Vamana Stuti

अव्याद्वो वामनो यस्य कौस्तुभप्रतिबिम्बिता।
कौतुकालोकिनी जाता जाठरीव जगत्त्रयी।
अङ्घ्रिदण्डो हरेरूर्ध्वमुत्क्षप्तो बलिनिग्रहे।
विधिविष्टरपद्मस्य नालदण्डो मुदेऽस्तु नः।
खर्वग्रन्थिविमुक्तसन्धिविलसद्वक्षःस्फुरत्कौस्तुभं
निर्यन्नाभिसरोजकुड्मलपुटीगम्भीरसामध्वनि।
पात्रावाप्तिसमुत्सुकेन बलिना सानन्दमालोकितं
पायाद्वः क्रमवर्धमानमहिमाश्चर्यं मुरारेर्वपुः।
हस्ते शस्त्रकिणाङ्कितोऽरुणविभाकिर्मीरितोरःस्थलो
नाभिप्रेङ्खदलिर्विलोचनयुगप्रोद्भूतशीतातपः।
बाहूर्मिश्रितवह्निरेष तदिति व्याक्षिप्यवाक्यं कवेः
तारैरध्ययनैर्हरन्बलिमनः पायाज्जगद्वामनः।
स्वस्ति स्वागतमर्थ्यहं वद विभो किं दीयतां मेदिनी
का मात्रा मम विक्रमत्रयपदं दत्तं जलं दीयताम्।
मा देहीत्युशनाब्रवीद्धरिरयं पात्रं किमस्मात्परं
चेत्येवं बलिनार्चितो मखमुखे पायात्स वो वामनः।
स्वामी सन्भुवनत्रयस्य विकृतिं नीतोऽसि किं याच्ञया
यद्वा विश्वसृजा त्वयैव न कृतं तद्दीयतां ते कुतः।
दानं श्रेष्ठतमाय तुभ्यमतुलं बन्धाय नो मुक्तये
विज्ञप्तो बलिना निरुत्तरतया ह्रीतो हरिः पातु वः।
ब्रह्माण्डच्छत्रदण्डः शतधृतिभवनाम्भोरुहो नालदण्डः
क्षोणीनौकूपदण्डः क्षरदमरसरित्पट्टिकाकेतुदण्डः।
ज्योतिश्चक्राक्षदण्डस्त्रिभुवनविजयस्तम्भदण्डोऽङ्घ्रिदण्डः
श्रेयस्त्रैविक्रमस्ते वितरतु विबुधद्वेषिणां कालदण्डः।
यस्मादाक्रामतो द्यां गरुडमणिशिलाकेतुदण्डायमाना-
दाश्च्योतन्त्याबभासे सुरसरिदमला वैजयन्तीव कान्ता।
भूमिष्ठो यस्तथान्यो भुवनगृहमहास्तम्भशोभां दधानः
पातामेतौ पयोजोदरललिततलौ पङ्कजाक्षस्य पादौ।
कस्त्वं ब्रह्मन्नपूर्वः क्व च तव वसतिर्याखिला ब्रह्मसृष्टिः
कस्ते नाथो ह्यनाथः क्व स तव जनको नैव तातं स्मरामि।
किं तेऽभीष्टं ददामि त्रिपदपरिमिता भूमिरल्पं किमेतत्
त्रैलोक्यं भावगर्भं बलिमिदमवदद्वामनो वः स पायात्।

avyaadvo vaamano yasya kaustubhapratibimbitaa.
kautukaalokinee jaataa jaat'hareeva jagattrayee.
anghridand'o hareroordhvamutkshapto balinigrahe.
vidhivisht'arapadmasya naaladand'o mude'stu nah'.
kharvagranthivimuktasandhivilasadvakshah'sphuratkaustubham
niryannaabhisarojakud'malaput'eegambheerasaamadhvani.
paatraavaaptisamutsukena balinaa saanandamaalokitam
paayaadvah' kramavardhamaanamahimaashcharyam muraarervapuh'.
haste shastrakinaankito'runavibhaakirmeeritorah'sthalo
naabhiprenkhadalirvilochanayugaprodbhootasheetaatapah'.
baahoormishritavahniresha taditi vyaakshipyavaakyam kaveh'
taarairadhyayanairharanbalimanah' paayaajjagadvaamanah'.
svasti svaagatamarthyaham vada vibho kim deeyataam medinee
kaa maatraa mama vikramatrayapadam dattam jalam deeyataam.
maa deheetyushanaabraveeddharirayam paatram kimasmaatparam
chetyevam balinaarchito makhamukhe paayaatsa vo vaamanah'.
svaamee sanbhuvanatrayasya vikri'tim neeto'si kim yaachnjayaa
yadvaa vishvasri'jaa tvayaiva na kri'tam taddeeyataam te kutah'.
daanam shresht'hatamaaya tubhyamatulam bandhaaya no muktaye
vijnyapto balinaa niruttaratayaa hreeto harih' paatu vah'.
brahmaand'achchhatradand'ah' shatadhri'tibhavanaambhoruho naaladand'ah'
kshoneenaukoopadand'ah' ksharadamarasaritpat't'ikaaketudand'ah'.
jyotishchakraakshadand'astribhuvanavijayastambhadand'o'nghridand'ah'
shreyastraivikramaste vitaratu vibudhadveshinaam kaaladand'ah'.
yasmaadaakraamato dyaam garud'amanishilaaketudand'aayamaanaa-
daashchyotantyaababhaase surasaridamalaa vaijayanteeva kaantaa.
bhoomisht'ho yastathaanyo bhuvanagri'hamahaastambhashobhaam dadhaanah'
paataametau payojodaralalitatalau pankajaakshasya paadau.
kastvam brahmannapoorvah' kva cha tava vasatiryaakhilaa brahmasri'sht'ih'
kaste naatho hyanaathah' kva sa tava janako naiva taatam smaraami.
kim te'bheesht'am dadaami tripadaparimitaa bhoomiralpam kimetat
trailokyam bhaavagarbham balimidamavadadvaamano vah' sa paayaat.

Ramaswamy Sastry and Vighnesh Ghanapaathi

Other stotras