లక్ష్మీ లహరీ స్తోత్రం

సమున్మీలన్నీలాంబుజనికరనీరాజితరుచా-
మపాంగానాం భంగైరమృతలహరీశ్రేణిమసృణైః.
హ్రియా హీనం దీనం భృశముదరలీనం కరుణయా
హరిశ్యామా సా మామవతు జడసామాజికమపి.
సమున్మీలత్వంతఃకరణకరుణోద్గారచతురః
కరిప్రాణత్రాణప్రణయిని దృగంతస్తవ మయి.
యమాసాద్యోన్మాద్యద్ద్విపనియుతగండస్థలగలన్-
మదక్లిన్నద్వారో భవతి సుఖసారో నరపతిః.
ఉరస్యస్య భ్రశ్యత్కబరభరనిర్యత్సుమనసః
పతంతి స్వర్బాలాః స్మరశరపరాధీనమనసః.
సురాస్తం గాయంతి స్ఫురితతనుగంగాధరముఖా-
స్తవాయం దృక్పాతో యదుపరి కృపాతో విలసతి.
సమీపే సంగీతస్వరమధురభంగీ మృగదృశాం
విదూరే దానాంధద్విరదకలభోద్దామనినదః.
బహిర్ద్వారే తేషాం భవతి హయహేషాకలకలో
దృగేషా తే యేషాముపరి కమలే దేవి సదయా.
అగణ్యైరింద్రాద్యైరపి పరమపుణ్యైః పరిచితో
జగజ్జన్మస్థానప్రలయరచనాశిల్పనిపుణః.
ఉదంచత్పీయూషాంబుధిలహరిలీలామనుహరన్-
నపాంగస్తేఽమందం మమ కలుషవృందం దలయతు.
నమన్మౌలిశ్రేణిత్రిపురపరిపంథిప్రతిలసత్-
కపర్దవ్యావృత్తిస్ఫురితఫణిఫూత్కారచకితః.
లసత్ఫుల్లాంభోజమ్రదిమహరణః కోఽపి చరణశ్-
చిరం చేతశ్చారీ మమ భవతు వారీశదుహితుః.
ప్రవాలానాం దీక్షాగురురపి చ లాక్షారుణరుచాం
నియంత్రీ బంధూకద్యుతినికరబంధూకృతిపటుః.
నృణామంతర్ధ్వాంతం నిబిడమపహర్తుం తవ కిల
ప్రభాతశ్రీరేషా చరణరుచివేషా విజయతే.
ప్రభాతప్రోన్మీలత్కమలవనసంచారసమయే
శిఖాః కింజల్కానాం విదధతి రుజం యత్ర మృదులాః.
తదేతన్మాతస్తే చరణమరుణశ్లాఘ్యకరుణం
కఠోరా మద్వాణీ కథమియమిదానీం ప్రవిశతు.
స్మితజ్యోత్స్నామజ్జద్ద్విజమణిమయూఖామృతఝరైర్-
నిషించంతీం విశ్వం తవ విమలమూర్తిం స్మరతి యః.
అమందం స్యందంతే వదనకమలాదత్య కృతినో
వివిక్తౌ వై కల్పాః సతతమవికల్పా నవగిరః.
శరౌ మాయాబీజౌ హిమకరకలాక్రాంతశిరసౌ
విధాయోర్ధ్వం బిందుం స్ఫురితమితి బీజం జలధిజే.
జపేద్యః స్వచ్ఛందం స హి పునరమందం గజఘటాం-
అదభ్రామ్యద్భృంగైర్ముఖరయతి వేశ్మాని విదుషాం.
స్మరో నామం నామం త్రిజగదభిరామం తవ పదం
ప్రపేదే సిద్ధిం యాం కథమివ నరస్తాం కథయతు.
యయా పాతం పాతం పదకమలయోః పర్వతచరో
హరో హా రోషార్ద్రామనునయతి శైలేంద్రతనయాం.
హరంతో నిఃశంకం హిమకరకలానాం రుచిరతాం
కిరంతః స్వచ్ఛందం కిరణమయపీయూషనికరం.
విలుంపంతు ప్రౌఢా హరిహృదయహారాః ప్రియతమా
మమాంతఃసంతాపం తవ చరణశోణాంబుజనఖాః.
మిషాన్మాణిక్యానాం విగలితనిమేషం నిమిషతా-
మమందం సౌందర్య తవ చరణయోరంబుధిసుతే.
పదాలంకారాణాం జయతి కలనిక్వాణనపటుర్-
ఉదంచన్నుద్దామః స్తుతివచనలీలాకలకలః.
మణిజ్యోత్స్నాజాలైర్నిజతనురుచాం మాంసలతయా
జటాలం తే జంఘాయుగలమఘభంగాయ భవతు.
