ఏకముఖీ హనుమాన్ కవచం
పార్వత్యువాచ
భగవన్ దేవదేవేశ లోకనాథ జగద్గురో .
శోకాకులానాం లోకానాం కేన రక్షా భవేద్ధ్రువం ..
సంగ్రామే సంకటే ఘోరే భూతప్రేతాదికే భయే .
దుఃఖదావాగ్నిసంతప్తచేతసాం దుఃఖభాగినాం ..
ఈశ్వర ఉవాచ
శృణు దేవి ప్రవక్ష్యామి లోకానాం హితకామ్యయా .
విభీషణాయ రామేణ ప్రేమ్ణా దత్తం చ యత్పురా ..
కవచం కపినాథస్య వాయుపుత్రస్య ధీమతః .
గుహ్యం తే సంప్రవక్ష్యామి విశేషాచ్ఛృణు సుందరి ..
ధ్యాయేద్బాలదివాకరధృతినిభం దేవారిదర్పాపహం
దేవేంద్రప్రముఖప్రశస్తయశసం దేదీప్యమానం రుచా .
సుగ్రీవాదిసమస్తవానరయుతం సువ్యక్తతత్త్వప్రియం
సంరక్తారుణలోచనం పవనజం పీతాంబరాలంకృతం ..
ఉద్యన్మార్తండకోటిప్రకటరుచియుతం చారువీరాసనస్థం
మౌంజీయజ్ఞోపవీతారుణరుచిరశిఖాశోభితం కుండలాంగం .
భక్తానామిష్టదం తం ప్రణతమునిజనం వేదనాదప్రమోదం
ధ్యాయేద్దేవం విధేయం ప్లవగకులపతిం గోష్పదీభూతవార్ధిం ..
వజ్రాంగం పింగకేశాఢ్యం స్వర్ణకుండలమండితం .
నియుద్ధకర్మకుశలం పారావారపరాక్రమం ..
వామహస్తే మహావృక్షం దశాస్యకరఖండనం .
ఉద్యద్దక్షిణదోర్దండం హనుమంతం విచింతయేత్ ..
అపరాజిత నమస్తేఽస్తు నమస్తే రామపూజిత .
ప్రస్థానం చ కరిష్యామి సిద్ధిర్భవతు మే సదా ..
యో వారాంనిధిమల్పపల్వలమివోల్లంఘ్య ప్రతాపాన్వితో
వైదేహీఘనశోకతాపహరణో వైకుంఠతత్త్వప్రియః .
అక్షాద్యర్చితరాక్షసేశ్వరమహాదర్పాపహారీ రణే .
సోఽయం వానరపుంగవోఽవతు సదా యుష్మాన్సమీరాత్మజః ..
వజ్రాంగం పింగకేశం కనకమయలసత్కుండలాక్రాంతగండం
నానా విద్యాధినాథం కరతలవిధృతం పూర్ణకుంభం దృఢం చ
భక్తాభీష్టాధికారం విదధతి చ సదా సర్వదా సుప్రసన్నం
త్రైలోక్యత్రాణకారం సకలభువనగం రామదూతం నమామి ..
ఉద్యల్లాంగూలకేశప్రలయజలధరం భీమమూర్తిం కపీంద్రం
వందే రామాంఘ్రిపద్మభ్రమరపరివృతం తత్త్వసారం ప్రసన్నం .
వజ్రాంగం వజ్రరూపం కనకమయలసత్కుండలాక్రాంతగండం
దంభోలిస్తంభసారప్రహరణవికటం భూతరక్షోఽధినాథం ..
వామే కరే వైరిభయం వహంతం శైలం చ దక్షే నిజకంఠలగ్నం .
దధానమాసాద్య సువర్ణవర్ణం భజేజ్జ్వలత్కుండలరామదూతం ..
పద్మరాగమణికుండలత్విషా పాటలీకృతకపోలమండలం .
దివ్యగేహకదలీవనాంతరే భావయామి పవమాననందనం ..
ఈశ్వర ఉవాచ
ఇతి వదతి విశేషాద్రాఘవో రాక్షసేంద్రం
ప్రముదితవరచిత్తో రావణస్యానుజో హ .
రఘువరవరదూతం పూజయామాస భూయః
స్తుతిభిరకృతార్థః స్వం పరం మన్యమానః ..
వందే విద్యుద్వలయసుభగస్వర్ణయజ్ఞోపవీతం
కర్ణద్వంద్వే కనకరుచిరే కుండలే ధారయంతం .
ఉచ్చైర్హృష్యద్ద్యుమణికిరణశ్రేణిసంభావితాంగం
సత్కౌపీనం కపివరవృతం కామరూపం కపీంద్రం ..
