ഗൗരീ ശതക സ്തോത്രം

അനന്തമഹിമവ്യാപ്തവിശ്വാം വേധാ ന വേദ യാം .
യാ ച മാതേവ ഭജതേ പ്രണതേ മാനവേ ദയാം ..

നതാപനീതക്ലേശായാഃ സുരാരിജനതാപനീ .
ന താപനീ തനുര്യസ്യാസ്തുല്യാ നാദീനതാപനീ ..

വക്ത്രപദ്മാ വിധേർഭാന്തി യയാ സർഗലയോ ദയാ .
യാ സാക്ഷാദ്യാ ച ജനിതസ്ഥിതിസർഗലയോദയാ ..

യാശ്രിതാ പാവനതയാ യാതനാച്ഛിദനീചയാ .
യാചനീയാ ധിയാ മായായാമായാസം സ്തുതാ ശ്രിയാ ..

നമാംസി ധ്വംസമായാന്തി അസ്യാഃ സ്തുത്യാദരേണ വഃ .
തസ്യാഃ സിദ്ധ്യൈ ധിയാം മാതുഃ കല്പന്താം പാദരേണവഃ ..

ഋഷീണാം സാദയാമാസ യാ തമാംസി ത്രയീമയീ .
പായാദ്വഃ സാ ദയാമാധിച്ഛിദം ജഗതി ബിഭ്രതീ ..

സ്മരദ്വിഷാ യാ യയാചേ യയാ ചേയം വിധേഃ ക്രിയാ .
യാം ചാച്യുതോഽപി തുഷ്ടാവ തുഷ്ടാ വഃ സാഽസ്തു പാർവതീ ..

യാ ദമാവനയാഗേന സ്വാരാഥാ നയസാരയാ .
ഹരികൈതവഹാസ്യായ സായാമാ വിജിതാ യയാ ..

യായതാജിവിമയാ സാ യസ്യാ ഹാ ബത കൈരിഹ .
യാ രസായനധാരാ സ്വാ ന ഗേയാനവമാ ദയാ ..

സാ ബുദ്ധിരുത്തമാലോകഃ സതാമാര്യാ പുനാതു വഃ .
യദ്ഭക്തേരുത്തമാ ലോകഃ പ്രാപ്നോത്യേഷ വിശുദ്ധതാം ..

അയുദ്ധ സാധുത്രാണായ സാമരാ യാ സഹാരിണാ .
ഖഡ്ഗേന ദീപ്രാ ദേവാനാം സാമരായാസഹാരിണാ ..

ചരണാഘാതനിഹതകാസരാ ച രണാജിരേ .
രരാജ യാ നയജയൈരരാജസജനാനതാ ..

സാവതാദ്വോഽമ്ബികാഽഭ്യർച്യനാമാ ന ന യശോഭിതഃ .
തനോതി പ്രണതോ യസ്യാ നാ മാനനയശോഭിതഃ ..

സംയതം യാചമാനേന യസ്യാഃ പ്രാപി ദ്വിഷാ വധഃ .
സംയതം യാ ച മാനേന യുനക്തി പ്രണതം ജനം ..

യാ ദമാനവമാനന്ദപദമാനനമാനദാ .
ദാനമാനക്ഷമാനിത്യധനമാനവമാനിതാ ..

സാ രക്ഷതാദപാരാ തേ രസകൃദ്ഗൗരബാധികാ .
സാരക്ഷതാദപാരാതേരസകൃദ്ഗൗരവാധികാ ..

അനുത്തമോഹരാശയോ ഭവന്തി യാമനാശ്രിതാഃ .
അനുത്തമോ ഹരാശയോ യയാ ചിരം ച രഞ്ജിതഃ ..

അനന്തരാഗതാപായാസ്താരയിത്രീ ഭവാപദഃ .
അനന്തരാഗതാപായാഃ സാ വോ ഗൗരീ ഹിയാത്ക്രിയാഃ ..

യാമായാസജിദാസക്തശോകജാലസ്യ പാതിനീ .
യാ മാതാ സർവദാ ഭക്തലോകജാലസ്യ പാലനീ ..

സാമരാഗമനായാസം ത്യക്ത്വാ സാർധം സുരാരിഭിഃ .
സാമരാ ഗമനായാസന്നുദ്യതാ യുധി യദ്ഗണാഃ ..

സാമോദയാജയാ ശാതൈഃ ശസ്ത്രൈഃ ശത്രൗ ഹതേ യയാ .
സാമോദയാ ജയാശാ തൈർഗീർവാണൈർഗർവതോ ജഹേ ..

