ഗംഗാ ലഹരീ സ്തോത്രം

സമൃദ്ധം സൗഭാഗ്യം സകലവസുധായാഃ കിമപി തൻ
മഹൈശ്വര്യം ലീലാജനിതജഗതഃ ഖണ്ഡപരശോഃ.
ശ്രുതീനാം സർവസ്വം സുകൃതമഥ മൂർതം സുമനസാം
സുധാസോദര്യം തേ സലിലമശിവം നഃ ശമയതു.
ദരിദ്രാണാം ദൈന്യം ദുരിതമഥ ദുർവാസനഹൃദാം
ദ്രുതം ദൂരീകുർവൻ സകൃദപി ഗതോ ദൃഷ്ടിസരണിം.
അപി ദ്രാഗാവിദ്യാദ്രുമദലനദീക്ഷാഗുരുരിഹ
പ്രവാഹസ്തേ വാരാം ശ്രിയമയമപാരാം ദിശതു നഃ.
ഉദഞ്ചന്മാർതണ്ഡസ്ഫുടകപടഹേരംബജനനീ-
കടാക്ഷവ്യാക്ഷേപക്ഷണജനിതസങ്ക്ഷോഭനിവഹാഃ.
ഭവന്തു ത്വംഗന്തോ ഹരശിരസി ഗംഗാതനുഭുവ-
സ്തരംഗാഃ പ്രോത്തുംഗാ ദുരിതഭയഭംഗായ ഭവതാം.
തവാലംബാദംബ സ്ഫുരദലഘുഗർവേണ സഹസാ
മയാ സർവേഽവജ്ഞാസരണിമഥ നീതാഃ സുരഗണാഃ.
ഇദാനീമൗദാസ്യം ഭജസി യദി ഭാഗീരഥി തദാ
നിരാധാരോ ഹാ രോദിമി കഥയ കേഷാമിഹ പുരഃ.
സ്മൃതിം യാതാ പുംസാമകൃതസുകൃതാനാമപി ച യാ
ഹരത്യന്തസ്തന്ദ്രാം തിമിരമിവ ചന്ദ്രാംശുസരണിഃ.
ഇയം സാ തേ മൂർതിഃ സകലസുരസംസേവ്യസലിലാ
മമാന്തഃസന്താപം ത്രിവിധമപി പാപം ച ഹരതാം.
അപി പ്രാജ്യം രാജ്യം തൃണമിവ പരിത്യജ്യ സഹസാ
വിലോലദ്വാനീരം തവ ജനനി തീരം ശ്രിതവതാം.
സുധാതഃ സ്വാദീയസ്സലിലഭരമാതൃപ്തി പിബതാം
ജനാനാമാനന്ദഃ പരിഹസതി നിർവാണപദവീം.
പ്രഭാതേ സ്നാതീനാം നൃപതിരമണീനാം കുചതടീ-
ഗതോ യാവന്മാതർമിലതി തവ തോയൈർമൃഗമദഃ.
മൃഗാസ്താവദ്വൈമാനികശതസഹസ്രൈഃ പരിവൃതാ
വിശന്തി സ്വച്ഛന്ദം വിമലവപുഷോ നന്ദനവനം.
സ്മൃതം സദ്യഃ സ്വാന്തം വിരചയതി ശാന്തം സകൃദപി
പ്രഗീതം യത്പാപം ഝടിതി ഭവതാപം ച ഹരതി.
ഇദം തദ്ഗംഗേതി ശ്രവണരമണീയം ഖലു പദം
മമ പ്രാണപ്രാന്തേ വദനകമലാന്തർവിലസതു.
യദന്തഃ ഖേലന്തോ ബഹുലതരസന്തോഷഭരിതാ
ന കാകാ നാകാധീശ്വരനഗരസാകാങ്ക്ഷമനസഃ.
നിവാസാല്ലോകാനാം ജനിമരണശോകാപഹരണം
തദേതത്തേ തീരം ശ്രമശമനധീരം ഭവതു നഃ.
ന യത്സാക്ഷാദ്വേദൈരപി ഗലിതഭേദൈരവസിതം
ന യസ്മിൻ ജീവാനാം പ്രസരതി മനോവാഗവസരഃ.
നിരാകാരം നിത്യം നിജമഹിമനിർവാസിതതമോ
വിശുദ്ധം യത്തത്ത്വം സുരതടിനി തത്ത്വം ന വിഷയഃ.
മഹാദാനൈർധ്യാനൈർബഹുവിധവിതാനൈരപി ച യൻ
ന ലഭ്യം ഘോരാഭിഃ സുവിമലതപോരാശിഭിരപി.
