చక్రధర స్తోత్రం
సూత ఉవాచ.
వక్ష్యేఽహమచ్యుతస్తోత్రం శృణు శౌనక సర్వదం .
బ్రహ్మా పృష్టో నారదాయ యథోవాచ తథాపరం.
నారద ఉవాచ.
యథాక్షయోఽవ్యయో విష్ణుః స్తోతవ్యో వరదో మయా.
ప్రత్యహం చార్చనాకాలే తథా త్వం వక్తుమర్హసి.
తే ధన్యాస్తే సుజన్మానస్తే హి సర్వసుఖప్రదాః.
సఫలం జీవితం తేషాం యే స్తువంతి సదాచ్యుతం.
బ్రహ్మోవాచ.
మునే స్తోత్రం ప్రవక్ష్యామిః వాసుదేవస్య ముక్తిదం.
శృణు యేన స్తుతః సమ్యక్పూజాకాలే ప్రసీదతి.
ఓం నమో భగవతే వాసుదేవాయ నమః సర్వపాపహారిణే.
నమో విశుద్ధదేహాయ నమో జ్ఞానస్వరూపిణే.
నమః సర్వసురేశాయ నమః శ్రీవత్సధారిణే.
నమశ్చర్మాసిహస్తాయ నమః పంకజమాలినే.
నమో విశ్వప్రతిష్ఠాయ నమః పీతాంబరాయ చ.
నమో నృసింహరూపాయ వైకుంఠాయ నమో నమః.
నమః పంకజనాభాయ నమః క్షీరోదశాయినే.
నమః సహస్రశీర్షాయ నమో నాగాంగశాయినే.
నమః పరశుహస్తాయ నమః క్షత్త్రాంతకారిణే.
నమః సత్యప్రతిజ్ఞాయ హ్యజితాయ నమో నమః.
నమస్త్రై లోక్యనాథాయ నమశ్చక్రధారయ చ.
నమః శివాయ సూక్ష్మాయ పురాణాయ నమో నమః.
నమో వామనరూపాయ బలిరాజ్యాపహారిణే.
నమో యజ్ఞవరాహాయ గోవిందాయ నమో నమః.
నమస్తే పరమానంద నమస్తే పరమాక్షర.
నమస్తే జ్ఞానసద్భావ నమస్తే జ్ఞానదాయక.
నమస్తే పరమాద్వైత నమస్తే పురుషోత్తమ.
నమస్తే విశ్వకృద్దేవ నమస్తే విశ్వభావన.
నమస్తేఽస్తు విశ్వనాథ నమస్తే విశ్వకారణ.
నమస్తే మధుదైత్యఘ్న నమస్తే రావణాంతక.
నమస్తే కంసకేశిఘ్న నమస్తే కైటభార్దన.
నమస్తే శతపత్రాక్ష నమస్తే గరుడధ్వజ.
నమస్తే కాలనేమిఘ్న నమస్తే గరుడాసన.
నమస్తే దేవకీపుత్ర నమస్తే వృష్ణినందన.
నమస్తే రుక్మిణీకాంత నమస్తే దితినందన.
నమస్తే గోకులావాస నమస్తే గోకులప్రియ.
జయ గోపవపుః కృష్ణ జయ గోపీజనప్రియ.
జయ గోవర్ధనాధార జయ గోకులవర్ధన.
జయ రావణవీరఘ్న జయ చాణూరనాశన.
జయ వృష్ణికులోద్ద్యోత జయ కాలీయమర్దన.
జయ సత్య జగత్సాక్షిన్జయ సర్వార్థసాధక.
జయ వేదాంతవిద్వేద్య జయ సర్వద మాధవ.
జయ సర్వాశ్రయావ్యక్త జయ సర్వగ మాధవ.
జయ సూక్ష్మచిదాందన జయ చిత్తనిరంజన.
జయస్తేఽస్తు నిరాలంబ జయ శాంత సనాతన.
జయ నాథ జగత్పుష్ట జయ విష్ణో నమోఽస్తూతే.
త్వం గురుస్త్వం హరే శిష్యస్త్వం దీక్షామంత్రమండలం.
త్వం న్యాసముద్రాసమయాస్త్వం చ పుష్పాదిసాధనం.
త్వమాధారస్త్వ హ్యనంతస్త్వం కూర్మస్త్వం ధరాంబుజం.
ధర్మజ్ఞానాదయస్త్వం హి వేదిమండలశక్తయః.
త్వం ప్రభో ఛలభృద్రామస్త్వం పునః స ఖరాంతకః.
