സപ്തശതീ സാര ദുർഗാ സ്തോത്രം

യസ്യാ ദക്ഷിണഭാഗകേ ദശഭുജാ കാലീ കരാലാ സ്ഥിതാ
യദ്വാമേ ച സരസ്വതീ വസുഭുജാ ഭാതി പ്രസന്നാനനാ.
യത്പൃഷ്ഠേ മിഥുനത്രയം ച പുരതോ യസ്യാ ഹരിഃ സൈരിഭ-
സ്താമഷ്ടാദശബാഹുമംബുജഗതാം ലക്ഷ്മീം സ്മരേന്മധ്യഗാം.
ലം പൃഥ്വ്യാത്മകമർപയാമി രുചിരം ഗന്ധം ഹമഭ്രാത്മകം
പുഷ്പം യം മരുദാത്മകം ച സുരഭിം ധൂപം വിധൂതാഗമം.
രം വഹ്ന്യാത്മകദപികം വമമൃതാത്മാനം ച നൈവേദ്യകം
മാതർമാനസികാൻഗൃഹാണ രുചിരാൻപഞ്ചോപചാരാനമൂൻ.
കല്പാന്തേ ഭുജഗാധിപം മുരരിപാവാസ്തീര്യ നിദ്രാമിതേ
സഞ്ജാതൗ മധുകൈടഭൗ സുരരിപൂ തത്കർണപീയൂഷതഃ.
ദൃഷ്ട്വാ ഭീതിഭരാന്വിതേന വിധിനാ യാ സംസ്തുതാഽഘാതയദ്
വൈകുണ്ഠേന വിമോഹ്യ തൗ ഭഗവതീ താമസ്മി കാലീം ഭജേ.
യാ പൂർവം മഹിഷാസുരാർദിതസുരോദന്തശ്രുതിപ്രോത്ഥിത-
ക്രോധവ്യാപ്തശിവാദിദൈവതനുതോ നിർഗത്യ തേജോമയീ.
ദേവപ്രാപ്തസമസ്തവേഷരുചിരാ സിംഹേന സാകം സുര-
ദ്വേഷ്ടൄണാം കദനം ചകാര നിതരാം താമസ്മി ലക്ഷ്മീം ഭജേ.
സൈന്യം നഷ്ടമവേക്ഷ്യ ചിക്ഷുരമുഖാ യോക്തും യയുര്യേഽഥ താൻ
ഹത്വാ ശൃംഗഖുരാസ്യപുച്ഛവലനൈസ്ത്രസ്തത്ത്രിലോകീജനം.
ആക്രമ്യ പ്രപദേന തം ച മഹിഷം ശൂലേന കണ്ഠേഽഭിനദ്-
യാ മദ്യാരുണനേത്രവക്ത്രകമലാ താമസ്മി ലക്ഷ്മീം ഭജേ.
ബ്രഹ്മാ വിഷ്ണുമഹേശ്വരൗ ച ഗദിതും യസ്യാഃ പ്രഭാവം ബലം
നാലം സാ പരിപാലനായ ജഗതോഽസ്മാകം ച കുര്യാന്മതിം.
ഇത്ഥം ശക്രമുഖൈഃ സ്തുതാഽമരഗണൈര്യാ സംസ്മൃതാഽഽപദ്വ്രജം
ഹന്താഽസ്മീതി വരം ദദാവതിശുഭം താമസ്മി ലക്ഷ്മീം ഭജേ.
ഭൂയഃ ശുംഭനിശുംഭപീഡിതസുരൈഃ സ്തോത്രം ഹിമാദ്രൗ കൃതം
ശ്രുത്വാ തത്ര സമാഗതേശരമണീദേഹാദഭൂത്കൗശികീ.
യാ നൈജഗ്രഹണേരിതായ സുരജിദ്ദൂതായ സന്ധാരണേ
യോ ജേതാ സ പതിർമമേത്യകഥയത്താമസ്മി വാണീം ഭജേ.
തദ്ദൂതസ്യ വചോ നിശമ്യ കുപിതഃ ശുംഭോഽഥ യം പ്രേഷയത്
കേശാകർഷണവിഹ്വലാം ബലയുതസ്താമാനയേതി ദ്രുതം.
ദൈത്യം ഭസ്മ ചകാര ധൂമ്രനയനം ഹുങ്കാരമാത്രേണ യാ
തത്സൈന്യം ച ജഘാന യന്മൃഗപതിസ്താമസ്മി വാണീം ഭജേ.
ചണ്ഡം മുണ്ഡയുതം ച സൈന്യസഹിതം ദൃഷ്ട്വാഽഽഗതം സംയുഗേ
കാല്യാ ഭൈരവയാ ലലാടഫലകാദുദ്ഭൂതയാഘാതയത്.
