ശ്രീരാമ വർണമാലികാ സ്തോത്രം

അന്തസ്സമസ്തജഗതാം യമനുപ്രവിഷ്ട-
മാചക്ഷതേ മണിഗണേഷ്വിവ സൂത്രമാര്യാഃ .
തം കേലികല്പിതരഘൂദ്വഹരൂപമാദ്യം
പങ്കേരുഹാക്ഷമനിശം ശരണം പ്രപദ്യേ ..

ആമ്നായശൈലശിഖരൈകനികേതനായ
വാല്മീകിവാഗ്ജലനിധിപ്രതിബിംബിതായ .
കാലാംബുദായ കരുണാരസമേദുരായ
കസ്മൈചിദസ്തു മമ കാർമുകിണേ പ്രണാമഃ ..

ഇന്ദുപ്രസാദമവതംസയതാ തദീയം
ചാപം കരേ ഹുതവഹം വഹതാ ഹരേണ .
ശങ്കേ ജഗത്ത്രയമനുഗ്രഹനിഗ്രഹാഭ്യാം
സംയോജ്യതേ രഘുപതേ സമയാന്തരേഷു ..

ഈദൃഗ്വിധസ്ത്വമിതി വേദ ന സോഽപി വേദഃ
ശക്തോഽന്തികസ്ഥിതമവേക്ഷിതുമുത്തമാംഗേ .
ശ്രോതും ക്ഷമം ന കുദൃശേക്ഷിതുമപ്യതസ്ത്വാം
സർവേ വിദന്തു കഥമീശ കഥം സ്തുവന്തു ..

ഉഷ്ണാംശുബിംബമുദധിസ്മയഘസ്മരാസ്ത്ര
ഗ്രാവാ ച തുല്യമജനിഷ്ട ഗൃഹം യഥാ തേ .
വാല്മീകിവാഗപി മദുക്തിരപി പ്രഭും ത്വാം
ദേവ പ്രശംസതി തഥാ യദി കോഽത്ര ദോഷഃ ..

ഊഢഃ പുരാസി വിനതാന്വയസംഭവേന
ദേവ ത്വയാ കിമധുനാപി തഥാ ന ഭാവ്യം .
പൂർവേ ജനാ മമ വിനേമുരസംശയം ത്വാം
ജാനാസി രാഘവ തദന്വയസംഭവം മാം ..

ഋക്ഷം പ്ലവംഗമപി രക്ഷസി ചേന്മഹാത്മൻ
വിപ്രേഷു കിം പുനരഥാപി ന വിശ്വസാമ .
അത്രാപരാധ്യതി കില പ്രഥമദ്വിതീയൗ
വർണൗ തവൗദനതയാ നിഗമോ വിവൃണ്വൻ ..

നൄണാം ന കേവലമസി ത്രിദിവൗകസാം ത്വം
രാജാ യമാർകമരുതോഽപി യതസ്ത്രസന്തി .
ദീനസ്യ വാങ്മമ തഥാ വിതതേ തവ സ്യാത്
കർണേ രഘൂദ്വഹ യതഃ കകുഭോഽപി ജാതാഃ ..

ക്ലൃപ്താമപി വ്യസനിനീം ഭവിതവ്യതാം മേ
നാഥാന്യഥാ കുരു തവ പ്രഭുതാം ദിദൃക്ഷോഃ .
ചക്രേ ശിലാപി തരുണീ ഭവതാ തദാസ്താം
മായാപി യദ്ധടയതേ തവ ദുർഘടാനി ..

ഏകം ഭവന്തമൃഷയോ വിദുരദ്വിതീയം
ജാനാമി കാർമുകാമഹം തു തവ ദ്വിതീയം .
ശ്രുത്യാശ്രിതാ ജഗതി യദ്ഗുണഘോഷണാ സാ
ദൂരീകരോതി ദുരിതാനി സമാശ്രിതാനാം ..