അചിന്ത്യം തദ്വിഷ്ണോഃ പദമഖിലസാധാരണതയാ
ദദാനാ കേനാസി ത്വമിഹ തുലനീയാ കഥയ നഃ.
നൃണാമീക്ഷാമാത്രാദപി പരിഹരന്ത്യാ ഭവഭയം
ശിവായാസ്തേ മൂർതേഃ ക ഇഹ മഹിമാനം നിഗദതു.
അമർഷമ്ലാനായാഃ പരമമനുരോധം ഗിരിഭുവോ
വിഹായ ശ്രീകണ്ഠഃ ശിരസി നിയതം ധാരയതി യാം.
വിനിന്ദ്യാന്യുന്മത്തൈരപി ച പരിഹാര്യാണി പതിതൈ-
രവാച്യാനി വ്രാത്യൈഃ സപുലകമപാസ്യാനി പിശുനൈഃ.
ഹരന്തീ ലോകാനാമനവരതമേനാംസി കിയതാം
കദാപ്യശ്രാന്താ ത്വം ജഗതി പുനരേകാ വിജയസേ.
സ്ഖലന്തീ സ്വർലോകാദവനിതലശോകാപഹൃതയേ
ജടാജൂടഗ്രന്ഥൗ യദസി വിനിബദ്ധാ പുരഭിദാ.
അയേ നിർലോഭാനാമപി മനസി ലോഭം ജനയതാം
ഗുണാനാമേവായം തവ ജനനി ദോഷഃ പരിണതഃ.
ജഡാനന്ധാൻ പംഗൂൻ പ്രകൃതിബധിരാനുക്തിവികലാൻ
ഗ്രഹഗ്രസ്താനസ്താഖിലദുരിതനിസ്താരസരണീൻ.
നിലിമ്പൈർനിർമുക്താനപി ച നിരയാന്തർനിപതതോ
നരാനംബ ത്രാതും ത്വമിഹ പരമം ഭേഷജമസി.
സ്വഭാവസ്വച്ഛാനാം സഹജശിശിരാണാമയമപാ-
മപാരസ്തേ മാതർജയതി മഹിമാ കോഽപി ജഗതി.
മുദായം ഗായന്തി ദ്യുതലമനവദ്യദ്യുതിഭൃതഃ
സമാസാദ്യാദ്യാപി സ്ഫുടപുലകസാന്ദ്രാഃ സഗരജാഃ.
കൃതക്ഷുദ്രൈനസ്കാനഥ ഝടിതി സന്തപ്തമനസഃ
സമുദ്ധർതും സന്തി ത്രിഭുവനതലേ തീർഥനിവഹാഃ.
അപി പ്രായശ്ചിത്തപ്രസരണപഥാതീതചരിതാ-
ന്നരാനൂരീകർതും ത്വമിവ ജനനി ത്വം വിജയസേ.
നിധാനം ധർമാണാം കിമപി ച വിധാനം നവമുദാം
പ്രധാനം തീർഥാനാമമലപരിധാനം ത്രിജഗതഃ.
സമാധാനം ബുദ്ധേരഥ ഖലു തിരോധാനമധിയാം
ശ്രിയാമാധാനം നഃ പരിഹരതു താപം തവ വപുഃ.
പുരോ ധാവം ധാവം ദ്രവിണമദിരാഘൂർണിതദൃശാം
മഹീപാനാം നാനാതരുണതരഖേദസ്യ നിയതം.
മമൈവായം മന്തുഃ സ്വഹിതശതഹന്തുർജഡധിയോ
വിയോഗസ്തേ മാതര്യദിഹ കരുണാതഃ ക്ഷണമപി.
മരുല്ലീലാലോലല്ലഹരിലുലിതാംഭോജപടലീ-
സ്ഖലത്പാംസുവ്രാതച്ഛുരണവിസരത്കൗങ്കുമരുചി.
സുരസ്ത്രീവക്ഷോജക്ഷരദഗരുജംബാലജടിലം
ജലം തേ ജംബാലം മമ ജനനജാലം ജരയതു.
സമുത്പത്തിഃ പദ്മാരമണപദപദ്മാമലനഖാ-
ന്നിവാസഃ കന്ദർപപ്രതിഭടജടാജൂടഭവനേ.
അഥാഽയം വ്യാസംഗോ ഹതപതിതനിസ്താരണവിധൗ
ന കസ്മാദുത്കർഷസ്തവ ജനനി ജാഗർതു ജഗതി.