త్వం బ్రహ్మర్షిశ్చదేవస్త్వం విష్ణుః సత్యపరాక్రమః.
త్వం నృసింహః పరానందో వరాహస్త్వం ధరాధరః.
త్వం సుపర్ణస్తథా చక్రం త్వం గదా శంఖ ఏవ చ.
త్వం శ్రీః ప్రభో త్వం ముష్టిసత్వం త్వం మాలా దేవ శాశ్వతీ.
శ్రీవత్సః కౌస్తుభస్త్వం హి శార్ఙ్గీ త్వం చ తథేషుధిః.
త్వం ఖడ్గచర్మణా సార్ధం త్వం దిక్పాలాస్తథా ప్రభో.
త్వం వేధాస్త్వం విధాతా చ త్వం యమస్త్వం హుతాశనః.
త్వం ధనేశస్త్వమీశానస్త్వమింద్రస్త్వమపాం పతిః.
త్వం రక్షోఽధిపతిః సాధ్యస్త్వం వాయుస్త్వం నిశాకరః.
ఆదిత్యా వసవో రుద్రా అశ్వినౌ త్వం మరుద్గణాః.
త్వం దైత్యా దానవా నాగాస్త్వం యక్షా రాక్షసాః ఖగాః.
గంధర్వాప్సరసః సిద్ధాః పితరస్త్వం మహామరాః.
భూతాని విషయస్త్వం హి త్వమవ్యక్తేంద్రియాణి చ.
మనోబుద్ధిరహంకారః క్షేత్రజ్ఞస్త్వం హృదీశ్వరః.
త్వం యజ్ఞస్త్వం వషట్కారస్త్వమోంకారః సమిత్కుశః.
త్వం వేదీ త్వం హరే దీక్షా త్వం యూపస్త్వం హుతాశనః.
త్వం పత్నీ త్వం పురోడాశస్త్వం శాలా స్త్రుక్చ త్వం స్తువః.
గ్రావాణః సకలం త్వం హి సదస్యాస్త్వం సదాక్షిణః.
త్వం సూర్పాదిస్త్వం చ బ్రహ్మా ముసలోలూఖలే ధ్రువం.
త్వం హోతా యజమానస్త్వం త్వం ధాన్యం పశుయాజకః.
త్వమధ్వర్యుస్త్వముద్గాతా త్వం యజ్ఞః పురుషోత్తమః.
దిక్పాతాలమహి వ్యోమ ద్యౌస్త్వం నక్షత్రకారకః.
దేవతిర్యఙ్మనుష్యేషు జగదేతచ్చరాచరం.
యత్కించిద్దృశ్యతే దేవ బ్రహ్మాండమఖిలం జగత్.
తవ రూపమిదం సర్వం దృష్ట్యర్థం సంప్రకాశితం.
నాథయంతే పరం బ్రహ్మ దైవేరపి దురాసదం.
కస్తజ్జానాతి విమలం యోగగమ్యమతీంద్రియం.
అక్షయం పురుషం నిత్యమవ్యక్తమజమవ్యయం.
ప్రలయోత్పత్తిరహితం సర్వవ్యాపినమీశ్వరం.
సర్వజ్ఞం నిర్గుణం శుద్ధమానందమజరం పరం.
బోధరూపం ధ్రువం శాంతం పూర్ణమద్వైతమక్షయం.
అవతారేషు యా మూర్తిర్విదూరే దేవ దృశ్యతే.
పరం భావమజానంతస్త్వాం భజంతి దివౌకసః.
కథం త్వామీదృశం సూక్ష్మం శక్నోమి పురుషోత్తమ.
అరాధయితుమీశాన మనోగమ్యమగోచరం.
ఇహ యన్మండలే నాథ పూజ్యతే విధివత్క్రమైః.
పుష్పధూపాదిభిర్యత్ర తత్ర సర్వా విభూతయః.
సంకర్షణాదిభేదేన తవ యత్పూజితా మయా.
క్షంతుమర్హసి తత్సర్వం యత్కృతం న కృతం మయా.
న శక్నోమి విభో సమ్యక్కర్తుం పూజాం యథోదితాం.
యత్కృతం జపహోమాది అసాధ్యం పురుషోత్తమ.
వినిష్పాదయితుం భక్త్యా అత స్త్వాం క్షమయామ్యహం.
దివా రాత్రౌ చ సంధ్యాయాం సర్వావస్థాసు చేష్టతః.
అచలా తు హరే భక్తిస్తవాంఘ్రియుగలే మమ.
