ಕಪಾಲೀಶ್ವರ ಸ್ತೋತ್ರ
ಕಪಾಲಿನಾಮಧೇಯಕಂ ಕಲಾಪಿಪುರ್ಯಧೀಶ್ವರಂ
ಕಲಾಧರಾರ್ಧಶೇಖರಂ ಕರೀಂದ್ರಚರ್ಮಭೂಷಿತಂ .
ಕೃಪಾರಸಾರ್ದ್ರಲೋಚನಂ ಕುಲಾಚಲಪ್ರಪೂಜಿತಂ
ಕುಬೇರಮಿತ್ರಮೂರ್ಜಿತಂ ಗಣೇಶಪೂಜಿತಂ ಭಜೇ ..
ಭಜೇ ಭುಜಂಗಭೂಷಣಂ ಭವಾಬ್ಧಿಭೀತಿಭಂಜನಂ
ಭವೋದ್ಭವಂ ಭಯಾಪಹಂ ಸುಖಪ್ರದಂ ಸುರೇಶ್ವರಂ .
ರವೀಂದುವಹ್ನಿಲೋಚನಂ ರಮಾಧವಾರ್ಚಿತಂ ವರಂ
ಹ್ಯುಮಾಧವಂ ಸುಮಾಧವೀಸುಭೂಷಿತಂ ಮಹಾಗುರುಂ ..
ಗುರುಂ ಗಿರೀಂದ್ರಧನ್ವಿನಂ ಗುಹಪ್ರಿಯಂ ಗುಹಾಶಯಂ
ಗಿರಿಪ್ರಿಯಂ ನಗಪ್ರಿಯಾಸಮನ್ವಿತಂ ವರಪ್ರದಂ .
ಸುರಪ್ರಿಯಂ ರವಿಪ್ರಭಂ ಸುರೇಂದ್ರಪೂಜಿತಂ ಪ್ರಭುಂ
ನರೇಂದ್ರಪೀಠದಾಯಕಂ ನಮಾಮ್ಯಹಂ ಮಹೇಶ್ವರಂ ..
ಮಹೇಶ್ವರಂ ಸುರೇಶ್ವರಂ ಧನೇಶ್ವರಪ್ರಿಯೇಶ್ವರಂ
ವನೇಶ್ವರಂ ವಿಶುದ್ಧಚಿತ್ತವಾಸಿನಂ ಪರಾತ್ಪರಂ .
ಪ್ರಮತ್ತವೇಷಧಾರಿಣಂ ಪ್ರಕೃಷ್ಟಚಿತ್ಸ್ವರೂಪಿಣಂ
ವಿರುದ್ಧಕರ್ಮಕಾರಿಣಂ ಸುಶಿಕ್ಷಕಂ ಸ್ಮರಾಮ್ಯಹಂ ..
ಸ್ಮರಾಮ್ಯಹಂ ಸ್ಮರಾಂತಕಂ ಮುರಾರಿಸೇವಿತಾಂಘ್ರಿಕಂ
ಪರಾರಿನಾಶನಕ್ಷಮಂ ಪುರಾರಿರೂಪಿಣಂ ಶುಭಂ .
ಸ್ಫುರತ್ಸಹಸ್ರಭಾನುತುಲ್ಯತೇಜಸಂ ಮಹೌಜಸಂ
ಸುಚಂಡಿಕೇಶಪೂಜಿತಂ ಮೃಡಂ ಸಮಾಶ್ರಯೇ ಸದಾ ..
ಸದಾ ಪ್ರಹೃಷ್ಟರೂಪಿಣಂ ಸತಾಂ ಪ್ರಹರ್ಷವರ್ಷಿಣಂ
ಭಿದಾ ವಿನಾಶಕಾರಣ ಪ್ರಮಾಣಗೋಚರಂ ಪರಂ .
ಮುದಾ ಪ್ರವೃತ್ತನರ್ತನಂ ಜಗತ್ಪವಿತ್ರಕೀರ್ತನಂ
ನಿದಾನಮೇಕಮದ್ಭುತಂ ನಿತಾಂತಮಾಶ್ರಯೇಹ್ಯಹಂ ..
ಅಹಮ್ಮಮಾದಿದೂಷಣಂ ಮಹೇಂದ್ರರತ್ನಭೂಷಣಂ
ಮಹಾವೃಷೇಂದ್ರವಾಹನಂ ಹ್ಯಹೀಂದ್ರಭೂಷಣಾನ್ವಿತಂ .
ವೃಷಾಕಪಿಸ್ವರೂಪಿಣಂ ಮೃಷಾಪದಾರ್ಥಧಾರಿಣಂ
ಮೃಕಂಡುಸೂನುಸಂಸ್ತುತಂ ಹ್ಯಭೀತಿದಂ ನಮಾಮಿ ತಂ ..
ನಮಾಮಿ ತಂ ಮಹಾಮತಿಂ ನತೇಷ್ಟದಾನಚಕ್ಷಣಂ
ನತಾರ್ತಿಭಂಜನೋದ್ಯತಂ ನಗೇಂದ್ರವಾಸಿನಂ ವಿಭುಂ .
ಅಗೇಂದ್ರಜಾಸಮನ್ವಿತಂ ಮೃಗೇಂದ್ರವಿಕ್ರಮಾನ್ವಿತಂ
ಖಗೇಂದ್ರವಾಹನಪ್ರಿಯಂ ಸುಖಸ್ವರೂಪಮವ್ಯಯಂ ..
ಸುಕಲ್ಪಕಾಂಬಿಕಾಪತಿಪ್ರಿಯಂ ತ್ವಿದಂ ಮನೋಹರಂ
ಸುಗೂಡಕಾಂಚಿರಾಮಕೃಷ್ಣಯೋಗಿಶಿಷ್ಯಸಂಸ್ತುತಂ .
ಮಹಾಪ್ರದೋಷಪುಣ್ಯಕಾಲಕೀರ್ತನಾತ್ ಶುಭಪ್ರದಂ
ಭಜಾಮಹೇ ಸದಾ ಮುದಾ ಕಪಾಲಿಮಂಗಲಾಷ್ಟಕಂ ..
ಕಪಾಲಿ ತುಷ್ಟಿದಾಯಕಂ ಮಹಾಪದಿಪ್ರಪಾಲಕಂ
ತ್ವಭೀಷ್ಟಸಿದ್ಧಿದಾಯಕಂ ವಿಶಿಷ್ಟಮಂಗಲಾಷ್ಟಕಂ .
ಪಠೇತ್ಸಕೃತ್ಸುಭಕ್ತಿತಃ ಕಪಾಲಿಸನ್ನಿಧೌ ಕ್ರಮಾತ್
ಅವಾಪ್ಯ ಸರ್ವಮಾಯುರಾದಿ ಮೋದತೇ ಸುಮಂಗಲಂ ..
Other stotras