ഐശം ശരാസമചലോപമമിക്ഷുവല്ലീ-
ഭഞ്ജം ബഭഞ്ജ ഫില യസ്തവ ബാഹുദണ്ഡഃ .
തസ്യ ത്വശീതകരവംശവതംസ ശംസ
കിം ദുഷ്കരോ ഭവതി മേ വിധിപാശഭംഗഃ ..

ഓജസ്തവ പ്രഹിതശേഷവിഷാഗ്നിദഗ്ധൈഃ
സ്പഷ്ടം ജഗദ്ഭിരുപലഭ്യ ഭയാകുലാനാം .
ഗീതോക്തിഭിസ്ത്വയി നിരസ്യ മനുഷ്യബുദ്ധിം
ദേവ സ്തുതോഽസി വിധിവിഷ്ണുവൃഷധ്ജാനാം ..

ഔത്കണ്ഠ്യമസ്തി ദശകണ്ഠരിപോ മമൈകം
ദ്രക്ഷ്യാമി താവകപദാംബുരുഹം കദേതി .
അപ്യേതി കർമ നിഖിലം മമ യത്ര ദൃഷ്ടേ
ലീനാശ്ച യത്ര യതിഭിഃ സഹ മത്കുലീനാഃ ..

അംഭോനിധാവവധിമത്യവകീര്യ ബാണാൻ
കിം ലബ്ധവാനസി നനു ശ്വശുരസ്തവായം .
ഇഷ്ടാപനേതുമഥവാ യദി ബാണകണ്ഡൂ-
ര്ദേവായമസ്യനവധിർമമ ദൈന്യസിന്ധുഃ ..

അശ്രാന്തമർഹതി തുലാമമൃതാംശുബിംബം
ഭഗ്നാംബുജദ്യുതിമദേന ഭവന്മുഖേന .
അസ്മാദഭൂദനല ഇത്യകൃതോക്തിരീശ
സത്യാ കഥം ഭവതു സാധുവിവേകഭാജാം ..

കല്യാണമാവഹതു നഃ കമലോദരശ്രീ-
രാസന്നവാനരഭടൗഘഗൃഹീതശേഷഃ .
ശ്ലിഷ്യൻ മുനീൻ പ്രണതദേവശിരഃകിരീട-
ദാമ്നി സ്ഖലൻ ദശരഥാത്മജ തേ കടാക്ഷഃ ..

ഖംവായുരഗ്നിരുദകം പൃഥിവീ ച ശബ്ദഃ
സ്പർശശ്വ രൂപരസഗന്ധമപി ത്വമേവ .
രാമ ശ്രിതാശ്രയ വിഭോ ദയയാത്മബന്ധോ
ധത്സേ വപുഃ ശരശരാസഭൃദബ്ദനീലം ..

ഗംഗാ പുനാതി രഘുപുംഗവ യത്പ്രസൂതാ
യദ്രേണുനാ ച പുപുവേ യമിനഃ കലത്രം .
തസ്യ ത്വദംഘ്രികമലസ്യ നിഷേവയാ സ്യാം
പൂതോ യഥാ പുനരഘേഽപി തഥാ പ്രസീദ ..

ഘണ്ടാഘണംഘണിതകോടിശരാസനം തേ
ലുണ്ടാകമസ്തു വിപദാം മമ ലോകനാഥ .
ജിഹ്വാലുതാം വഹതി യദ്ഭുജഗോ രിപൂണാ-
മുഷ്ണൈരസൃഗ്ഭിരുദരംഭരിണാ ശരേണ ..

പ്രാങ്സ്യവാങ്സി പരേശ തഥാസി തിര്യക്
ബ്രൂമഃ കിമന്യദഖിലാ അപി ജന്തവോഽസി .
ഏകക്രമേപി തവ വാ ഭുവി ന മ്രിയന്തേ
മന്ദസ്യ രാഘവ സഹസ്വ മമാപരാധം ..