യയായായായ്യയാ യൂയം യോ യോഽയം യേയയൈയ യാം .
യയുയായിയയേയായ യയേഽയായായ യായയുക് ..

സാഽവ്യാദ്ഗൗരീ സദാ യുഷ്മാൻസദായുഷ്മാൻസമൃദ്ധ്യതി .
ശരണം യാം നരോ ഗച്ഛന്ന രോഗച്ഛന്ദമേതി ച ..

കൃതാസ്പദാ യഥാ സമ്പദഘാനി സുരവൈരിഷു .
ഹന്തി യാ വാങ്മയീ ദൂരാദഘാനി സുരവൈരിഷുഃ ..

ജിതാനയാ യാ നതാജിതാരസാതതസാരതാ .
ന സാവനാ നാവസാനയാതനാരിരിനാ തയാ ..

മനോഭവാരാതിമനോഭിരാമയാ ജരാമയാപാകരണൈകദക്ഷയാ .
മദക്ഷയാന്നിർമലതാം ദദാനയാ സദാ നയാസ്ഥാ ക്രിയതാം തവാര്യയാ ..

സമായയാവിന്ദ്രഹിതായ യാ രണേ സമായയാ യാ ന ജിതാരിസേനയാ .
സ മാ യയാചേ ഹരമാശ്രിതഃ സ്ഫുടം സമാ യയാ മുഗ്ധതയാ മനോജ്ഞതാഃ ..

സാ ഭാവക്ഷാലവര്യാ നുതവിഭവിതനുര്യാ വലക്ഷാവഭാസാ
ജാനാനസ്യാശയപ്രാ നവനലിനവനപ്രായശസ്യാനനാജാ .
സാതം വർമാനനസ്ഥാ രഹസി രസിഹരസ്ഥാനനർമാവതംസാ
പായാദക്താ രണത്രാ മതനമനതമത്രാണരക്താ ദയാപാ ..

ഉപാസതേ കൃഷ്ടികൃതോദയാം യാം ജനാ സദാരാധനമീഹമാനാഃ .
ശംഭോഃ പ്രസിദ്ധാ തനുതാം വഹന്തീ ഗൗരീ ഹിതം സാ ഭവതാം വിധേയാത് ..

യാം സദ്യ ഏവ ത്രിദശൈഃ പുമാംസഃ സമാ നമസ്യന്തി സദാനഭോഗാഃ .
അഘാനി യസ്യ പ്രണതാ വിപക്ഷൈഃ സമാനമസ്യന്തി സദാ നഭോഗാഃ ..

യസ്യാഃ പ്രഭാവോ ദ്യുസദാം വിപക്ഷസേനാ വധാനന്ദയിതാഹരസ്യ .
മനോംബുജസ്യാവഹതു ശ്രിയൈ വഃ സേനാവധാനം ദയിതാ ഹരസ്യ ..

സുരാ ജിതാ ഭാവിതദേവരാജദ്വിപക്ഷമാ യാത രണാദഭീതം .
സ്വാപം ന വോ ധാമ ഹിതം ന നാമ സദൈവസേനാ ഭവതോഹിതാനാം ..

സുരാജിതാ ഭാവിതദേവരാജദ്വിപക്ഷമായാ തരണാദഭീതം .
സ്വാപന്നബോധാമഹിതം നനാമ സദൈവ സേനാ ഭവതോ ഹിതാനാം ..

സുരാനിതി ദ്വേഷിജനൈരഭിദ്രുതാനുദാഹരദ്യാ സ്വയമാഹവോദ്യതാ .
ശിവോഽദ്യ താപപ്രശമസ്തയാ തവ പ്രശസ്തയാ തത്ത്വദൃശാ വിധീയതാം ..

വക്രം ബിഭ്രത്യുപഹിതചന്ദ്രായാസം യാ സംമോഹപ്രശമനസൂര്യാകാരാ .
കാരാനീതാമരമരിമാചിക്ഷേപ ക്ഷേപത്യക്താ രണഭുവി സാ വഃ പായാത് ..

ഹിതേ ഹിതേഽസ്തു തേ സ്തുതേ ജിതാജിതാമിതാമിതാ .
ജയാജയാ ജനോഽജനോ യയാ യയാവലം ബലം ..

