रमापति अष्टक स्तोत्र
जगदादिमनादिमजं पुरुषं शरदम्बरतुल्यतनुं वितनुम्।
धृतकञ्जरथाङ्गगदं विगदं प्रणमामि रमाधिपतिं तमहम्।
कमलाननकञ्जरतं विरतं हृदि योगिजनैः कलितं ललितम्।
कुजनैः सुजनैरलभं सुलभं प्रणमामि रमाधिपतिं तमहम्।
मुनिवृन्दहृदिस्थपदं सुपदं निखिलाध्वरभागभुजं सुभुजम्।
हृतवासवमुख्यमदं विमदं प्रणमामि रमाधिपतिं तमहम्।
हृतदानवदृप्तबलं सुबलं स्वजनास्तसमस्तमलं विमलम्।
समपास्त गजेन्द्रदरं सुदरं प्रणमामि रमाधिपतिं तमहम्।
परिकल्पितसर्वकलं विकलं सकलागमगीतगुणं विगुणम्।
भवपाशनिराकरणं शरणं प्रणमामि रमाधिपतिं तमहम्।
मृतिजन्मजराशमनं कमनं शरणागतभीतिहरं दहरम्।
परितुष्टरमाहृदयं सुदयं प्रणमामि रमाधिपतिं तमहम्।
सकलावनिबिम्बधरं स्वधरं परिपूरितसर्वदिशं सुदृशम्।
गतशोकमशोककरं सुकरं प्रणमामि रमाधिपतिं तमहम्।
मथितार्णवराजरसं सरसं ग्रथिताखिललोकहृदं सुहृदम्।
प्रथिताद्भुतशक्तिगणं सुगणं प्रणमामि रमाधिपतिं तमहम्।
सुखराशिकरं भवबन्धहरं परमाष्टकमेतदनन्यमतिः।
पठतीह तु योऽनिशमेव नरो लभते खलु विष्णुपदं स परम्।
Recommended for you
वेंकटेश ऋद्धि स्तव
श्रीमन्वृषभशैलेश वर्धतां विजयी भवान्। दिव्यं त्वदीयमै....
Click here to know more..राम पंचरत्न स्तोत्र
योऽत्रावतीर्य शकलीकृत- दैत्यकीर्ति- र्योऽयं च भूसुरवरा....
Click here to know more..नारायण सूक्त
सहस्र शीर्षं देवं विश्वाक्षं विश्वशंभुवम् । विश्वै नार....
Click here to know more..
