ಮೂಷಕ ವಾಹನ ಸ್ತುತಿ
ದೇವರ್ಷಯ ಊಚುಃ .
ನಮಸ್ತೇ ಸ್ತೇಯರೂಪಾಯ ಸರ್ವಹೃತ್ಸ್ಥಾಯ ಧೀಮತೇ .
ಅಂತರ್ಭೋಗಕರಾಯೈವ ಮೂಷಕಾಯ ನಮೋ ನಮಃ ..
ಮಾಯಯಾ ಸ್ತೇಯರೂಪಿಣ್ಯಾ ಮೋಹಯಿತ್ವಾ ಚರಾಚರಂ .
ಚೌರವದ್ಭೋಗಕರ್ತಾ ತ್ವಂ ಚೌರರೂಪಾಯ ತೇ ನಮಃ ..
ಚರಾಚರಮಯಾಯೈವ ಚರಾಚರಧರಾಯ ತೇ .
ಸರ್ವಾಧೀಶಾಯ ಲೋಕಾಯ ಕಾಲಕಾಲಾಯ ತೇ ನಮಃ ..
ಅನಾದಯೇ ಮಹೇಶಾಯ ಚತುರ್ವರ್ಗಪ್ರದಾಯಿನೇ .
ಗಣೇಶವಾಹನಾಯೈವ ಗಣೇಶಧ್ವಜಸಂಸ್ಥಿತ ..
ಸರ್ವತ್ರಗ ಗಣಾಧೀಶಸ್ತ್ವಯಾ ಹೃತ್ಸ್ಥ ನ ಸಂಶಯಃ .
ಚಾಲಕಾತ್ಮಕವೀರ್ಯಂ ಯದ್ಗಣೇಶಸ್ಯ ತ್ವಮಂಜಸಾ ..
ಬ್ರಹ್ಮಾಕಾರಶರೀರಾಯ ಸ್ತೇಯಾನಾಂ ಸ್ವಸ್ವರೂಪಿಣೇ .
ನಮೋ ನಮಃ ಪರೇಶಾಯ ಚತುರ್ಮಯಸ್ವರೂಪಿಣೇ ..
ಚತುರ್ಣಾಂ ಗಣಪಃ ಪಾತಾ ತ್ವಯಾ ತದ್ರೂಪಧಾರಿಣಾ .
ಭವ ವಾಹನಮುಖ್ಯಂ ವೈ ಗಣೇಶಸ್ಯಾಽಧುನಾ ಪ್ರಭೋ ..
ಇತಿ ಸ್ತುತಃ ಪ್ರಸನ್ನಾತ್ಮಾ ಮೂಷಕಸ್ತಾನುವಾಚ ಹ .
ಭವಿಷ್ಯಾಮಿ ಮಹಾಭಾಗಾ ವಾಹನಂ ಗಣಪಸ್ಯ ಚ ..
ಏವಮುಕ್ತ್ವಾ ಗಣೇಶಾನಂ ಪ್ರಭುಂ ತುಷ್ಟಾವ ಲಬ್ಧಧೀಃ .
ಮೂಷಕೋ ದರ್ಶನೇನೈವ ಹರ್ಷಯುಕ್ತೋ ಮಹಾದ್ಯುತಿಃ ..
ಮೂಷಕ ಉವಾಚ .
ದೇವಾಯ ಯೋಗರೂಪಾಯ ನಮೋ ಮೂಷಕಗಾಯ ತೇ .
ಗಣೇಶಾಯ ಪರೇಶಾಯ ಪರಾತ್ಪರತರಾಯ ತೇ ..
ಅನಂತಾಯ ಮಹೇಶಾಯ ಮಹೇಶೈಃ ಸಂಸ್ತುತಾಯ ಚ .
ವಿಘ್ನೇಶಾಯ ಮಹಾವಿಘ್ನಧಾರಿಣೇ ತೇ ನಮೋ ನಮಃ ..
ಅನಂತಸೂನವೇ ತುಭ್ಯಂ ದೈತ್ಯದಾನವಮರ್ದಿನೇ .
ದೇವಾನಾಂ ಪಾಲಕಾಯೈವ ಹೇರಂಬಾಯ ನಮೋ ನಮಃ ..
ಸ್ವಾನಂದವಾಸಿನೇ ತುಭ್ಯಂ ಭಕ್ತಸ್ವಾನಂದದಾಯಿನೇ .
ಬ್ರಹ್ಮಣೇ ಬ್ರಹ್ಮಣಾಂ ಚೈವ ಪತಯೇ ತೇ ನಮೋ ನಮಃ ..
ಚತುರ್ಣಾಂ ಚಾಲಕಾಯೈವ ಚತುಃಸಂಯೋಗಮೂರ್ತಯೇ .