శరీరేణ తథా ప్రీతిర్న చ ధర్మాదికేషు చ.
యథా త్వయి జగన్నాథ ప్రీతిరాత్యంతికీ మమ.
కిం తేన న కృతం కర్మ స్వర్గమోక్షాదిసాధనం.
యస్య విష్ణౌ దృఢా భక్తిః సర్వకామఫలప్రదే.
పూజాం కర్తుం తథా స్తోత్రం కః శక్నోతి తవాచ్యుత.
స్తుతం తు పూజితం మేఽద్య తత్క్షమస్వ నమోఽస్తు తే.
ఇతి చక్రధరస్తోత్రం మయా సమ్యగుదాహృతం.
స్తౌహి విష్ణుం మునే భక్త్యా యదీచ్ఛసి పరం పదం.
స్తోత్రేణానేన యః స్తౌతి పూజాకాలే జగద్గురుం.
అచిరాల్లభతే మోక్షం ఛిత్వా సంసారబంధనం.
అన్యోఽపి యో జపేద్భక్త్యా త్రిసంధ్యం నియతః శుచిః.
ఇదం స్తోత్రం మునే సోఽపి సర్వకామమవాప్నుయాత్.
పుత్రార్థీ లభతే పుత్రాన్బద్ధో ముచ్యేత బంధనాత్.
రోగాద్విముచ్యతే రాగీ లభతే నిర్ధనో ధనం.
విద్యార్థో లభతే విద్యాం భాగ్యం కీర్తిం చ విందతి.
జాతి స్మరత్వం మేధావీ యద్యదిచ్ఛతి చేతసా.
స ధన్యః సర్వవిత్ప్రాజ్ఞః స సాధుః సర్వకర్మకృత్.
స సత్యవాక్యశ్ఛుచిర్దాతా యః స్తౌతి పురుషోత్తమం.
అసంభాష్యా హి తే సర్వే సర్వధర్మబహిష్కృతాః.
యేషాం ప్రవర్తనే నాస్తి హరిముద్దిశ్య సత్క్రియా.
న శుద్ధం విద్యతే తస్య మనో వాక్చ దురాత్మనః.
యస్య సర్వార్థదే విష్ణౌ భక్తిర్నావ్యభిచారిణీ.
ఆరాధ్య విధివద్దేవం హరిం సర్వసుఖప్రదం.
ప్రాప్నోతి పురుషః సమ్యగ్యద్యత్ప్రార్థయతే ఫలం.
కర్మ కామాదికం సర్వం శ్రద్ధధానః సురోత్తమః.
అసురాదివపుః సిద్ధైర్దేయతే యస్య నాంతరం.
సకలమునిభిరాద్యశ్చింత్యతే యో హి శుద్ధో
నిఖిలహృది నివిష్టో వేత్తి యః సర్వసాక్షీ.
తమజమమృతమీశం వాసుదేవం నతోఽస్మి
భయమరణవిహీనం నిత్యమానందరూపం.
నిఖిలభువననాథం శాశ్వతం సుప్రసన్నం
త్వతివిమలవిశుద్ధం నిర్గుణం భావపుష్పైః.
సుఖముదితసమస్తం పూజయామ్యాత్మభావం
విశతు హృదయపద్మే సర్వసాక్షీ చిదాత్మా.
ఏవం మయోక్తం పరమప్రభావమాద్యంతహీనస్య పరస్య విష్ణోః.
తస్మాద్విచింత్యః పరమేశ్వరోఽసౌ విముక్తికామేన నరేణ సమ్యక్.
బోధస్వరూపం పురుషం పురాణమాదిత్యవర్ణం విమలం విశుద్ధం.
సంచింత్య విష్ణుం పరమద్వితీయం కస్తత్ర యోగీ న లంయ ప్రయాతి.
ఇమం స్తవం యః సతతం మనుష్యః పఠేచ్చ తద్వత్ప్రయతః ప్రశాంతః.
స ధూతపాప్మా వితతప్రభావః ప్రయాతి లోకం వితతం మురారేః.
యః ప్రార్థయత్యర్థమశేషసౌఖ్యం ధర్మం చ కామం చ తథైవ మోక్షం.
స సర్వముత్సృజ్య పరం పురాణం ప్రయాతి విష్ణుం శరణం వరేణ్యం.
విభుం ప్రభుం విశ్వధరం విశుద్ధమశేషసంసారవినాశహేతుం.
యో వాసుదేవం విమలం ప్రపన్నః స మోక్షమాప్నోతి విముక్తసంగః.
Other stotras
