అనంత కృష్ణ అష్టకం

శ్రీభూమినీలాపరిసేవ్యమానమనంతకృష్ణం వరదాఖ్యవిష్ణుం.
అఘౌఘవిధ్వంసకరం జనానామఘంహరేశం ప్రభజే సదాఽహం.
తిష్ఠన్ స్వధిష్ణ్యే పరితో విపశ్యన్నానందయన్ స్వానభిరామమూర్త్యా.
యోఽఘంహరగ్రామజనాన్ పునీతే హ్యనంతకృష్ణం వరదేశమీడే.
భక్తాన్ జనాన్ పాలనదక్షమేకం విభుం శ్రియాఽఽశ్లిష్యతనుం మహాంతం.
సుపర్ణపక్షోపరిరోచమానమనంతకృష్ణం వరదేశమీడే.
సూర్యస్య కాంత్యా సదృశైర్విరాజద్రత్నైః సమాలంకృతవేషభూషం.
తమో వినాశాయ ముహుర్ముహుస్త్వామనంతకృష్ణం వరదేశమీడే.
అనంతసంసారసముద్రతారనౌకాయితం శ్రీపతిమాననాబ్జం.
అనంతభక్తైః పరిదృశ్యమానమనంతకృష్ణం వరదేశమీడే.
నమంతి దేవాః సతతం యమేవ కిరీటినం గదినం చక్రిణం తం.
వైఖానసైః సూరిభిరర్చయంతమనంతకృష్ణం వరదేశమీడే.
తనోతి దేవః కృపయా వరాన్ యశ్చిరాయుషం భూతిమనన్యసిద్ధిం.
తం దేవదేవం వరదానదక్షమనంతకృష్ణం వరదేశమీడే.
కృష్ణం నమస్కృత్య మహామునీంద్రాః స్వానందతుష్టా విగతాన్యవాచః.
తం స్వానుభూత్యై భవపాద్మవంద్యమనంతకృష్ణం వరదేశమీడే.
అనంతకృష్ణస్య కృపావలోకాదఘంహరగ్రామజదీక్షితేన.
సుసూక్తిమాలాం రచితాం మనోజ్ఞాం గృహ్ణాతు దేవో వరదేశవిష్ణుః.