ಏಕಮುಖೀ ಹನುಮಾನ್ ಕವಚ
ಪಾರ್ವತ್ಯುವಾಚ
ಭಗವನ್ ದೇವದೇವೇಶ ಲೋಕನಾಥ ಜಗದ್ಗುರೋ .
ಶೋಕಾಕುಲಾನಾಂ ಲೋಕಾನಾಂ ಕೇನ ರಕ್ಷಾ ಭವೇದ್ಧ್ರುವಂ ..
ಸಂಗ್ರಾಮೇ ಸಂಕಟೇ ಘೋರೇ ಭೂತಪ್ರೇತಾದಿಕೇ ಭಯೇ .
ದುಃಖದಾವಾಗ್ನಿಸಂತಪ್ತಚೇತಸಾಂ ದುಃಖಭಾಗಿನಾಂ ..
ಈಶ್ವರ ಉವಾಚ
ಶೃಣು ದೇವಿ ಪ್ರವಕ್ಷ್ಯಾಮಿ ಲೋಕಾನಾಂ ಹಿತಕಾಮ್ಯಯಾ .
ವಿಭೀಷಣಾಯ ರಾಮೇಣ ಪ್ರೇಮ್ಣಾ ದತ್ತಂ ಚ ಯತ್ಪುರಾ ..
ಕವಚಂ ಕಪಿನಾಥಸ್ಯ ವಾಯುಪುತ್ರಸ್ಯ ಧೀಮತಃ .
ಗುಹ್ಯಂ ತೇ ಸಂಪ್ರವಕ್ಷ್ಯಾಮಿ ವಿಶೇಷಾಚ್ಛೃಣು ಸುಂದರಿ ..
ಧ್ಯಾಯೇದ್ಬಾಲದಿವಾಕರಧೃತಿನಿಭಂ ದೇವಾರಿದರ್ಪಾಪಹಂ
ದೇವೇಂದ್ರಪ್ರಮುಖಪ್ರಶಸ್ತಯಶಸಂ ದೇದೀಪ್ಯಮಾನಂ ರುಚಾ .
ಸುಗ್ರೀವಾದಿಸಮಸ್ತವಾನರಯುತಂ ಸುವ್ಯಕ್ತತತ್ತ್ವಪ್ರಿಯಂ
ಸಂರಕ್ತಾರುಣಲೋಚನಂ ಪವನಜಂ ಪೀತಾಂಬರಾಲಂಕೃತಂ ..
ಉದ್ಯನ್ಮಾರ್ತಂಡಕೋಟಿಪ್ರಕಟರುಚಿಯುತಂ ಚಾರುವೀರಾಸನಸ್ಥಂ
ಮೌಂಜೀಯಜ್ಞೋಪವೀತಾರುಣರುಚಿರಶಿಖಾಶೋಭಿತಂ ಕುಂಡಲಾಂಗಂ .
ಭಕ್ತಾನಾಮಿಷ್ಟದಂ ತಂ ಪ್ರಣತಮುನಿಜನಂ ವೇದನಾದಪ್ರಮೋದಂ
ಧ್ಯಾಯೇದ್ದೇವಂ ವಿಧೇಯಂ ಪ್ಲವಗಕುಲಪತಿಂ ಗೋಷ್ಪದೀಭೂತವಾರ್ಧಿಂ ..
ವಜ್ರಾಂಗಂ ಪಿಂಗಕೇಶಾಢ್ಯಂ ಸ್ವರ್ಣಕುಂಡಲಮಂಡಿತಂ .
ನಿಯುದ್ಧಕರ್ಮಕುಶಲಂ ಪಾರಾವಾರಪರಾಕ್ರಮಂ ..
ವಾಮಹಸ್ತೇ ಮಹಾವೃಕ್ಷಂ ದಶಾಸ್ಯಕರಖಂಡನಂ .
ಉದ್ಯದ್ದಕ್ಷಿಣದೋರ್ದಂಡಂ ಹನುಮಂತಂ ವಿಚಿಂತಯೇತ್ ..
ಅಪರಾಜಿತ ನಮಸ್ತೇಽಸ್ತು ನಮಸ್ತೇ ರಾಮಪೂಜಿತ .
ಪ್ರಸ್ಥಾನಂ ಚ ಕರಿಷ್ಯಾಮಿ ಸಿದ್ಧಿರ್ಭವತು ಮೇ ಸದಾ ..
