ഉഡുപീ കൃഷ്ണ സുപ്രഭാത സ്തോത്രം

ഉത്തിഷ്ഠോത്തിഷ്ഠ ഗോവിന്ദ ഉത്തിഷ്ഠ ഗരുഡധ്വജ .
ഉത്തിഷ്ഠ കമലാകാന്ത ത്രൈലോക്യം മംഗലം കുരു ..

നാരായണാഖിലശരണ്യ രഥാംഗപാണേ
പ്രാണായമാനവിജയാഗണിതപ്രഭാവ .
ഗീർവാണവൈരികദലീവനവാരണേന്ദ്ര
മധ്വേശ കൃഷ്ണ ഭഗവൻ തവ സുപ്രഭാതം ..

ഉത്തിഷ്ഠ ദീനപതിതാർതജനാനുകമ്പിൻ
ഉത്തിഷ്ഠ വിശ്വരചനാചതുരൈകശില്പിൻ .
ഉത്തിഷ്ഠ വൈഷ്ണവമതോദ്ഭവധാമവാസിൻ
മധ്വേശ കൃഷ്ണ ഭഗവൻ തവ സുപ്രഭാതം ..

ഉത്തിഷ്ഠ പാതയ കൃപാമസൃണാൻ കടാക്ഷാൻ
ഉത്തിഷ്ഠ ദർശയ സുമംഗലവിഗ്രഹന്തേ .
ഉത്തിഷ്ഠ പാലയ ജനാൻ ശരണം പ്രപന്നാൻ
മധ്വേശ കൃഷ്ണ ഭഗവൻ തവ സുപ്രഭാതം ..

ഉത്തിഷ്ഠ യാദവ മുകുന്ദ ഹരേ മുരാരേ
ഉത്തിഷ്ഠ കൗരവകുലാന്തക വിശ്വബന്ധോ .
ഉത്തിഷ്ഠ യോഗിജനമാനസരാജഹംസ
മധ്വേശ കൃഷ്ണ ഭഗവൻ തവ സുപ്രഭാതം ..

ഉത്തിഷ്ഠ പദ്മനിലയാപ്രിയ പദ്മനാഭ
പദ്മോദ്ഭവസ്യ ജനകാച്യുത പദ്മനേത്ര .
ഉത്തിഷ്ഠ പദ്മസഖമണ്ഡലമധ്യവർതിൻ
മധ്വേശ കൃഷ്ണ ഭഗവൻ തവ സുപ്രഭാതം ..

മധ്വാഖ്യയാ രജതപീഠപുരേവതീർണ-
സ്ത്വത്കാര്യസാധനപടുഃ പവമാനദേവഃ .
മൂർതേശ്ചകാര തവ ലോകഗുരോഃ പ്രതിഷ്ഠാം
മധ്വേശ കൃഷ്ണ ഭഗവൻ തവ സുപ്രഭാതം ..

സന്യാസയോഗനിരതാശ്രവണാദിഭിസ്ത്വാം
ഭക്തേർഗുണൈർനവഭിരാത്മനിവേദനാന്തൈഃ .
അഷ്ടൗ യജന്തി യതിനോ ജഗതാമധീശം
മധ്വേശ കൃഷ്ണ ഭഗവൻ തവ സുപ്രഭാതം ..

യാ ദ്വാരകാപുരി പുരാ തവ ദിവ്യമൂർതിഃ
സമ്പൂജിതാഷ്ടമഹിഷീഭിരനന്യഭക്ത്യാ .
അദ്യാർചയന്തി യതയോഷ്ടമഠാധിപാസ്താം
മധ്വേശ കൃഷ്ണ ഭഗവൻ തവ സുപ്രഭാതം ..

വാമേ കരേ മഥനദണ്ഡമസവ്യഹസ്തേ
ഗൃഹ്ണംശ്ച പാശമുപദേഷ്ടുമനാ ഇവാസി .
ഗോപാലനം സുഖകരം കുരുതേതി ലോകാൻ
മധ്വേശ കൃഷ്ണ ഭഗവൻ തവ സുപ്രഭാതം ..

സമ്മോഹിതാഖിലചരാചരരൂപ വിശ്വ-
ശ്രോത്രാഭിരാമമുരലീമധുരാരവേണ .
ആധായവാദയകരേണ പുനശ്ചവേണും
മധ്വേശ കൃഷ്ണ ഭഗവൻ തവ സുപ്രഭാതം ..

ഗീതോഷ്ണരശ്മിരുദയന്വഹനോദയാദ്രൗ
യസ്യാഹരത്സകലലോകഹൃദാന്ധകാരം .
സത്വം സ്ഥിതോ രജതപീഠപുരേ വിഭാസി
മധ്വേശ കൃഷ്ണ ഭഗവൻ തവ സുപ്രഭാതം ..

