అకారార్థో విష్ణుర్జగదుదయరక్షాప్రలయకృన్-
మకారార్థో జీవస్తదుపకరణం వైష్ణవమిదం .
ఉకారోఽనన్యర్హం నియమయతి సంబంధమనయో-
స్త్రయీసారస్త్ర్యాత్మా ప్రణవ ఇమమర్థం సమదిశత్ ..1..
మంత్రబ్రహ్మణి మధ్యమేన నమసా పుంసఃస్వరూపంగతి-
ర్గమ్యం శిక్షితమీక్షితేన పురతఃపశ్చాదపి స్థానతః .
స్వాతంత్ర్యం నిజరక్షణం సముచితా వృత్తిశ్చ నాన్యోచితా
తస్యైవేతి హరేర్వివిచ్య కథితం స్వస్యాపి నార్హం తతః ..2..
అకారార్థాయైవస్వమహమథ మహ్యం న నివహాః
నరాణాం నిత్యానామయనమితి నారాయణపదం .
యమాహాస్మై కాలం సకలమపి సర్వత్ర సకలా-
స్వవస్థాస్వావిః స్యుర్మమ సహజకైంకర్యవిధయః ..3..
దేహాసక్తాత్మబుద్ధిర్యది భవతి పదం సాధు విద్యాత్తృతీయం
స్వాతంత్ర్యాంధో యది స్యాత్ప్రథమమితరశేషత్వధీశ్చేద్ ద్వితీయం .
ఆత్మత్రాణోన్ముఖశ్చేన్నమ ఇతి చ పదం బాంధవాభాసలోలః
శబ్దం నారాయణాఖ్యం విషయచపలధీశ్చేచ్చతుర్థీం ప్రపన్నః ..4..
నేతృత్వం నిత్యయోగం సముచితగుణజాతం తనుఖ్యాపనంచో-
పాయం కర్త్తవ్యభాగం త్వథ మిథునపరం ప్రాప్యమేవం ప్రసిద్ధం .
స్వామిత్వం ప్రార్థనాం చ ప్రబలతరవిరోధిప్రహాణం దశైతాన్
మంతారం త్రాయతే చేత్యధిగతనియమః షట్పదోఽయం ద్విఖండః ..5..
ఈశానాంజగతామధీశదయితాం నిత్యానపాయాం శ్రియం
సంశ్రిత్యాశ్రయణోచితాఖిలగుణస్యాంఘ్రీ హరేరాశ్రయే .
ఇష్టోపాయతయా శ్రియా చ సహితాయాత్మేశ్వరాయార్థయే
కర్తుం దాస్యమశేషమప్రతిహతం నిత్యం త్వహం నిర్మమః ..6..
మత్ప్రాప్త్యర్థతయా మయోక్తమఖిలం సంత్యజ్య ధర్మం పునః
మామేకం మదవాప్తయే శమణమిత్యార్తోఽవసాయం కురు .
త్వామేకం వ్యవసాయయుక్తమఖిలజ్ఞానాదిపూర్ణో హ్యహం
మత్ప్రాప్తిప్రతిబంధకైర్విరహితం కుర్యాం శుచం మా కృథాః ..7..
నిశ్చిత్య త్వదధీనతాం మయి సదా కర్మాద్యుపాయాన్ హరే
కర్తుం త్యక్తుమపి ప్రపత్తుమనలం సీదామి దుఃఖాకులః .
ఏతజ్జ్ఞానముపేయుషో మమ పునస్సర్వాపరాధక్షయం
కర్తాసీతి దృఢోఽస్మి తే తు చరమం వాక్యం స్మరన్సారథేః ..8..
శాఖానాముపరి స్థితేన మనునా మూలేన లబ్ధాత్మకః
సత్తాహేతుసకృజ్జపేన సకలం కాలం ద్వయేన క్షిపన్ .
వేదోత్తంసవిహారసారథిదయాగుంఫేన విస్త్రంభితః
సారజ్ఞో యది కశ్చిదస్తి భువనే నాథః స యూథస్య నః ..9..
శివ తాండవ స్తోత్రం
జటాటవీగలజ్జల- ప్రవాహపావితస్థలే గలేఽవలంబ్య లంబితాం భుజ....
Click here to know more..వేంకటేశ మంగల అష్టక స్తోత్రం
జంబూద్వీపగశేషశైలభువనః శ్రీజానిరాద్యాత్మజః తార్క్ష్య....
Click here to know more..శివుని అనుగ్రహం కోసం మంత్రం
తత్పురుషాయ విద్మహే మహాదేవాయ ధీమహి తన్నో రుద్రః ప్రచోదయ....
Click here to know more..