മൂഷക വാഹന സ്തുതി
ദേവർഷയ ഊചുഃ .
നമസ്തേ സ്തേയരൂപായ സർവഹൃത്സ്ഥായ ധീമതേ .
അന്തർഭോഗകരായൈവ മൂഷകായ നമോ നമഃ ..
മായയാ സ്തേയരൂപിണ്യാ മോഹയിത്വാ ചരാചരം .
ചൗരവദ്ഭോഗകർതാ ത്വം ചൗരരൂപായ തേ നമഃ ..
ചരാചരമയായൈവ ചരാചരധരായ തേ .
സർവാധീശായ ലോകായ കാലകാലായ തേ നമഃ ..
അനാദയേ മഹേശായ ചതുർവർഗപ്രദായിനേ .
ഗണേശവാഹനായൈവ ഗണേശധ്വജസംസ്ഥിത ..
സർവത്രഗ ഗണാധീശസ്ത്വയാ ഹൃത്സ്ഥ ന സംശയഃ .
ചാലകാത്മകവീര്യം യദ്ഗണേശസ്യ ത്വമഞ്ജസാ ..
ബ്രഹ്മാകാരശരീരായ സ്തേയാനാം സ്വസ്വരൂപിണേ .
നമോ നമഃ പരേശായ ചതുർമയസ്വരൂപിണേ ..
ചതുർണാം ഗണപഃ പാതാ ത്വയാ തദ്രൂപധാരിണാ .
ഭവ വാഹനമുഖ്യം വൈ ഗണേശസ്യാഽധുനാ പ്രഭോ ..
ഇതി സ്തുതഃ പ്രസന്നാത്മാ മൂഷകസ്താനുവാച ഹ .
ഭവിഷ്യാമി മഹാഭാഗാ വാഹനം ഗണപസ്യ ച ..
ഏവമുക്ത്വാ ഗണേശാനം പ്രഭും തുഷ്ടാവ ലബ്ധധീഃ .
മൂഷകോ ദർശനേനൈവ ഹർഷയുക്തോ മഹാദ്യുതിഃ ..
മൂഷക ഉവാച .
ദേവായ യോഗരൂപായ നമോ മൂഷകഗായ തേ .
ഗണേശായ പരേശായ പരാത്പരതരായ തേ ..
അനന്തായ മഹേശായ മഹേശൈഃ സംസ്തുതായ ച .
വിഘ്നേശായ മഹാവിഘ്നധാരിണേ തേ നമോ നമഃ ..
അനന്തസൂനവേ തുഭ്യം ദൈത്യദാനവമർദിനേ .
ദേവാനാം പാലകായൈവ ഹേരംബായ നമോ നമഃ ..
സ്വാനന്ദവാസിനേ തുഭ്യം ഭക്തസ്വാനന്ദദായിനേ .
ബ്രഹ്മണേ ബ്രഹ്മണാം ചൈവ പതയേ തേ നമോ നമഃ ..
ചതുർണാം ചാലകായൈവ ചതുഃസംയോഗമൂർതയേ .
ചതുർണാം പദദാത്രേ തേ തൈർഹീനായ നമോ നമഃ ..
യോഗേശയോഗരൂപായ യോഗിഭ്യോ യോഗദായിനേ .
ശാന്തിരൂപായ വൈ തുഭ്യം ശാന്തിദായ നമോ നമഃ ..
മൂഷകവാഹനായൈവ മൂഷകധ്വജിനേ നമഃ .
സിദ്ധിബുദ്ധിപതേ നാഥ ഭക്തേശായ നമോ നമഃ ..
വേദവാക്യപ്രമാണേന മാം കുരുഷ്വ ഗജാനന .
വാഹനം ഭക്തിസംയുക്തം സേവായൈ തേ നമോ നമഃ ..
ഇദം മൂഷകഗോ നാമ മദീയം തു ത്വയാ ധൃതം .
അതോഽഭേദമയീം ഭക്തിം ദേഹി നാഥ നമോ നമഃ ..
മദീയനാഥരൂപേണ നാമ തേ ചാഽഭവത് പ്രഭോ .
തതോ മൂഷകഗോ ഭക്തം മാം കുരുഷ്വ മഹാദ്ഭുതം ..
ഏവം സ്തുത്വാ ഗണാധീശം പ്രണനാമ സ ദണ്ഡവത് .
ഭക്തിസംയുതമുത്ഥാപ്യ ഗണാധീശോ ജഗാദ തം ..
മൂഷകഗ ഉവാച .
വാഹനം മേ സദാ സാധോ ഭവിഷ്യസി മഹാമതേ .
മദീയാ ഭക്തിരത്യന്തം സുദൃഢാ തേ ഭവിഷ്യതി ..
ത്വയാ കൃതമിദം സ്തോത്രം മദീയം ഭക്തിദം ഭവേത് .
ധർമാർഥകാമമോക്ഷാണാം ദായകം സർവദം പരം ..
പഠതേ ശൃണ്വതേ ചൈതത് പുത്രപൗത്രാദികപ്രദം .
യദ്യദിച്ഛതി തത്തദ്വൈ സഫലം പ്രഭവിഷ്യതി ..
അന്യത്ത്വം ശൃണു മേ വാക്യം ദേവൈർവിപ്രൈഃ കൃതം മഹത് .
സ്തവനം സർവമാന്യം തേ ഭവിഷ്യതി ന സംശയഃ ..
യസ്ത്വാം സ്തോഷ്യതി ചൗരേശസ്തോത്രേണാനേന മാനവഃ .
സ സർവം ലഭതേ നിത്യമീപ്സിതം നാഽത്ര സംശയഃ ..
അന്തേ സ്വാനന്ദഗോ ഭൂത്വാ ബ്രഹ്മഭൂതോ ഭവിഷ്യതി .
മദീയകൃപയാ സോഽപി ത്വത്സമോ മേ പ്രിയോ ഭവേത് ..
Other stotras
