గణేశ పంచచామర స్తోత్రం
లలాటపట్టలుంఠితామలేందురోచిరుద్భటే
వృతాతివర్చరస్వరోత్సరరత్కిరీటతేజసి.
ఫటాఫటత్ఫటత్స్ఫురత్ఫణాభయేన భోగినాం
శివాంకతః శివాంకమాశ్రయచ్ఛిశౌ రతిర్మమ.
అదభ్రవిభ్రమభ్రమద్భుజాభుజంగఫూత్కృతీ-
ర్నిజాంకమానినీషతో నిశమ్య నందినః పితుః.
త్రసత్సుసంకుచంతమంబికాకుచాంతరం యథా
విశంతమద్య బాలచంద్రభాలబాలకం భజే.
వినాదినందినే సవిభ్రమం పరాభ్రమన్ముఖ-
స్వమాతృవేణిమాగతాం స్తనం నిరీక్ష్య సంభ్రమాత్.
భుజంగశంకయా పరేత్యపిత్ర్యమంకమాగతం
తతోఽపి శేషఫూత్కృతైః కృతాతిచీత్కృతం నమః.
విజృంభమాణనందిఘోరఘోణఘుర్ఘురధ్వని-
ప్రహాసభాసితాశమంబికాసమృద్ధివర్ధినం.
ఉదిత్వరప్రసృత్వరక్షరత్తరప్రభాభర-
ప్రభాతభానుభాస్వరం భవస్వసంభవం భజే.
అలంగృహీతచామరామరీ జనాతివీజన-
ప్రవాతలోలితాలకం నవేందుభాలబాలకం.
విలోలదుల్లలల్లలామశుండదండమండితం
సతుండముండమాలివక్రతుండమీడ్యమాశ్రయే.
ప్రఫుల్లమౌలిమాల్యమల్లికామరందలేలిహా
మిలన్ నిలిందమండలీచ్ఛలేన యం స్తవీత్యమం.
త్రయీసమస్తవర్ణమాలికా శరీరిణీవ తం
సుతం మహేశితుర్మతంగజాననం భజామ్యహం.
ప్రచండవిఘ్నఖండనైః ప్రబోధనే సదోద్ధురః
సమర్ద్ధిసిద్ధిసాధనావిధావిధానబంధురః.
సబంధురస్తు మే విభూతయే విభూతిపాండురః
పురస్సరః సురావలేర్ముఖానుకారిసింధురః.
అరాలశైలబాలికాఽలకాంతకాంతచంద్రమో-
జకాంతిసౌధమాధయన్ మనోఽనురాధయన్ గురోః.
సుసాధ్యసాధవం ధియాం ధనాని సాధయన్నయ-
నశేషలేఖనాయకో వినాయకో ముదేఽస్తు నః.
రసాంగయుంగనవేందువత్సరే శుభే గణేశితు-
స్తిథౌ గణేశపంచచామరం వ్యధాదుమాపతిః.
పతిః కవివ్రజస్య యః పఠేత్ ప్రతిప్రభాతకం
స పూర్ణకామనో భవేదిభాననప్రసాదభాక్.
ఛాత్రత్వే వసతా కాశ్యాం విహితేయం యతః స్తుతిః.
తతశ్ఛాత్రైరధీతేయం వైదుష్యం వర్ద్ధయేద్ధియా.
Recommended for you
ద్వాదశ జ్యోతిర్లింగ భుజంగ స్తోత్రం
సుశాంతం నితాంతం గుణాతీతరూపం శరణ్యం ప్రభుం సర్వలోకాధిన....
Click here to know more..సుబ్రహ్మణ్య పంచక స్తోత్రం
సర్వార్తిఘ్నం కుక్కుటకేతుం రమమాణం వహ్న్యుద్భూతం భక్త....
Click here to know more..ధన్వంతరి భగవాన్ అనుగ్రహం కోసం మంత్రం
ఓం నమో భగవతే వాసుదేవాయ ధన్వంతరయే అమృతకలశహస్తాయ సర్వామయ....
Click here to know more..
