ഏകമുഖീ ഹനുമാൻ കവചം
പാർവത്യുവാച
ഭഗവൻ ദേവദേവേശ ലോകനാഥ ജഗദ്ഗുരോ .
ശോകാകുലാനാം ലോകാനാം കേന രക്ഷാ ഭവേദ്ധ്രുവം ..
സംഗ്രാമേ സങ്കടേ ഘോരേ ഭൂതപ്രേതാദികേ ഭയേ .
ദുഃഖദാവാഗ്നിസന്തപ്തചേതസാം ദുഃഖഭാഗിനാം ..
ഈശ്വര ഉവാച
ശൃണു ദേവി പ്രവക്ഷ്യാമി ലോകാനാം ഹിതകാമ്യയാ .
വിഭീഷണായ രാമേണ പ്രേമ്ണാ ദത്തം ച യത്പുരാ ..
കവചം കപിനാഥസ്യ വായുപുത്രസ്യ ധീമതഃ .
ഗുഹ്യം തേ സമ്പ്രവക്ഷ്യാമി വിശേഷാച്ഛൃണു സുന്ദരി ..
ധ്യായേദ്ബാലദിവാകരധൃതിനിഭം ദേവാരിദർപാപഹം
ദേവേന്ദ്രപ്രമുഖപ്രശസ്തയശസം ദേദീപ്യമാനം രുചാ .
സുഗ്രീവാദിസമസ്തവാനരയുതം സുവ്യക്തതത്ത്വപ്രിയം
സംരക്താരുണലോചനം പവനജം പീതാംബരാലങ്കൃതം ..
ഉദ്യന്മാർതണ്ഡകോടിപ്രകടരുചിയുതം ചാരുവീരാസനസ്ഥം
മൗഞ്ജീയജ്ഞോപവീതാരുണരുചിരശിഖാശോഭിതം കുണ്ഡലാംഗം .
ഭക്താനാമിഷ്ടദം തം പ്രണതമുനിജനം വേദനാദപ്രമോദം
ധ്യായേദ്ദേവം വിധേയം പ്ലവഗകുലപതിം ഗോഷ്പദീഭൂതവാർധിം ..
വജ്രാംഗം പിംഗകേശാഢ്യം സ്വർണകുണ്ഡലമണ്ഡിതം .
നിയുദ്ധകർമകുശലം പാരാവാരപരാക്രമം ..
വാമഹസ്തേ മഹാവൃക്ഷം ദശാസ്യകരഖണ്ഡനം .
ഉദ്യദ്ദക്ഷിണദോർദണ്ഡം ഹനുമന്തം വിചിന്തയേത് ..
അപരാജിത നമസ്തേഽസ്തു നമസ്തേ രാമപൂജിത .
പ്രസ്ഥാനം ച കരിഷ്യാമി സിദ്ധിർഭവതു മേ സദാ ..
യോ വാരാംനിധിമല്പപല്വലമിവോല്ലംഘ്യ പ്രതാപാന്വിതോ
വൈദേഹീഘനശോകതാപഹരണോ വൈകുണ്ഠതത്ത്വപ്രിയഃ .
അക്ഷാദ്യർചിതരാക്ഷസേശ്വരമഹാദർപാപഹാരീ രണേ .
സോഽയം വാനരപുംഗവോഽവതു സദാ യുഷ്മാൻസമീരാത്മജഃ ..
വജ്രാംഗം പിംഗകേശം കനകമയലസത്കുണ്ഡലാക്രാന്തഗണ്ഡം
നാനാ വിദ്യാധിനാഥം കരതലവിധൃതം പൂർണകുംഭം ദൃഢം ച
ഭക്താഭീഷ്ടാധികാരം വിദധതി ച സദാ സർവദാ സുപ്രസന്നം
ത്രൈലോക്യത്രാണകാരം സകലഭുവനഗം രാമദൂതം നമാമി ..
