రాధా నాయక స్తోత్రం
వృందావనే కల్పతరోః సుమూలే
గోగోపికావృందవృతం సురేశం .
వంశీకరం లోకవశీకరం చ
రాధాధవం తం ప్రణమామి కృష్ణం .
యస్యైవ బింబం పరిదృశ్యతేఽథ
రాధా యదా పశ్యతి శుద్ధతోయే .
రాధార్ద్ధభాగం మహనీయరూపం
రాధాధవం తం ప్రణమామి కృష్ణం .
సుహోలికాపర్వణి దివ్యవర్ణ-
విలేపనాయాఽపి నిసృష్టపాణిం .
రాధాకపోలే ససుఖం సహార్దం
రాధాధవం తం ప్రణమామి కృష్ణం .
రాధాస్తనన్యస్తసుచందనేన
విలిప్తవక్షస్థలమేకభావం .
రాధాకరస్థాపితదక్షహస్తం
రాధాధవం తం ప్రణమామి కృష్ణం .
సత్ప్రేమభావాశ్రయరూపమేకం
శిఖీంద్రపింఛాశిఖమాదిభూతం .
సుపుష్పమాలం సమభావమూలం
రాధాధవం తం ప్రణమామి కృష్ణం .
కృష్ణాపవిత్రీకృతశుద్ధభూమౌ
శ్రీరాధికానర్తననేత్రతృష్ణం .
తత్పాదవచ్చంచలనేత్రమీశం
రాధాధవం తం ప్రణమామి కృష్ణం .
స్వకంఠదేశస్థితహేమమాలా-
మారోపయన్ తుష్యతి రాధికాయాః .
కంఠే విశాలాం సుమగంధయుక్తాం
రాధాధవం తం ప్రణమామి కృష్ణం .
ఘటే జలస్యానయనాయ రాధా
నదీం యదా గచ్ఛతి యస్తదానీం .
ప్రేమ్ణా కటిన్యస్తకరాగ్రభాగో
రాధాధవం తం ప్రణమామి కృష్ణం .
సువేణువాద్యం కరయోర్గృహీత్వా
యః ప్రేమగీతం మధురం సరాధం .
ప్రవాదయత్యాశ్రితభక్తతుష్ట్యై
రాధాధవం తం ప్రణమామి కృష్ణం .
రాత్రౌ భృశం శారదపూర్ణిమాయాం
స్వాంకే శయానాం వృషభానుజాతాం .
స్పృశంతమేకేన కరేణ మూర్ధ్ని
రాధాధవం తం ప్రణమామి కృష్ణం .
Other stotras