യാ മൂർതിം കിമപി സ്മരാരിവപുഷാ ധത്തേ സമായോജിതാം
യാം ദൃഷ്ട്വൈവ വിനാശമാപ സഹസാ ശുംഭഃ സമായോഽജിതാം .
യാ നമ്രൈഃ സുരസിദ്ധികിംനരനരൈഃ ഖേദം വിനാ ശസ്യതേ
സാ ഹേതുർഭവതാം ത്രിലോചനവധൂരശ്രീവിനാശസ്യ തേ ..

സായാസായാസ്ത്രിലോക്യാഃ ശരണമകരുണക്ഷുണ്ണദൈത്യപ്രവീരാ
സ്വൈരം സ്വൈരംശസർഗൈർഗഹനതമമഹാമോഹഹാർദം ഹരന്തീ .
ശസ്യാശസ്യാദധാനാ സകലമഭിഹിതം ഭക്തിഭാജഃ സ്മൃതൈവ
സ്താദസ്താദഭ്രദോഷാ ദ്വിഷദുപശമനീ സർവതഃ പാർവതീ വഃ ..

സുരസുരചിതചിതനവനവഭവഭവനാനാദരാദരായേഥേ .
ലയലയചരണൗ ചരണൗ ന ന മാമി നതേന നമാമി ന തേ ..

യാ വിസ്മയം സ്മരഭിദാ ചക്രേഽങ്കാരോപിതാ നവം നാരീണാം .
വിദധേ യച്ചാപസ്യ ന ച ക്രേങ്കാരോഽപി താനവം നാരീണാം ..

യാ ഹന്താം ച പ്രയാതാ വിഹാഥസാ കംസമാഹ താരാതിബലേന .
കൃഷ്ണസ്തവ പരമായാ വിഹായ സാകം സമാഹതാരാതിബലേന ..

താം നമത യാ ച സമരേഷ്വനേകശോ ഭാതി ഭദ്രകാലീ നതയാ .
ഖ്യാതി യയാ ജനതോജ്ജ്വലവിവേകശോഭാതിഭദ്രാകാലീനതയാ ..

താം സ്മരത ഥാ സ്മൃതൈവ ഹി മാനവതാമരസമാനതാ രാതി ബലാത് .
യത്പ്രണതം ശ്രീഃ ശ്രയതേ മാനവതാമരസമാന താരാതി ബലാത് ..

അനവരാഗസമുദ്ഭവദേഹതാമുപഗതാ ദദൃശേ ഗിരിശേന യാ .
അനവരാഗസമുദ്ഭവദേഹ താമവനതോഽസ്മി ജഗാത്പ്രിയതാം സതീം ..

മേനേ നൂനമനേന മാനനമുമാനാമ്നാ നു മേനോന്മനാ
നുന്നേനോനമനേ നിമാനമമുനാ നോ നാമ നാനാനുമേ .
മൗനേനാമമമാനനിമ്നമനനാന്നാനാമിനാനൂനിമേ
സുന്മിന്നാനനമാ നമീ മുനിമനോമാനാനനോന്നാമിനി ..

താം വന്ദേഽഹം നവം ദേഹം ജ്ഞാനരൂപം വിധായ യാ .
സുഘീരസ്യതി ധീരസ്യ മഹാമോഹമയീം ത്വചം ..

യാം നുത്വാ യാന്തി ഹൃദ്യാർഥസജ്ജായാം ഗിരി ശസ്യതാം .
നൗമ്യഹം ഭക്തിമാസ്ഥായ സജ്ജായാം ഗിരിശസ്യ താം ..

യദാനതോഽയദാനതോ ന യാത്യയം നയാത്യയം .
ശിവേ ഹിതാം ശിവേഹിതാം സ്മരാമിതാം സ്മരാമി താം ..

സരസ്വതിപ്രസാദം മേ സ്ഥിതി ചിത്തസരസ്വതി .
സരസ്വതി കുരു ക്ഷേത്രകുരുക്ഷേത്രസരസ്വതി ..

ത്വദ്ഭക്തിഭാവിതധിയോ ജഗതാമത്ര യേ ത്രയേ .
ജന്മവത്താമഹം മന്യേ തേഷാമേവാനൃണാം നൃണാം ..

ജഗതഃ സാതിരേകാ ത്വം ഗതിരസ്യ സ്ഥിരാധികാ .
തരസ്യത്രാസതാരാരേഃ സാസ്യത്രാസരസസ്ഥിതി ..

ത്വന്നാമസ്മരണാദേവ ന ലക്ഷ്മീശ്ചപലായതേ .
സർവതഃ പാർവതി ക്ഷിപ്രമലക്ഷ്മീശ്ച പലായതേ ..

