రామ శరణాగతి స్తోత్రం

విశ్వస్య చాత్మనోనిత్యం పారతంత్ర్యం విచింత్య చ.
చింతయేచ్చేతసా నిత్యం శ్రీరామఃశరణం మమ.
అచింత్యోఽపి శరీరాదేః స్వాతంత్ర్యేనైవ విద్యతే.
చింతయేచ్చేతసా నిత్యం శ్రీరామఃశరణం మమ.
ఆత్మాధారం స్వతంత్రం చ సర్వశక్తిం విచింత్య చ.
చింతయేచ్చేతసా నిత్యం శ్రీరామఃశరణం మమ.
నిత్యాత్మ గుణసంయుక్తో నిత్యాత్మతనుమండితః.
నిత్యాత్మకేలినిరతః శ్రీరామఃశరణం మమ.
గుణలీలాస్వరూపైశ్చ మితిర్యస్య న విద్యతే.
అతో వాఙ్మనసా వేద్యః శ్రీరామఃశరణం మమ.
కర్తా సర్వస్య జగతో భర్తా సర్వస్య సర్వగః.
ఆహర్తా కార్యజాతస్య శ్రీరామఃశరణం మమ.
వాసుదేవాదిమూర్తీనాం చతుర్ణాం కారణం పరం.
చతుర్వింశతిమూర్తీనాం శ్రీరామఃశరణం మమ.
నిత్యముక్తజనైర్జుష్టో నివిష్టః పరమే పదే.
పదం పరమభక్తానాం శ్రీరామః శరణం మమ.
మహదాదిస్వరూపేణ సంస్థితః ప్రాకృతే పదే.
బ్రహ్మాదిదేవరూపైశ్చ శ్రీరామః శరణం మమ.
మన్వాదినృపరూపేణ శ్రుతిమార్గం బిభర్తి యః.
యః ప్రాకృతస్వరూపేణ శ్రీరామఃశరణం మమ.
ఋషిరూపేణ యో దేవో వన్యవృత్తిమపాలయత్.
యోఽన్తరాత్మా చ సర్వేషాం శ్రీరామఃశరణం మమ.
యోఽసౌ సర్వతనుః సర్వః సర్వనామా సనాతనః.
ఆస్థితః సర్వభావేషు శ్రీరామఃశరణం మమ.
బహిర్మత్స్యాదిరూపేణ సద్ధర్మమనుపాలయన్.
పరిపాతి జనాన్ దీనాన్ శ్రీరామఃశరణం మమ.
యశ్చాత్మానం పృథక్కృత్య భావేన పురుషోత్తమః.
ఆర్చాయామాస్థితో దేవః శ్రీరామఃశరణం మమ.
అర్చావతారరూపేణ దర్శనస్పర్శనాదిభిః.
దీనానుద్ధరతే యోఽసౌ శ్రీరామఃశరణం మమ.
కౌశల్యాశుక్తిసంజాతో జానకీకంఠభూషణః.
ముక్తాఫలసమో యోఽసౌ శ్రీరామఃశరణం మమ.
విశ్వామిత్రమఖత్రాతా తాడకాగతిదాయకః.
అహల్యాశాపశమనః శ్రీరామఃశరణం మమ.
పినాకభంజనః శ్రీమాన్ జానకీప్రేమపాలకః.
జామదగ్న్యప్రతాపఘ్నః శ్రీరామఃశరణం మమ.
రాజ్యాభిషేకసంహృష్టః కైకేయీవచనాత్పునః.
పితృదత్తవనక్రీడః శ్రీరామఃశరణం మమ.
జటాచీరధరో ధన్వీ జానకీలక్ష్మణాన్వితః.
చిత్రకూటకృతావాసః శ్రీరామఃశరణం మమ.
మహాపంచవటీలీలా- సంజాతపరమోత్సవః.
దండకారణ్యసంచారీ శ్రీరామఃశరణం మమ.
ఖరదూషణవిచ్ఛేదీ దుష్టరాక్షసభంజనః.
హృతశూర్పనఖాశోభః శ్రీరామఃశరణం మమ.
మాయామృగవిభేత్తా చ హృతసీతానుతాపకృత్.
జానకీవిరహాక్రోశీ శ్రీరామఃశరణం మమ.
లక్ష్మణానుచరో ధన్వీ లోకయాత్రవిడంబకృత్.
పంపాతీరకృతాన్వేషః శ్రీరామఃశరణం మమ.
జటాయుగతిదాతా చ కబంధగతిదాయకః.
హనుమత్కృతసాహిత్యః శ్రీరామఃశరణం మమ.
సుగ్రీవరాజ్యదః శ్రీశో బాలినిగ్రహకారకః.
అంగదాశ్వాసనకరః శ్రీరామఃశరణం మమ.
సీతాన్వేషణనిర్ముక్తః హనుమత్ప్రముఖవ్రజః.
ముద్రానివేశితబలః శ్రీరామఃశరణం మమ.
హేలోత్తరితపాథోధి- ర్బలనిర్ధూతరాక్షసః.
లంకాదాహకరో ధీరః శ్రీరామఃశరణం మమ.
రోషసంబద్ధపాథోధి- ర్లంకాప్రాసాదరోధకః.
రావణాదిప్రభేత్తా చ శ్రీరామఃశరణం మమ.
జానకీజీవనత్రాతా విభీషణసమృద్ధిదః.
పుష్పకారోహణాసక్తః శ్రీరామఃశరణం మమ.
రాజ్యసింహాసనారూఢః కౌశల్యానందవర్ద్ధనః.
నామనిర్ధూతనిరయః శ్రీరామఃశరణం మమ.
యజ్ఞకర్త్తా యజ్ఞభోక్తా యజ్ఞభర్తామహేశ్వరః.
అయోధ్యాముక్తిదః శాస్తా శ్రీరామఃశరణం మమ.
ప్రపఠేద్యః శుభం స్తోత్రం ముచ్యేత భవబంధనాత్.
మంత్రశ్చాష్టాక్షరో దేవః శ్రీరామఃశరణం మమ.