ഉദ്യല്ലാംഗൂലകേശപ്രലയജലധരം ഭീമമൂർതിം കപീന്ദ്രം
വന്ദേ രാമാംഘ്രിപദ്മഭ്രമരപരിവൃതം തത്ത്വസാരം പ്രസന്നം .
വജ്രാംഗം വജ്രരൂപം കനകമയലസത്കുണ്ഡലാക്രാന്തഗണ്ഡം
ദംഭോലിസ്തംഭസാരപ്രഹരണവികടം ഭൂതരക്ഷോഽധിനാഥം ..
വാമേ കരേ വൈരിഭയം വഹന്തം ശൈലം ച ദക്ഷേ നിജകണ്ഠലഗ്നം .
ദധാനമാസാദ്യ സുവർണവർണം ഭജേജ്ജ്വലത്കുണ്ഡലരാമദൂതം ..
പദ്മരാഗമണികുണ്ഡലത്വിഷാ പാടലീകൃതകപോലമണ്ഡലം .
ദിവ്യഗേഹകദലീവനാന്തരേ ഭാവയാമി പവമാനനന്ദനം ..
ഈശ്വര ഉവാച
ഇതി വദതി വിശേഷാദ്രാഘവോ രാക്ഷസേന്ദ്രം
പ്രമുദിതവരചിത്തോ രാവണസ്യാനുജോ ഹ .
രഘുവരവരദൂതം പൂജയാമാസ ഭൂയഃ
സ്തുതിഭിരകൃതാർഥഃ സ്വം പരം മന്യമാനഃ ..
വന്ദേ വിദ്യുദ്വലയസുഭഗസ്വർണയജ്ഞോപവീതം
കർണദ്വന്ദ്വേ കനകരുചിരേ കുണ്ഡലേ ധാരയന്തം .
ഉച്ചൈർഹൃഷ്യദ്ദ്യുമണികിരണശ്രേണിസംഭാവിതാംഗം
സത്കൗപീനം കപിവരവൃതം കാമരൂപം കപീന്ദ്രം ..
ശ്രീരാമ ഉവാച
ഹനുമാൻ പൂർവതഃ പാതു ദക്ഷിണേ പവനാത്മജഃ .
പ്രതീച്യാം പാതു രക്ഷോഘ്ന ഉത്തരസ്യാമബ്ധിപാരഗഃ ..
ഉദീച്യാമൂർധ്വഗഃ പാതു കേസരീപ്രിയനന്ദനഃ .
അധശ്ച വിഷ്ണുഭക്തസ്തു പാതു മധ്യേ ച പാവനിഃ ..
അവാന്തരദിശഃ പാതു സീതാശോകവിനാശനഃ .
ലങ്കാവിദാഹകഃ പാതു സർവാപദ്ഭ്യോ നിരന്തരം ..
സുഗ്രീവസചിവഃ പാതു മസ്തകം വായുനന്ദനഃ .
ഭാലം പാതു മഹാവീരോ ഭ്രുവോർമധ്യേ നിരന്തരം ..
നേത്രേ ഛായാഽപഹാരീ ച പാതു നഃ പ്ലവഗേശ്വരഃ .
കപോലകർണമൂലേ തു പാതു ശ്രീരാമകിങ്കരഃ ..
നാസാഗ്രേ അഞ്ജനാസൂനുർവക്ത്രം പാതു ഹരീശ്വരഃ .
വാചം രുദ്രപ്രിയഃ പാതു ജിഹ്വാം പിംഗലലോചനഃ ..
പാതു ദന്താൻ ഫാൽഗുനേഷ്ടശ്ചിബുകം ദൈത്യപ്രാണഹൃത് .
പാതു കണ്ഠം ച ദൈത്യാരിഃ സ്കന്ധൗ പാതു സുരാർചിതഃ ..
ഭുജൗ പാതു മഹാതേജാഃ കരൗ തു ചരണായുധഃ .
നഖാന്നഖായുധഃ പാതു കുക്ഷിം പാതു കപീശ്വരഃ ..