ചണ്ഡാനിലവ്യതികരക്ഷുഭിതാംബുവാഹ-
ദംഭോലിപാതമിവ ദാരുണമന്തകാലം .
സ്മൃത്വാപി സംഭവിനമുദ്വിജതേ ന ധന്യോ
ലബ്ധ്വാ ശരണ്യമനരണ്യകുലേശ്വരം ത്വാം ..

ഛന്നം നിജം കുഹനയാ മൃഗരൂപഭാജോ
നക്തഞ്ചരസ്യ ന കിമാവിരകാരി രൂപം .
ത്വത്പത്രിണാപി രഘുവീര മമാദ്യ മായാ-
ഗൂഢസ്വരൂപവിവൃതൗ തവ കഃ പ്രയാസഃ ..

ജന്തോഃ കില ത്വദഭിധാ മമ കർണികായാം
കർണേ ജപൻ ഹരതി കശ്ചന പഞ്ചകോശാൻ .
ഇത്യാമനന്തി രഘുവീര തതോ ഭവന്തം
രാജാധിരാജ ഇതി വിശ്വസിമഃ കഥം വാ ..

ഝങ്കാരിഭൃംഗകമലോപമിതം പദം തേ
ചാരുസ്തവപ്രവണചാരണകിന്നരൗഘം .
ജാനാമി രാഘവ ജലാശയവാസയോഗ്യം
സ്വൈരം വസേത്തദധുനൈവ ജലാശയേ മേ ..

ജ്ഞാനേന മുക്തിരിതി നിശ്ചിതമാഗമജ്ഞൈ-
ര്ജ്ഞാനം ക്വ മേ ഭവതു ദുസ്ത്യജവാസനസ്യ .
ദേവാഭയം വിതര കിം നു സകൃത്പ്രപത്ത്യാ
മഹ്യം ന വിസ്മര പുരൈവ കൃതാം പ്രതിജ്ഞാം ..

ടങ്കാരമീശ ഭവദീയശരാസനസ്യ
ജ്യാസ്ഭാലനേന ജനിതം നിഗമം പ്രതീമഃ .
യേനൈവ രാഘവ ഭവാനവഗമ്യ മാസ-
ത്രാസം നിരസ്യ സുഖമാതനുതേ ബുധാനാം ..

ഠാത്കൃത്യ മണ്ഡലമഖണ്ഡി യദുഷ്ണഭാനോ-
ര്ദേവ ത്വദസ്ത്രദലിതൈര്യുധി യാതുധാനൈഃ .
ശങ്കേ തതസ്തവ പദം വിദലയ്യ വേഗാ-
ത്തൈരദ്ഭുതം പ്രതികൃതിർവിദധേ വധസ്യ ..

ഡിംഭസ്തവാസ്മി രഘുവീര തഥാ ദയസ്വ
ലഭ്യം യഥാ കുശലവത്വമപി ക്ഷിതൗ മേ .
കിഞ്ചിന്മനോ മയി നിധേഹി തവ ക്ഷതം കിം
വ്യർഥാ ഭവത്വമനസം ഗൃണതീ ശ്രുതിസ്ത്വാം ..

ഢക്കാം ത്വദീയയശസാ മധുനാപി ശൃണ്മഃ
പ്രാചേതസസ്യ ഭണിതിം ഭരതാഗ്രജന്മൻ .
സത്യേ യശസ്തവ ശൃണോതി മൃകണ്ഡുസൂനോ-
ര്ധാതാപ്യതോ ജഗതി കോ ഹി ഭവാദൃശോഽന്യഃ ..

ത്രാണം സമസ്തജഗതാം തവ കിം ന കാര്യം
സാ കിം ന തത്ര കരണം കരുണാ തവൈവ .
ആഖ്യാതി കാര്യകരണേ തവ നേതി യാ വാങ്-
മുഖ്യാ ന സാ രഘുപതേ ഭവതി ശ്രുതീനാം ..

