ఉత్తిష్ఠోత్తిష్ఠ గోవింద ఉత్తిష్ఠ గరుడధ్వజ .
ఉత్తిష్ఠ కమలాకాంత త్రైలోక్యం మంగలం కురు ..
నారాయణాఖిలశరణ్య రథాంగపాణే
ప్రాణాయమానవిజయాగణితప్రభావ .
గీర్వాణవైరికదలీవనవారణేంద్ర
మధ్వేశ కృష్ణ భగవన్ తవ సుప్రభాతం ..
ఉత్తిష్ఠ దీనపతితార్తజనానుకంపిన్
ఉత్తిష్ఠ విశ్వరచనాచతురైకశిల్పిన్ .
ఉత్తిష్ఠ వైష్ణవమతోద్భవధామవాసిన్
మధ్వేశ కృష్ణ భగవన్ తవ సుప్రభాతం ..
ఉత్తిష్ఠ పాతయ కృపామసృణాన్ కటాక్షాన్
ఉత్తిష్ఠ దర్శయ సుమంగలవిగ్రహంతే .
ఉత్తిష్ఠ పాలయ జనాన్ శరణం ప్రపన్నాన్
మధ్వేశ కృష్ణ భగవన్ తవ సుప్రభాతం ..
ఉత్తిష్ఠ యాదవ ముకుంద హరే మురారే
ఉత్తిష్ఠ కౌరవకులాంతక విశ్వబంధో .
ఉత్తిష్ఠ యోగిజనమానసరాజహంస
మధ్వేశ కృష్ణ భగవన్ తవ సుప్రభాతం ..
ఉత్తిష్ఠ పద్మనిలయాప్రియ పద్మనాభ
పద్మోద్భవస్య జనకాచ్యుత పద్మనేత్ర .
ఉత్తిష్ఠ పద్మసఖమండలమధ్యవర్తిన్
మధ్వేశ కృష్ణ భగవన్ తవ సుప్రభాతం ..
మధ్వాఖ్యయా రజతపీఠపురేవతీర్ణ-
స్త్వత్కార్యసాధనపటుః పవమానదేవః .
మూర్తేశ్చకార తవ లోకగురోః ప్రతిష్ఠాం
మధ్వేశ కృష్ణ భగవన్ తవ సుప్రభాతం ..
సన్యాసయోగనిరతాశ్రవణాదిభిస్త్వాం
భక్తేర్గుణైర్నవభిరాత్మనివేదనాంతైః .
అష్టౌ యజంతి యతినో జగతామధీశం
మధ్వేశ కృష్ణ భగవన్ తవ సుప్రభాతం ..
యా ద్వారకాపురి పురా తవ దివ్యమూర్తిః
సంపూజితాష్టమహిషీభిరనన్యభక్త్యా .
అద్యార్చయంతి యతయోష్టమఠాధిపాస్తాం
మధ్వేశ కృష్ణ భగవన్ తవ సుప్రభాతం ..
వామే కరే మథనదండమసవ్యహస్తే
గృహ్ణంశ్చ పాశముపదేష్టుమనా ఇవాసి .
గోపాలనం సుఖకరం కురుతేతి లోకాన్
మధ్వేశ కృష్ణ భగవన్ తవ సుప్రభాతం ..
సమ్మోహితాఖిలచరాచరరూప విశ్వ-
శ్రోత్రాభిరామమురలీమధురారవేణ .
ఆధాయవాదయకరేణ పునశ్చవేణుం
మధ్వేశ కృష్ణ భగవన్ తవ సుప్రభాతం ..
గీతోష్ణరశ్మిరుదయన్వహనోదయాద్రౌ
యస్యాహరత్సకలలోకహృదాంధకారం .
సత్వం స్థితో రజతపీఠపురే విభాసి
మధ్వేశ కృష్ణ భగవన్ తవ సుప్రభాతం ..