നഗേഭ്യോ യാന്തീനാം കഥയ തടിനീനാം കതമയാ
പുരാണാം സംഹർതുഃ സുരധുനി കപർദോഽധിരുരുഹേ.
കയാ വാ ശ്രീഭർതുഃ പദകമലമക്ഷാലി സലിലൈ-
സ്തുലാലേശോ യസ്യാം തവ ജനനി ദീയേത കവിഭിഃ.
വിധത്താം നിഃശങ്കം നിരവധി സമാധിം വിധിരഹോ
സുഖം ശേഷേ ശേതാം ഹരിരവിരതം നൃത്യതു ഹരഃ.
കൃതം പ്രായശ്ചിത്തൈരലമഥ തപോദാനയജനൈഃ
സവിത്രീ കാമാനാം യദി ജഗതി ജാഗർതി ജനനീ.
അനാഥഃ സ്നേഹാർദ്രാം വിഗലിതഗതിഃ പുണ്യഗതിദാം
പതൻ വിശ്വോദ്ധർത്രീം ഗദവിഗലിതഃ സിദ്ധഭിഷജം.
സുധാസിന്ധും തൃഷ്ണാകുലിതഹൃദയോ മാതരമയം
ശിശുഃ സമ്പ്രാപ്തസ്ത്വാമഹമിഹ വിദധ്യാഃ സമുചിതം.
വിലീനോ വൈ വൈവസ്വതനഗരകോലാഹലഭരോ
ഗതാ ദൂതാ ദൂരം ക്വചിദപി പരേതാൻ മൃഗയിതും.
വിമാനാനാം വ്രാതോ വിദലയതി വീഥിർദിവിഷദാം
കഥാ തേ കല്യാണീ യദവധി മഹീമണ്ഡലമഗാത്.
സ്ഫുരത്കാമക്രോധപ്രബലതരസഞ്ജാതജടില-
ജ്വരജ്വാലാജാലജ്വലിതവപുഷാം നഃ പ്രതിദിനം.
ഹരന്താം സന്താപം കമപി മരുദുല്ലാസലഹരി-
ച്ഛടാചഞ്ചത്പാഥഃകണസരണയോ ദിവ്യസരിതഃ.
ഇദം ഹി ബ്രഹ്മാണ്ഡം സകലഭുവനാഭോഗഭവനം
തരംഗൈര്യസ്യാന്തർലുഠതി പരിതസ്തിന്ദുകമിവ.
സ ഏഷ ശ്രീകണ്ഠപ്രവിതതജടാജൂടജടിലോ
ജലാനാം സംഘാതസ്തവ ജനനി താപം ഹരതു നഃ.
ത്രപന്തേ തീർഥാനി ത്വരിതമിഹ യസ്യോദ്ധൃതിവിധൗ
കരം കർണേ കുർവന്ത്യപി കില കപാലിപ്രഭൃതയഃ.
ഇമം ത്വം മാമംബ ത്വമിയമനുകമ്പാർദ്രഹൃദയേ
പുനാനാ സർവേഷാമഘമഥനദർപം ദലയസി.
ശ്വപാകാനാം വ്രാതൈരമിതവിചികിത്സാവിചലിതൈ-
ര്വിമുക്താനാമേകം കില സദനമേനഃപരിഷദാം.
അഹോ മാമുദ്ധർതും ജനനി ഘടയന്ത്യാഃ പരികരം
തവ ശ്ലാഘാം കർതും കഥമിവ സമർഥോ നരപശുഃ.
ന കോഽപ്യേതാവന്തം ഖലു സമയമാരഭ്യ മിലിതോ
യദുദ്ധാരാദാരാദ്ഭവതി ജഗതോ വിസ്മയഭരഃ.
ഇതീമാമീഹാം തേ മനസി ചിരകാലം സ്ഥിതവതീ-
മയം സമ്പ്രാപ്തോഽഹം സഫലയിതുമംബ പ്രണയ നഃ.
ശ്വവൃത്തിവ്യാസംഗോ നിയതമഥ മിഥ്യാപ്രലപനം
കുതർകേശ്വഭ്യാസഃ സതതപരപൈശുന്യമനനം.
അപി ശ്രാവം ശ്രാവം മമ തു പുനരേവം ഗുണഗണാ-
നൃതേ ത്വത്കോ നാമ ക്ഷണമപി നിരീക്ഷേത വദനം.
വിശാലാഭ്യാമാഭ്യാം കിമിഹ നയനാഭ്യാം ഖലു ഫലം
ന യാഭ്യാമാലീഢാ പരമരമണീയാ തവ തനുഃ.
