Jagannatha Ashtakam
कदाचित् कालिन्दीतटविपिनसङ्गीतकवरो
मुदा गोपीनारीवदनकमलास्वादमधुपः।
रमाशंभुब्रह्मामरपतिगणेशार्चितपदो
जगन्नाथः स्वामी नयनपथगामी भवतु मे।
भुजे सव्ये वेणुं शिरसि शिखिपिञ्छं कटितटे
दुकूलं नेत्रान्ते सहचरकटाक्षं च विदधत्।
सदा श्रीमद्बृन्दावनवसतिलीलापरिचयो
जगन्नाथः स्वामी नयनपथगामी भवतु मे।
महाम्भोधेस्तीरे कनकरुचिरे नीलशिखरे
वसन्प्रासादान्तः सहजबलभद्रेण बलिना।
सुभद्रामध्यस्थः सकलसुरसेवावसरदो
जगन्नाथः स्वामी नयनपथगामी भवतु मे।
कृपापारावारः सजलजलदश्रेणिरुचिरो
रमावाणीसोमस्फुरदमलपद्मोद्भवमुखैः।
सुरेन्द्रैराराध्यः श्रुतिगणशिखागीतचरितो
जगन्नाथः स्वामी नयनपथगामी भवतु मे।
रथारूढो गच्छन्पथि मिलितभूदेवपटलैः
स्तुतिप्रादुर्भावं प्रतिपदमुपाकर्ण्य सदयः।
दयासिन्धुर्बन्धुः सकलजगतां सिन्धुसुतया
जगन्नाथः स्वामी नयनपथगामी भवतु मे।
परब्रह्मापीडः कुवलयदलोत्फुल्लनयनो
निवासी नीलाद्रौ निहितचरणोऽनन्तशिरसि।
रसानन्दो राधासरसवपुरालिङ्गनसुखो
जगन्नाथः स्वामी नयनपथगामी भवतु मे।
न वै प्रार्थ्यं राज्यं न च कनकता भोगविभवे
न याचेऽहं रम्यां निखिलजनकाम्यां वरवधूम्।
सदा काले काले प्रथमपतिना गीतचरितो
जगन्नाथः स्वामी नयनपथगामी भवतु मे।
हर त्वं संसारं द्रुततरमसारं सुरपते
हर त्वं पापानां विततिमपरां यादवपते।
अहो दीनानाथं निहितमचलं पातुमनिशं
जगन्नाथः स्वामी नयनपथगामी भवतु मे।
kadaachit kaalindeetat'avipinasangeetakavaro
mudaa gopeenaareevadana- kamalaasvaadamadhupah'.
ramaashambhubrahmaamarapati- ganeshaarchitapado
jagannaathah' svaamee nayanapathagaamee bhavatu me.
bhuje savye venum shirasi shikhipinchham kat'itat'e
dukoolam netraante sahacharakat'aaksham cha vidadhat.
sadaa shreemadbri'ndaavanavasati- leelaaparichayo
jagannaathah' svaamee nayanapathagaamee bhavatu me.
mahaambhodhesteere kanakaruchire neelashikhare
vasanpraasaadaantah' sahajabalabhadrena balinaa.
subhadraamadhyasthah' sakalasurasevaavasarado
jagannaathah' svaamee nayanapathagaamee bhavatu me.
kri'paapaaraavaarah' sajalajaladashreniruchiro
ramaavaaneesoma- sphuradamalapadmodbhavamukhaih'.
surendrairaaraadhyah' shrutiganashikhaageetacharito
jagannaathah' svaamee nayanapathagaamee bhavatu me.
rathaarood'ho gachchhanpathi militabhoodevapat'alaih'
stutipraadurbhaavam pratipadamupaakarnya sadayah'.
dayaasindhurbandhuh' sakalajagataam sindhusutayaa
jagannaathah' svaamee nayanapathagaamee bhavatu me.
parabrahmaapeed'ah' kuvalayadalotphullanayano
nivaasee neelaadrau nihitacharano'nantashirasi.
rasaanando raadhaasarasavapuraalinganasukho
jagannaathah' svaamee nayanapathagaamee bhavatu me.
na vai praarthyam raajyam na cha kanakataa bhogavibhave
na yaache'ham ramyaam nikhilajanakaamyaam varavadhoom.
sadaa kaale kaale prathamapatinaa geetacharito
jagannaathah' svaamee nayanapathagaamee bhavatu me.
hara tvam samsaaram drutataramasaaram surapate
hara tvam paapaanaam vitatimaparaam yaadavapate.
aho deenaanaatham nihitamachalam paatumanisham
jagannaathah' svaamee nayanapathagaamee bhavatu me.
Other stotras
