अमरनाथ शिव स्तोत्र
भागीरथीसलिलसान्द्रजटाकलापं
शीतांशुकान्तिरमणीयविशालभालम्।
कर्पूरदुग्धहिमहंसनिभं स्वतोजं
नित्यं भजाम्यऽमरनाथमहं दयालुम्।
गौरीपतिं पशुपतिं वरदं त्रिनेत्रं
भूताधिपं सकललोकपतिं सुरेशम्।
शार्दूलचर्मचितिभस्मविभूषिताङ्गं
नित्यं भजाम्यऽमरनाथमहं दयालुम्।
गन्धर्वयक्षरसुरकिन्नरसिद्धसङ्घैः
संस्तूयमानमनिशं श्रुतिपूतमन्त्रैः।
सर्वत्रसर्वहृदयैकनिवासिनं तं
नित्यं भजाम्यऽमरनाथमहं दयालुम्।
व्योमानिलानलजलावनिसोमसूर्य-
होत्रीभिरष्टतनुभिर्जगदेकनाथः।
यस्तिष्ठतीह जनमङ्गलधारणाय
तं प्रार्थयाम्यऽमरनाथमहं दयालुम्।
शैलेन्द्रतुङ्गशिखरे गिरिजासमेतं
प्रालेयदुर्गमगुहासु सदा वसन्तम्।
श्रीमद्गजाननविराजित दक्षिणाङ्कं
नित्यं भजाम्यऽमरनाथमहं दयालुम्।
वाग्बुद्धिचित्तकरणैश्च तपोभिरुग्रैः
शक्यं समाकलयितुं न यदीयरूपम्।
तं भक्तिभावसुलभं शरणं नतानां
नित्ंय भजाम्यऽमरनाथमहं दयालुम्।
आद्यन्तहीनमखिलाधिपतिं गिरीशं
भक्तप्रियं हितकरं प्रभुमद्वयैकम्।
सृष्टिस्थितिप्रलयलीलमनन्तशक्तिं
नित्यं भजाम्यऽमरनाथमहं दयालुम्।
हे पार्वतीश वृषभध्वज शूलपाणे
हे नीलकण्ठ मदनान्तक शुभ्रमूर्ते ।
हे भक्तकल्पतरुरूप सुखैकसिन्धो
मां पाहि पाहि भवतोऽमरनाथ नित्यम्।
Recommended for you
सुदर्शन स्तुति
सहस्रादित्यसङ्काशं सहस्रवदनं परम्। सहस्रदोःसहस्रारं ....
Click here to know more..रसेश्वर अष्टक स्तोत्र
भक्तानां सर्वदुःखज्ञं तद्दुःखादिनिवारकम्| पातालजह्नु....
Click here to know more..भीष्म का जन्म
Click here to know more..