അയം ഹി ന്യക്കാരോ ജനനി മനുജസ്യ ശ്രവണയോ-
ര്യയോർനാന്തര്യാതസ്തവ ലഹരിലീലാകലകലഃ.
വിമാനൈഃ സ്വച്ഛന്ദം സുരപുരമയന്തേ സുകൃതിനഃ
പതന്തി ദ്രാക് പാപാ ജനനി നരകാന്തഃ പരവശാഃ.
വിഭാഗോഽയം തസ്മിന്നശുഭമയമൂർതൗ ജനപദേ
ന യത്ര ത്വം ലീലാദലിതമനുജാശേഷകലുഷാ.
അപി ഘ്നന്തോ വിപ്രാനവിരതമുശന്തോ ഗുരുസതീഃ
പിബന്തോ മൈരേയം പുനരപി ഹരന്തശ്ച കനകം.
വിഹായ ത്വയ്യന്തേ തനുമതനുദാനാധ്വരജുഷാ-
മുപര്യംബ ക്രീഡന്ത്യഖിലസുരസംഭാവിതപദാഃ.
അലഭ്യം സൗരഭ്യം ഹരതി സതതം യഃ സുമനസാം
ക്ഷണാദേവ പ്രാണാനപി വിരഹശസ്ത്രക്ഷതഹൃദാം.
ത്വദീയാനാം ലീലാചലിതലഹരീണാം വ്യതികരാത്
പുനീതേ സോഽപി ദ്രാഗഹഹ പവമാനസ്ത്രിഭുവനം.
കിയന്തഃ സന്ത്യേകേ നിയതമിഹലോകാർഥഘടകാഃ
പരേ പൂതാത്മാനഃ കതി ച പരലോകപ്രണയിനഃ.
സുഖം ശേതേ മാതസ്തവ ഖലു കൃപാതഃ പുനരയം
ജഗന്നാഥഃ ശശ്വത്ത്വയി നിഹിതലോകദ്വയഭരഃ.
ഭവത്യാ ഹി വ്രാത്യാധമപതിതപാഖണ്ഡപരിഷത്
പരിത്രാണസ്നേഹഃ ശ്ലഥയിതുമശക്യഃ ഖലു യഥാ.
മമാപ്യേവം പ്രേമാ ദുരിതനിവഹേഷ്വംബ ജഗതി
സ്വഭാവോഽയം സർവൈരപി ഖലു യതോ ദുഷ്പരിഹരഃ.
പ്രദോഷാന്തർനൃത്യത്പുരമഥനലീലോദ്ധൃതജടാ-
തടാഭോഗപ്രേംഖല്ലഹരിഭുജസന്താനവിധുതിഃ.
ബിലക്രോഡക്രീഡജ്ജലഡമരുടങ്കാരസുഭഗ-
സ്തിരോധത്താം താപം ത്രിദശതടിനീതാണ്ഡവവിധിഃ.
സദൈവ ത്വയ്യേവാർപിതകുശലചിന്താഭരമിമം
യദി ത്വം മാമംബ ത്യജസി സമയേഽസ്മിൻസുവിഷമേ.
തദാ വിശ്വാസോഽയം ത്രിഭുവനതലാദസ്തമയതേ
നിരാധാരാ ചേയം ഭവതി ഖലു നിർവ്യാജകരുണാ.
കപർദാദുല്ലസ്യ പ്രണയമിലദർധാംഗയുവതേഃ
പുരാരേഃ പ്രേംഖന്ത്യോ മൃദുലതരസീമന്തസരണൗ.
ഭവാന്യാ സാപത്ന്യസ്ഫുരിതനയനം കോമലരുചാ
കരേണാക്ഷിപ്താസ്തേ ജനനി വിജയന്താം ലഹരയഃ.
പ്രപദ്യന്തേ ലോകാഃ കതി ന ഭവതീമത്രഭവതീ-
മുപാധിസ്തത്രായം സ്ഫുരതി യദഭീഷ്ടം വിതരസി.
ശപേ തുഭ്യം മാതർമമ തു പുനരാത്മാ സുരധുനി
സ്വഭാവാദേവ ത്വയ്യമിതമനുരാഗം വിധൃതവാൻ.
ലലാടേ യാ ലോകൈരിഹ ഖലു സലീലം തിലകിതാ
തമോ ഹന്തും ധത്തേ തരുണതരമാർതണ്ഡതുലനാം.
വിലുമ്പന്തീ സദ്യോ വിധിലിഖിതദുർവർണസരണിം
ത്വദീയാ സാ മൃത്സ്നാ മമ ഹരതു കൃത്സ്നാമപി ശുചം.
