విశ్వేశ స్తోత్రం

నమామి దేవం విశ్వేశం వామనం విష్ణురూపిణం .
బలిదర్పహరం శాంతం శాశ్వతం పురుషోత్తమం ..

ధీరం శూరం మహాదేవం శంఖచక్రగదాధరం .
విశుద్ధం జ్ఞానసంపన్నం నమామి హరిమచ్యుతం ..

సర్వశక్తిమయం దేవం సర్వగం సర్వభావనం .
అనాదిమజరం నిత్యం నమామి గరుడధ్వజం ..

సురాసురైర్భక్తిమద్భిః స్తుతో నారాయణః సదా .
పూజితం చ హృషీకేశం తం నమామి జగద్గురుం ..

హృది సంకల్ప్య యద్రూపం ధ్యాయంతి యతయః సదా .
జ్యోతీరూపమనౌపమ్యం నరసింహం నమామ్యహం ..

న జానంతి పరం రూపం బ్రహ్మాద్యా దేవతాగణాః .
యస్యావతారరూపాణి సమర్చంతి నమామి తం ..

ఏతత్సమస్తం యేనాదౌ సృష్టం దుష్టవధాత్పునః .
త్రాతం యత్ర జగల్లీనం తం నమామి జనార్దనం ..

భక్తైరభ్యర్చితో యస్తు నిత్యం భక్తప్రియో హి యః .
తం దేవమమలం దివ్యం ప్రణమామి జగత్పతిం ..

దుర్లభం చాపి భక్తానాం యః ప్రయచ్ఛతి తోషితః .
తం సర్వసాక్షిణం విష్ణుం ప్రణమామి సనాతనం ..

Ramaswamy Sastry and Vighnesh Ghanapaathi

Other stotras