కృష్ణేతి మంగలపదం కృకవాకువృందం
వక్తుం ప్రయత్య విఫలం బహుశః కుకూకుః .
త్వాం సంప్రబోధయితుముచ్చరతీతి మన్యే
మధ్వేశ కృష్ణ భగవన్ తవ సుప్రభాతం ..
భృంగాపిపాసవ ఇమే మధు పద్మషందే
కృష్ణార్పణం సుమరసోస్వితి హర్షభాజః .
ఝంకారరావమిషతః కథయంతి మన్యే
మధ్వేశ కృష్ణ భగవన్ తవ సుప్రభాతం ..
నిర్యాంతి శావకవియోగయుతా విహంగాః
ప్రీత్యార్భకేశు చ పునః ప్రవిశంతి నీడం .
ధావంతి సస్య కణికానుపచేతుమారాన్-
మధ్వేశ కృష్ణ భగవన్ తవ సుప్రభాతం ..
భూత్వాతిథిః సుమనసామనిలః సుగంధం
సంగృహ్య వాతి జనయన్ ప్రమదం జనానాం .
విశ్వాత్మనోర్చనధియా తవ ముంచ నిద్రాం
మధ్వేశ కృష్ణ భగవన్ తవ సుప్రభాతం ..
తారాలిమౌక్తికవిభూషణమండితాంగీ
ప్రాచీదుకూలమరుణం రుచిరం దధాన .
ఖేసౌఖసుప్తికవధూరివ దృశ్యతేద్య
మధ్వేశ కృష్ణ భగవన్ తవ సుప్రభాతం ..
ఆలోక్య దేహసుషమాం తవ తారకాలి-
ర్హ్రీణాక్రమేణ సముపేత్య వివర్ణభావం .
అంతర్హితే వనచిరాత్ త్యజ శేషశయ్యాం
మధ్వేశ కృష్ణ భగవన్ తవ సుప్రభాతం ..
సాధ్వీకరాబ్జవలయధ్వనినాసమేతో
గానధ్వనిః సుదధిమంథనఘోషపుష్టః .
సంశ్రూయతే ప్రతిగ్రహం రజనీ వినష్టా
మధ్వేశ కృష్ణ భగవన్ తవ సుప్రభాతం ..
భాస్వానుదేష్యతి హిమాంశురభూద్గతశ్రీః
పూర్వాం దిశామరుణయన్ సముపైత్యనూరుః .
ఆశాః ప్రసాద సుభగాశ్చ గతత్రియామా
మధ్వేశ కృష్ణ భగవన్ తవ సుప్రభాతం ..
ఆదిత్యచంద్రధరణీసుతరౌహిణేయ-
జీవోశనఃశనివిధుంతుదకేతవస్తే .
దాసానుదాసపరిచారకభృత్యభృత్యా
మధ్వేశ కృష్ణ భగవన్ తవ సుప్రభాతం ..
ఇంద్రాగ్నిదండధరనిర్ఋతిపాశివాయు-
విత్తేశభూతపతయో హరితామధీశాః .
ఆరాధయంతి పదవీచ్యుతిశంకయా త్వాం
మధ్వేశ కృష్ణ భగవన్ తవ సుప్రభాతం ..
వీణాం సతీ కమలజస్య కరే దధానా
తంత్ర్యాగలస్య చరవే కలయంత్యభేదం .
విశ్వం నిమజ్జయతి గానసుధారసాబ్ధౌ
మధ్వేశ కృష్ణ భగవన్ తవ సుప్రభాతం ..
దేవర్షిరంబరతలాదవనీం ప్రపన్న-
స్త్వత్సన్నిధౌ మధురవాదితచారువీణా .
నామాని గాయతి నతస్ఫురితోత్తమాంగో
మధ్వేశ కృష్ణ భగవన్ తవ సుప్రభాతం ..
వాతాత్మజః ప్రణతకల్పతరుర్హనూమాన్
ద్వారే కృతాంజలిపుటస్తవదర్శనార్థీ .
