ദശാവതാര മംഗല സ്തോത്രം

ആദാവംബുജസംഭവാദിവിനുതഃ ശാന്തോഽച്യുതഃ ശാശ്വതഃ
സംഫുല്ലാമലപുണ്ഡരീകനയനഃ പുണ്യഃ പുരാണഃ പുമാൻ .
ലോകേശഃ ശ്രുതിചോരസോമകഹരോ മത്സ്യാവതാരോ ഹരിഃ
ശ്രീമാൻ സിംഹഗിരീശ്വരഃ കരുണയാ ദദ്യാത്സദാ മംഗലം ..

സപ്തദ്വീപകുലാചലേന്ദ്രജലധിസ്തോമാഭിസങ്ക്രാന്തഭൂ-
ഭാരാലീഢഫണീന്ദ്രമന്ദരധരോ മന്ദാരമാലാർചിതഃ .
ഭാവജ്ഞോ ബഹുചക്രലാഞ്ഛിതതനുഃ കൂർമാവതാരോ ഹരിഃ
ശ്രീമാൻ സിംഹഗിരീശ്വരഃ കരുണയാ ദദ്യാത്സദാ മംഗലം ..

ലീലാലോഡിതസർവസാഗരജലഃ സമ്പൂർണചന്ദ്രപ്രഭോ
ഹേമാക്ഷാസുരഖണ്ഡനോ ഭുജഗദഃ ചക്രാങ്കിതഃ സന്തതം .
ദംഷ്ട്രാഗ്രോദ്ധൃതമേദിനീഭയഹരഃ ക്രോഡാവതാരോ ഹരിഃ
ശ്രീമാൻ സിംഹഗിരീശ്വരഃ കരുണയാ ദദ്യാത്സദാ മംഗലം ..

കുന്ദേന്ദുസ്ഫടികപ്രഭോ ബഹുഭുജോ ഭൂഷാസഹസ്രോജ്ജ്വലോ
ദൈത്യേന്ദ്രോദരദാരണേഽതിനിപുണഃ സ്തംഭോദ്ഭവോ ഭീഷണഃ .
പ്രഹ്ലാദാർതിഹരോദയോ നരമൃഗാകാരാവതാരോ ഹരിഃ
ശ്രീമാൻ സിംഹഗിരീശ്വരഃ കരുണയാ ദദ്യാത്സദാ മംഗലം ..

ധാതൃക്ഷാലിതപാദപങ്കജഭവസ്രോതോമഹാശാംബരഃ
പ്രക്ഷാലീകൃതപാദപദ്മയുഗലോ ബാലോ ജഗജ്ജീവനഃ .
ഭിക്ഷാർഥീ ബലിദർപഹാ പടുവടുഃ ഖർവാവതാരോ ഹരിഃ
ശ്രീമാൻ സിംഹഗിരീശ്വരഃ കരുണയാ ദദ്യാത്സദാ മംഗലം ..

സദ്യഃഖണ്ഡിതരാജമണ്ഡലശരീരോദ്ഭൂതരക്താപഗാ
സംസിക്താഖിലഭൂതലഃ പിതൃവചഃസമ്പാലനേ നിഷ്ഠിതഃ .
വേദജ്ഞോ ജമദഗ്നിജഃ പരശുഭൃദ്രാമാവതാരോ ഹരിഃ
ശ്രീമാൻ സിംഹഗിരീശ്വരഃ കരുണയാ ദദ്യാത്സദാ മംഗലം ..

രാജേന്ദ്രോ രണരംഗരാജവിനുതാനേകാസുരാഭാസുരാ-
കാരോ രാവണകോടിഖണ്ഡനപടുഃ കോദണ്ഡദീക്ഷാഗുരുഃ .
സീതേശഃ സുരസജ്ജനാമൃതകരോ രാമാവതാരോ ഹരിഃ
ശ്രീമാൻ സിംഹഗിരീശ്വരഃ കരുണയാ ദദ്യാത്സദാ മംഗലം ..

കാലിന്ദീജലഭേദനോ ബഹുഭുജോ ഭൂഷാസമുദ്ഭാസുരഃ
പ്രധ്വംസീ മുസലായുധോ ഹലധരോ നീലാംബരോ നിർമലഃ .
ലാവണ്യാപ്പതിരേവതീപതിരസൗ രാമാവതാരോ ഹരിഃ
ശ്രീമാൻ സിംഹഗിരീശ്വരഃ കരുണയാ ദദ്യാത്സദാ ഭംഗലം ..

ധർമജ്ഞത്രിപുരാധിനാഥവനിതാധർമോപദേഷ്ടാ ച ത-
ത്പാതിവ്രത്യവിശേഷഭഞ്ജനപരോ വേദാന്തവേദ്യഃ സദാ .
ദൈത്യവ്രാതവിനാശനാദിചതുരോ ബുദ്ധാവതാരോ ഹരിഃ
ശ്രീമാൻ സിംഹഗിരീശ്വരഃ കരുണയാ ദദ്യാത്സദാ മംഗലം ..

മ്ലേച്ഛവ്രാതവിനാശകഃ കലിയുഗാന്തേഽശ്വാധിരൂഢോ മഹാ-
മായാവീ ബഹുഭാനുകോടിസദൃശോ ഭീമാംശുചക്രായുധഃ .
യശ്ചാംഗീകൃതകൽകിരൂപവിഭവോ ഭൂമൗ അവിഷ്യാന്വയഃ
ശ്രീമാൻ സിംഹഗിരീശ്വരഃ കരുണയാ ദദ്യാത്സദാ മംഗലം ..

Ramaswamy Sastry and Vighnesh Ghanapaathi

Other stotras