ലക്ഷ്മീ ലഹരീ സ്തോത്രം

സമുന്മീലന്നീലാംബുജനികരനീരാജിതരുചാ-
മപാംഗാനാം ഭംഗൈരമൃതലഹരീശ്രേണിമസൃണൈഃ.
ഹ്രിയാ ഹീനം ദീനം ഭൃശമുദരലീനം കരുണയാ
ഹരിശ്യാമാ സാ മാമവതു ജഡസാമാജികമപി.
സമുന്മീലത്വന്തഃകരണകരുണോദ്ഗാരചതുരഃ
കരിപ്രാണത്രാണപ്രണയിനി ദൃഗന്തസ്തവ മയി.
യമാസാദ്യോന്മാദ്യദ്ദ്വിപനിയുതഗണ്ഡസ്ഥലഗലൻ-
മദക്ലിന്നദ്വാരോ ഭവതി സുഖസാരോ നരപതിഃ.
ഉരസ്യസ്യ ഭ്രശ്യത്കബരഭരനിര്യത്സുമനസഃ
പതന്തി സ്വർബാലാഃ സ്മരശരപരാധീനമനസഃ.
സുരാസ്തം ഗായന്തി സ്ഫുരിതതനുഗംഗാധരമുഖാ-
സ്തവായം ദൃക്പാതോ യദുപരി കൃപാതോ വിലസതി.
സമീപേ സംഗീതസ്വരമധുരഭംഗീ മൃഗദൃശാം
വിദൂരേ ദാനാന്ധദ്വിരദകലഭോദ്ദാമനിനദഃ.
ബഹിർദ്വാരേ തേഷാം ഭവതി ഹയഹേഷാകലകലോ
ദൃഗേഷാ തേ യേഷാമുപരി കമലേ ദേവി സദയാ.
അഗണ്യൈരിന്ദ്രാദ്യൈരപി പരമപുണ്യൈഃ പരിചിതോ
ജഗജ്ജന്മസ്ഥാനപ്രലയരചനാശില്പനിപുണഃ.
ഉദഞ്ചത്പീയൂഷാംബുധിലഹരിലീലാമനുഹരൻ-
നപാംഗസ്തേഽമന്ദം മമ കലുഷവൃന്ദം ദലയതു.
നമന്മൗലിശ്രേണിത്രിപുരപരിപന്ഥിപ്രതിലസത്-
കപർദവ്യാവൃത്തിസ്ഫുരിതഫണിഫൂത്കാരചകിതഃ.
ലസത്ഫുല്ലാംഭോജമ്രദിമഹരണഃ കോഽപി ചരണശ്-
ചിരം ചേതശ്ചാരീ മമ ഭവതു വാരീശദുഹിതുഃ.
പ്രവാലാനാം ദീക്ഷാഗുരുരപി ച ലാക്ഷാരുണരുചാം
നിയന്ത്രീ ബന്ധൂകദ്യുതിനികരബന്ധൂകൃതിപടുഃ.
നൃണാമന്തർധ്വാന്തം നിബിഡമപഹർതും തവ കില
പ്രഭാതശ്രീരേഷാ ചരണരുചിവേഷാ വിജയതേ.
പ്രഭാതപ്രോന്മീലത്കമലവനസഞ്ചാരസമയേ
ശിഖാഃ കിഞ്ജൽകാനാം വിദധതി രുജം യത്ര മൃദുലാഃ.
തദേതന്മാതസ്തേ ചരണമരുണശ്ലാഘ്യകരുണം
കഠോരാ മദ്വാണീ കഥമിയമിദാനീം പ്രവിശതു.
സ്മിതജ്യോത്സ്നാമജ്ജദ്ദ്വിജമണിമയൂഖാമൃതഝരൈർ-
നിഷിഞ്ചന്തീം വിശ്വം തവ വിമലമൂർതിം സ്മരതി യഃ.
അമന്ദം സ്യന്ദന്തേ വദനകമലാദത്യ കൃതിനോ
വിവിക്തൗ വൈ കല്പാഃ സതതമവികല്പാ നവഗിരഃ.
ശരൗ മായാബീജൗ ഹിമകരകലാക്രാന്തശിരസൗ
വിധായോർധ്വം ബിന്ദും സ്ഫുരിതമിതി ബീജം ജലധിജേ.
ജപേദ്യഃ സ്വച്ഛന്ദം സ ഹി പുനരമന്ദം ഗജഘടാം-
അദഭ്രാമ്യദ്ഭൃംഗൈർമുഖരയതി വേശ്മാനി വിദുഷാം.
