ ಕೈಲಾಸಧಾಮ್ನಾ ತವ .
ಅತ್ಯಾಶ್ಚರ್ಯಯುತಾನ್ ಗೃಹಾನಭಿಮತಾನುತ್ಪಾದ್ಯ ಬುದ್ಧಯಾ ಸ್ವಯಾ
ಭಕ್ತ್ಯಾಹಂ ವಿತರಾಮಿ ದೇವ ವಕುಲಾರಣ್ಯಾಶ್ರಯಾಂಗೀಕುರು ..
ವಿಶ್ವಸ್ಯಾಂತರ್ಬಹಿರಪಿ ವಿಭೋ ವರ್ತಸೇ ತೇನ ತೇ ಸ್ತಃ
ತತ್ ತ್ವಾಂ ನಂತುಂ ಕ್ರಮಿತುಮಭಿತೋಽಸಂಭವಾನ್ನಾಸ್ಮಿ ಶಕ್ತಃ .
ಭಕ್ತಾಧೀನಸ್ತ್ವಮಸಿ ಬಕುಲಾಟವ್ಯಧೀಶೋಪಚಾರಾನ್
ಸರ್ವಾನ್ ಕುರ್ವೇ ಪ್ರಣಮನಮುಖಾನಾಶಯೇನಾನಿಶಂ ತೇ ..
ಶ್ರೀಮನ್ಮಂಗಲತೀರ್ಥಪಶ್ಚಿಮತಟಪ್ರಾಸಾದಭದ್ರಾಸನಾ-
ಜಸ್ರಾವಾಸಕೃತಾಂತರಂಗಮಹನೀಯಾಂಗೇಂದುಗಂಗಾಧರ .
ಸ್ತೋತ್ರಂ ತೇ ಕಲಯಾಮಿ ಶಶ್ವದಖಿಲಾಮ್ನಾಯೈಃ ಸಹಾಂಗೈಃ ಪುನಃ
ಸರ್ವೈಶ್ಚೋಪನಿಷತ್ಪುರಾಣಕವಿತಾಗುಂಭೈರ್ಭವಚ್ಛಂಸಿಭಿಃ ..
ಸಕಲತ್ರಪುತ್ರಪೌತ್ರಂ ಸಹಪರಿವಾರಂ ಸಹೋಪಕರಣಂ ಚ .
ಆತ್ಮಾನಮರ್ಪಯಾಮಿ ಶ್ರೀಬೃಹದಂಬೇಶ ಪಾಹಿ ಮಾಂ ಕೃಪಯಾ ..
ಕಾಯಕೃತಂ ವಚನಕೃತಂ ಹೃದಯಕೃತಂ ಚಾಪಿ ಮಾಮಕಂ ಮಂತುಂ .
ಪರಿಹೃತ್ಯ ಮಾಮಜಸ್ರಂ ತ್ವಯಿ ಕೃತಭಾರಂ ಮಹೇಶ ಪರಿಪಾಹಿ ..
Other stotras