ಯೋ ವಾರಾಂನಿಧಿಮಲ್ಪಪಲ್ವಲಮಿವೋಲ್ಲಂಘ್ಯ ಪ್ರತಾಪಾನ್ವಿತೋ
ವೈದೇಹೀಘನಶೋಕತಾಪಹರಣೋ ವೈಕುಂಠತತ್ತ್ವಪ್ರಿಯಃ .
ಅಕ್ಷಾದ್ಯರ್ಚಿತರಾಕ್ಷಸೇಶ್ವರಮಹಾದರ್ಪಾಪಹಾರೀ ರಣೇ .
ಸೋಽಯಂ ವಾನರಪುಂಗವೋಽವತು ಸದಾ ಯುಷ್ಮಾನ್ಸಮೀರಾತ್ಮಜಃ ..
ವಜ್ರಾಂಗಂ ಪಿಂಗಕೇಶಂ ಕನಕಮಯಲಸತ್ಕುಂಡಲಾಕ್ರಾಂತಗಂಡಂ
ನಾನಾ ವಿದ್ಯಾಧಿನಾಥಂ ಕರತಲವಿಧೃತಂ ಪೂರ್ಣಕುಂಭಂ ದೃಢಂ ಚ
ಭಕ್ತಾಭೀಷ್ಟಾಧಿಕಾರಂ ವಿದಧತಿ ಚ ಸದಾ ಸರ್ವದಾ ಸುಪ್ರಸನ್ನಂ
ತ್ರೈಲೋಕ್ಯತ್ರಾಣಕಾರಂ ಸಕಲಭುವನಗಂ ರಾಮದೂತಂ ನಮಾಮಿ ..
ಉದ್ಯಲ್ಲಾಂಗೂಲಕೇಶಪ್ರಲಯಜಲಧರಂ ಭೀಮಮೂರ್ತಿಂ ಕಪೀಂದ್ರಂ
ವಂದೇ ರಾಮಾಂಘ್ರಿಪದ್ಮಭ್ರಮರಪರಿವೃತಂ ತತ್ತ್ವಸಾರಂ ಪ್ರಸನ್ನಂ .
ವಜ್ರಾಂಗಂ ವಜ್ರರೂಪಂ ಕನಕಮಯಲಸತ್ಕುಂಡಲಾಕ್ರಾಂತಗಂಡಂ
ದಂಭೋಲಿಸ್ತಂಭಸಾರಪ್ರಹರಣವಿಕಟಂ ಭೂತರಕ್ಷೋಽಧಿನಾಥಂ ..
ವಾಮೇ ಕರೇ ವೈರಿಭಯಂ ವಹಂತಂ ಶೈಲಂ ಚ ದಕ್ಷೇ ನಿಜಕಂಠಲಗ್ನಂ .
ದಧಾನಮಾಸಾದ್ಯ ಸುವರ್ಣವರ್ಣಂ ಭಜೇಜ್ಜ್ವಲತ್ಕುಂಡಲರಾಮದೂತಂ ..
ಪದ್ಮರಾಗಮಣಿಕುಂಡಲತ್ವಿಷಾ ಪಾಟಲೀಕೃತಕಪೋಲಮಂಡಲಂ .
ದಿವ್ಯಗೇಹಕದಲೀವನಾಂತರೇ ಭಾವಯಾಮಿ ಪವಮಾನನಂದನಂ ..
ಈಶ್ವರ ಉವಾಚ
ಇತಿ ವದತಿ ವಿಶೇಷಾದ್ರಾಘವೋ ರಾಕ್ಷಸೇಂದ್ರಂ
ಪ್ರಮುದಿತವರಚಿತ್ತೋ ರಾವಣಸ್ಯಾನುಜೋ ಹ .
ರಘುವರವರದೂತಂ ಪೂಜಯಾಮಾಸ ಭೂಯಃ
ಸ್ತುತಿಭಿರಕೃತಾರ್ಥಃ ಸ್ವಂ ಪರಂ ಮನ್ಯಮಾನಃ ..
ವಂದೇ ವಿದ್ಯುದ್ವಲಯಸುಭಗಸ್ವರ್ಣಯಜ್ಞೋಪವೀತಂ
ಕರ್ಣದ್ವಂದ್ವೇ ಕನಕರುಚಿರೇ ಕುಂಡಲೇ ಧಾರಯಂತಂ .
ಉಚ್ಚೈರ್ಹೃಷ್ಯದ್ದ್ಯುಮಣಿಕಿರಣಶ್ರೇಣಿಸಂಭಾವಿತಾಂಗಂ
ಸತ್ಕೌಪೀನಂ ಕಪಿವರವೃತಂ ಕಾಮರೂಪಂ ಕಪೀಂದ್ರಂ ..
