നവ ദുർഗാ സ്തവം
സർവോത്തുംഗാം സർവവിപ്രപ്രവന്ദ്യാം
ശൈവാം മേനാകന്യകാംഗീം ശിവാംഗീം.
കൈലാസസ്ഥാം ധ്യാനസാധ്യാം പരാംബാം
ശുഭ്രാം ദേവീം ശൈലപുത്രീം നമാമി.
കൗമാരീം താം കോടിസൂര്യപ്രകാശാം
താപാവൃത്താം ദേവദേവീമപർണാം.
വേദജ്ഞേയാം വാദ്യഗീതപ്രിയാം താം
ബ്രഹ്മോദ്ഗീഥാം ബ്രഹ്മരൂപാം നമാമി.
വൃത്താക്ഷീം താം വാസരാരംഭഖർവ-
സൂര്യാതാപാം ശൗര്യശക്ത്യൈകദാത്രീം.
ദേവീം നമ്യാം നന്ദിനീം നാദരൂപാം
വ്യാഘ്രാസീനാം ചന്ദ്രഘണ്ടാം നമാമി.
ഹൃദ്യാം സ്നിഗ്ധാം ശുദ്ധസത്ത്വാന്തരാലാം
സർവാം ദേവീം സിദ്ധിബുദ്ധിപ്രദാത്രീം.
ആര്യാമംബാം സർവമാംഗല്യയുക്താം
കൂഷ്മാണ്ഡാം താം കാമബീജാം നമാമി.
ദിവ്യേശാനീം സർവദേവൈരതുല്യാം
സുബ്രഹ്മണ്യാം സർവസിദ്ധിപ്രദാത്രീം.
സിംഹാസീനാം മാതരം സ്കന്ദസഞ്ജ്ഞാം
ധന്യാം പുണ്യാം സർവദാ താം നമാമി.
കാലീം ദോർഭ്യാം ഖഡ്ഗചക്രേ ദധാനാം
ശുദ്ധാമംബാം ഭക്തകഷ്ടാദിനാശാം.
സത്ത്വാം സർവാലങ്കൃതാശേഷഭൂഷാം
ദേവീം ദുർഗാം കാതവംശാം നമാമി.
രുദ്രാം തീക്ഷ്ണാം രാജരാജൈർവിവന്ദ്യാം
കാലാകാലാം സർവദുഷ്ടപ്രനാശാം.
ക്രൂരാം തുണ്ഡാം മുണ്ഡമാല്യാംബരാം താം
ചണ്ഡാം ഘോരാം കാലരാത്രിം നമാമി.
ശൂലീകാന്താം പാരമാർഥപ്രദാം താം
പുണ്യാപുണ്യാം പാപനാശാം പരേശാം.
കാമേശാനീം കാമദാനപ്രവീണാം
ഗൗരീമംബാം ഗൗരവർണാം നമാമി.
നിശ്ചാഞ്ചല്യാം രക്തനാലീകസംസ്ഥാം
ഹേമാഭൂഷാം ദീനദൈന്യാദിനാശാം.
സാധുസ്തുത്യാം സർവവേദൈർവിവന്ദ്യാം
സിദ്ധൈർവന്ദ്യാം സിദ്ധിദാത്രീം നമാമി.
ദുർഗാസ്തോത്രം സന്തതം യഃ പഠേത് സഃ
പ്രാപ്നോതി സ്വം പ്രാതരുത്ഥായ നിത്യം.
ധൈര്യം പുണ്യം സ്വർഗസംവാസഭാഗ്യം
ദിവ്യാം ബുദ്ധിം സൗഖ്യമർഥം ദയാം ച.
Other stotras