തത്ത്വമ്പദേ പദമസീതി ച യാനി ദേവ
തേഷാം യദസ്മ്യഭിലഷന്നുപലബ്ധുമർഥാൻ .
സേവേ പദദ്വയമതോ മൃദുലം ന വാദൗ
യദ്ദാരുണൈരപി തതോ ഭവദർഥലാഭഃ ..

പ്രോഥം യദുദ്വഹസി ഭൂമിവഹൈകദംഷ്ട്രം
വിശ്വപ്രഭോ വിഘടിതാഭ്രഘടാഃ സടാ വാ .
രൂപം തദുദ്ഭടമപാസ്യ രുചാസി ദിഷ്ട്യാ
ത്വം ശംബരാരിരപി കൈതവശംബരാരിഃ ..

ദഗ്ധ്വാ നിശാചരപുരീ പ്രഥിതസ്തവൈകോ
ഭക്തേഷു ദാനവപുരത്രിതയം തഥാന്യഃ .
ത്വഞ്ചാശരാവ്യുരസമസ്യഗുണൈഃ പ്രഭോ മേ
പുര്യഷ്ടകപ്രശമനേന ലഭസ്വ കീർതിം ..

ധത്തേ ശിരാംസി ദശ യസ്സുകരോ വധോഽസ്യ
കിം ന ത്വയാ നിഗമഗീതസഹസ്ത്രമൂർധ്നാ .
മോഹം മമാമിതപദം യദി ദേവ ഹന്യാഃ
കീർതിസ്തദാ തവ സഹസ്രപദോ ബഹുഃ സ്യാത് ..

നമ്രസ്യ മേ ഭവ വിഭോ സ്വയമേവ നാഥോ
നാഥോ ഭവ ത്വമിതി ചോദയിതും ബിഭേമി .
യേന സ്വസാ ദശമുഖസ്യ നിയോജയന്തീ
നാഥോ ഭവ ത്വമിതി നാസികയാ വിഹീനാ ..

പര്യാകുലോഽസ്മി കില പാതകമേവ കുർവൻ
ദീനം തതഃ കരുണയാ കുരു മാമപാപം .
കർതും രഘൂദ്വഹ നദീനമപാപമുർവ്യാം
ശക്തസ്ത്വമിത്യയമപൈതി ന ലോകവാദഃ ..

ഫൽഗൂനി യദ്യപി ഫലാനി ന ലിപ്സതേ മേ
ചേതഃ പ്രഭോ തദപി നോ ഭജതി പ്രകൃത്യാ .
മൂർത്യന്തരം വ്രജവധൂജനമോഹനം തേ
ജാനാതി ഫൽഗു ന ഫലം ഭുവി യത്പ്രദാതും ..

ബർഹിശ്ഛദഗ്രഥിതകേശമനർഹവേഷ-
മാദായ ഗോപവനിതാകുചകുങ്കുമാങ്കം .
ഹ്രീണോ ന രാഘവ ഭവാൻ യദതഃ പ്രതീമഃ
പത്ന്യാ ഹ്രിയാ വിരഹിതോഽസി പുരാ ശ്രിയേവ ..

ഭദ്രായ മേഽസ്തു തവ രാഘവ ബോധമുദ്രാ
വിദ്രാവയന്ത്യഖിലമാന്തരമന്ധകാരം .
മന്ത്രസ്യ തേ പരിപുനന്തി ജഗദ്യഥാഷ-
ഡഷ്ടാക്ഷരാണ്യാപി തഥൈവ വിവൃണ്വതീ സാ ..

മന്ദം നിധേഹി ഹൃദി മേ ഭഗവന്നടവ്യാം
പാഷാണകണ്ടകസഹിഷ്ണു പദാംബുജം തേ .
അംഗുഷ്ഠമാത്രമഥവാത്ര നിധാതുമർഹ-
സ്യാക്രാന്തദുന്ദുഭിതനൂകഠിനാസ്ഥികൂടം ..

