ಅಂಬಾ ಸ್ತುತಿ
ಚೇಟೀ ಭವನ್ನಿಖಿಲಖೇಟೀ ಕದಂಬವನವಾಟೀಷು ನಾಕಪಟಲೀ
ಕೋಟೀರಚಾರುತರಕೋಟೀಮಣೀಕಿರಣಕೋಟೀಕರಂಬಿತಪದಾ .
ಪಾಟೀರಗಂಧಿಕುಚಶಾಟೀ ಕವಿತ್ವಪರಿಪಾಟೀ ಮಗಾಧಿಪಸುತಾ
ಘೋಟೀಖುರಾದಧಿಕಧಾಟೀಮುದಾರಮುಖವೀಟೀರಸೇನ ತನುತಾಂ ‖ 1 ‖
ದ್ವೈಪಾಯನಪ್ರಭೃತಿಶಾಪಾಯುಧತ್ರಿದಿವಸೋಪಾನಧೂಲಿಚರಣಾ
ಪಾಪಾಪಹಸ್ವಮನುಜಾಪಾನುಲೀನಜನತಾಪಾಪನೋದನಿಪುಣಾ .
ನೀಪಾಲಯಾ ಸುರಭಿಧೂಪಾಲಕಾ ದುರಿತಕೂಪಾದುದಂಚಯತು ಮಾಂ
ರೂಪಾಧಿಕಾ ಶಿಖರಿಭೂಪಾಲವಂಶಮಣಿದೀಪಾಯಿತಾ ಭಗವತೀ ‖ 2 ‖
ಯಾಲೀಭಿರಾತ್ಮತನುತಾಲೀನಕೃತ್ಪ್ರಿಯಕಪಾಲೀಷು ಖೇಲತಿ ಭವಾ
ವ್ಯಾಲೀನಕುಲ್ಯಸಿತಚೂಲೀಭರಾ ಚರಣಧೂಲೀಲಸನ್ಮಣಿಗಣಾ .
ಯಾಲೀಭೃತಿ ಶ್ರವಸಿ ತಾಲೀದಲಂ ವಹತಿ ಯಾಲೀಕಶೋಭಿತಿಲಕಾ
ಸಾಲೀಕರೋತು ಮಮ ಕಾಲೀ ಮನಃ ಸ್ವಪದನಾಲೀಕಸೇವನವಿಧೌ ‖ 3 ‖
ಬಾಲಾಮೃತಾಂಶುನಿಭಫಾಲಾಮನಾಗರುಣಚೇಲಾ ನಿತಂಬಫಲಕೇ
ಕೋಲಾಹಲಕ್ಷಪಿತಕಾಲಾಮರಾಕುಶಲಕೀಲಾಲಶೋಷಣರವಿಃ .
ಸ್ಥೂಲಾ ಕುಚೇ ಜಲದನೀಲಾಕಚೇ ಕಲಿತವೀಲಾ ಕದಂಬವಿಪಿನೇ
ಶೂಲಾಯುಧಪ್ರಣತಿಶೀಲಾ ದಧಾತು ಹೃದಿ ಶೈಲಾಧಿರಾಜತನಯಾ ‖ 4 ‖
ಕಂಬಾವತೀವ ಸವಿಡಂಬಾ ಗಲೇನ ನವತುಂಬಾಭವೀಣಸವಿಧಾ
ಬಿಂಬಾಧರಾ ವಿನತಶಂಬಾಯುಧಾದಿನಿಕುರುಂಬಾ ಕದಂಬವಿಪಿನೇ .
ಅಂಬಾ ಕುರಂಗಮದಜಂಬಾಲರೋಚಿರಿಹ ಲಂಬಾಲಕಾ ದಿಶತು ಮೇ
ಶಂ ಬಾಹುಲೇಯಶಶಿಬಿಂಬಾಭಿರಾಮಮುಖಸಂಬಾಧಿತಾ ಸ್ತನಭರಾ ‖ 5 ‖
ದಾಸಾಯಮಾನಸುಮಹಾಸಾ ಕದಂಬವನವಾಸಾ ಕುಸುಂಭಸುಮನೋ-
ವಾಸಾ ವಿಪಂಚಿಕೃತರಾಸಾ ವಿಧೂತಮಧುಮಾಸಾರವಿಂದಮಧುರಾ .
ಕಾಸಾರಸೂನತತಿಭಾಸಾಭಿರಾಮತನುರಾಸಾರಶೀತಕರುಣಾ
ನಾಸಾಮಣಿಪ್ರವರಭಾಸಾ ಶಿವಾ ತಿಮಿರಮಾಸಾದಯೇದುಪರತಿಂ ‖ 6 ‖
ನ್ಯಂಕಾಕರೇ ವಪುಷಿ ಕಂಕಾಲರಕ್ತಪುಷಿ ಕಂಕಾದಿಪಕ್ಷಿವಿಷಯೇ
ತ್ವಂ ಕಾಮನಾಮಯಸಿ ಕಿಂ ಕಾರಣಂ ಹೃದಯಪಂಕಾರಿಮೇ ಹಿ ಗಿರಿಜಾಂ .
