Chandramouli Dashakam

सदा मुदा मदीयके मनःसरोरुहान्तरे
विहारिणेऽघसञ्चयं विदारिणे चिदात्मने।
निरस्ततोय- तोयमुङ्निकाय- कायशोभिने
नमः शिवाय साम्बशङ्कराय चन्द्रमौलये।
नमो नमोऽष्टमूर्तये नमो नमानकीर्तये
नमो नमो महात्मने नमः शुभप्रदायिने।
नमो दयार्द्रचेतसे नमोऽस्तु कृत्तिवाससे
नमः शिवाय साम्बशङ्कराय चन्द्रमौलये।
पितामहाद्यवेद्यक- स्वभावकेवलाय ते
समस्तदेववासवादि- पूजिताङ्घ्रिशोभिने।
भवाय शक्ररत्नसद्गल- प्रभाय शूलिने
नमः शिवाय साम्बशङ्कराय चन्द्रमौलये।
शिवोऽहमस्मि भावये शिवं शिवेन रक्षितः
शिवस्य पूर्णवर्चसः समर्चये पदद्वयम् ।
शिवात्परं न विद्यते शिवे जगत् प्रवर्तये
नमः शिवाय साम्बशङ्कराय चन्द्रमौलये।
मरन्दतुन्दिलारविन्द- सुन्दरस्मिताननो-
न्मिलन्मिलिन्दववृन्द- नीलनीलकुन्तलां शिवाम्।
कलाकलापसारिणीं शिवां च वीक्ष्य तोषिणे
नमः शिवाय साम्बशङ्कराय चन्द्रमौलये।
शिवाननारविन्द- सन्मिलिन्दभावभाङ्मनो-
विनोदिने दिनेशकोटि- कोटिदीप्ततेजसे ।
स्वसेवलोकसादराव- लोकनैकवर्तिने
नमः शिवाय साम्बशङ्कराय चन्द्रमौलये।
जटातटीलुठद्वियद्धुनी- धलद्धलध्वन-
द्घनौघगर्जितोत्थबुद्धि- सम्भ्रमच्छिखण्डिने।
विखण्डितारिमण्डल- प्रचण्डदोस्त्रिशूलिने
नमः शिवाय साम्बशङ्कराय चन्द्रमौलये।
प्रहृष्टहृष्टतुष्टपुष्ट- दिष्टविष्टपाय सं-
नमद्विशिष्टभक्त- विष्टराप्तयेऽष्टमूर्तये।
विदायिने धनाधिनाथसाधु- सख्यदायिने
नमः शिवाय साम्बशङ्कराय चन्द्रमौलये।
अखर्वगर्वदोर्विजृम्भ- दम्भकुम्भदानव-
च्छिदासदाध्वन- त्पिनाकहारिणे विहारिणे।
सुहृत्सुहृत्सुहृत्सुहृत्सु- हृत्स्मयापहारिणे
नमः शिवाय साम्बशङ्कराय चन्द्रमौलये।
अखण्डदण्डबाहुदण्ड- दण्डितोग्रडिण्डिम-
प्रधिं धिमिन्धिमिन्धिमिन्ध्वनि- क्रमोत्थताण्डवम्।
अखण्डवैभवाहि- नाथमण्डितं चिदम्बरं
नमः शिवाय साम्बशङ्कराय चन्द्रमौलये।

sadaa mudaa madeeyake manah'saroruhaantare
vihaarine'ghasanchayam vidaarine chidaatmane.
nirastatoya- toyamungnikaaya- kaayashobhine
namah' shivaaya saambashankaraaya chandramaulaye.
namo namo'sht'amoortaye namo namaanakeertaye
namo namo mahaatmane namah' shubhapradaayine.
namo dayaardrachetase namo'stu kri'ttivaasase
namah' shivaaya saambashankaraaya chandramaulaye.
pitaamahaadyavedyaka- svabhaavakevalaaya te
samastadevavaasavaadi- poojitaanghrishobhine.
bhavaaya shakraratnasadgala- prabhaaya shooline
namah' shivaaya saambashankaraaya chandramaulaye.
shivo'hamasmi bhaavaye shivam shivena rakshitah'
shivasya poornavarchasah' samarchaye padadvayam .
shivaatparam na vidyate shive jagat pravartaye
namah' shivaaya saambashankaraaya chandramaulaye.
marandatundilaaravinda- sundarasmitaanano-
nmilanmilindavavri'nda- neelaneelakuntalaam shivaam.
kalaakalaapasaarineem shivaam cha veekshya toshine
namah' shivaaya saambashankaraaya chandramaulaye.
shivaananaaravinda- sanmilindabhaavabhaangmano-
vinodine dineshakot'i- kot'ideeptatejase .
svasevalokasaadaraava- lokanaikavartine
namah' shivaaya saambashankaraaya chandramaulaye.
jat'aatat'eelut'hadviyaddhunee- dhaladdhaladhvana-
dghanaughagarjitotthabuddhi- sambhramachchhikhand'ine.
vikhand'itaarimand'ala- prachand'adostrishooline
namah' shivaaya saambashankaraaya chandramaulaye.
prahri'sht'ahri'sht'atusht'apusht'a- disht'avisht'apaaya sam-
namadvishisht'abhakta- visht'araaptaye'sht'amoortaye.
vidaayine dhanaadhinaathasaadhu- sakhyadaayine
namah' shivaaya saambashankaraaya chandramaulaye.
akharvagarvadorvijri'mbha- dambhakumbhadaanava-
chchhidaasadaadhvana- tpinaakahaarine vihaarine.
suhri'tsuhri'tsuhri'tsuhri'tsu- hri'tsmayaapahaarine
namah' shivaaya saambashankaraaya chandramaulaye.
akhand'adand'abaahudand'a- dand'itograd'ind'ima-
pradhim dhimindhimindhimindhvani- kramotthataand'avam.
akhand'avaibhavaahi- naathamand'itam chidambaram
namah' shivaaya saambashankaraaya chandramaulaye.

Ramaswamy Sastry and Vighnesh Ghanapaathi

Other stotras