സ്മരോ നാമം നാമം ത്രിജഗദഭിരാമം തവ പദം
പ്രപേദേ സിദ്ധിം യാം കഥമിവ നരസ്താം കഥയതു.
യയാ പാതം പാതം പദകമലയോഃ പർവതചരോ
ഹരോ ഹാ രോഷാർദ്രാമനുനയതി ശൈലേന്ദ്രതനയാം.
ഹരന്തോ നിഃശങ്കം ഹിമകരകലാനാം രുചിരതാം
കിരന്തഃ സ്വച്ഛന്ദം കിരണമയപീയൂഷനികരം.
വിലുമ്പന്തു പ്രൗഢാ ഹരിഹൃദയഹാരാഃ പ്രിയതമാ
മമാന്തഃസന്താപം തവ ചരണശോണാംബുജനഖാഃ.
മിഷാന്മാണിക്യാനാം വിഗലിതനിമേഷം നിമിഷതാ-
മമന്ദം സൗന്ദര്യ തവ ചരണയോരംബുധിസുതേ.
പദാലങ്കാരാണാം ജയതി കലനിക്വാണനപടുർ-
ഉദഞ്ചന്നുദ്ദാമഃ സ്തുതിവചനലീലാകലകലഃ.
മണിജ്യോത്സ്നാജാലൈർനിജതനുരുചാം മാംസലതയാ
ജടാലം തേ ജംഘായുഗലമഘഭംഗായ ഭവതു.
ഭ്രമന്തീ യന്മധ്യേ ദരദലിതശോണാംബുജരുചാം
ദൃശാം മാലാ നീരാജനമിവ വിധത്തേ മുരരിപോഃ.
ഹരദ്ഗർവം സർവം കരിപതികരാണാം മൃദുതയാ
ഭൃശം ഭാഭിർദംഭം കനകമയരംഭാവനിരുഹാം.
ലസജ്ജാനുജ്യോത്സ്നാ തരണിപരിണദ്ധം ജലധിജേ
തവോരുദ്വന്ദ്വം നഃ ശ്ലഥയതു ഭവോരുജ്വരഭയം.
കലക്വാണാം കാഞ്ചീം മണിഗണജടാലാമധിവഹൻ-
വസാനഃ കൗസുംഭം വസനമസനം കൗസ്തുഭരുചാം.
മുനിവ്രാതൈഃ പ്രാതഃ ശുചിവചനജാതൈരതിനുതം
നിതംബസ്തേ ബിംബം ഹസതി നവമംബാംബരമണേഃ.
ജഗന്മിഥ്യാഭൂതം മമ നിഗദതാം വേദവചസാം-
അഭിപ്രായോ നാദ്യാവധി ഹൃദയമധ്യാവിശദയം.
ഇദാനീം വിശ്വേഷാം ജനകമുദരം തേ വിമൃശതോ
വിസന്ദേഹം ചേതോഽജനി ഗരുഡകേതോഃ പ്രിയതമേ.
അനല്പൈർവാദീന്ദ്രൈരഗണിതമഹായുക്തിനിവഹൈർ-
നിരസ്താ വിസ്താരം ക്വചിദകലയന്തീ തനുമപി.
അസത്ഖ്യാതിവ്യാഖ്യാധികചതുരിമാഖ്യാതമഹിമാ
വലഗ്നേ ലഗ്നേയം സുഗതമതസിദ്ധാന്തസരണിഃ.
നിദാനം ശൃംഗാംരപ്രകരമകരന്ദസ്യ കമലേ
മഹാനേവാലംബോ ഹരിനയനരോലംബവരയോഃ.
നിധാനം ശോഭാനാം നിധനമനുതാപസ്യ ജഗതോ
ജവേനാഭീതിം മേ ദിശതു തവ നാഭീസരസിജം.
ഗഭീരാമുദ്വേലാം പ്രഥമരസകല്ലോലമിലിതാം
വിഗാഢും തേ നാഭീവിമലസരസീം ഗൗർമമ മനാക്.
പദം യാവന്നയസ്യത്യഹഹ വിനിമഗ്നൈവ സഹസാ
നഹി ക്ഷേമം സൂതേ ഗുരുമഹിമഭൂതേഷ്വവിനയഃ.
കുചൗ തേ ദുഗ്ധാംഭോനിധികുലശിഖാമണ്ഡനമണേ
ഹരേതേ സൗഭാഗ്യം യദി സുരഗിരേശ്ചിത്രമിഹ കിം.
