മഹാവിഷ്ണു ശരണാഗതി സ്തോത്രം

അകാരാർഥോ വിഷ്ണുർജഗദുദയരക്ഷാപ്രലയകൃൻ-
മകാരാർഥോ ജീവസ്തദുപകരണം വൈഷ്ണവമിദം .
ഉകാരോഽനന്യർഹം നിയമയതി സംബന്ധമനയോ-
സ്ത്രയീസാരസ്ത്ര്യാത്മാ പ്രണവ ഇമമർഥം സമദിശത് ..1..

മന്ത്രബ്രഹ്മണി മധ്യമേന നമസാ പുംസഃസ്വരൂപംഗതി-
ര്ഗമ്യം ശിക്ഷിതമീക്ഷിതേന പുരതഃപശ്ചാദപി സ്ഥാനതഃ .
സ്വാതന്ത്ര്യം നിജരക്ഷണം സമുചിതാ വൃത്തിശ്ച നാന്യോചിതാ
തസ്യൈവേതി ഹരേർവിവിച്യ കഥിതം സ്വസ്യാപി നാർഹം തതഃ ..2..

അകാരാർഥായൈവസ്വമഹമഥ മഹ്യം ന നിവഹാഃ
നരാണാം നിത്യാനാമയനമിതി നാരായണപദം .
യമാഹാസ്മൈ കാലം സകലമപി സർവത്ര സകലാ-
സ്വവസ്ഥാസ്വാവിഃ സ്യുർമമ സഹജകൈങ്കര്യവിധയഃ ..3..

ദേഹാസക്താത്മബുദ്ധിര്യദി ഭവതി പദം സാധു വിദ്യാത്തൃതീയം
സ്വാതന്ത്ര്യാന്ധോ യദി സ്യാത്പ്രഥമമിതരശേഷത്വധീശ്ചേദ് ദ്വിതീയം .
ആത്മത്രാണോന്മുഖശ്ചേന്നമ ഇതി ച പദം ബാന്ധവാഭാസലോലഃ
ശബ്ദം നാരായണാഖ്യം വിഷയചപലധീശ്ചേച്ചതുർഥീം പ്രപന്നഃ ..4..

നേതൃത്വം നിത്യയോഗം സമുചിതഗുണജാതം തനുഖ്യാപനഞ്ചോ-
പായം കർത്തവ്യഭാഗം ത്വഥ മിഥുനപരം പ്രാപ്യമേവം പ്രസിദ്ധം .
സ്വാമിത്വം പ്രാർഥനാം ച പ്രബലതരവിരോധിപ്രഹാണം ദശൈതാൻ
മന്താരം ത്രായതേ ചേത്യധിഗതനിയമഃ ഷട്പദോഽയം ദ്വിഖണ്ഡഃ ..5..

ഈശാനാഞ്ജഗതാമധീശദയിതാം നിത്യാനപായാം ശ്രിയം
സംശ്രിത്യാശ്രയണോചിതാഖിലഗുണസ്യാംഘ്രീ ഹരേരാശ്രയേ .
ഇഷ്ടോപായതയാ ശ്രിയാ ച സഹിതായാത്മേശ്വരായാർഥയേ
കർതും ദാസ്യമശേഷമപ്രതിഹതം നിത്യം ത്വഹം നിർമമഃ ..6..

മത്പ്രാപ്ത്യർഥതയാ മയോക്തമഖിലം സന്ത്യജ്യ ധർമം പുനഃ
മാമേകം മദവാപ്തയേ ശമണമിത്യാർതോഽവസായം കുരു .
ത്വാമേകം വ്യവസായയുക്തമഖിലജ്ഞാനാദിപൂർണോ ഹ്യഹം
മത്പ്രാപ്തിപ്രതിബന്ധകൈർവിരഹിതം കുര്യാം ശുചം മാ കൃഥാഃ ..7..

നിശ്ചിത്യ ത്വദധീനതാം മയി സദാ കർമാദ്യുപായാൻ ഹരേ
കർതും ത്യക്തുമപി പ്രപത്തുമനലം സീദാമി ദുഃഖാകുലഃ .
ഏതജ്ജ്ഞാനമുപേയുഷോ മമ പുനസ്സർവാപരാധക്ഷയം
കർതാസീതി ദൃഢോഽസ്മി തേ തു ചരമം വാക്യം സ്മരൻസാരഥേഃ ..8..

ശാഖാനാമുപരി സ്ഥിതേന മനുനാ മൂലേന ലബ്ധാത്മകഃ
സത്താഹേതുസകൃജ്ജപേന സകലം കാലം ദ്വയേന ക്ഷിപൻ .
വേദോത്തംസവിഹാരസാരഥിദയാഗുംഫേന വിസ്ത്രംഭിതഃ
സാരജ്ഞോ യദി കശ്ചിദസ്തി ഭുവനേ നാഥഃ സ യൂഥസ്യ നഃ ..9..

Ramaswamy Sastry and Vighnesh Ghanapaathi

Other stotras