ರಾಧಾ ನಾಯಕ ಸ್ತೋತ್ರ
ವೃಂದಾವನೇ ಕಲ್ಪತರೋಃ ಸುಮೂಲೇ
ಗೋಗೋಪಿಕಾವೃಂದವೃತಂ ಸುರೇಶಂ .
ವಂಶೀಕರಂ ಲೋಕವಶೀಕರಂ ಚ
ರಾಧಾಧವಂ ತಂ ಪ್ರಣಮಾಮಿ ಕೃಷ್ಣಂ .
ಯಸ್ಯೈವ ಬಿಂಬಂ ಪರಿದೃಶ್ಯತೇಽಥ
ರಾಧಾ ಯದಾ ಪಶ್ಯತಿ ಶುದ್ಧತೋಯೇ .
ರಾಧಾರ್ದ್ಧಭಾಗಂ ಮಹನೀಯರೂಪಂ
ರಾಧಾಧವಂ ತಂ ಪ್ರಣಮಾಮಿ ಕೃಷ್ಣಂ .
ಸುಹೋಲಿಕಾಪರ್ವಣಿ ದಿವ್ಯವರ್ಣ-
ವಿಲೇಪನಾಯಾಽಪಿ ನಿಸೃಷ್ಟಪಾಣಿಂ .
ರಾಧಾಕಪೋಲೇ ಸಸುಖಂ ಸಹಾರ್ದಂ
ರಾಧಾಧವಂ ತಂ ಪ್ರಣಮಾಮಿ ಕೃಷ್ಣಂ .
ರಾಧಾಸ್ತನನ್ಯಸ್ತಸುಚಂದನೇನ
ವಿಲಿಪ್ತವಕ್ಷಸ್ಥಲಮೇಕಭಾವಂ .
ರಾಧಾಕರಸ್ಥಾಪಿತದಕ್ಷಹಸ್ತಂ
ರಾಧಾಧವಂ ತಂ ಪ್ರಣಮಾಮಿ ಕೃಷ್ಣಂ .
ಸತ್ಪ್ರೇಮಭಾವಾಶ್ರಯರೂಪಮೇಕಂ
ಶಿಖೀಂದ್ರಪಿಂಛಾಶಿಖಮಾದಿಭೂತಂ .
ಸುಪುಷ್ಪಮಾಲಂ ಸಮಭಾವಮೂಲಂ
ರಾಧಾಧವಂ ತಂ ಪ್ರಣಮಾಮಿ ಕೃಷ್ಣಂ .
ಕೃಷ್ಣಾಪವಿತ್ರೀಕೃತಶುದ್ಧಭೂಮೌ
ಶ್ರೀರಾಧಿಕಾನರ್ತನನೇತ್ರತೃಷ್ಣಂ .
ತತ್ಪಾದವಚ್ಚಂಚಲನೇತ್ರಮೀಶಂ
ರಾಧಾಧವಂ ತಂ ಪ್ರಣಮಾಮಿ ಕೃಷ್ಣಂ .
ಸ್ವಕಂಠದೇಶಸ್ಥಿತಹೇಮಮಾಲಾ-
ಮಾರೋಪಯನ್ ತುಷ್ಯತಿ ರಾಧಿಕಾಯಾಃ .
ಕಂಠೇ ವಿಶಾಲಾಂ ಸುಮಗಂಧಯುಕ್ತಾಂ
ರಾಧಾಧವಂ ತಂ ಪ್ರಣಮಾಮಿ ಕೃಷ್ಣಂ .
ಘಟೇ ಜಲಸ್ಯಾನಯನಾಯ ರಾಧಾ
ನದೀಂ ಯದಾ ಗಚ್ಛತಿ ಯಸ್ತದಾನೀಂ .
ಪ್ರೇಮ್ಣಾ ಕಟಿನ್ಯಸ್ತಕರಾಗ್ರಭಾಗೋ
ರಾಧಾಧವಂ ತಂ ಪ್ರಣಮಾಮಿ ಕೃಷ್ಣಂ .
ಸುವೇಣುವಾದ್ಯಂ ಕರಯೋರ್ಗೃಹೀತ್ವಾ
ಯಃ ಪ್ರೇಮಗೀತಂ ಮಧುರಂ ಸರಾಧಂ .
ಪ್ರವಾದಯತ್ಯಾಶ್ರಿತಭಕ್ತತುಷ್ಟ್ಯೈ
ರಾಧಾಧವಂ ತಂ ಪ್ರಣಮಾಮಿ ಕೃಷ್ಣಂ .
ರಾತ್ರೌ ಭೃಶಂ ಶಾರದಪೂರ್ಣಿಮಾಯಾಂ
ಸ್ವಾಂಕೇ ಶಯಾನಾಂ ವೃಷಭಾನುಜಾತಾಂ .
ಸ್ಪೃಶಂತಮೇಕೇನ ಕರೇಣ ಮೂರ್ಧ್ನಿ
ರಾಧಾಧವಂ ತಂ ಪ್ರಣಮಾಮಿ ಕೃಷ್ಣಂ .
Other stotras