ജയന്തി ഭക്താ വിത്തേശസമരായസ്തബാഹവേ .
തുഭ്യന്നമസ്ത്രിലോക്യർഥസമരായസ്തബാഹവേ ..

സത്ത്വം സമ്യക്ത്വമുന്മീല്യ ഹൃദി ഭാസി വിരാജസേ .
ദ്വിഷാമരീണാ ത്വം സേനാം വാഹിനീമുദകമ്പയഃ ..

ദൂരാഗതരസാ ധന്യഃ സേവതേയസ്തവ സ്തുതീഃ .
ദൂരാഗത രസാധന്യഃ കല്പന്തേ തസ്യ സിദ്ധയഃ ..

മോഹം ഹത്വാസ്പദം യാസി സാത്ത്വമംബരവാസിനാ .
യാ ന സംസ്തൂയസേ കേന സാ ത്വംബരവസിനാ ..

പ്രകാശ്യ ഗൃഹ്യപുംസസ്യഖേദച്ഛേദാംബുദാവലീ .
പ്രജ്ഞാത്മനേനവിമലാ സ്മിതാ ദൃശ്യസി വിദ്വതാം ..

ഭവാനി യേ നിരന്തരം തവ പ്രണാമലാലസാഃ .
മനസ്തമോമലാലസാ ഭവന്തി നൈയ തു ക്വചിത് ..

വിഭാവനാകുലാ ത്വയി ക്രമേണ ദേവി ഭാവനാ .
വപുഷ്പതിസ്ഥിരേതരേ നിതാന്തമേവ പുഷ്യതി ..

മഹോഽദയാനാമവധീ രണേന മഹോദയാനാമവധീരണേന .
മഹോദയാനാമവ ധീരണേജമഹോദയാനാമവധീരണേന ..

ന മജ്ജനേന തീർഥാനാം തദിഹ പ്രാപ്യതേ ശുഭം .
നമജ്ജനേന തീർഥാനാം സേവയാ യത്തവാംബികേ ..

പ്രയാതി മോഹേ നിഃസാരഭാരതീവ്രതമേത്യയം .
ത്വാത്പ്രാസാദാജ്ജനഃ സാരഭാരതീവ്രതമേത്യയം ..

ശാസ്ത്രപ്രഭാവഹസിതാഃ സതാം യാ നിർമലാ ഗിരഃ .
ശാസ്ത്രപ്രഭാവഹസിതാസ്ത്വമംബതിമിരച്ഛിദഃ ..

ശമീഹ തേ സമാനതോ വിഭാവിതോഽത്രസന്ന യഃ .
വിഭാവിതോഽത്ര സന്നയഃ ശമീഹതേ സ മാനതഃ ..

മാതരം ത്വാ പദം സദ്യ ആശ്രിതാസ്തേ കഥം ജനാഃ .
മാ തരന്ത്വാപദം സദ്യ ആദ്യം ശ്രേയഃ സമാശ്രിതാഃ ..

ഭാതി ത്വത്തനുസംശ്ലേഷേ സത്യംബ വപുരനുത്തരം .
സംസാരാബ്ധൗ സദാഹുസ്തേ സത്യം വപുരനുത്തരം ..

യച്ഛ മേ നിത്യസംസംഗി യച്ഛമേ തദിദം മനഃ .
സ്വച്ഛലോ ഭക്തിയോഗസ്തേ സ്വച്ഛലോകവിവേകസൂഃ ..

കേ വലന്തേ വിതന്വന്തകൃതസ്ത്വത്പ്രണതാ ഭവേ .
കേവലം തേ വിതന്വന്ത ആസതേ വിമലാം ധിയം ..

ദേവി നിർദഗ്ധകാമസ്യ ത്വം നിരാവരണാത്മനഃ .
ഹരസ്യ ശുഭസന്താനം തേനാസൗ ഭ്രാജതേ തഥാ ..

ദ്വിഷദ്ഭിയാ സപദി വിമുച്യതേ യതസ്തവാനതോ ജനനി ജയാശയാ ന കഃ .
സ്തവാനതോ ജനനിജയാ ശയാനകഃ കരോതി തേ യുധി മധുസൂദനസ്വസഃ ..