ಚತುರ್ಣಾಂ ಪದದಾತ್ರೇ ತೇ ತೈರ್ಹೀನಾಯ ನಮೋ ನಮಃ ..
ಯೋಗೇಶಯೋಗರೂಪಾಯ ಯೋಗಿಭ್ಯೋ ಯೋಗದಾಯಿನೇ .
ಶಾಂತಿರೂಪಾಯ ವೈ ತುಭ್ಯಂ ಶಾಂತಿದಾಯ ನಮೋ ನಮಃ ..
ಮೂಷಕವಾಹನಾಯೈವ ಮೂಷಕಧ್ವಜಿನೇ ನಮಃ .
ಸಿದ್ಧಿಬುದ್ಧಿಪತೇ ನಾಥ ಭಕ್ತೇಶಾಯ ನಮೋ ನಮಃ ..
ವೇದವಾಕ್ಯಪ್ರಮಾಣೇನ ಮಾಂ ಕುರುಷ್ವ ಗಜಾನನ .
ವಾಹನಂ ಭಕ್ತಿಸಂಯುಕ್ತಂ ಸೇವಾಯೈ ತೇ ನಮೋ ನಮಃ ..
ಇದಂ ಮೂಷಕಗೋ ನಾಮ ಮದೀಯಂ ತು ತ್ವಯಾ ಧೃತಂ .
ಅತೋಽಭೇದಮಯೀಂ ಭಕ್ತಿಂ ದೇಹಿ ನಾಥ ನಮೋ ನಮಃ ..
ಮದೀಯನಾಥರೂಪೇಣ ನಾಮ ತೇ ಚಾಽಭವತ್ ಪ್ರಭೋ .
ತತೋ ಮೂಷಕಗೋ ಭಕ್ತಂ ಮಾಂ ಕುರುಷ್ವ ಮಹಾದ್ಭುತಂ ..
ಏವಂ ಸ್ತುತ್ವಾ ಗಣಾಧೀಶಂ ಪ್ರಣನಾಮ ಸ ದಂಡವತ್ .
ಭಕ್ತಿಸಂಯುತಮುತ್ಥಾಪ್ಯ ಗಣಾಧೀಶೋ ಜಗಾದ ತಂ ..
ಮೂಷಕಗ ಉವಾಚ .
ವಾಹನಂ ಮೇ ಸದಾ ಸಾಧೋ ಭವಿಷ್ಯಸಿ ಮಹಾಮತೇ .
ಮದೀಯಾ ಭಕ್ತಿರತ್ಯಂತಂ ಸುದೃಢಾ ತೇ ಭವಿಷ್ಯತಿ ..
ತ್ವಯಾ ಕೃತಮಿದಂ ಸ್ತೋತ್ರಂ ಮದೀಯಂ ಭಕ್ತಿದಂ ಭವೇತ್ .
ಧರ್ಮಾರ್ಥಕಾಮಮೋಕ್ಷಾಣಾಂ ದಾಯಕಂ ಸರ್ವದಂ ಪರಂ ..
ಪಠತೇ ಶೃಣ್ವತೇ ಚೈತತ್ ಪುತ್ರಪೌತ್ರಾದಿಕಪ್ರದಂ .
ಯದ್ಯದಿಚ್ಛತಿ ತತ್ತದ್ವೈ ಸಫಲಂ ಪ್ರಭವಿಷ್ಯತಿ ..
ಅನ್ಯತ್ತ್ವಂ ಶೃಣು ಮೇ ವಾಕ್ಯಂ ದೇವೈರ್ವಿಪ್ರೈಃ ಕೃತಂ ಮಹತ್ .
ಸ್ತವನಂ ಸರ್ವಮಾನ್ಯಂ ತೇ ಭವಿಷ್ಯತಿ ನ ಸಂಶಯಃ ..
ಯಸ್ತ್ವಾಂ ಸ್ತೋಷ್ಯತಿ ಚೌರೇಶಸ್ತೋತ್ರೇಣಾನೇನ ಮಾನವಃ .
ಸ ಸರ್ವಂ ಲಭತೇ ನಿತ್ಯಮೀಪ್ಸಿತಂ ನಾಽತ್ರ ಸಂಶಯಃ ..
ಅಂತೇ ಸ್ವಾನಂದಗೋ ಭೂತ್ವಾ ಬ್ರಹ್ಮಭೂತೋ ಭವಿಷ್ಯತಿ .
ಮದೀಯಕೃಪಯಾ ಸೋಽಪಿ ತ್ವತ್ಸಮೋ ಮೇ ಪ್ರಿಯೋ ಭವೇತ್ ..
Other stotras