താവാദായ സമാഗതേത്യഥ ച യാ തസ്യാഃ പ്രസന്നാ സതീ
ചാമുണ്ഡേത്യഭിധാം വ്യധാത്ത്രിഭുവനേ താമസ്മി വാണീം ഭജേ.
ശ്രുത്വാ സംയതി ചണ്ഡമുണ്ഡമരണം ശുംഭോ നിശുംഭാന്വിതഃ
ക്രുദ്ധസ്തത്ര സമേത്യ സൈന്യസഹിതശ്ചക്രേഽദ്ഭുതം സംയുഗം.
ബ്രഹ്മാണ്യാദിയുതാ രണേ ബലപതിം യാ രക്തബീജാസുരം
ചാമുണ്ഡാ പരിപീതരക്തമവധീത്താമസ്മി വാണീം ഭജേ.
ദൃഷ്ട്വാ രക്തജനുർവധം പ്രകുപിതൗ ശുംഭോ നിശുംഭോഽപ്യുഭൗ
ചക്രാതേ തുമുലം രണം പ്രതിഭയം നാനാസ്ത്രശസ്ത്രോത്കരൈഃ.
തത്രാദ്യം വിനിപാത്യ മൂർച്ഛിതമലം ഛിത്ത്വാ നിശുംഭം ശിരഃ
ഖഡ്ഗേനൈനമപാതയത്സപദി യാ താമസ്മി വാണീം ഭജേ.
ശുംഭം ഭ്രാതൃവധാദതീവ കുപിതം ദുർഗേ ത്വമന്യാശ്രയാത്
ഗർവിഷ്ഠാ ഭവ മേത്യുദീര്യ സഹസാ യുധ്യന്തമത്യുത്കടം.
ഏകൈവാഽസ്മി ന ചാപരേതി വദതീ ഭിത്ത്വാ ച ശൂലേന യാ
വക്ഷസ്യേനമപാതയദ്ഭുവി ബലാത്താമസ്മി വാണീം ഭജേ.
ദൈത്യേഽസ്മിന്നിഹതേഽനലപ്രഭൃതിഭിർദേവൈഃ സ്തുതാ പ്രാർഥിതാ
സർവാർതിപ്രശമായ സർവജഗതഃ സ്വീയാരിനാശായ ച.
ബാധാ ദൈത്യജനിർഭവിഷ്യതി യദാ തത്രാവതീര്യ സ്വയം
ദൈത്യാന്നാശയിതാസ്മ്യഹം വരമദാത്താമസ്മി വാണീം ഭജേ.
യശ്ചൈതച്ചരിതത്രയം പഠതി നാ തസ്യൈധതേ സന്തതി-
ര്ധാന്യം കീർതിധനാദികം ച വിപദാം സദ്യശ്ച നാശോ ഭവേത്.
ഇത്യുക്ത്വാന്തരധീയത സ്വയമഹോ യാ പൂജിതാ പ്രത്യഹം
വിത്തം ധർമമതിം സുതാംശ്ച ദദതേ താമസ്മി വാണീം ഭജേ.
ഇത്യേതത്കഥിതം നിശമ്യ ചരിതം ദേവ്യാഃ ശുഭം മേധസാ-
രാജാസൗ സുരഥഃ സമാധിരതുലം വൈശ്യശ്ച തേപേ തപഃ.
യാ തുഷ്ടാഽത്ര പരത്ര ജന്മനി വരം രാജ്യം ദദൗ ഭൂഭൃതേ
ജ്ഞാനം ചൈവ സമാധയേ ഭഗവതീം താമസ്മി വാണീം ഭജേ.
ദുർഗാസപ്തശതീത്രയോദശമിതാധ്യായാർഥസംഗർഭിതം
ദുർഗാസ്തോത്രമിദം പഠിഷ്യതി ജനോ യഃ കശ്ചിദത്യാദരാത്.
തസ്യ ശ്രീരതുലാ മതിശ്ച വിമലാ പുത്രഃ കുലാലങ്കൃതിഃ
ശ്രീദുർഗാചരണാരവിന്ദകൃപയാ സ്യാദത്ര കഃ സംശയഃ.
വേദാഭ്രാവനിസമ്മിതാ നവരസാ വർണാബ്ധിതുല്യാഃ കരാമ്നായാ
നന്ദകരേന്ദവോ യുഗകരാഃ ശൈലദ്വയോഽഗ്ന്യംഗകാഃ
ചന്ദ്രാംഭോധിസമാ ഭുജാനലമിതാ ബാണേഷവോഽബ്ജാർണവാ
നന്ദദ്വന്ദ്വസമാ ഇതീഹ കഥിതാ അധ്യായമന്ത്രാഃ ക്രമാത്.
ശ്രീമത്കാശീകരോപാഖ്യരാമകൃഷ്ണസുധീകൃതം.
ദുർഗാസ്തോത്രമിദം ധീരാഃ പശ്യന്തു ഗതമത്സരാഃ.