భ్రమంతీ యన్మధ్యే దరదలితశోణాంబుజరుచాం
దృశాం మాలా నీరాజనమివ విధత్తే మురరిపోః.
హరద్గర్వం సర్వం కరిపతికరాణాం మృదుతయా
భృశం భాభిర్దంభం కనకమయరంభావనిరుహాం.
లసజ్జానుజ్యోత్స్నా తరణిపరిణద్ధం జలధిజే
తవోరుద్వంద్వం నః శ్లథయతు భవోరుజ్వరభయం.
కలక్వాణాం కాంచీం మణిగణజటాలామధివహన్-
వసానః కౌసుంభం వసనమసనం కౌస్తుభరుచాం.
మునివ్రాతైః ప్రాతః శుచివచనజాతైరతినుతం
నితంబస్తే బింబం హసతి నవమంబాంబరమణేః.
జగన్మిథ్యాభూతం మమ నిగదతాం వేదవచసాం-
అభిప్రాయో నాద్యావధి హృదయమధ్యావిశదయం.
ఇదానీం విశ్వేషాం జనకముదరం తే విమృశతో
విసందేహం చేతోఽజని గరుడకేతోః ప్రియతమే.
అనల్పైర్వాదీంద్రైరగణితమహాయుక్తినివహైర్-
నిరస్తా విస్తారం క్వచిదకలయంతీ తనుమపి.
అసత్ఖ్యాతివ్యాఖ్యాధికచతురిమాఖ్యాతమహిమా
వలగ్నే లగ్నేయం సుగతమతసిద్ధాంతసరణిః.
నిదానం శృంగాంరప్రకరమకరందస్య కమలే
మహానేవాలంబో హరినయనరోలంబవరయోః.
నిధానం శోభానాం నిధనమనుతాపస్య జగతో
జవేనాభీతిం మే దిశతు తవ నాభీసరసిజం.
గభీరాముద్వేలాం ప్రథమరసకల్లోలమిలితాం
విగాఢుం తే నాభీవిమలసరసీం గౌర్మమ మనాక్.
పదం యావన్నయస్యత్యహహ వినిమగ్నైవ సహసా
నహి క్షేమం సూతే గురుమహిమభూతేష్వవినయః.
కుచౌ తే దుగ్ధాంభోనిధికులశిఖామండనమణే
హరేతే సౌభాగ్యం యది సురగిరేశ్చిత్రమిహ కిం.
త్రిలోకీలావణ్యాహరణనవలీలానిపుణయోర్-
యయోర్దత్తే భూయః కరమఖిలనాథో మధురిపుః.
హరక్రోధత్రస్యన్మదననవదుర్గద్వయతులాం
దధత్కోకద్వంద్వద్యుతిదమనదీక్షాధిగురుతాం.
తవైతద్వక్షోజద్వితయమరవిందాక్షమహిలే
మమ స్వాంతధ్వాంతం కిమపి చ నితాంతం గమయతు.
అనేకబ్రహ్మాండస్థితినియమలీలావిలసితే
దయాపీయూషాంభోనిధిసహజసంవాసభవనే.
విధోశ్చిత్తాయామే హృదయకమలే తే తు కమలే
మనాంగ మన్నిస్తారస్మృతిరపి చ కోణే నివసతు.
మృణాలీనాం లీలాః సహజలవణిమ్నా లఘయతాం
చతుర్ణాం సౌభాగ్యం తవ జనని దోష్ణాం వదతు కః.
లుఠంతి స్వచ్ఛందం మరకతశిలామాంసలరుచః
శ్రుతీనాం స్పర్ధాం యే దధత ఇవ కంఠే మధురిపోః.
అలభ్యం సౌరభ్యం కవికులనమస్యా రుచిరతా
తథాపి త్వద్ధస్తే నివసదరవిందం వికసితం.
కలాపే కావ్యానాం ప్రకృతికమనీయస్తుతివిధౌ
గుణోత్కర్షాధానం ప్రథితముపమానం సమజని.
అనల్పం జల్పంతు ప్రతిహతధియః పల్లవతులాం
రసజ్ఞామజ్ఞానాం క ఇవ కమలే మంథరయతు.
త్రపంతు శ్రీభిక్షావితరణవశీభూతజగతాం
కరాణాం సౌభాగ్యం తవ తులయితుం తుంగరసనాః.
సమాహారః శ్రీణాం విరచితవిహారో హరిదృశాం
పరీహారో భక్తప్రభవభవసంతాపసరణేః.
ప్రహారః సర్వాసామపి చ విపదాం విష్ణుదయితే
మమోద్ధారోపాయం తవ సపది హారో విమృశతు.
అలంకుర్వాణానాం మణిగణఘృణీనాం లవణిమా
యదీయాభిర్భాభిర్భజతి మహిమానం లఘురపి.
