രാഹു കവചം
ഓം അസ്യ ശ്രീരാഹുകവചസ്തോത്രമന്ത്രസ്യ. ചന്ദ്രമാ-ഋഷിഃ.
അനുഷ്ടുപ് ഛന്ദഃ. രാഹുർദേവതാ. രാം ബീജം. നമഃ ശക്തിഃ.
സ്വാഹാ കീലകം. രാഹുകൃതപീഡാനിവാരണാർഥേധനധാന്യായുരാരോഗ്യാദിസമൃദ്ധിപ്രാപ്തയർഥേ ജപേ വിനിയോഗഃ.
പ്രണമാമി സദാ രാഹും ശൂർപാകാരം കിരീടിനം.
സൈംഹികേയം കരാലാസ്യം ലോകാനാമഭയപ്രദം.
നീലാംബരഃ ശിരഃ പാതു ലലാടം ലോകവന്ദിതഃ.
ചക്ഷുഷീ പാതു മേ രാഹുഃ ശ്രോത്രേ ത്വർധശരീരവാൻ.
നാസികാം മേ ധൂമ്രവർണഃ ശൂലപാണിർമുഖം മമ.
ജിഹ്വാം മേ സിംഹികാസൂനുഃ കണ്ഠം മേ കഠിനാംഘ്രികഃ.
ഭുജംഗേശോ ഭുജൗ പാതു നീലമാല്യാംബരഃ കരൗ.
പാതു വക്ഷഃസ്ഥലം മന്ത്രീ പാതു കുക്ഷിം വിധുന്തുദഃ.
കടിം മേ വികടഃ പാതു ചോരൂ മേ സുരപൂജിതഃ.
സ്വർഭാനുർജാനുനീ പാതു ജംഘേ മേ പാതു ജാഡ്യഹാ.
ഗുൽഫൗ ഗ്രഹപതിഃ പാതു പാദൗ മേ ഭീഷണാകൃതിഃ.
സർവാണ്യംഗാനി മേ പാതു നീലചന്ദനഭൂഷണഃ.
രാഹോരിദം കവചമൃദ്ധിദവസ്തുദം യോ
ഭക്ത്യാ പഠത്യനുദിനം നിയതഃ ശുചിഃ സൻ.
പ്രാപ്നോതി കീർതിമതുലാം ശ്രിയമൃദ്ധിമായു-
രാരോഗ്യമാത്മവിജയം ച ഹി തത്പ്രസാദാത്.
Other stotras
