Pranava Ashtaka Stotram

अचतुराननमुस्वभुवं हरि-
महरमेव सुनादमहेश्वरम्|
परममुज्ज्वलबिन्दुसदाशिवं
प्रणवकारमहं प्रणमामि तम्|
अरचनाख्यकलामुसुपाकला-
मकृतिनाशकलां लयनादगाम्|
परमबिन्दुरनुग्रहगां कलां
प्रणवकारमहं प्रणमामि तम्|
अगणनाथमुकारजनार्दन-
मरविमेव सुनादकलाम्बिकाम्|
परमबिन्दुशिवं परमेश्वरं
प्रणवकारमहं प्रणमामि तम्|
अपृथिवीमुजलामकृशानुकं
परमनादमयं परबिन्दुखम्|
भुवनबीजमहापरमेश्वरं
प्रणवकारमहं प्रणमामि तम्|
अनिनदं क्षितिचक्रसमुद्भवं
हृदयचक्रजमुद्ध्वनिमुज्ज्वलम्|
मखजमेकसहस्रदले गतं
प्रणवकारमहं प्रणमामि तम्|
पुनरमातृमयं तदुमानगं
शुभममेयमयं त्रिगुणात्मकम्|
परमनादपरां परबैन्दवं
प्रणवकारमहं प्रणमामि तम्|
त्रिपुरधाममयं परमात्मकं
परमहंसमयं लयमोक्षदम्|
सुनियमागमतत्त्वयुतं प्रभं
प्रणवकारमहं प्रणमामि तम्|
ओङ्कारं परमात्मकं त्रिगुणकं चाम्बाम्बिकाम्बालिका-
रूपं नादमनादिशक्ति- विभवाविद्यासुविद्यायुतम्|
बिन्दुं ब्रह्ममयं तदन्तरगतां श्रीसुन्दरीं चिन्मयीं
साक्षाच्छ्रीप्रणवं सदैव शुभदं नित्यं परं नौम्यहम्|

achaturaananamusvabhuvam hari-
maharameva sunaadamaheshvaram|
paramamujjvalabindusadaashivam
pranavakaaramaham pranamaami tam|
arachanaakhyakalaamusupaakalaa-
makri'tinaashakalaam layanaadagaam|
paramabinduranugrahagaam kalaam
pranavakaaramaham pranamaami tam|
agananaathamukaarajanaardana-
maravimeva sunaadakalaambikaam|
paramabindushivam parameshvaram
pranavakaaramaham pranamaami tam|
apri'thiveemujalaamakri'shaanukam
paramanaadamayam parabindukham|
bhuvanabeejamahaaparameshvaram
pranavakaaramaham pranamaami tam|
aninadam kshitichakrasamudbhavam
hri'dayachakrajamuddhvanimujjvalam|
makhajamekasahasradale gatam
pranavakaaramaham pranamaami tam|
punaramaatri'mayam tadumaanagam
shubhamameyamayam trigunaatmakam|
paramanaadaparaam parabaindavam
pranavakaaramaham pranamaami tam|
tripuradhaamamayam paramaatmakam
paramahamsamayam layamokshadam|
suniyamaagamatattvayutam prabham
pranavakaaramaham pranamaami tam|
onkaaram paramaatmakam trigunakam chaambaambikaambaalikaa-
roopam naadamanaadishakti- vibhavaavidyaasuvidyaayutam|
bindum brahmamayam tadantaragataam shreesundareem chinmayeem
saakshaachchhreepranavam sadaiva shubhadam nityam param naumyaham|