Varaha Stotram

जितं जितं तेऽजित यज्ञभावना त्रयीं तनुं स्वां परिधुन्वते नमः ।

यद्रोमगर्तेषु निलिल्युरध्वरास्तस्मै नमः कारणसूकराय ते ॥

रूपं तवैतन्ननु दुष्कृतात्मनां दुर्दर्शनं देव यदध्वरात्मकम् ।

छन्दांसि यस्य त्वचि बर्हिरोमस्वाज्यं दृशि त्वङ्घ्रिषु चातुर्होत्रम् ॥

स्रुक्तुण्ड आसीत्स्रुव ईश नासयोरिडोदरे चमसाः कर्णरन्ध्रे ।

प्राशित्रमास्ये ग्रसने ग्रहास्तु ते यच्चर्वणं ते भगवन्नग्निहोत्रम् ॥

दीक्षानुजन्मोपसदः शिरोधरं त्वं प्रायणीयोदयनीयदंष्ट्रः ।

जिह्वा प्रवर्ग्यस्तव शीर्षकं क्रतोः सभ्यावसथ्यं चितयोऽसवो हि ते ॥

सोमस्तु रेतः सवनान्यवस्थितिः संस्थाविभेदास्तव देव धातवः ।

सत्राणि सर्वाणि शरीरसन्धिस्त्वं सर्वयज्ञक्रतुरिष्टिबन्धनः ॥

नमो नमस्तेऽखिलयन्त्रदेवताद्रव्याय सर्वक्रतवे क्रियात्मने ।

वैराग्यभक्त्यात्मजयानुभावितज्ञानाय विद्यागुरवे नमो नमः ॥

दंष्ट्राग्रकोट्या भगवंस्त्वया धृता विराजते भूधर भूः सभूधरा ।

यथा वनान्निःसरतो दता धृता मतङ्गजेन्द्रस्य सपत्रपद्मिनी ॥

त्रयीमयं रूपमिदं च सौकरं भूमण्डलेनाथ दता धृतेन ते ।

चकास्ति श‍ृङ्गोढघनेन भूयसा कुलाचलेन्द्रस्य यथैव विभ्रमः ॥

संस्थापयैनां जगतां सतस्थुषां लोकाय पत्नीमसि मातरं पिता ।

विधेम चास्यै नमसा सह त्वया यस्यां स्वतेजोऽग्निमिवारणावधाः ॥

कः श्रद्दधीतान्यतमस्तव प्रभो रसां गताया भुव उद्विबर्हणम् ।

न विस्मयोऽसौ त्वयि विश्वविस्मये यो माययेदं ससृजेऽतिविस्मयम् ॥

विधुन्वता वेदमयं निजं वपुर्जनस्तपःसत्यनिवासिनो वयम् ।

सटाशिखोद्धूतशिवाम्बुबिन्दुभिर्विमृज्यमाना भृशमीश पाविताः ॥

स वै बत भ्रष्टमतिस्तवैष ते यः कर्मणां पारमपारकर्मणः ।

यद्योगमायागुणयोगमोहितं विश्वं समस्तं भगवन् विधेहि शम् ॥

jitam' jitam' te'jita yajnyabhaavanaa trayeem' tanum' svaam' paridhunvate namah' .
yadromagarteshu nililyuradhvaraastasmai namah' kaaranasookaraaya te ..
roopam' tavaitannanu dushkri'taatmanaam' durdarshanam' deva yadadhvaraatmakam .
chhandaam'si yasya tvachi barhiromasvaajyam' dri'shi tvanghrishu chaaturhotram ..
sruktund'a aaseetsruva eesha naasayorid'odare chamasaah' karnarandhre .
praashitramaasye grasane grahaastu te yachcharvanam' te bhagavannagnihotram ..
deekshaanujanmopasadah' shirodharam' tvam' praayaneeyodayaneeyadam'sht'rah' .
jihvaa pravargyastava sheershakam' kratoh' sabhyaavasathyam' chitayo'savo hi te ..
somastu retah' savanaanyavasthitih' sam'sthaavibhedaastava deva dhaatavah' .
satraani sarvaani shareerasandhistvam' sarvayajnyakraturisht'ibandhanah' ..
namo namaste'khilayantradevataadravyaaya sarvakratave kriyaatmane .
vairaagyabhaktyaatmajayaanubhaavitajnyaanaaya vidyaagurave namo namah' ..
dam'sht'raagrakot'yaa bhagavam'stvayaa dhri'taa viraajate bhoodhara bhooh' sabhoodharaa .
yathaa vanaannih'sarato dataa dhri'taa matangajendrasya sapatrapadminee ..
trayeemayam' roopamidam' cha saukaram' bhoomand'alenaatha dataa dhri'tena te .
chakaasti shri'ngod'haghanena bhooyasaa kulaachalendrasya yathaiva vibhramah' ..
sam'sthaapayainaam' jagataam' satasthushaam' lokaaya patneemasi maataram' pitaa .
vidhema chaasyai namasaa saha tvayaa yasyaam' svatejo'gnimivaaranaavadhaah' ..
kah' shraddadheetaanyatamastava prabho rasaam' gataayaa bhuva udvibarhanam .
na vismayo'sau tvayi vishvavismaye yo maayayedam' sasri'je'tivismayam ..
vidhunvataa vedamayam' nijam' vapurjanastapah'satyanivaasino vayam .
sat'aashikhoddhootashivaambubindubhirvimri'jyamaanaa bhri'shameesha paavitaah' ..
sa vai bata bhrasht'amatistavaisha te yah' karmanaam' paaramapaarakarmanah' .
yadyogamaayaagunayogamohitam' vishvam' samastam' bhagavan vidhehi sham ..