సుపర్వశ్రేణీనాం జనితపరసౌభాగ్యవిభవాస్-
తవాంగుల్యస్తా మే దదతు హరివామేఽభిలషితం.
తపస్తేపే తీవ్రం కిమపి పరితప్య ప్రతిదినం
తవ గ్రీవాలక్ష్మీలవపరిచయాదాప్తవిభవం.
హరిః కంబుం చుంబత్యథ వహతి పాణౌ కిమధికం
వదామస్తత్రాయం ప్రణయవశతోఽస్యై స్పృహయతి.
అభూదప్రత్యూహః సకలహరిదుల్లాసనవిధిర్-
విలీనో లోకానాం స హి నయనతాపోఽపి కమలే.
తవాస్మిన్పీయూషం కిరతి వదనే రమ్యవదనే
కుతో హేతోశ్చేతోవిధురయముదేతి స్మ జలధేః.
ముఖాంభోజే మందస్మితమధురకాంత్యా వికసతాం
ద్విజానాం తే హీరావలివిహితనీరాజనరుచాం.
ఇయం జ్యోత్స్నా కాపి స్రవదమృతసందోహసరసా
మమోద్యద్దారిద్ర్యజ్వరతరుణతాపం తిరయతు.
కులైః కస్తూరీణాం భృశమనిశమాశాస్యమపి
చ ప్రభాతప్రోన్మీలన్నలిననివహైరశ్రుతచరం.
వహంతః సౌరభ్యం మృదుగతివిలాసా మమ శివం
తవ శ్వాసా నాసాపుటవిహితవాసా విదధతాం.
కపోలే తే దోలాయితలలితలోలాలకవృతే
విముక్తా ధమ్మిల్లాదభిలసతి ముక్తావలిరియం.
స్వకీయానాం బందీకృతమసహమానైరివ బలాన్-
నిబధ్యోర్ధ్వం కృష్టా తిమిరనికురంబైర్విధుకలా.
ప్రసాదో యస్యాయం నమదమితగీర్వాణముకుట-
ప్రసర్పజ్జోత్స్నాభిశ్చరణతలపీఠార్చితవిధిః.
దృగంభోజం తత్తే గతిహసితమత్తేభగమనే
వనే లీనైర్దీనైః కథయ కథమీయాదిహ తులాం.
దురాపా దుర్వృత్తైర్దురితదమనే దారణభరా
దయార్ద్రా దీనానాముపరి దలదిందీవరనిభా.
దహంతీ దారిద్ర్యద్రుమకులముదారద్రవిణదా
త్వదీయా దృష్టిర్మే జనని దురదృష్టం దలయతు.
తవ శ్రోత్రే ఫుల్లోత్పలసకలసౌభాగ్యజయినీ
సదైవ శ్రీనారాయణగుణగణౌఘప్రణయినీ.
రవైర్దీనాం లీనామనిశమవధానాతిశయినీ
మమాప్యేతాం వాచం జలధితనయే గోచరయతాం.
ప్రభాజాలైః ప్రాభాతికదినకరాభాపనయనం
తవేదం ఖేదం మే విఘటయతు తాటంకయుగలం.
మహిమ్నా యస్యాయం ప్రలయసమయేఽపి క్రతుభుజాం
జగత్పాయం పాయం స్వపితి నిరపాయం తవ పతిః.
నివాసో ముక్తానాం నిబిడతరనీలాంబుదనిభస్-
తవాయం ధమ్మిల్లో విమలయతు మల్లోచనయుగం.
భృశం యస్మిన్కాలాగరుబహులసౌరభ్యనివహైః
పతంతి శ్రీభిక్షార్థిన ఇవ మదాంధా మధులిహః.
విలగ్నౌ తే పార్శ్వద్వయపరిసరే మత్తకరిణౌ
కరోన్నీతైరంచన్మణికలశముగ్ధాస్యగలితైః.
నిషించంతౌ ముక్తామణిగణజయైస్త్వాం జలకణైర్-
నమస్యామో దామోదరగృహిణీ దారిద్ర్యదలితాః.
అయే మాతర్లక్ష్మి త్వదరుణపదాంభోజనికటే
లుఠంతం బాలం మామవిరలగలద్బాష్పజటిలం.
సుధాసేకస్నిగ్ధైరతిమసృణముగ్ధైః కరతలైః
స్పృశంతీ మా రోదీరితి వద సమాశ్వాస్యసి కదా.
రమే పద్మే లక్ష్మి ప్రణతజనకల్పద్రుమలతే
సుధాంభోధేః పుత్రి త్రిదశనికరోపాస్తచరణే.
పరే నిత్యం మాతర్గుణమయి పరబ్రహ్మమహిలే
జగన్నాథస్యాకర్ణయ మృదులవర్ణావలిమిమాం