ಶ್ರೀನಿವಾಸ ಸ್ತೋತ್ರ

ಅಥ ವಿಬುಧವಿಲಾಸಿನೀಷು ವಿಷ್ವಙ್ಮುನಿಮಭಿತಃ ಪರಿವಾರ್ಯ ತಸ್ಥುಷೀಷು.
ಮದವಿಹೃತಿವಿಕತ್ಥನಪ್ರಲಾಪಾಸ್ವವಮತಿನಿರ್ಮಿತನೈಜಚಾಪಲಾಸು.
ತ್ರಿಭುವನಮುದಮುದ್ಯತಾಸು ಕರ್ತುಂ ಮಧುಸಹಸಾಗತಿಸರ್ವನಿರ್ವಹಾಸು.
ಮಧುರಸಭರಿತಾಖಿಲಾತ್ಮಭಾವಾಸ್ವಗಣಿತಭೀತಿಷು ಶಾಪತಶ್ಶುಕಸ್ಯ.
ಅತಿವಿಮಲಮತಿರ್ಮಹಾನುಭಾವೋ ಮುನಿರಪಿ ಶಾಂತಮನಾ ನಿಜಾತ್ಮಗುಪ್ತ್ಯೈ.
ಅಖಿಲಭುವನರಕ್ಷಕಸ್ಯ ವಿಷ್ಣೋಃ ಸ್ತುತಿಮಥ ಕರ್ತುಮನಾ ಮನಾಗ್ಬಭೂವ.
ಶ್ರಿಯಃಶ್ರಿಯಂ ಷಂಗುಣಪೂರಪೂರ್ಣಂ ಶ್ರೀವತ್ಸಚಿಹ್ನಂ ಪುರುಷಂ ಪುರಾಣಂ.
ಶ್ರೀಕಂಠಪೂರ್ವಾಮರಬೃಂದವಂದ್ಯಂ ಶ್ರಿಯಃಪತಿಂ ತಂ ಶರಣಂ ಪ್ರಪದ್ಯೇ.
ವಿಭುಂ ಹೃದಿ ಸ್ವಂ ಭುವನೇಶಮೀಡ್ಯಂ ನೀಳಾಶ್ರಯಂ ನಿರ್ಮಲಚಿತ್ತಚಿಂತ್ಯಂ.
ಪರಾತ್ಪರಂ ಪಾಮರಪಾರಮೇನಮುಪೇಂದ್ರಮೂರ್ತಿಂ ಶರಣಂ ಪ್ರಪದ್ಯೇ.
ಸ್ಮೇರಾತಸೀಸೂನಸಮಾನಕಾಂತಿಂ ಸುರಕ್ತಪದ್ಮಪ್ರಭಪಾದಹಸ್ತಂ.
ಉನ್ನಿದ್ರಪಂಕೇರುಹಚಾರುನೇತ್ರಂ ಪವಿತ್ರಪಾಣಿಂ ಶರಣಂ ಪ್ರಪದ್ಯೇ.
ಸಹಸ್ರಭಾನುಪ್ರತಿಮೋಪಲೌಘಸ್ಫುರತ್ಕಿರೀಟಪ್ರವರೋತ್ತಮಾಂಗಂ.
ಪ್ರವಾಲಮುಕ್ತಾನವರತ್ನಹಾರತಾರಂ ಹರಿಂ ತಂ ಶರಣಂ ಪ್ರಪದ್ಯೇ.
ಪುರಾ ರಜೋದುಷ್ಟಧಿಯೋ ವಿಧಾತುರಪಾಹೃತಾನ್ ಯೋ ಮಧುಕೈಟಭಾಭ್ಯಾಂ.
ವೇದಾನುಪಾದಾಯ ದದೌ ಚ ತಸ್ಮೈ ತಂ ಮತ್ಸ್ಯರೂಪಂ ಶರಣಂ ಪ್ರಪದ್ಯೇ.
ಪಯೋಧಿಮಧ್ಯೇಽಪಿ ಚ ಮಂದರಾದ್ರಿಂ ಧರ್ತುಂ ಚ ಯಃ ಕೂರ್ಮವಪುರ್ಬಭೂವ.