ಶ್ರೀರಾಮ ಉವಾಚ
ಹನುಮಾನ್ ಪೂರ್ವತಃ ಪಾತು ದಕ್ಷಿಣೇ ಪವನಾತ್ಮಜಃ .
ಪ್ರತೀಚ್ಯಾಂ ಪಾತು ರಕ್ಷೋಘ್ನ ಉತ್ತರಸ್ಯಾಮಬ್ಧಿಪಾರಗಃ ..
ಉದೀಚ್ಯಾಮೂರ್ಧ್ವಗಃ ಪಾತು ಕೇಸರೀಪ್ರಿಯನಂದನಃ .
ಅಧಶ್ಚ ವಿಷ್ಣುಭಕ್ತಸ್ತು ಪಾತು ಮಧ್ಯೇ ಚ ಪಾವನಿಃ ..
ಅವಾಂತರದಿಶಃ ಪಾತು ಸೀತಾಶೋಕವಿನಾಶನಃ .
ಲಂಕಾವಿದಾಹಕಃ ಪಾತು ಸರ್ವಾಪದ್ಭ್ಯೋ ನಿರಂತರಂ ..
ಸುಗ್ರೀವಸಚಿವಃ ಪಾತು ಮಸ್ತಕಂ ವಾಯುನಂದನಃ .
ಭಾಲಂ ಪಾತು ಮಹಾವೀರೋ ಭ್ರುವೋರ್ಮಧ್ಯೇ ನಿರಂತರಂ ..
ನೇತ್ರೇ ಛಾಯಾಽಪಹಾರೀ ಚ ಪಾತು ನಃ ಪ್ಲವಗೇಶ್ವರಃ .
ಕಪೋಲಕರ್ಣಮೂಲೇ ತು ಪಾತು ಶ್ರೀರಾಮಕಿಂಕರಃ ..
ನಾಸಾಗ್ರೇ ಅಂಜನಾಸೂನುರ್ವಕ್ತ್ರಂ ಪಾತು ಹರೀಶ್ವರಃ .
ವಾಚಂ ರುದ್ರಪ್ರಿಯಃ ಪಾತು ಜಿಹ್ವಾಂ ಪಿಂಗಲಲೋಚನಃ ..
ಪಾತು ದಂತಾನ್ ಫಾಲ್ಗುನೇಷ್ಟಶ್ಚಿಬುಕಂ ದೈತ್ಯಪ್ರಾಣಹೃತ್ .
ಪಾತು ಕಂಠಂ ಚ ದೈತ್ಯಾರಿಃ ಸ್ಕಂಧೌ ಪಾತು ಸುರಾರ್ಚಿತಃ ..
ಭುಜೌ ಪಾತು ಮಹಾತೇಜಾಃ ಕರೌ ತು ಚರಣಾಯುಧಃ .
ನಖಾನ್ನಖಾಯುಧಃ ಪಾತು ಕುಕ್ಷಿಂ ಪಾತು ಕಪೀಶ್ವರಃ ..
ವಕ್ಷೋ ಮುದ್ರಾಪಹಾರೀ ಚ ಪಾತು ಪಾರ್ಶ್ವೇ ಭುಜಾಯುಧಃ .
ಲಂಕಾವಿಭಂಜನಃ ಪಾತು ಪೃಷ್ಠದೇಶೇ ನಿರಂತರಂ ..
ನಾಭಿಂಚ ರಾಮದೂತಸ್ತು ಕಟಿಂ ಪಾತ್ವನಿಲಾತ್ಮಜಃ .
ಗುಹ್ಮಂ ಪಾತು ಮಹಾಪ್ರಾಜ್ಞಃ ಸೃಕ್ಕಿಣೀ ಚ ಶಿವಪ್ರಿಯಃ ..
ಊರೂ ಚ ಜಾನುನೀ ಪಾತು ಲಂಕಾಪ್ರಾಸಾದಭಂಜನಃ .
ಜಂಘೇ ಪಾತು ಮಹಾಬಾಹುರ್ಗುಲ್ಫೌ ಪಾತು ಮಹಾಬಲಃ ..
ಅಚಲೋದ್ಧಾರಕಃ ಪಾತು ಪಾದೌ ಭಾಸ್ಕರಸನ್ನಿಭಃ .
ಪಾದಾಂತೇ ಸರ್ವಸತ್ವಾಢ್ಯಃ ಪಾತು ಪಾದಾಂಗುಲೀಸ್ತಥಾ ..