శ్రీరామ ఉవాచ
హనుమాన్ పూర్వతః పాతు దక్షిణే పవనాత్మజః .
ప్రతీచ్యాం పాతు రక్షోఘ్న ఉత్తరస్యామబ్ధిపారగః ..
ఉదీచ్యామూర్ధ్వగః పాతు కేసరీప్రియనందనః .
అధశ్చ విష్ణుభక్తస్తు పాతు మధ్యే చ పావనిః ..
అవాంతరదిశః పాతు సీతాశోకవినాశనః .
లంకావిదాహకః పాతు సర్వాపద్భ్యో నిరంతరం ..
సుగ్రీవసచివః పాతు మస్తకం వాయునందనః .
భాలం పాతు మహావీరో భ్రువోర్మధ్యే నిరంతరం ..
నేత్రే ఛాయాఽపహారీ చ పాతు నః ప్లవగేశ్వరః .
కపోలకర్ణమూలే తు పాతు శ్రీరామకింకరః ..
నాసాగ్రే అంజనాసూనుర్వక్త్రం పాతు హరీశ్వరః .
వాచం రుద్రప్రియః పాతు జిహ్వాం పింగలలోచనః ..
పాతు దంతాన్ ఫాల్గునేష్టశ్చిబుకం దైత్యప్రాణహృత్ .
పాతు కంఠం చ దైత్యారిః స్కంధౌ పాతు సురార్చితః ..
భుజౌ పాతు మహాతేజాః కరౌ తు చరణాయుధః .
నఖాన్నఖాయుధః పాతు కుక్షిం పాతు కపీశ్వరః ..
వక్షో ముద్రాపహారీ చ పాతు పార్శ్వే భుజాయుధః .
లంకావిభంజనః పాతు పృష్ఠదేశే నిరంతరం ..
నాభించ రామదూతస్తు కటిం పాత్వనిలాత్మజః .
గుహ్మం పాతు మహాప్రాజ్ఞః సృక్కిణీ చ శివప్రియః ..
ఊరూ చ జానునీ పాతు లంకాప్రాసాదభంజనః .
జంఘే పాతు మహాబాహుర్గుల్ఫౌ పాతు మహాబలః ..
అచలోద్ధారకః పాతు పాదౌ భాస్కరసన్నిభః .
పాదాంతే సర్వసత్వాఢ్యః పాతు పాదాంగులీస్తథా ..
సర్వాంగాని మహావీరః పాతు రోమాణి చాత్మవాన్ .
హనుమత్కవచం యస్తు పఠేద్విద్వాన్ విచాక్షణః ..
స ఏవ పురుషశ్రేష్ఠో భక్తిం ముక్తిం చ విందతి .
త్రికాలమేకకాలం వా పఠేన్మాసత్రయం సదా ..
సర్వాన్ రిపూన్ క్షణే జిత్వా స పుమాన్ శ్రియమాప్నుయాత్ .
మధ్యరాత్రే జలే స్థిత్వా సప్తవారం పఠేద్యది ..
క్షయాఽపస్మారకుష్ఠాదితాపత్రయనివారణం .
ఆర్కివారేఽశ్వత్థమూలే స్థిత్వా పఠతిః యః పుమాన్ ..
అచలాం శ్రియమాప్నోతి సంగ్రామే విజయీ భవేత్ ..
యః కరే ధారయేన్నిత్యం స పుమాన్ శ్రియమాప్నుయాత్ .
వివాహే దివ్యకాలే చ ద్యూతే రాజకులే రణే ..
భూతప్రేతమహాదుర్గే రణే సాగరసంప్లవే .
దశవారం పఠేద్రాత్రౌ మితాహారీ జితేంద్రియః ..
విజయం లభతే లోకే మానవేషు నరాధిపః .
సింహవ్యాఘ్రభయే చాగ్నౌ శరశస్త్రాస్త్రయాతనే ..
శృంఖలాబంధనే చైవ కారాగ్రహనియంత్రణే .
కాయస్తంభే వహ్నిదాహే గాత్రరోగే చ దారుణే ..
శోకే మహారణే చైవ బ్రహ్మగ్రహవినాశనే .
సర్వదా తు పఠేన్నిత్యం జయమాప్నోత్యసంశయం ..
భూర్జే వా వసనే రక్తే క్షౌమే వా తాలపత్రకే .
త్రిగంధేనాథవా మస్యా లిఖిత్వా ధారయేన్నరః ..
పంచసప్తత్రిలౌహైర్వా గోపితం కవచం శుభం .
గలే కట్యాం బాహుమూలే వా కంఠే శిరసి ధారితం ..
సర్వాన్ కామానవాప్నోతి సత్యం శ్రీరామభాషితం ..
Other stotras