ത്രിലോകീലാവണ്യാഹരണനവലീലാനിപുണയോർ-
യയോർദത്തേ ഭൂയഃ കരമഖിലനാഥോ മധുരിപുഃ.
ഹരക്രോധത്രസ്യന്മദനനവദുർഗദ്വയതുലാം
ദധത്കോകദ്വന്ദ്വദ്യുതിദമനദീക്ഷാധിഗുരുതാം.
തവൈതദ്വക്ഷോജദ്വിതയമരവിന്ദാക്ഷമഹിലേ
മമ സ്വാന്തധ്വാന്തം കിമപി ച നിതാന്തം ഗമയതു.
അനേകബ്രഹ്മാണ്ഡസ്ഥിതിനിയമലീലാവിലസിതേ
ദയാപീയൂഷാംഭോനിധിസഹജസംവാസഭവനേ.
വിധോശ്ചിത്തായാമേ ഹൃദയകമലേ തേ തു കമലേ
മനാംഗ മന്നിസ്താരസ്മൃതിരപി ച കോണേ നിവസതു.
മൃണാലീനാം ലീലാഃ സഹജലവണിമ്നാ ലഘയതാം
ചതുർണാം സൗഭാഗ്യം തവ ജനനി ദോഷ്ണാം വദതു കഃ.
ലുഠന്തി സ്വച്ഛന്ദം മരകതശിലാമാംസലരുചഃ
ശ്രുതീനാം സ്പർധാം യേ ദധത ഇവ കണ്ഠേ മധുരിപോഃ.
അലഭ്യം സൗരഭ്യം കവികുലനമസ്യാ രുചിരതാ
തഥാപി ത്വദ്ധസ്തേ നിവസദരവിന്ദം വികസിതം.
കലാപേ കാവ്യാനാം പ്രകൃതികമനീയസ്തുതിവിധൗ
ഗുണോത്കർഷാധാനം പ്രഥിതമുപമാനം സമജനി.
അനല്പം ജല്പന്തു പ്രതിഹതധിയഃ പല്ലവതുലാം
രസജ്ഞാമജ്ഞാനാം ക ഇവ കമലേ മന്ഥരയതു.
ത്രപന്തു ശ്രീഭിക്ഷാവിതരണവശീഭൂതജഗതാം
കരാണാം സൗഭാഗ്യം തവ തുലയിതും തുംഗരസനാഃ.
സമാഹാരഃ ശ്രീണാം വിരചിതവിഹാരോ ഹരിദൃശാം
പരീഹാരോ ഭക്തപ്രഭവഭവസന്താപസരണേഃ.
പ്രഹാരഃ സർവാസാമപി ച വിപദാം വിഷ്ണുദയിതേ
മമോദ്ധാരോപായം തവ സപദി ഹാരോ വിമൃശതു.
അലങ്കുർവാണാനാം മണിഗണഘൃണീനാം ലവണിമാ
യദീയാഭിർഭാഭിർഭജതി മഹിമാനം ലഘുരപി.
സുപർവശ്രേണീനാം ജനിതപരസൗഭാഗ്യവിഭവാസ്-
തവാംഗുല്യസ്താ മേ ദദതു ഹരിവാമേഽഭിലഷിതം.
തപസ്തേപേ തീവ്രം കിമപി പരിതപ്യ പ്രതിദിനം
തവ ഗ്രീവാലക്ഷ്മീലവപരിചയാദാപ്തവിഭവം.
ഹരിഃ കംബും ചുംബത്യഥ വഹതി പാണൗ കിമധികം
വദാമസ്തത്രായം പ്രണയവശതോഽസ്യൈ സ്പൃഹയതി.
അഭൂദപ്രത്യൂഹഃ സകലഹരിദുല്ലാസനവിധിർ-
വിലീനോ ലോകാനാം സ ഹി നയനതാപോഽപി കമലേ.
തവാസ്മിൻപീയൂഷം കിരതി വദനേ രമ്യവദനേ
കുതോ ഹേതോശ്ചേതോവിധുരയമുദേതി സ്മ ജലധേഃ.
മുഖാംഭോജേ മന്ദസ്മിതമധുരകാന്ത്യാ വികസതാം
ദ്വിജാനാം തേ ഹീരാവലിവിഹിതനീരാജനരുചാം.
