గణపతి వజ్ర పంజర కవచం

మహాదేవి గణేశస్య వరదస్య మహాత్మనః .
కవచం తే ప్రవక్ష్యామి వజ్రపంజరకాభిధం ..

ఓం అస్య శ్రీమహాగణపతివజ్రపంజరకవచస్య . శ్రీభైరవ ఋషిః .
గాయత్రీ ఛందః . శ్రీమహాగణపతి దేవతా . గం బీజం . హ్రీం శక్తిః .
కురు కురు కీలకం . వజ్రవిద్యాదిసిద్ధ్యర్థే మహాగణపతివజ్రపంజరకవచపాఠే వినియోగః ..

శ్రీభైరవర్షయే నమః శిరసి . గాయత్రచ్ఛందసే నమో ముఖే .
శ్రీమహాగణపతిదేవతాయై నమో హృది . గం బీజాయ నమో గుహ్యే .
హ్రీంశక్తయే నమో నాభౌ . కురు కురు కీలకాయ నమః పాదయోః .
వజ్రవిద్యాదిసిద్ధ్యర్థే మహాగణపతివజ్రపంజరకవచపాఠే వినియోగాయ నమః సర్వాంగే ..

గాం అంగుష్ఠాభ్యాం నమః . గీం తర్జనీభ్యాం నమః .
గూం మధ్యమాభ్యాం నమః . గైం అనామికాభ్యాం నమః .
గౌం కనిష్ఠికాభ్యాం నమః . గః కరతలకరపృష్ఠాభ్యాం నమః ..

గాం హృదయాయ నమః . గీం శిరసే స్వాహా . గూం శిఖాయై వషట్ .
గైం కవచాయ హుం . గౌం నేత్రత్రయాయ వౌషట్ . గః అస్త్రాయ ఫట్ ..

విఘ్నేశం విశ్వవంద్యం సువిపులయశసం లోకరక్షాప్రదక్షం
సాక్షాత్సర్వాపదాసు ప్రశమనసుమతిం పార్వతీప్రాణసూనుం .
ప్రాయః సర్వాసురేంద్రైః ససురమునిగణైః సాధకైః పూజ్యమానం
కారుణ్యేనాంతరాయామితభయశమనం విఘ్నరాజం నమామి ..

ఓం శ్రీం హ్రీం గం శిరః పాతు మహాగణపతిః ప్రభుః .
వినాయకో లలాటం మే విఘ్నరాజో భ్రువౌ మమ ..

పాతు నేత్రే గణాధ్యక్షో నాసికాం మే గజాననః .
శ్రుతీ మేఽవతు హేరంబో గండౌ మే మోదకాశనః ..

ద్వైమాతురో ముఖం పాతు చాధరౌ పాత్వరిందమః .
దంతాన్మమైకదంతోఽవ్యాద్వక్రతుండోఽవతాద్రసాం ..

గాంగేయో మే గలం పాతు స్కంధౌ సింహాసనోఽవతు .
విఘ్నాంతకో భుజౌ పాతు హస్తౌ మూషకవాహనః ..

ఊరూ మమావతాన్నిత్యం దేవస్త్రిపురఘాతనః .
హృదయం మే కుమారోఽవ్యాజ్జయంతః పార్శ్వయుగ్మకం ..

ప్రద్యుమ్నో మేఽవతాత్పృష్ఠం నాభిం శంకరనందనః .
కటిం నందిగణః పాతు శిశ్నం విశ్వేశ్వరోఽవతు ..

మేఢ్రే మేఽవతు సౌభాగ్యో భృంగిరీటీ చ గుహ్యకం .
విరాటకోఽవతాదూరూ జానూ మే పుష్పదంతకః ..

జంఘే మమ వికర్తోఽవ్యాద్గుల్ఫావంత్యగణోఽవతు .
పాదౌ చిత్తగణః పాతు పాదాధో లోహితోఽవతు ..

పాదపృష్ఠం సుందరోఽవ్యాన్నూపురాఢ్యో వపుర్మమ .
విచారో జఠరం పాతు భూతాని చోగ్రరూపకః ..

శిరసః పాదపర్యంతం వపుః సప్తగణోఽవతు .
పాదాదిమూర్ధపర్యంతం వపుః పాతు వినర్తకః ..

విస్మారితం తు యత్స్థానం గణేశస్తత్సదాఽవతు .
పూర్వే మాం హ్రీం కరాలోఽవ్యాదాగ్నేయే వికరాలకః ..

దక్షిణే పాతు సంహారో నైరృతే రురుభైరవః .
పశ్చిమే మాం మహాకాలో వాయౌ కాలాగ్నిభైరవః ..

ఉత్తరే మాం సితాస్యోఽవ్యాదైశాన్యామసితాత్మకః .
ప్రభాతే శతపత్రోఽవ్యాత్సహస్రారస్తు మధ్యమే ..

దంతమాలా దినాంతేఽవ్యాన్నిశి పాత్రం సదాఽవతు .
కలశో మాం నిశీథేఽవ్యాన్నిశాంతే పరశుస్తథా .
సర్వత్ర సర్వదా పాతు శంఖయుగ్మం చ మద్వపుః ..

ఓం ఓం రాజకులే హౌం హౌం రణభయే హ్రీం హ్రీం కుద్యూతేఽవతాత్
శ్రీం శ్రీం శత్రుగృహే శౌం శౌం జలభయే క్లీం క్లీం వనాంతేఽవతు .
గ్లౌం గ్లూం గ్లైం గ్లం గుం సత్త్వభీతిషు మహావ్యాధ్యార్తిషు గ్లౌం గం గౌం
నిత్యం యక్షపిశాచభూతఫణిషు గ్లౌం గం గణేశోఽవతు ..

ఇతీదం కవచం గుహ్యం సర్వతంత్రేషు గోపితం .
వజ్రపంజరనామానం గణేశస్య మహాత్మనః ..

అంగభూతం మనుమయం సర్వాచారైకసాధనం .
వినానేన న సిద్ధిః స్యాత్పూజనస్య జపస్య చ ..

తస్మాత్తు కవచం పుణ్యం పఠేద్వా ధారయేత్సదా .
తస్య సిద్ధిర్మహాదేవి కరస్థా పారలౌకికీ ..

యం యం కామయతే కామం తం తం ప్రాప్నోతి పాఠతః .
అర్ధరాత్రే పఠేన్నిత్యం సర్వాభీష్టఫలం లభేత్ ..

ఇతి గుహ్యం సుకవచం మహాగణపతేః ప్రియం .
సర్వసిద్ధిమయం దివ్యం గోపయేత్పరమేశ్వరి ..

Ramaswamy Sastry and Vighnesh Ghanapaathi

72.7K

10.9K