കൃഷ്ണേതി മംഗലപദം കൃകവാകുവൃന്ദം
വക്തും പ്രയത്യ വിഫലം ബഹുശഃ കുകൂകുഃ .
ത്വാം സമ്പ്രബോധയിതുമുച്ചരതീതി മന്യേ
മധ്വേശ കൃഷ്ണ ഭഗവൻ തവ സുപ്രഭാതം ..

ഭൃംഗാപിപാസവ ഇമേ മധു പദ്മഷന്ദേ
കൃഷ്ണാർപണം സുമരസോസ്വിതി ഹർഷഭാജഃ .
ഝങ്കാരരാവമിഷതഃ കഥയന്തി മന്യേ
മധ്വേശ കൃഷ്ണ ഭഗവൻ തവ സുപ്രഭാതം ..

നിര്യാന്തി ശാവകവിയോഗയുതാ വിഹംഗാഃ
പ്രീത്യാർഭകേശു ച പുനഃ പ്രവിശന്തി നീഡം .
ധാവന്തി സസ്യ കണികാനുപചേതുമാരാൻ-
മധ്വേശ കൃഷ്ണ ഭഗവൻ തവ സുപ്രഭാതം ..

ഭൂത്വാതിഥിഃ സുമനസാമനിലഃ സുഗന്ധം
സംഗൃഹ്യ വാതി ജനയൻ പ്രമദം ജനാനാം .
വിശ്വാത്മനോർചനധിയാ തവ മുഞ്ച നിദ്രാം
മധ്വേശ കൃഷ്ണ ഭഗവൻ തവ സുപ്രഭാതം ..

താരാലിമൗക്തികവിഭൂഷണമണ്ഡിതാംഗീ
പ്രാചീദുകൂലമരുണം രുചിരം ദധാന .
ഖേസൗഖസുപ്തികവധൂരിവ ദൃശ്യതേദ്യ
മധ്വേശ കൃഷ്ണ ഭഗവൻ തവ സുപ്രഭാതം ..

ആലോക്യ ദേഹസുഷമാം തവ താരകാലി-
ര്ഹ്രീണാക്രമേണ സമുപേത്യ വിവർണഭാവം .
അന്തർഹിതേ വനചിരാത് ത്യജ ശേഷശയ്യാം
മധ്വേശ കൃഷ്ണ ഭഗവൻ തവ സുപ്രഭാതം ..

സാധ്വീകരാബ്ജവലയധ്വനിനാസമേതോ
ഗാനധ്വനിഃ സുദധിമന്ഥനഘോഷപുഷ്ടഃ .
സംശ്രൂയതേ പ്രതിഗ്രഹം രജനീ വിനഷ്ടാ
മധ്വേശ കൃഷ്ണ ഭഗവൻ തവ സുപ്രഭാതം ..

ഭാസ്വാനുദേഷ്യതി ഹിമാംശുരഭൂദ്ഗതശ്രീഃ
പൂർവാം ദിശാമരുണയൻ സമുപൈത്യനൂരുഃ .
ആശാഃ പ്രസാദ സുഭഗാശ്ച ഗതത്രിയാമാ
മധ്വേശ കൃഷ്ണ ഭഗവൻ തവ സുപ്രഭാതം ..

ആദിത്യചന്ദ്രധരണീസുതരൗഹിണേയ-
ജീവോശനഃശനിവിധുന്തുദകേതവസ്തേ .
ദാസാനുദാസപരിചാരകഭൃത്യഭൃത്യാ
മധ്വേശ കൃഷ്ണ ഭഗവൻ തവ സുപ്രഭാതം ..

ഇന്ദ്രാഗ്നിദണ്ഡധരനിർഋതിപാശിവായു-
വിത്തേശഭൂതപതയോ ഹരിതാമധീശാഃ .
ആരാധയന്തി പദവീച്യുതിശങ്കയാ ത്വാം
മധ്വേശ കൃഷ്ണ ഭഗവൻ തവ സുപ്രഭാതം ..

വീണാം സതീ കമലജസ്യ കരേ ദധാനാ
തന്ത്ര്യാഗലസ്യ ചരവേ കലയന്ത്യഭേദം .
വിശ്വം നിമജ്ജയതി ഗാനസുധാരസാബ്ധൗ
മധ്വേശ കൃഷ്ണ ഭഗവൻ തവ സുപ്രഭാതം ..