ഇയം ജ്യോത്സ്നാ കാപി സ്രവദമൃതസന്ദോഹസരസാ
മമോദ്യദ്ദാരിദ്ര്യജ്വരതരുണതാപം തിരയതു.
കുലൈഃ കസ്തൂരീണാം ഭൃശമനിശമാശാസ്യമപി
ച പ്രഭാതപ്രോന്മീലന്നലിനനിവഹൈരശ്രുതചരം.
വഹന്തഃ സൗരഭ്യം മൃദുഗതിവിലാസാ മമ ശിവം
തവ ശ്വാസാ നാസാപുടവിഹിതവാസാ വിദധതാം.
കപോലേ തേ ദോലായിതലലിതലോലാലകവൃതേ
വിമുക്താ ധമ്മില്ലാദഭിലസതി മുക്താവലിരിയം.
സ്വകീയാനാം ബന്ദീകൃതമസഹമാനൈരിവ ബലാൻ-
നിബധ്യോർധ്വം കൃഷ്ടാ തിമിരനികുരംബൈർവിധുകലാ.
പ്രസാദോ യസ്യായം നമദമിതഗീർവാണമുകുട-
പ്രസർപജ്ജോത്സ്നാഭിശ്ചരണതലപീഠാർചിതവിധിഃ.
ദൃഗംഭോജം തത്തേ ഗതിഹസിതമത്തേഭഗമനേ
വനേ ലീനൈർദീനൈഃ കഥയ കഥമീയാദിഹ തുലാം.
ദുരാപാ ദുർവൃത്തൈർദുരിതദമനേ ദാരണഭരാ
ദയാർദ്രാ ദീനാനാമുപരി ദലദിന്ദീവരനിഭാ.
ദഹന്തീ ദാരിദ്ര്യദ്രുമകുലമുദാരദ്രവിണദാ
ത്വദീയാ ദൃഷ്ടിർമേ ജനനി ദുരദൃഷ്ടം ദലയതു.
തവ ശ്രോത്രേ ഫുല്ലോത്പലസകലസൗഭാഗ്യജയിനീ
സദൈവ ശ്രീനാരായണഗുണഗണൗഘപ്രണയിനീ.
രവൈർദീനാം ലീനാമനിശമവധാനാതിശയിനീ
മമാപ്യേതാം വാചം ജലധിതനയേ ഗോചരയതാം.
പ്രഭാജാലൈഃ പ്രാഭാതികദിനകരാഭാപനയനം
തവേദം ഖേദം മേ വിഘടയതു താടങ്കയുഗലം.
മഹിമ്നാ യസ്യായം പ്രലയസമയേഽപി ക്രതുഭുജാം
ജഗത്പായം പായം സ്വപിതി നിരപായം തവ പതിഃ.
നിവാസോ മുക്താനാം നിബിഡതരനീലാംബുദനിഭസ്-
തവായം ധമ്മില്ലോ വിമലയതു മല്ലോചനയുഗം.
ഭൃശം യസ്മിൻകാലാഗരുബഹുലസൗരഭ്യനിവഹൈഃ
പതന്തി ശ്രീഭിക്ഷാർഥിന ഇവ മദാന്ധാ മധുലിഹഃ.
വിലഗ്നൗ തേ പാർശ്വദ്വയപരിസരേ മത്തകരിണൗ
കരോന്നീതൈരഞ്ചന്മണികലശമുഗ്ധാസ്യഗലിതൈഃ.
നിഷിഞ്ചന്തൗ മുക്താമണിഗണജയൈസ്ത്വാം ജലകണൈർ-
നമസ്യാമോ ദാമോദരഗൃഹിണീ ദാരിദ്ര്യദലിതാഃ.
അയേ മാതർലക്ഷ്മി ത്വദരുണപദാംഭോജനികടേ
ലുഠന്തം ബാലം മാമവിരലഗലദ്ബാഷ്പജടിലം.
സുധാസേകസ്നിഗ്ധൈരതിമസൃണമുഗ്ധൈഃ കരതലൈഃ
സ്പൃശന്തീ മാ രോദീരിതി വദ സമാശ്വാസ്യസി കദാ.
രമേ പദ്മേ ലക്ഷ്മി പ്രണതജനകല്പദ്രുമലതേ
സുധാംഭോധേഃ പുത്രി ത്രിദശനികരോപാസ്തചരണേ.
പരേ നിത്യം മാതർഗുണമയി പരബ്രഹ്മമഹിലേ
ജഗന്നാഥസ്യാകർണയ മൃദുലവർണാവലിമിമാം