మహా సరస్వతీ స్తోత్రం
అశ్వతర ఉవాచ -
జగద్ధాత్రీమహం దేవీమారిరాధయిషుః శుభాం .
స్తోష్యే ప్రణమ్య శిరసా బ్రహ్మయోనిం సరస్వతీం ..
సదసద్దేవి సత్కించిన్మోక్షవచ్చార్థవత్పదం .
తత్సర్వం త్వయ్యసంయోగం యోగవద్దేవి సంస్థితం ..
త్వమక్షరం పరం దేవి యత్ర సర్వం ప్రతిష్ఠితం .
అక్షరం పరమం దేవి సంస్థితం పరమాణువత్ ..
అక్షరం పరమం బ్రహ్మ విశ్వంచైతత్క్షరాత్మకం .
దారుణ్యవస్థితో వహ్నిర్భౌమాశ్చ పరమాణవః ..
తథా త్వయి స్థితం బ్రహ్మ జగచ్చేదమశేషతః .
ఓంకారాక్షరసంస్థానం యత్తు దేవి స్థిరాస్థిరం ..
తత్ర మాత్రాత్రయం సర్వమస్తి యద్దేవి నాస్తి చ .
త్రయో లోకాస్త్రయో వేదాస్త్రైవిద్యం పావకత్రయం ..
త్రీణి జ్యోతీంషి వర్ణాశ్చ త్రయో ధర్మాగమాస్తథా .
త్రయో గుణాస్త్రయః శబ్దస్త్రయో వేదాస్తథాశ్రమాః ..
త్రయః కాలాస్తథావస్థాః పితరోఽహర్నిశాదయః .
ఏతన్మాత్రాత్రయం దేవి తవ రూపం సరస్వతి ..
విభిన్నదర్శినామాద్యా బ్రహ్మణో హి సనాతనాః .
సోమసంస్థా హవిః సంస్థాః పాకసంస్థాశ్చ సప్త యాః ..
తాస్త్వదుచ్చారణాద్దేవి క్రియంతే బ్రహ్మవాదిభిః .
అనిర్దేశ్యం తథా చాన్యదర్ధమాత్రాన్వితం పరం ..
అవికార్యక్షయం దివ్యం పరిణామవివర్జితం .
తవైతత్పరమం రూపం యన్న శక్యం మయోదితుం ..
న చాస్యే న చ తజ్జిహ్వా తామ్రోష్ఠాదిభిరుచ్యతే .
ఇంద్రోఽపి వసవో బ్రహ్మా చంద్రార్కౌ జ్యోతిరేవ చ ..
విశ్వావాసం విశ్వరూపం విశ్వేశం పరమేశ్వరం .
సాంఖ్యవేదాంతవాదోక్తం బహుశాఖాస్థిరీకృతం ..
అనాదిమధ్యనిధనం సదసన్న సదేవ యత్ .
ఏకంత్వనేకం నాప్యేకం భవభేదసమాశ్రైతం ..
అనాఖ్యం షడ్గుణాఖ్యంచ వర్గాఖ్యం త్రిగుణాశ్రయం .
నానాశక్తిమతామేకం శక్తివైభవికం పరం ..
సుఖాసుఖం మహాసౌఖ్యరూపం త్వయి విభావ్యతే .
ఏవం దేవి త్వయా వ్యాప్తం సకలం నిష్కలంచ యత్ .
అద్వైతావస్థితం బ్రహ్మ యచ్చ ద్వైతే వ్యవస్థితం ..
యేఽర్థా నిత్యా యే వినశ్యంతి చాన్యే
యే వా స్థూలా యే చ సూక్ష్మాతిసూక్ష్మాః .
యే వా భూమౌ యేఽన్తరీక్షేఽన్యతో వా
తేషాం తేషాం త్వత్త ఏవోపలబ్ధిః ..
యచ్చామూర్తం యచ్చ మూర్తం సమస్తం
యద్వా భూతేష్వేకమేకంచ కించిత్ .
యద్దివ్యస్తి క్ష్మాతలే ఖేఽన్యతో వా
త్వత్సంబద్ధం త్వత్స్వరైర్వ్యంజనైశ్చ ..
Other stotras