ಸರ್ವಾಂಗಾನಿ ಮಹಾವೀರಃ ಪಾತು ರೋಮಾಣಿ ಚಾತ್ಮವಾನ್ .
ಹನುಮತ್ಕವಚಂ ಯಸ್ತು ಪಠೇದ್ವಿದ್ವಾನ್ ವಿಚಾಕ್ಷಣಃ ..
ಸ ಏವ ಪುರುಷಶ್ರೇಷ್ಠೋ ಭಕ್ತಿಂ ಮುಕ್ತಿಂ ಚ ವಿಂದತಿ .
ತ್ರಿಕಾಲಮೇಕಕಾಲಂ ವಾ ಪಠೇನ್ಮಾಸತ್ರಯಂ ಸದಾ ..
ಸರ್ವಾನ್ ರಿಪೂನ್ ಕ್ಷಣೇ ಜಿತ್ವಾ ಸ ಪುಮಾನ್ ಶ್ರಿಯಮಾಪ್ನುಯಾತ್ .
ಮಧ್ಯರಾತ್ರೇ ಜಲೇ ಸ್ಥಿತ್ವಾ ಸಪ್ತವಾರಂ ಪಠೇದ್ಯದಿ ..
ಕ್ಷಯಾಽಪಸ್ಮಾರಕುಷ್ಠಾದಿತಾಪತ್ರಯನಿವಾರಣಂ .
ಆರ್ಕಿವಾರೇಽಶ್ವತ್ಥಮೂಲೇ ಸ್ಥಿತ್ವಾ ಪಠತಿಃ ಯಃ ಪುಮಾನ್ ..
ಅಚಲಾಂ ಶ್ರಿಯಮಾಪ್ನೋತಿ ಸಂಗ್ರಾಮೇ ವಿಜಯೀ ಭವೇತ್ ..
ಯಃ ಕರೇ ಧಾರಯೇನ್ನಿತ್ಯಂ ಸ ಪುಮಾನ್ ಶ್ರಿಯಮಾಪ್ನುಯಾತ್ .
ವಿವಾಹೇ ದಿವ್ಯಕಾಲೇ ಚ ದ್ಯೂತೇ ರಾಜಕುಲೇ ರಣೇ ..
ಭೂತಪ್ರೇತಮಹಾದುರ್ಗೇ ರಣೇ ಸಾಗರಸಂಪ್ಲವೇ .
ದಶವಾರಂ ಪಠೇದ್ರಾತ್ರೌ ಮಿತಾಹಾರೀ ಜಿತೇಂದ್ರಿಯಃ ..
ವಿಜಯಂ ಲಭತೇ ಲೋಕೇ ಮಾನವೇಷು ನರಾಧಿಪಃ .
ಸಿಂಹವ್ಯಾಘ್ರಭಯೇ ಚಾಗ್ನೌ ಶರಶಸ್ತ್ರಾಸ್ತ್ರಯಾತನೇ ..
ಶೃಂಖಲಾಬಂಧನೇ ಚೈವ ಕಾರಾಗ್ರಹನಿಯಂತ್ರಣೇ .
ಕಾಯಸ್ತಂಭೇ ವಹ್ನಿದಾಹೇ ಗಾತ್ರರೋಗೇ ಚ ದಾರುಣೇ ..
ಶೋಕೇ ಮಹಾರಣೇ ಚೈವ ಬ್ರಹ್ಮಗ್ರಹವಿನಾಶನೇ .
ಸರ್ವದಾ ತು ಪಠೇನ್ನಿತ್ಯಂ ಜಯಮಾಪ್ನೋತ್ಯಸಂಶಯಂ ..
ಭೂರ್ಜೇ ವಾ ವಸನೇ ರಕ್ತೇ ಕ್ಷೌಮೇ ವಾ ತಾಲಪತ್ರಕೇ .
ತ್ರಿಗಂಧೇನಾಥವಾ ಮಸ್ಯಾ ಲಿಖಿತ್ವಾ ಧಾರಯೇನ್ನರಃ ..
ಪಂಚಸಪ್ತತ್ರಿಲೌಹೈರ್ವಾ ಗೋಪಿತಂ ಕವಚಂ ಶುಭಂ .
ಗಲೇ ಕಟ್ಯಾಂ ಬಾಹುಮೂಲೇ ವಾ ಕಂಠೇ ಶಿರಸಿ ಧಾರಿತಂ ..
ಸರ್ವಾನ್ ಕಾಮಾನವಾಪ್ನೋತಿ ಸತ್ಯಂ ಶ್ರೀರಾಮಭಾಷಿತಂ ..
Other stotras