ಸುಧಾಂ ಸುರಾಣಾಮವನಾರ್ಥಮಿಚ್ಛಂಸ್ತಮಾದಿದೇವಂ ಶರಣಂ ಪ್ರಪದ್ಯೇ.
ವಸುಂಧರಾಮಂತರದೈತ್ಯಪೀಡಾಂ ರಸಾತಲಾಂತರ್ವಿವಶಾಭಿವಿಷ್ಟಾಂ.
ಉದ್ಧಾರಣಾರ್ಥಂ ಚ ವರಾಹ ಆಸೀಚ್ಚತುರ್ಭುಜಂ ತಂ ಶರಣಂ ಪ್ರಪದ್ಯೇ.
ನಖೈರ್ವರೈಸ್ತೀಕ್ಷ್ಣಮುಖೈರ್ಹಿರಣ್ಯಮರಾತಿಮಾಮರ್ದಿತಸರ್ವಸತ್ತ್ವಂ.
ವಿದಾರಯಾಮಾಸ ಚ ಯೋ ನೃಸಿಂಹೋ ಹಿರಣ್ಯಗರ್ಭಂ ಶರಣಂ ಪ್ರಪದ್ಯೇ.
ಮಹನ್ಮ ಹತ್ವೇಂದ್ರಿಯಪಂಚಭೂತತನ್ಮಾತ್ರಮಾತ್ರಪ್ರಕೃತಿಃ ಪುರಾಣೀ.
ಯತಃ ಪ್ರಸೂತಾ ಪುರುಷಾಸ್ತದಾತ್ಮಾ ತಮಾತ್ಮನಾಥಂ ಶರಣಂ ಪ್ರಪದ್ಯೇ.
ಪುರಾ ಯ ಏತಸ್ತಕಲಂ ಬಭೂವ ಯೇನಾಪಿ ತದ್ಯತ್ರ ಚ ಲೀನಮೇತತ್.
ಆಸ್ತಾಂ ಯತೋಽನುಗ್ರಹನಿಗ್ರಹೌ ಚ ತಂ ಶ್ರೀನಿವಾಸಂ ಶರಣಂ ಪ್ರಪದ್ಯೇ.
ನಿರಾಮಯಂ ನಿಶ್ಚಲನೀರರಾಶಿನೀಕಾಶಸದ್ರೂಪಮಯಂ ಮಹಸ್ತತ್.
ನಿಯಂತು ನಿರ್ಭಾತೃ ನಿಹಂತು ನಿತ್ಯಂ ನಿದ್ರಾಂತಮೇನಂ ಶರಣಂ ಪ್ರಪದ್ಯೇ.
ಜಗಂತಿ ಯಃ ಸ್ಥಾವರಜಂಗಮಾನಿ ಸಂಹೃತ್ಯ ಸರ್ವಾಣ್ಯುದರೇಶಯಾನಿ.
ಏಕಾರ್ಣವಾಂತರ್ವಟಪತ್ರತಲ್ಪೇ ಸ್ವಪಿತ್ಯನಂತಂ ಶರಣಂ ಪ್ರಪದ್ಯೇ.
ನಿರಸ್ತದುಃಖೌಘಮತೀಂದ್ರಿಯಂ ತಂ ನಿಷ್ಕಾರಣಂ ನಿಷ್ಕಲಮಪ್ರಮೇಯಂ.
ಅಣೋರಣೀಯಾಂಸಮನಂತಮಂತರಾತ್ಮಾನುಭಾವಂ ಶರಣಂ ಪ್ರಪದ್ಯೇ.
ಸಪ್ತಾಂಬುಜೀರಂಜಕರಾಜಹಾಸಂ ಸಪ್ತಾರ್ಣವೀಸಂಸೃತಿಕರ್ಣಧಾರಂ.
ಸಪ್ತಾಶ್ವಬಿಂಬಾಶ್ವಹಿರಣ್ಮಯಂ ತಂ ಸಪ್ತಾರ್ಚಿರಂಗಂ ಶರಣಂ ಪ್ರಪದ್ಯೇ.