ജ്യായോനിഷ്ഠാരിവര്യാധിനിയമനവരസ്വൈരദത്തായതാജ്ഞാ
സ്വാരാധത്വാസമധ്യാനിയജനജനനി ജ്ഞേയസുസ്ഥാവഭാസാ .
നാനാപുണ്യാഗമസ്ഥാ ജനനമനമയജ്ഞാനനന്ദ്യാ വരാ ധീ-
ര്യാതാ നവ്യാ വിഭുത്വം നുതസരലമനസ്താമസസ്യാവഹാസ്യേ ..

സ്യേഹാവ സ്യാ സമസ്താനമലരസതനു ത്വം ഭുവി വ്യാനതാര്യാ
ധീരാ വന്ദ്യാ ന ന ജ്ഞാ യമനമനനജസ്ഥാമഗണ്യാ പുനാനാ .
സാ ഭാവസ്ഥാ സുയജ്ഞേഽനിനജനജയനി ധ്യാമസത്ത്വാധരാസ്വാ
ജ്ഞാതായത്താദരസ്വൈരവനമനിധിര്യാ വരിഷ്ഠാനിയോജ്യാ ..

അലോലകമലേ ചിത്തലലാമകമലാലയേ .
പാഹി ചണ്ഡി മഹാമോഹഭംഗഭീമബലാമലേ ..

ദുർഗാപി മാതഃ സുലഭാസി ഭക്ത്യാ ഭവാനുകൂലാപി ഭവം ക്ഷിണോഷി .
അധ്യേയതാം യാസി സദൈവ ദേവി ധ്യേയാസി ചിത്രം ചരിതം തവൈതത് ..

മഹദേസുരസന്ധമ്മേ തമവസമാസംഗമാഗമാഹരണേ .
ഹരബഹുസരണം തം ചിത്തമോഹമവസര ഉമേ സഹസാ ..

വന്ദ്യാ പ്രഭാതസന്ധ്യേവ സൂര്യാലോകപ്രവർതിനീ .
നിവർതയസി ദേവി ത്വം മഹാമോഹമയീം നിശാം ..

സംവാദിസാരസമ്പത്തീസദാഗോരിജയേസുദേ .
തവസത്തീരദേ സന്തു സംസാരേ സുസമാനദേ ..

ആഗമമണിസുദമഹിമസമസംമദകൃദപരജസ്സു .
കിര സവിഭയവദിതോ സമയ ഉജ്ജലഭാവസഹസ്സു ..

ത്വം വാദേ ശാസ്ത്രസംഗിന്യാം ഭാസി വാചി ദിവൗകസഃ .
തവാദേശാസ്ത്രസംസ്കാരാജ്ജയന്തി വരദേ ദ്വിഷഃ ..

സദാവ്യാജവശിധ്യാതാഃ സദാത്തജപശിക്ഷിതാഃ .
ദദാസ്യജസ്രം ശിവതാഃ സൂദാത്താജദിശി സ്ഥിതാഃ ..

ഹരേഃ സ്വസാരം ദേവി ത്വാ ജനതാശ്രിത്യ തത്ത്വതഃ .
വേത്തി സ്വസാരം ദേവിത്വാ യോഗേന ക്ഷപിതാശുഭാ ..

സദാപ്നോതി യതിർജ്യോതിസ്താദൃശം സ്വത്പ്രഭാവതഃ .
പ്രഭാവതഃ സമോ യേന കല്പതേ മോഹനുത്തിതഃ ..

ത്വം സദ്ഗതിഃ സിതാപാരാ പരാ വിദ്യോത്തിതീർഷതഃ .
സംസാരാദത്ര ചാംബ ത്വം സത്ത്വം പാസി വിപത്തിതഃ ..

പരമാ യാ തപോവൃത്തിരാര്യായാസ്തം സ്മൃതിം ജനാഃ .
പരമായാത പോഷായ ധിയാം ശരണമാദൃതാഃ ..

പ്രവാദിമതഭേദേഷു ദൃശ്യസ്തേ മഹിമാശ്രയഃ .
ഭാന്തി ത്വത്ത്രിശിഖസ്യേവ ശിഖാനാമസമാശ്രയഃ ..

യച്ചേഷ്ടയാ തവ സ്ഫീതമുദാരവസു ധാമതഃ .
യച്ചേതോ യാത്യവഹിതമുദാ രവസുധാമതഃ ..

സുരദേശസ്യ തേ കീർതിം മണ്ഡനത്വം നയന്തി യൈഃ .
വരദേ ശസ്യതേ ധീരൈർഭവതീ ഭുവി ദേവതാ ..

തത്ത്വം വീതാവതതതുത്തത്വം തതവതീ തതഃ .
വിത്തം വിത്തവ വിത്തത്വം വീതാവീതവതാം ബത ..