വക്ഷോ മുദ്രാപഹാരീ ച പാതു പാർശ്വേ ഭുജായുധഃ .
ലങ്കാവിഭഞ്ജനഃ പാതു പൃഷ്ഠദേശേ നിരന്തരം ..
നാഭിഞ്ച രാമദൂതസ്തു കടിം പാത്വനിലാത്മജഃ .
ഗുഹ്മം പാതു മഹാപ്രാജ്ഞഃ സൃക്കിണീ ച ശിവപ്രിയഃ ..
ഊരൂ ച ജാനുനീ പാതു ലങ്കാപ്രാസാദഭഞ്ജനഃ .
ജംഘേ പാതു മഹാബാഹുർഗുൽഫൗ പാതു മഹാബലഃ ..
അചലോദ്ധാരകഃ പാതു പാദൗ ഭാസ്കരസന്നിഭഃ .
പാദാന്തേ സർവസത്വാഢ്യഃ പാതു പാദാംഗുലീസ്തഥാ ..
സർവാംഗാനി മഹാവീരഃ പാതു രോമാണി ചാത്മവാൻ .
ഹനുമത്കവചം യസ്തു പഠേദ്വിദ്വാൻ വിചാക്ഷണഃ ..
സ ഏവ പുരുഷശ്രേഷ്ഠോ ഭക്തിം മുക്തിം ച വിന്ദതി .
ത്രികാലമേകകാലം വാ പഠേന്മാസത്രയം സദാ ..
സർവാൻ രിപൂൻ ക്ഷണേ ജിത്വാ സ പുമാൻ ശ്രിയമാപ്നുയാത് .
മധ്യരാത്രേ ജലേ സ്ഥിത്വാ സപ്തവാരം പഠേദ്യദി ..
ക്ഷയാഽപസ്മാരകുഷ്ഠാദിതാപത്രയനിവാരണം .
ആർകിവാരേഽശ്വത്ഥമൂലേ സ്ഥിത്വാ പഠതിഃ യഃ പുമാൻ ..
അചലാം ശ്രിയമാപ്നോതി സംഗ്രാമേ വിജയീ ഭവേത് ..
യഃ കരേ ധാരയേന്നിത്യം സ പുമാൻ ശ്രിയമാപ്നുയാത് .
വിവാഹേ ദിവ്യകാലേ ച ദ്യൂതേ രാജകുലേ രണേ ..
ഭൂതപ്രേതമഹാദുർഗേ രണേ സാഗരസമ്പ്ലവേ .
ദശവാരം പഠേദ്രാത്രൗ മിതാഹാരീ ജിതേന്ദ്രിയഃ ..
വിജയം ലഭതേ ലോകേ മാനവേഷു നരാധിപഃ .
സിംഹവ്യാഘ്രഭയേ ചാഗ്നൗ ശരശസ്ത്രാസ്ത്രയാതനേ ..
ശൃംഖലാബന്ധനേ ചൈവ കാരാഗ്രഹനിയന്ത്രണേ .
കായസ്തംഭേ വഹ്നിദാഹേ ഗാത്രരോഗേ ച ദാരുണേ ..
ശോകേ മഹാരണേ ചൈവ ബ്രഹ്മഗ്രഹവിനാശനേ .
സർവദാ തു പഠേന്നിത്യം ജയമാപ്നോത്യസംശയം ..
ഭൂർജേ വാ വസനേ രക്തേ ക്ഷൗമേ വാ താലപത്രകേ .
ത്രിഗന്ധേനാഥവാ മസ്യാ ലിഖിത്വാ ധാരയേന്നരഃ ..
പഞ്ചസപ്തത്രിലൗഹൈർവാ ഗോപിതം കവചം ശുഭം .
ഗലേ കട്യാം ബാഹുമൂലേ വാ കണ്ഠേ ശിരസി ധാരിതം ..
സർവാൻ കാമാനവാപ്നോതി സത്യം ശ്രീരാമഭാഷിതം ..
Other stotras
