ಕೃಷ್ಣ ಚೌರಾಷ್ಟಕಂ

ವ್ರಜೇ ಪ್ರಸಿದ್ಧಂ ನವನೀತಚೌರಂ
ಗೋಪಾಂಗನಾನಾಂ ಚ ದುಕೂಲಚೌರಂ .
ಅನೇಕಜನ್ಮಾರ್ಜಿತಪಾಪಚೌರಂ
ಚೌರಾಗ್ರಗಣ್ಯಂ ಪುರುಷಂ ನಮಾಮಿ ..
ಶ್ರೀರಾಧಿಕಾಯಾ ಹೃದಯಸ್ಯ ಚೌರಂ
ನವಾಂಬುದಶ್ಯಾಮಲಕಾಂತಿಚೌರಂ .
ಪದಾಶ್ರಿತಾನಾಂ ಚ ಸಮಸ್ತಚೌರಂ
ಚೌರಾಗ್ರಗಣ್ಯಂ ಪುರುಷಂ ನಮಾಮಿ ..
ಅಕಿಂಚನೀಕೃತ್ಯ ಪದಾಶ್ರಿತಂ ಯಃ
ಕರೋತಿ ಭಿಕ್ಷುಂ ಪಥಿ ಗೇಹಹೀನಂ .
ಕೇನಾಪ್ಯಹೋ ಭೀಷಣಚೌರ ಈದೃಗ್-
ದೃಷ್ಟಃ ಶ್ರುತೋ ವಾ ನ ಜಗತ್ತ್ರಯೇಽಪಿ ..
ಯದೀಯ ನಾಮಾಪಿ ಹರತ್ಯಶೇಷಂ
ಗಿರಿಪ್ರಸಾರಾನ್ ಅಪಿ ಪಾಪರಾಶೀನ್ .
ಆಶ್ಚರ್ಯರೂಪೋ ನನು ಚೌರ ಈದೃಗ್
ದೃಷ್ಟಃ ಶ್ರುತೋ ವಾ ನ ಮಯಾ ಕದಾಪಿ ..
ಧನಂ ಚ ಮಾನಂ ಚ ತಥೇಂದ್ರಿಯಾಣಿ
ಪ್ರಾಣಾಂಶ್ಚ ಹೃತ್ವಾ ಮಮ ಸರ್ವಮೇವ .
ಪಲಾಯಸೇ ಕುತ್ರ ಧೃತೋಽದ್ಯ ಚೌರ
ತ್ವಂ ಭಕ್ತಿದಾಮ್ನಾಸಿ ಮಯಾ ನಿರುದ್ಧಃ ..
ಛಿನತ್ಸಿ ಘೋರಂ ಯಮಪಾಶಬಂಧಂ
ಭಿನತ್ಸಿ ಭೀಮಂ ಭವಪಾಶಬಂಧಂ .
ಛಿನತ್ಸಿ ಸರ್ವಸ್ಯ ಸಮಸ್ತಬಂಧಂ
ನೈವಾತ್ಮನೋ ಭಕ್ತಕೃತಂ ತು ಬಂಧಂ ..
ಮನ್ಮಾನಸೇ ತಾಮಸರಾಶಿಘೋರೇ
ಕಾರಾಗೃಹೇ ದುಃಖಮಯೇ ನಿಬದ್ಧಃ .
ಲಭಸ್ವ ಹೇ ಚೌರ ಹರೇ ಚಿರಾಯ
ಸ್ವಚೌರ್ಯದೋಷೋಚಿತಮೇವ ದಂಡಂ ..
ಕಾರಾಗೃಹೇ ವಸ ಸದಾ ಹೃದಯೇ ಮದೀಯೇ
ಮದ್ಭಕ್ತಿಪಾಶದೃಢಬಂಧನನಿಶ್ಚಲಃ ಸನ್ .
ತ್ವಾಂ ಕೃಷ್ಣ ಹೇ ಪ್ರಲಯಕೋಟಿಶತಾಂತರೇಽಪಿ
ಸರ್ವಸ್ವಚೌರ ಹೃದಯಾನ್ ನ ಹಿ ಮೋಚಯಾಮಿ ..