യജ്ഞേന ദേവ തപസാ യദനാശകേന
ദാനേന ച ദ്വിജഗണൈർവിവിദിഷ്യസേ ത്വം .
ഭാഗ്യേന മേ ജനിതൃഷാ തദിദം യതസ്ത്വാം
ചാപേഷുഭാക് പരമബുധ്യത ജാമദഗ്ന്യഃ ..

രമ്യോജ്ജ്വലസ്തവ പുരാ രഘുവീര ദേഹഃ
കാമപ്രദോ യദഭവത് കമലാലയായൈ .
ചിത്രം കിമത്ര ചരണാംബുജരേണുരേഖാ
കാമം ദദൗ ന മുനയേ കിമു ഗൗതമായ ..

ലങ്കേശവക്ഷസി നിവിശ്യ യഥാ ശരസ്തേ
മന്ദോദരീകുചതടീമണിഹാരചോരഃ .
ശുദ്ധേ സതാം ഹൃദി ഗതസ്ത്വമപി പ്രഭോ മേ
ചിത്തേ തഥാ ഹര ചിരോവനതാമവിദ്യാം ..

വന്ദേ തവാംഘ്രികമലം ശ്വശുരം പയോധേ-
സ്താതം ഭുവശ്ച രഘുപുംഗവ രേഖയാ യത് .
വജ്രം ബിഭർതി ഭജദാർതിഗിരിം വിഭേത്തും
വിദ്യാം നതായ വിതരേയമിതി ധ്വജം ച ..

ശംഭുഃ സ്വയം നിരദിശദ്ഗിരികന്യകായൈ
യന്നാമ രാമ തവ നാമസഹസ്രതുല്യം .
അർഥം ഭവന്തമപി തദ്വഹദേകമേവ
ചിത്രം ദദാതി ഗൃണതേ ചതുരഃ കിലാർഥാൻ ..

ഷട് തേ വിധിപ്രഭൃതിഭിഃ സമവേക്ഷിതാനി
മന്ത്രാക്ഷരാണി ഋഷിഭിർമനുവംശകേതോ .
ഏകേന യാനി ഗുണിതാന്യപി മാനസേന
ചിത്രം നൃണാം ത്രിദശതാമുപലംഭയന്തി ..

സർഗസ്ഥിതിപ്രലയകർമസു ചോദയന്തീ
മായാ ഗുണത്രയമയീ ജഗതോ ഭവന്തം .
ബ്രഹ്മേതി വിഷ്ണുരിതി രുദ്ര ഇതി ത്രിധാ തേ
നാമ പ്രഭോ ദിശതി ചിത്രമജന്മനോഽപി ..

ഹംസോഽസി മാനസചരോ മഹതാം യതസ്ത്വം
സംഭാവ്യതേ കീല തതസ്തവ പക്ഷപാതഃ .
മയ്യേനമർപയ ന ചേദ്രഘുനന്ദന
ജിഷ്ണോരപി ത്രിഭുവനേ സമവേശ രാമ ..

ലക്ഷ്മീര്യതോഽജനി യഥൈവ ജലാശയാനാ-
മേകോ രുഷാ തവ തഥാ കൃപയാപി കാര്യഃ .
അന്യോഽപി കശ്ചിദിതി ചേദഹമേവ വർതേ
താദൃഗ്വിധസ്തപനവംശമണേ കിമന്യൈഃ ..

ക്ഷന്തും ത്വമർഹസി രഘൂദ്വഹ മേഽപരാധാൻ
സർവംസഹാ നനു വധൂരപി തേ പുരാണീ .
വാസാലയം ച നനു ഹൃത്കമലം മദീയം
കാന്താപരാപി ന ഹി കിം കമലാലയാ തേ ..

Ramaswamy Sastry and Vighnesh Ghanapaathi

Other stotras