ಗಂಗಾ ಲಹರೀ ಸ್ತೋತ್ರ

ಸಮೃದ್ಧಂ ಸೌಭಾಗ್ಯಂ ಸಕಲವಸುಧಾಯಾಃ ಕಿಮಪಿ ತನ್
ಮಹೈಶ್ವರ್ಯಂ ಲೀಲಾಜನಿತಜಗತಃ ಖಂಡಪರಶೋಃ.
ಶ್ರುತೀನಾಂ ಸರ್ವಸ್ವಂ ಸುಕೃತಮಥ ಮೂರ್ತಂ ಸುಮನಸಾಂ
ಸುಧಾಸೋದರ್ಯಂ ತೇ ಸಲಿಲಮಶಿವಂ ನಃ ಶಮಯತು.
ದರಿದ್ರಾಣಾಂ ದೈನ್ಯಂ ದುರಿತಮಥ ದುರ್ವಾಸನಹೃದಾಂ
ದ್ರುತಂ ದೂರೀಕುರ್ವನ್ ಸಕೃದಪಿ ಗತೋ ದೃಷ್ಟಿಸರಣಿಂ.
ಅಪಿ ದ್ರಾಗಾವಿದ್ಯಾದ್ರುಮದಲನದೀಕ್ಷಾಗುರುರಿಹ
ಪ್ರವಾಹಸ್ತೇ ವಾರಾಂ ಶ್ರಿಯಮಯಮಪಾರಾಂ ದಿಶತು ನಃ.
ಉದಂಚನ್ಮಾರ್ತಂಡಸ್ಫುಟಕಪಟಹೇರಂಬಜನನೀ-
ಕಟಾಕ್ಷವ್ಯಾಕ್ಷೇಪಕ್ಷಣಜನಿತಸಂಕ್ಷೋಭನಿವಹಾಃ.
ಭವಂತು ತ್ವಂಗಂತೋ ಹರಶಿರಸಿ ಗಂಗಾತನುಭುವ-
ಸ್ತರಂಗಾಃ ಪ್ರೋತ್ತುಂಗಾ ದುರಿತಭಯಭಂಗಾಯ ಭವತಾಂ.
ತವಾಲಂಬಾದಂಬ ಸ್ಫುರದಲಘುಗರ್ವೇಣ ಸಹಸಾ
ಮಯಾ ಸರ್ವೇಽವಜ್ಞಾಸರಣಿಮಥ ನೀತಾಃ ಸುರಗಣಾಃ.
ಇದಾನೀಮೌದಾಸ್ಯಂ ಭಜಸಿ ಯದಿ ಭಾಗೀರಥಿ ತದಾ
ನಿರಾಧಾರೋ ಹಾ ರೋದಿಮಿ ಕಥಯ ಕೇಷಾಮಿಹ ಪುರಃ.
ಸ್ಮೃತಿಂ ಯಾತಾ ಪುಂಸಾಮಕೃತಸುಕೃತಾನಾಮಪಿ ಚ ಯಾ
ಹರತ್ಯಂತಸ್ತಂದ್ರಾಂ ತಿಮಿರಮಿವ ಚಂದ್ರಾಂಶುಸರಣಿಃ.
ಇಯಂ ಸಾ ತೇ ಮೂರ್ತಿಃ ಸಕಲಸುರಸಂಸೇವ್ಯಸಲಿಲಾ
ಮಮಾಂತಃಸಂತಾಪಂ ತ್ರಿವಿಧಮಪಿ ಪಾಪಂ ಚ ಹರತಾಂ.
ಅಪಿ ಪ್ರಾಜ್ಯಂ ರಾಜ್ಯಂ ತೃಣಮಿವ ಪರಿತ್ಯಜ್ಯ ಸಹಸಾ
ವಿಲೋಲದ್ವಾನೀರಂ ತವ ಜನನಿ ತೀರಂ ಶ್ರಿತವತಾಂ.
ಸುಧಾತಃ ಸ್ವಾದೀಯಸ್ಸಲಿಲಭರಮಾತೃಪ್ತಿ ಪಿಬತಾಂ
ಜನಾನಾಮಾನಂದಃ ಪರಿಹಸತಿ ನಿರ್ವಾಣಪದವೀಂ.
ಪ್ರಭಾತೇ ಸ್ನಾತೀನಾಂ ನೃಪತಿರಮಣೀನಾಂ ಕುಚತಟೀ-
ಗತೋ ಯಾವನ್ಮಾತರ್ಮಿಲತಿ ತವ ತೋಯೈರ್ಮೃಗಮದಃ.
ಮೃಗಾಸ್ತಾವದ್ವೈಮಾನಿಕಶತಸಹಸ್ರೈಃ ಪರಿವೃತಾ
ವಿಶಂತಿ ಸ್ವಚ್ಛಂದಂ ವಿಮಲವಪುಷೋ ನಂದನವನಂ.