ನಿರಾಗಸಂ ನಿರ್ಮಲಪೂರ್ಣಬಿಂಬಂ ನಿಶೀಥಿನೀನಾಥನಿಭಾನನಾಭಂ.
ನಿರ್ಣೀತನಿದ್ರಂ ನಿಗಮಾಂತನಿತ್ಯಂ ನಿಃಶ್ರೇಯಸಂ ತಂ ಶರಣಂ ಪ್ರಪದ್ಯೇ.
ನಿರಾಮಯಂ ನಿರ್ಮಲಮಪ್ರಮೇಯಂ ನಿಜಾಂತರಾರೋಪಿತವಿಶ್ವಬಿಂಬಂ.
ನಿಸ್ಸೀಮಕಲ್ಯಾಣಗುಣಾತ್ಮಭೂತಿಂ ನಿಧಿಂ ನಿಧೀನಾಂ ಶರಣಂ ಪ್ರಪದ್ಯೇ.
ತ್ವಕ್ಚರ್ಮಮಾಂಸಾಸ್ಥ್ಯಸೃಗಶ್ರುಮೂತ್ರಶ್ಲೇಷ್ಮಾಂತ್ರವಿಟ್ಚ್ಛುಕ್ಲಸಮುಚ್ಚಯೇಷು.
ದೇಹೇಷ್ವಸಾರೇಷು ನ ಮೇ ಸ್ಪೃಹೈಷಾ ಧ್ರುವಂ ಧ್ರುವಂ ತ್ವಂ ಭಗವನ್ ಪ್ರಸೀದ.
ಗೋವಿಂದ ಕೇಶವ ಜನಾರ್ದನ ವಾಸುದೇವ ವಿಶ್ವೇಶ ವಿಶ್ವ ಮಧುಸೂದನ ವಿಶ್ವರೂಪ.
ಶ್ರೀಪದ್ಮನಾಭ ಪುರುಷೋತ್ತಮ ಪುಷ್ಕರಾಕ್ಷ ನಾರಾಯಣಾಚ್ಯುತ ನೃಸಿಂಹ ನಮೋ ನಮಸ್ತೇ.
ದೇವಾಃ ಸಮಸ್ತಾಮರಯೋಗಿಮುಖ್ಯಾಃ ಗಂಧರ್ವವಿದ್ಯಾಧರಕಿನ್ನರಾಶ್ಚ.
ಯತ್ಪಾದಮೂಲಂ ಸತತಂ ನಮಂತಿ ತಂ ನಾರಸಿಂಹಂ ಶರಣಂ ಪ್ರಪದ್ಯೇ.
ವೇದಾನ್ ಸಮಸ್ತಾನ್ ಖಲು ಶಾಸ್ತ್ರಗರ್ಭಾನ್ ಆಯುಃ ಸ್ಥಿರಂ ಕೀರ್ತಿಮತೀವ ಲಕ್ಷ್ಮೀಂ.
ಯಸ್ಯ ಪ್ರಸಾದಾತ್ ಪುರುಷಾ ಲಭಂತೇ ತಂ ನಾರಸಿಂಹಂ ಶರಣಂ ಪ್ರಪದ್ಯೇ.
ಬ್ರಹ್ಮಾ ಶಿವಸ್ತ್ವಂ ಪುರುಷೋತ್ತಮಶ್ಚ ನಾರಾಯಣೋಽಸೌ ಮರುತಾಂಪತಿಶ್ಚ.
ಚಂದಾರ್ಕವಾವ್ಯಗ್ನಿಮರುದ್ಗಣಾಶ್ಚ ತ್ವಮೇವ ನಾನ್ಯತ್ ಸತತಂ ನತೋಽಸ್ಮಿ.
ಸ್ರಷ್ಟಾ ಚ ನಿತ್ಯಂ ಜಗತಾಮಧೀಶಃ ತ್ರಾತಾ ಚ ಹಂತಾ ವಿಭುರಪ್ರಮೇಯಃ.
ಏಕಸ್ತ್ವಮೇವ ತ್ರಿವಿಧಾ ವಿಭಿನ್ನಃ ತ್ವಾಂ ಸಿಂಹಮೂರ್ತಿಂ ಸತತಂ ನತೋಽಸ್ಮಿ.