ರಾಹು ಕವಚ

ಓಂ ಅಸ್ಯ ಶ್ರೀರಾಹುಕವಚಸ್ತೋತ್ರಮಂತ್ರಸ್ಯ. ಚಂದ್ರಮಾ-ಋಷಿಃ.
ಅನುಷ್ಟುಪ್ ಛಂದಃ. ರಾಹುರ್ದೇವತಾ. ರಾಂ ಬೀಜಂ. ನಮಃ ಶಕ್ತಿಃ.
ಸ್ವಾಹಾ ಕೀಲಕಂ. ರಾಹುಕೃತಪೀಡಾನಿವಾರಣಾರ್ಥೇಧನಧಾನ್ಯಾಯುರಾರೋಗ್ಯಾದಿಸಮೃದ್ಧಿಪ್ರಾಪ್ತಯರ್ಥೇ ಜಪೇ ವಿನಿಯೋಗಃ.
ಪ್ರಣಮಾಮಿ ಸದಾ ರಾಹುಂ ಶೂರ್ಪಾಕಾರಂ ಕಿರೀಟಿನಂ.
ಸೈಂಹಿಕೇಯಂ ಕರಾಲಾಸ್ಯಂ ಲೋಕಾನಾಮಭಯಪ್ರದಂ.
ನೀಲಾಂಬರಃ ಶಿರಃ ಪಾತು ಲಲಾಟಂ ಲೋಕವಂದಿತಃ.
ಚಕ್ಷುಷೀ ಪಾತು ಮೇ ರಾಹುಃ ಶ್ರೋತ್ರೇ ತ್ವರ್ಧಶರೀರವಾನ್.
ನಾಸಿಕಾಂ ಮೇ ಧೂಮ್ರವರ್ಣಃ ಶೂಲಪಾಣಿರ್ಮುಖಂ ಮಮ.
ಜಿಹ್ವಾಂ ಮೇ ಸಿಂಹಿಕಾಸೂನುಃ ಕಂಠಂ ಮೇ ಕಠಿನಾಂಘ್ರಿಕಃ.
ಭುಜಂಗೇಶೋ ಭುಜೌ ಪಾತು ನೀಲಮಾಲ್ಯಾಂಬರಃ ಕರೌ.
ಪಾತು ವಕ್ಷಃಸ್ಥಲಂ ಮಂತ್ರೀ ಪಾತು ಕುಕ್ಷಿಂ ವಿಧುಂತುದಃ.
ಕಟಿಂ ಮೇ ವಿಕಟಃ ಪಾತು ಚೋರೂ ಮೇ ಸುರಪೂಜಿತಃ.
ಸ್ವರ್ಭಾನುರ್ಜಾನುನೀ ಪಾತು ಜಂಘೇ ಮೇ ಪಾತು ಜಾಡ್ಯಹಾ.
ಗುಲ್ಫೌ ಗ್ರಹಪತಿಃ ಪಾತು ಪಾದೌ ಮೇ ಭೀಷಣಾಕೃತಿಃ.
ಸರ್ವಾಣ್ಯಂಗಾನಿ ಮೇ ಪಾತು ನೀಲಚಂದನಭೂಷಣಃ.
ರಾಹೋರಿದಂ ಕವಚಮೃದ್ಧಿದವಸ್ತುದಂ ಯೋ
ಭಕ್ತ್ಯಾ ಪಠತ್ಯನುದಿನಂ ನಿಯತಃ ಶುಚಿಃ ಸನ್.
ಪ್ರಾಪ್ನೋತಿ ಕೀರ್ತಿಮತುಲಾಂ ಶ್ರಿಯಮೃದ್ಧಿಮಾಯು-
ರಾರೋಗ್ಯಮಾತ್ಮವಿಜಯಂ ಚ ಹಿ ತತ್ಪ್ರಸಾದಾತ್.

Ramaswamy Sastry and Vighnesh Ghanapaathi

Other stotras