ನವ ದುರ್ಗಾ ಸ್ತೋತ್ರ

ಚಂದ್ರಾರ್ಧಧಾರಕತನೂಂ ಚ ವರಾಂ ಚರಾಣಾಂ
ವಾಚಾಲವಾಙ್ಮಯಕರಾಂ ಚ ವಿಭವಾಂ ವಿಭೂಷಾಂ.
ವಿದ್ಯಾಜ್ಞವಂದಿತವರಾಂ ವ್ರತಪರ್ವಪುಣ್ಯಾಂ
ವಂದೇ ಶುಭಾಂ ಶಿವಸಖೀಂ ಹಿಮಶೈಲಪುತ್ರೀಂ.
ಓಂ ಶೈಲಪುತ್ರ್ಯೈ ನಮಃ.
ದೋರ್ಭ್ಯಾಂ ಕಮಂಡಲುಸಿತಸ್ಫಟಿಕೇ ದಧಾನಾಂ
ಬ್ರಹ್ಮಪ್ರಚಾರನಿಯುತಾಂ ಸುರಸೇವ್ಯಮಾನಾಂ.
ವೇದೇಷು ವರ್ಣಿತವರಾಂ ವಿಕಟಸ್ವರೂಪಾಂ
ವಂದೇ ಹಿ ಚೋತ್ತಮಗುಣಾಂ ಶ್ರುತಿವಾದಿನೀಂ ತಾಂ.
ಓಂ ಬ್ರಹ್ಮಚಾರಿಣ್ಯೈ ನಮಃ.
ಕೋಪಪ್ರತಾಪಶರಮೌರ್ವಿಯುತಾಂ ಪುರಾಣಾಂ
ಚಂದ್ರಪ್ರಕಾಶಸದೃಶಾನಲಭಾಲಯುಕ್ತಾಂ.
ವೀರಾಭಿವಾಂಛಿತಸಮಸ್ತವರಪ್ರದಾಂ ತಾಂ
ವಂದೇ ವಿಶಾಲವಸನಾಂ ಶ್ರುತಚಂದ್ರಘಂಟಾಂ.
ಓಂ ಚಂದ್ರಘಂಟಾಯೈ ನಮಃ.
ಸತ್ತ್ವಾಂ ಸುವರ್ಣವದನಾಂ ಸತತಂ ಸುತಪ್ತಾಂ
ಯಜ್ಞಕ್ರಿಯಾಸು ವರದಾಂ ವಿತನೂಂ ವಿವಂದ್ಯಾಂ.
ಕಾಲಾಂ ಕುಶಾಗ್ರಸಮಬುದ್ಧಿಮತೀಂ ಹಿರಣ್ಯಾಂ.
ವಂದೇ ಕುಶಾಂ ಕುವಲಯಾಂ ಗಣದೇವತಾಂ ತಾಂ.
ಓಂ ಕೂಷ್ಮಾಂಡಾಯೈ ನಮಃ.
ಶಂಭೋಃ ಸುಪತ್ನಿಪರಮಾಂ ಸ್ಮೃತಿವರ್ಣಿತೇಶಾಂ
ದೇವೀಂ ಶರಾಗ್ರದಹನಾಂ ಶತಸೂರ್ಯದೀಪ್ತಾಂ.
ಈಪ್ಸಾಧಿಕಪ್ರಫಲದಾಂ ಪರಮಾಮೃತಜ್ಞಾಂ
ವಂದೇ ಸುಶಬ್ದಜನನೀಂ ಗುಹಮಾತೃಕಾಂ ತಾಂ.
ಓಂ ಸ್ಕಂದಮಾತ್ರೇ ನಮಃ.
ಕಾಮೇಶ್ವರೀಂ ಕುಮುದಮಾಲಿಕಮಾಲಿನೀಂ ತಾಂ
ಕಲ್ಪಂ ದಿನಾರ್ಧಮಿತಮಾತ್ರಕದೈವತಾಖ್ಯಾಂ.
ಕಾತ್ಯಾಯನೀಂ ದಿವಿಜಕನ್ಯಕುಮಾರಿಕಾಂ ಕಾಂ
ವಂದೇ ತಪೋಧನನಿಭಾಂ ಕತಪುತ್ರಿಕಾಂ ತಾಂ.
ಓಂ ಕಾತ್ಯಾಯನ್ಯೈ ನಮಃ.
ಕಲ್ಯಾಣಕರ್ತೃವರದಾಂ ಚ ಸುಖಾರ್ಥದಾತ್ರೀಂ
ಕಾವ್ಯಾಮೃತಾಕಲಿತಕಾಲಕಲಾಪ್ರವೀಣಾಂ.
ಪಾಪಾಪನೋದನಕರಾಂ ಪರಮಸ್ವರೂಪಾಂ
ವಂದೇ ಸದಾ ಹಿ ಸಕಲಾಂ ನಿಜಕಾಲರಾತ್ರಿಂ.
ಓಂ ಕಾಲರಾತ್ರ್ಯೈ ನಮಃ.
ಇಂದೀವರೇಂದ್ರವದನಾಮಭಯಾಂ ಪ್ರಸನ್ನಾಂ
ಪ್ರಾಣಪ್ರದಾಂ ಪ್ರವರಪರ್ವತಪುತ್ರಿಕಾಂ ತಾಂ.
ದೇವೀಂ ಸುಭಕ್ತವರದಾಂ ಪರಮೇಡ್ಯಮಾನಾಂ
ವಂದೇ ಪ್ರಿಯಾಂ ಪ್ರವದನಾಂ ಪೃಥುಗೌರವರ್ಣಾಂ.
ಓಂ ಮಹಾಗೌರ್ಯೈ ನಮಃ.
ಸಂವೃತ್ತಸಂಯಮಧನಾಂ ಸ್ಮಿತಭಾವದೃಶ್ಯಾಂ
ಶುದ್ಧಾಂ ಸುರಕ್ತವರಭಕ್ತನುತಿಪ್ರಕಾಮಾಂ.
ಸಿದ್ಧಾದಿದೇವವರಯೋನಿಭಿರರ್ಚಿತಾಂ ತಾಂ
ವಂದೇ ಸುರೋದ್ಭವಕರಾಂ ಸಮಸಿದ್ಧಿದಾತ್ರೀಂ.
ಓಂ ಸಿದ್ಧಿದಾತ್ರ್ಯೈ ನಮಃ.