తిష్ఠత్యముం కురుకృతార్థమపేత నిద్రాం
మధ్వేశ కృష్ణ భగవన్ తవ సుప్రభాతం ..
సర్వోత్తమో హరిరితి శ్రుతివాక్యవృందై-
శ్చంద్రేశ్వరద్విరదవక్త్రషడాననాద్యాః .
ఉద్ఘోశయంత్యనిమిషా రజనీం ప్రభాతే
మధ్వేశ కృష్ణ భగవన్ తవ సుప్రభాతం ..
మధ్వాభిదే సరసి పుణ్యజలే ప్రభాతే
గంగాంభసర్వమఘమాశు హరేతి జప్త్వా .
మజ్జంతి వైదికశిఖామణయో యథావన్
మధ్వేశ కృష్ణ భగవన్ తవ సుప్రభాతం ..
ద్వారే మిలంతి నిగమాంతవిదస్త్రయీజ్ఞా
మీమాంసకాః పదవిదోనయదర్శనజ్ఞాః .
గాంధర్వవేదకుశలాశ్చ తవేక్షణార్థం
మధ్వేశ కృష్ణ భగవన్ తవ సుప్రభాతం ..
శ్రీమధ్వయోగివరవందితపాదపద్మ
భైష్మీముఖాంబురుహభాస్కర విశ్వవంద్య .
దాసాగ్రగణ్యకనకాదినుతప్రభావ
మధ్వేశ కృష్ణ భగవన్ తవ సుప్రభాతం ..
పర్యాయపీఠమధిరుహ్య మఠాధిపాస్త్వా-
మష్టౌ భజంతి విధివత్ సతతం యతీంద్రాః .
శ్రీవాదిరాజనియమాన్ పరిపాలయంతో
మధ్వేశ కృష్ణ భగవన్ తవ సుప్రభాతం ..
శ్రీమన్ననంతశయనోడుపివాస శౌరే
పూర్ణప్రబోధ హృదయాంబరశీతరశ్మే .
లక్ష్మీనివాస పురుషోత్తమ పూర్ణకామ
మధ్వేశ కృష్ణ భగవన్ తవ సుప్రభాతం ..
శ్రీప్రాణనాథ కరుణావరుణాలయార్త
సంత్రాణశౌంద రమణీయగుణప్రపూర్ణ .
సంకర్షణానుజ ఫణీంద్రఫణావితాన
మధ్వేశ కృష్ణ భగవన్ తవ సుప్రభాతం ..
ఆనందతుందిల పురందర పూర్వదాస-
వృందాభివందిత పదాంబుజనందసూనో .
గోవింద మందరగిరీంద్ర ధరాంబుదాభ
మధ్వేశ కృష్ణ భగవన్ తవ సుప్రభాతం ..
గోపాల గోపలలనాకులరాసలీలా-
లోలాభ్రనీలకమలేశ కృపాలవాల .
కాలీయమౌలివిలసన్మణిరంజితాంఘ్రే
మధ్వేశ కృష్ణ భగవన్ తవ సుప్రభాతం ..
కృష్ణస్య మంగలనిధేర్భువి సుప్రభాతం
యేహర్ముఖే ప్రతిదినం మనుజాః పఠంతి .
విందంతి తే సకలవాంఛితసిద్ధిమాశు
జ్ఞానంచ ముక్తిసులభం పరమం లభంతే ..
గురు ప్రార్థనా
ఆబాల్యాత్ కిల సంప్రదాయవిధురే వైదేశికేఽధ్వన్యహం సంభ్ర....
Click here to know more..గణనాథ స్తోత్రం
ప్రాతః స్మరామి గణనాథముఖారవిందం నేత్రత్రయం మదసుగంధితగ....
Click here to know more..పాంచజన్యం
మీరు పాంచజన్యం గురించి తెలుసుకోవాలనుకున్న అన్నీ విషయా....
Click here to know more..