താരേ ശരണമുദ്യന്തീ സുരേശരണമുദ്യമൈഃ .
ത്വം ദോഷാപാസിനോദഗ്രസ്വദോഷാ പാസി നോദനേ ..

സുമാതരക്ഷയാലോക രക്ഷയാത്തമഹാമനാഃ .
ത്വം ധൈര്യജനനീ പാസി ജനനീതിഗുണസ്ഥിതീഃ ..

ഖ്യാതികല്പനദക്ഷൈകാ ത്വം സാമർഗ്യജുഷാമിതഃ .
സദാ സരക്ഷസാംമുഖ്യദാനവാനാമസുസ്ഥിതിഃ ..

സിതാ സംസത്സു സത്താസ്തേ സ്തുതേസ്തേ സതതം സതഃ .
തതാസ്തിതൈത്തി തസ്തേതി സൂതിഃ സൂതിസ്തതോഽസി സാ ..

ത്വദാജ്ഞയാ ജഗത്സർവം ഭാസിതം മലനുദ്യതഃ .
സദാ ത്വയാ സഗന്ധർവം സമിദ്ധമരിനുത്തിതഃ ..

യതോ യാതി തതോഽത്യേതി യയാ താം തായതാം യതൈഃ .
മാതാമിതോത്തമതമാ തമോതീതാം മതിം മമ ..

മഹത്താം ത്വം ശ്രിതാ ദാസജനം മോഹച്ഛിദാ വസ .
യച്ഛദ്ധത്വം ഗതഃ പാപമന്യസ്യ പ്രസഭം ജയ ..

ത്വാം സാജ്ഞാസു ജഗന്മാതഃ സ്പഷ്ടം ജ്ഞാതാ സുവർത്മസു .
പ്രജ്ഞാ മുഖ്യാ സമുദ്ഭാസി തത്പൃഥുത്വം പ്രദർശയ ..

ആജ്ഞാസു ജഗന്മാതഃ സ്പഷ്ടം ജ്ഞാതാ സുവർത്മസു പ്രജ്ഞാ .
ഭാസി ത്വം സാ മുഖ്യാ സമുത്പൃഥുത്വം പ്രദർശയ തത് ..

ഹന്ത്ര്യോ രുഷഃ ക്ഷമാ ഏതാ സന്ദക്ഷോഭാസ്തമുന്നതഃ .
സതേഹിതഃ സേവതേ താഃ സതതം യഃ സ തേ ഹിതഃ ..

കരോഷി താത്സ്ത്വമുത്ഖാതമോഹസ്ഥാനേ സ്ഥിരാ മതീഃ .
പദം യതിഃ സുതപസാ ലഭതേഽതഃ സശുക്ലിമ ..

ദേവ്യാ സ്വപ്നോദ്ഗമാദിഷ്ടദേവീശതകസഞ്ജ്ഞയാ .
ദേശിതാനുപമാമാധാദതോ നോണസുതോ നുതിം ..

ഹാർദധ്വാന്തനിയന്തൃഭാസ്വരവപുഃ സ്വർവാസിനാം സർവതോ
ദുർവാരാരിപരിക്ഷയം വിദധതീ ധ്യാതൈവ ലർവാണസൂഃ .
ദേഹാർധേ നിഹിതാ ഭവേന ഭുവനത്രാണൈകതാനാത്മനാ
ദേവി ത്വം ത്വമിവാപരാ ജഗതി കാ സത്കേസരീന്ദ്രസ്ഥിതിഃ ..

ക്ലേശോന്മാഥകരീ സതാം ഭവഹരാനന്ദൈകഹേതോ ഗുരു-
ര്മാതാ ത്വം ജഗതാം ഭവന്തി വിധവാഃ സർവേ തവാനുഗ്രഹാത് .
ദുർഗേ ന ക്വചിദേവ സീദതി ജനസ്ത്വദ്ഭക്തിപൂതാശയഃ
സ്തുത്യാ ഭർതുരഭിന്നയേതി വിബുധൈസ്ത്വം സ്തൂയസേ ശ്രീരിവ ..

യേനാനന്ദകഥായാം ത്രിദശാനന്ദേ ച ലാലിതാ വാണീ .
തേന സുദുഷ്കരമേതത്സ്തോത്രം ദേവ്യാഃ കൃതം ഭക്ത്യാ ..

Ramaswamy Sastry and Vighnesh Ghanapaathi

Other stotras