మూషక వాహన స్తుతి
దేవర్షయ ఊచుః .
నమస్తే స్తేయరూపాయ సర్వహృత్స్థాయ ధీమతే .
అంతర్భోగకరాయైవ మూషకాయ నమో నమః ..
మాయయా స్తేయరూపిణ్యా మోహయిత్వా చరాచరం .
చౌరవద్భోగకర్తా త్వం చౌరరూపాయ తే నమః ..
చరాచరమయాయైవ చరాచరధరాయ తే .
సర్వాధీశాయ లోకాయ కాలకాలాయ తే నమః ..
అనాదయే మహేశాయ చతుర్వర్గప్రదాయినే .
గణేశవాహనాయైవ గణేశధ్వజసంస్థిత ..
సర్వత్రగ గణాధీశస్త్వయా హృత్స్థ న సంశయః .
చాలకాత్మకవీర్యం యద్గణేశస్య త్వమంజసా ..
బ్రహ్మాకారశరీరాయ స్తేయానాం స్వస్వరూపిణే .
నమో నమః పరేశాయ చతుర్మయస్వరూపిణే ..
చతుర్ణాం గణపః పాతా త్వయా తద్రూపధారిణా .
భవ వాహనముఖ్యం వై గణేశస్యాఽధునా ప్రభో ..
ఇతి స్తుతః ప్రసన్నాత్మా మూషకస్తానువాచ హ .
భవిష్యామి మహాభాగా వాహనం గణపస్య చ ..
ఏవముక్త్వా గణేశానం ప్రభుం తుష్టావ లబ్ధధీః .
మూషకో దర్శనేనైవ హర్షయుక్తో మహాద్యుతిః ..
మూషక ఉవాచ .
దేవాయ యోగరూపాయ నమో మూషకగాయ తే .
గణేశాయ పరేశాయ పరాత్పరతరాయ తే ..
అనంతాయ మహేశాయ మహేశైః సంస్తుతాయ చ .
విఘ్నేశాయ మహావిఘ్నధారిణే తే నమో నమః ..
అనంతసూనవే తుభ్యం దైత్యదానవమర్దినే .
దేవానాం పాలకాయైవ హేరంబాయ నమో నమః ..
స్వానందవాసినే తుభ్యం భక్తస్వానందదాయినే .
బ్రహ్మణే బ్రహ్మణాం చైవ పతయే తే నమో నమః ..
చతుర్ణాం చాలకాయైవ చతుఃసంయోగమూర్తయే .
చతుర్ణాం పదదాత్రే తే తైర్హీనాయ నమో నమః ..
యోగేశయోగరూపాయ యోగిభ్యో యోగదాయినే .
శాంతిరూపాయ వై తుభ్యం శాంతిదాయ నమో నమః ..
మూషకవాహనాయైవ మూషకధ్వజినే నమః .
సిద్ధిబుద్ధిపతే నాథ భక్తేశాయ నమో నమః ..
వేదవాక్యప్రమాణేన మాం కురుష్వ గజానన .
వాహనం భక్తిసంయుక్తం సేవాయై తే నమో నమః ..
ఇదం మూషకగో నామ మదీయం తు త్వయా ధృతం .
అతోఽభేదమయీం భక్తిం దేహి నాథ నమో నమః ..
మదీయనాథరూపేణ నామ తే చాఽభవత్ ప్రభో .
తతో మూషకగో భక్తం మాం కురుష్వ మహాద్భుతం ..
ఏవం స్తుత్వా గణాధీశం ప్రణనామ స దండవత్ .
భక్తిసంయుతముత్థాప్య గణాధీశో జగాద తం ..
మూషకగ ఉవాచ .
వాహనం మే సదా సాధో భవిష్యసి మహామతే .
మదీయా భక్తిరత్యంతం సుదృఢా తే భవిష్యతి ..
త్వయా కృతమిదం స్తోత్రం మదీయం భక్తిదం భవేత్ .
ధర్మార్థకామమోక్షాణాం దాయకం సర్వదం పరం ..
పఠతే శృణ్వతే చైతత్ పుత్రపౌత్రాదికప్రదం .
యద్యదిచ్ఛతి తత్తద్వై సఫలం ప్రభవిష్యతి ..
అన్యత్త్వం శృణు మే వాక్యం దేవైర్విప్రైః కృతం మహత్ .
స్తవనం సర్వమాన్యం తే భవిష్యతి న సంశయః ..
యస్త్వాం స్తోష్యతి చౌరేశస్తోత్రేణానేన మానవః .
స సర్వం లభతే నిత్యమీప్సితం నాఽత్ర సంశయః ..
అంతే స్వానందగో భూత్వా బ్రహ్మభూతో భవిష్యతి .
మదీయకృపయా సోఽపి త్వత్సమో మే ప్రియో భవేత్ ..
Other stotras