നരാൻ മൂഢാംസ്തത്തജ്ജനപദസമാസക്തമനസോ
ഹസന്തഃ സോല്ലാസം വികചകുസുമവ്രാതമിഷതഃ.
പുനാനാഃ സൗരഭ്യൈഃ സതതമലിനോ നിത്യമലിനാൻ
സഖായോ നഃ സന്തു ത്രിദശതടിനീതീരതരവഃ.
യജന്ത്യേകേ ദേവാൻ കഠിനതരസേവാംസ്തദപരേ
വിതാനവ്യാസക്താ യമനിയമരക്താഃ കതിപയേ.
അഹം തു ത്വന്നാമസ്മരണകൃതകാമസ്ത്രിപഥഗേ
ജഗജ്ജാലം ജാനേ ജനനി തൃണജാലേന സദൃശം.
അവിശ്രാന്തം ജന്മാവധി സുകൃതജന്മാർജനകൃതാം
സതാം ശ്രേയഃ കർതും കതി ന കൃതിനഃ സന്തി വിബുധാഃ.
നിരസ്താലംബാനാമകൃതസുകൃതാനാം തു ഭവതീം
വിനാഽമുഷ്മിംല്ലോകേ ന പരമവലോകേ ഹിതകരം.
പയഃ പീത്വാ മാതസ്തവ സപദി യാതഃ സഹചരൈ-
ര്വിമൂഢൈഃ സംരന്തും ക്വചിദപി ന വിശ്രാന്തിമഗമം.
ഇദാനീമുത്സംഗേ മൃദുപവനസഞ്ചാരശിശിരേ
ചിരാദുന്നിദ്രം മാം സദയഹൃദയേ ശായയ ചിരം.
ബധാന ദ്രാഗേവ ദ്രഢിമരമണീയം പരികരം
കിരീടേ ബാലേന്ദും നിയമയ പുനഃ പന്നഗഗണൈഃ.
ന കുര്യാസ്ത്വം ഹേലാമിതരജനസാധാരണതയാ
ജഗന്നാഥസ്യായം സുരധുനി സമുദ്ധാരസമയഃ.
ശരച്ചന്ദ്രശ്വേതാം ശശിശകലശ്വേതാലമുകുടാം
കരൈഃ കുംഭാംഭോജേ വരഭയനിരാസൗ ച ദധതീം.
സുധാധാരാകാരാഭരണവസനാം ശുഭ്രമകര-
സ്ഥിതാം ത്വാം യേ ധ്യായന്ത്യുദയതി ന തേഷാം പരിഭവഃ.
ദരസ്മിതസമുല്ലസദ്വദനകാന്തിപൂരാമൃതൈ-
ര്ഭവജ്വലനഭർജിതാനനിശമൂർജയന്തീ നരാൻ.
ചിദേകമയചന്ദ്രികാചയചമത്കൃതിം തന്വതീ
തനോതു മമ ശന്തനോഃ സപദി ശന്തനോരംഗനാ.
മന്ത്രൈർമീലിതമൗഷധൈർമുകുലിതം ത്രസ്തം സുരാണാം ഗണൈഃ
സ്രസ്തം സാന്ദ്രസുധാരസൈർവിദലിതം ഗാരുത്മതൈർഗ്രാവഭിഃ.
വീചിക്ഷാലിതകാലിയാഹിതപദേ സ്വർലോകകല്ലോലിനി
ത്വം താപം തിരയാധുനാ മമ ഭവജ്വാലാവലീഢാത്മനഃ.
ദ്യൂതേ നാഗേന്ദ്രകൃത്തിപ്രമഥഗണമണിശ്രേണിനന്ദീന്ദുമുഖ്യം
സർവസ്വം ഹാരയിത്വാ സ്വമഥ പുരഭിദി ദ്രാക് പണീകർതുകാമേ.
സാകൂതം ഹൈമവത്യാ മൃദുലഹസിതയാ വീക്ഷിതായാസ്തവാംബ
വ്യാലോലോല്ലാസിവൽഗല്ലഹരിനടഘടീതാണ്ഡവം നഃ പുനാതു.
വിഭൂഷിതാനംഗരിപൂത്തമാംഗാ സദ്യഃകൃതാനേകജനാർതിഭംഗാ.
മനോഹരോത്തുംഗചലത്തരംഗാ ഗംഗാ മമാംഗാന്യമലീകരോതു.
ഇമാം പീയൂഷലഹരീം ജഗന്നാഥേന നിർമിതാം.
യഃ പഠേത്തസ്യ സർവത്ര ജായന്തേ സുഖസമ്പദഃ.