ಶಂಕಾಶಿಲಾನಿಶಿತಟಂಕಾಯಮಾನಪದಸಂಕಾಶಮಾನಸುಮನೋ-
ಝಂಕಾರಿಭೃಂಗತತಿಮಂಕಾನುಪೇತಶಶಿಸಂಕಾಶವಕ್ತ್ರಕಮಲಾಂ ‖ 7 ‖
ಜಂಭಾರಿಕುಂಭಿಪೃಥುಕುಂಭಾಪಹಾಸಿ ಕುಚಸಂಭಾವ್ಯಹಾರಲತಿಕಾ
ರಂಭಾಕರೀಂದ್ರಕರದಂಭಾಪಹೋರುಗತಿಡಿಂಭಾನುರಂಜಿತಪದಾ .
ಶಂಭಾ ಉದಾರಪರಿರಂಭಾಂಕುರತ್ಪುಲಕದಂಭಾನುರಾಗಪಿಶುನಾ
ಶಂ ಭಾಸುರಾಭರಣಗುಂಭಾ ಸದಾ ದಿಶತು ಶುಂಭಾಸುರಪ್ರಹರಣಾ ‖ 8 ‖
ದಾಕ್ಷಾಯಣೀ ದನುಜಶಿಕ್ಷಾವಿಧೌ ವಿಕೃತದೀಕ್ಷಾ ಮನೋಹರಗುಣಾ
ಭಿಕ್ಷಾಶಿನೋ ನಟನವೀಕ್ಷಾವಿನೋದಮುಖಿ ದಕ್ಷಾಧ್ವರಪ್ರಹರಣಾ .
ವೀಕ್ಷಾಂ ವಿಧೇಹಿ ಮಯಿ ದಕ್ಷಾ ಸ್ವಕೀಯಜನಪಕ್ಷಾ ವಿಪಕ್ಷವಿಮುಖೀ
ಯಕ್ಷೇಶಸೇವಿತನಿರಾಕ್ಷೇಪಶಕ್ತಿ ಜಯ ಲಕ್ಷಾವಧಾನಕಲನಾ ‖ 9 ‖
ವಂದಾರುಲೋಕವರಸಂಧಾಯಿನೀ ವಿಮಲಕುಂದಾವದಾತರದನಾ
ವೃಂದಾರುವೃಂದಮಣಿವೃಂದಾರವಿಂದಮಕರಂದಾಭಿಷಿಕ್ತಚರಣಾ .
ಮಂದಾನಿಲಾ ಕಲಿತಮಂದಾರದಾಮಭಿರಮಂದಾಭಿರಾಮಮಕುಟಾ
ಮಂದಾಕಿನೀಜವನಭಿಂದಾನವಾಚಮರವಿಂದಾನನಾ ದಿಶತು ಮೇ ‖ 10 ‖
ಯತ್ರಾಶಯೋ ಲಗತಿ ತತ್ರಾಗಜಾ ಭವತು ಕುತ್ರಾಪಿ ನಿಸ್ತುಲಶುಕಾ
ಸುತ್ರಾಮಕಾಲಮುಖಸತ್ರಾಸಕಪ್ರಕರಸುತ್ರಾಣಕಾರಿಚರಣಾ .
ಛತ್ರಾನಿಲಾತಿರಯಪತ್ತ್ರಾಭಿರಾಮಗುಣಮಿತ್ರಾಮರೀಸಮವಧೂಃ
ಕುತ್ರಾಸಹೀನಮಣಿಚಿತ್ರಾಕೃತಿಸ್ಫುರಿತಪುತ್ರಾದಿದಾನನಿಪುಣಾ ‖ 11 ‖
ಇಂಧಾನಕೀರಮಣಿಬಂಧಾ ಭವೇ ಹೃದಯಬಂಧಾವತೀವ ರಸಿಕಾ
ಸಂಧಾವತೀ ಭುವನಸಂಧಾರಣೇಽಪ್ಯಮೃತಸಿಂಧಾವುದಾರನಿಲಯಾ .
ಗಂಧಾನುಭಾವಮುಹುರಂಧಾಲಿಪೀತಕಚಬಂಧಾ ಸಮರ್ಪಯತು ಮೇ
ಶಂ ಧಾಮ ಭಾನುಮಪಿ ರುಂಧಾನಮಾಶು ಪದಸಂಧಾನಮಪ್ಯನುಗತಾ ‖ 12 ‖
Other stotras
