ശ്രീശേഷശൈലസുനികേതന ദിവ്യമൂർതേ
നാരായണാച്യുത ഹരേ നലിനായതാക്ഷ.
ലീലാകടാക്ഷപരി- രക്ഷിതസർവലോക
ശ്രീവേങ്കടേശ മമ ദേഹി കരാവലംബം.
ബ്രഹ്മാദിവന്ദിത- പദാംബുജ ശംഖപാണേ
ശ്രീമത്സുദർശന- സുശോഭിതദിവ്യഹസ്ത.
കാരുണ്യസാഗര ശരണ്യ സുപുണ്യമൂർതേ
ശ്രീവേങ്കടേശ മമ ദേഹി കരാവലംബം.
വേദാന്തവേദ്യ ഭവസാഗരകർണധാര
ശ്രീപദ്മനാഭ കമലാർചിതപാദപദ്മ.
ലോകൈകപാവന പരാത്പര പാപഹാരിൻ
ശ്രീവേങ്കടേശ മമ ദേഹി കരാവലംബം.
ലക്ഷ്മീപതേ നിഗമലക്ഷ്യ നിജസ്വരൂപ
കാമാദിദോഷ- പരിഹാരക ബോധദായിൻ.
ദൈത്യാദിമർദന ജനാർദന വാസുദേവ
ശ്രീവേങ്കടേശ മമ ദേഹി കരാവലംബം.
താപത്രയം ഹര വിഭോ രഭസാന്മുരാരേ
സംരക്ഷ മാം കരുണയാ സരസീരുഹാക്ഷ.
മച്ഛിഷ്യമപ്യനുദിനം പരിരക്ഷ വിഷ്ണോ
ശ്രീവേങ്കടേശ മമ ദേഹി കരാവലംബം.
ശ്രീജാതരൂപനവരത്ന- ലസത്കിരീട-
കസ്തൂരികാതിലക- ശോഭിലലാടദേശ.
രാകേന്ദുബിംബ- വദനാംബുജ വാരിജാക്ഷ
ശ്രീവേങ്കടേശ മമ ദേഹി കരാവലംബം.
വന്ദാരുലോകവരദാന- വചോവിലാസ
രത്നാഢ്യഹാരപരിശോഭിത കംബുകണ്ഠ.
കേയൂരരത്ന സുവിഭാസിദിഗന്തരാല
ശ്രീവേങ്കടേശ മമ ദേഹി കരാവലംബം.
ദിവ്യാംഗദാങ്കിത- ഭുജദ്വയ മംഗലാത്മൻ
കേയൂരഭൂഷണ സുശോഭിത ദീർഘബാഹോ.
നാഗേന്ദ്രകങ്കണ- കരദ്വയകാമദായിൻ
ശ്രീവേങ്കടേശ മമ ദേഹി കരാവലംബം.
സ്വാമിൻ ജഗദ്ധരണ വാരിധിമധ്യമഗ്ന
മാമുദ്ധാരയ കൃപയാ കരുണാപയോധേ.
ലക്ഷ്മീംശ്ച ദേഹി മമ ധർമസമൃദ്ധിഹേതും
ശ്രീവേങ്കടേശ മമ ദേഹി കരാവലംബം.
ദിവ്യാംഗരാഗപരിചർചിത- കോമലാംഗ
പീതാംബരാവൃതതനോ തരുണാർകഭാസ.
സത്യാഞ്ചനാഭപരിധാന സുപത്തുബന്ധോ
ശ്രീവേങ്കടേശ മമ ദേഹി കരാവലംബം.
രത്നാഢ്യദാമ- സുനിബദ്ധകടിപ്രദേശ
മാണിക്യദർപണ- സുസന്നിഭജാനുദേശ.
ജംഘാദ്വയേന പരിമോഹിതസർവലോക
ശ്രീവേങ്കടേശ മമ ദേഹി കരാവലംബം.
ലോകൈകപാവന- സരിത്പരിശോഭിതാംഘ്രേ
ത്വത്പാദദർശനദിനേശ- മഹാപ്രസാദാത്.
ഹാർദം തമശ്ച സകലം ലയമാപ ഭൂമൻ
ശ്രീവേങ്കടേശ മമ ദേഹി കരാവലംബം.
കാമാദിവൈരി- നിവഹോഽപ്രിയതാം പ്രയാതോ
ദാരിദ്ര്യമപ്യപഗതം സകലം ദയാലോ.
ദീനം ച മാം സമവലോക്യ ദയാർദ്രദൃഷ്ട്യാ
ശ്രീവേങ്കടേശ മമ ദേഹി കരാവലംബം.
ശ്രീവേങ്കടേശപദ- പങ്കജഷട്പദേന
ശ്രീമന്നൃസിംഹയതിനാ രചിതം ജഗത്യാം.
ഏതത് പഠന്തി മനുജാഃ പുരുഷോത്തമസ്യ
തേ പ്രാപ്നുവന്തി പരമാം പദവീം മുരാരേഃ.
കാശീ വിശ്വനാഥ സുപ്രഭാത സ്തോത്രം
സ്നാനായ ഗാംഗസലിലേഽഥ സമർചനായ വിശ്വേശ്വരസ്യ ബഹുഭക്തജനാ ....
Click here to know more..ഹരി പഞ്ചക സ്തുതി
രവിസോമനേത്രമഘനാശനം വിഭും മുനിബുദ്ധിഗമ്യ- മഹനീയദേഹിനം. ....
Click here to know more..നാരായണ സൂക്തം
സഹസ്ര ശീർഷം ദേവം വിശ്വാക്ഷം വിശ്വശംഭുവം . വിശ്വൈ നാരായണ....
Click here to know more..