ദേവർഷിരംബരതലാദവനീം പ്രപന്ന-
സ്ത്വത്സന്നിധൗ മധുരവാദിതചാരുവീണാ .
നാമാനി ഗായതി നതസ്ഫുരിതോത്തമാംഗോ
മധ്വേശ കൃഷ്ണ ഭഗവൻ തവ സുപ്രഭാതം ..

വാതാത്മജഃ പ്രണതകല്പതരുർഹനൂമാൻ
ദ്വാരേ കൃതാഞ്ജലിപുടസ്തവദർശനാർഥീ .
തിഷ്ഠത്യമും കുരുകൃതാർഥമപേത നിദ്രാം
മധ്വേശ കൃഷ്ണ ഭഗവൻ തവ സുപ്രഭാതം ..

സർവോത്തമോ ഹരിരിതി ശ്രുതിവാക്യവൃന്ദൈ-
ശ്ചന്ദ്രേശ്വരദ്വിരദവക്ത്രഷഡാനനാദ്യാഃ .
ഉദ്ഘോശയന്ത്യനിമിഷാ രജനീം പ്രഭാതേ
മധ്വേശ കൃഷ്ണ ഭഗവൻ തവ സുപ്രഭാതം ..

മധ്വാഭിദേ സരസി പുണ്യജലേ പ്രഭാതേ
ഗംഗാംഭസർവമഘമാശു ഹരേതി ജപ്ത്വാ .
മജ്ജന്തി വൈദികശിഖാമണയോ യഥാവൻ
മധ്വേശ കൃഷ്ണ ഭഗവൻ തവ സുപ്രഭാതം ..

ദ്വാരേ മിലന്തി നിഗമാന്തവിദസ്ത്രയീജ്ഞാ
മീമാംസകാഃ പദവിദോനയദർശനജ്ഞാഃ .
ഗാന്ധർവവേദകുശലാശ്ച തവേക്ഷണാർഥം
മധ്വേശ കൃഷ്ണ ഭഗവൻ തവ സുപ്രഭാതം ..

ശ്രീമധ്വയോഗിവരവന്ദിതപാദപദ്മ
ഭൈഷ്മീമുഖാംബുരുഹഭാസ്കര വിശ്വവന്ദ്യ .
ദാസാഗ്രഗണ്യകനകാദിനുതപ്രഭാവ
മധ്വേശ കൃഷ്ണ ഭഗവൻ തവ സുപ്രഭാതം ..

പര്യായപീഠമധിരുഹ്യ മഠാധിപാസ്ത്വാ-
മഷ്ടൗ ഭജന്തി വിധിവത് സതതം യതീന്ദ്രാഃ .
ശ്രീവാദിരാജനിയമാൻ പരിപാലയന്തോ
മധ്വേശ കൃഷ്ണ ഭഗവൻ തവ സുപ്രഭാതം ..

ശ്രീമന്നനന്തശയനോഡുപിവാസ ശൗരേ
പൂർണപ്രബോധ ഹൃദയാംബരശീതരശ്മേ .
ലക്ഷ്മീനിവാസ പുരുഷോത്തമ പൂർണകാമ
മധ്വേശ കൃഷ്ണ ഭഗവൻ തവ സുപ്രഭാതം ..

ശ്രീപ്രാണനാഥ കരുണാവരുണാലയാർത
സന്ത്രാണശൗന്ദ രമണീയഗുണപ്രപൂർണ .
സങ്കർഷണാനുജ ഫണീന്ദ്രഫണാവിതാന
മധ്വേശ കൃഷ്ണ ഭഗവൻ തവ സുപ്രഭാതം ..

ആനന്ദതുന്ദില പുരന്ദര പൂർവദാസ-
വൃന്ദാഭിവന്ദിത പദാംബുജനന്ദസൂനോ .
ഗോവിന്ദ മന്ദരഗിരീന്ദ്ര ധരാംബുദാഭ
മധ്വേശ കൃഷ്ണ ഭഗവൻ തവ സുപ്രഭാതം ..

ഗോപാല ഗോപലലനാകുലരാസലീലാ-
ലോലാഭ്രനീലകമലേശ കൃപാലവാല .
കാലീയമൗലിവിലസന്മണിരഞ്ജിതാംഘ്രേ
മധ്വേശ കൃഷ്ണ ഭഗവൻ തവ സുപ്രഭാതം ..

കൃഷ്ണസ്യ മംഗലനിധേർഭുവി സുപ്രഭാതം
യേഹർമുഖേ പ്രതിദിനം മനുജാഃ പഠന്തി .
വിന്ദന്തി തേ സകലവാഞ്ഛിതസിദ്ധിമാശു
ജ്ഞാനഞ്ച മുക്തിസുലഭം പരമം ലഭന്തേ ..

Ramaswamy Sastry and Vighnesh Ghanapaathi

Other stotras