ಸ್ಮೃತಂ ಸದ್ಯಃ ಸ್ವಾಂತಂ ವಿರಚಯತಿ ಶಾಂತಂ ಸಕೃದಪಿ
ಪ್ರಗೀತಂ ಯತ್ಪಾಪಂ ಝಟಿತಿ ಭವತಾಪಂ ಚ ಹರತಿ.
ಇದಂ ತದ್ಗಂಗೇತಿ ಶ್ರವಣರಮಣೀಯಂ ಖಲು ಪದಂ
ಮಮ ಪ್ರಾಣಪ್ರಾಂತೇ ವದನಕಮಲಾಂತರ್ವಿಲಸತು.
ಯದಂತಃ ಖೇಲಂತೋ ಬಹುಲತರಸಂತೋಷಭರಿತಾ
ನ ಕಾಕಾ ನಾಕಾಧೀಶ್ವರನಗರಸಾಕಾಂಕ್ಷಮನಸಃ.
ನಿವಾಸಾಲ್ಲೋಕಾನಾಂ ಜನಿಮರಣಶೋಕಾಪಹರಣಂ
ತದೇತತ್ತೇ ತೀರಂ ಶ್ರಮಶಮನಧೀರಂ ಭವತು ನಃ.
ನ ಯತ್ಸಾಕ್ಷಾದ್ವೇದೈರಪಿ ಗಲಿತಭೇದೈರವಸಿತಂ
ನ ಯಸ್ಮಿನ್ ಜೀವಾನಾಂ ಪ್ರಸರತಿ ಮನೋವಾಗವಸರಃ.
ನಿರಾಕಾರಂ ನಿತ್ಯಂ ನಿಜಮಹಿಮನಿರ್ವಾಸಿತತಮೋ
ವಿಶುದ್ಧಂ ಯತ್ತತ್ತ್ವಂ ಸುರತಟಿನಿ ತತ್ತ್ವಂ ನ ವಿಷಯಃ.
ಮಹಾದಾನೈರ್ಧ್ಯಾನೈರ್ಬಹುವಿಧವಿತಾನೈರಪಿ ಚ ಯನ್
ನ ಲಭ್ಯಂ ಘೋರಾಭಿಃ ಸುವಿಮಲತಪೋರಾಶಿಭಿರಪಿ.
ಅಚಿಂತ್ಯಂ ತದ್ವಿಷ್ಣೋಃ ಪದಮಖಿಲಸಾಧಾರಣತಯಾ
ದದಾನಾ ಕೇನಾಸಿ ತ್ವಮಿಹ ತುಲನೀಯಾ ಕಥಯ ನಃ.
ನೃಣಾಮೀಕ್ಷಾಮಾತ್ರಾದಪಿ ಪರಿಹರಂತ್ಯಾ ಭವಭಯಂ
ಶಿವಾಯಾಸ್ತೇ ಮೂರ್ತೇಃ ಕ ಇಹ ಮಹಿಮಾನಂ ನಿಗದತು.
ಅಮರ್ಷಮ್ಲಾನಾಯಾಃ ಪರಮಮನುರೋಧಂ ಗಿರಿಭುವೋ
ವಿಹಾಯ ಶ್ರೀಕಂಠಃ ಶಿರಸಿ ನಿಯತಂ ಧಾರಯತಿ ಯಾಂ.
ವಿನಿಂದ್ಯಾನ್ಯುನ್ಮತ್ತೈರಪಿ ಚ ಪರಿಹಾರ್ಯಾಣಿ ಪತಿತೈ-
ರವಾಚ್ಯಾನಿ ವ್ರಾತ್ಯೈಃ ಸಪುಲಕಮಪಾಸ್ಯಾನಿ ಪಿಶುನೈಃ.
ಹರಂತೀ ಲೋಕಾನಾಮನವರತಮೇನಾಂಸಿ ಕಿಯತಾಂ
ಕದಾಪ್ಯಶ್ರಾಂತಾ ತ್ವಂ ಜಗತಿ ಪುನರೇಕಾ ವಿಜಯಸೇ.
ಸ್ಖಲಂತೀ ಸ್ವರ್ಲೋಕಾದವನಿತಲಶೋಕಾಪಹೃತಯೇ
ಜಟಾಜೂಟಗ್ರಂಥೌ ಯದಸಿ ವಿನಿಬದ್ಧಾ ಪುರಭಿದಾ.
ಅಯೇ ನಿರ್ಲೋಭಾನಾಮಪಿ ಮನಸಿ ಲೋಭಂ ಜನಯತಾಂ
ಗುಣಾನಾಮೇವಾಯಂ ತವ ಜನನಿ ದೋಷಃ ಪರಿಣತಃ.
ಜಡಾನಂಧಾನ್ ಪಂಗೂನ್ ಪ್ರಕೃತಿಬಧಿರಾನುಕ್ತಿವಿಕಲಾನ್
ಗ್ರಹಗ್ರಸ್ತಾನಸ್ತಾಖಿಲದುರಿತನಿಸ್ತಾರಸರಣೀನ್.
ನಿಲಿಂಪೈರ್ನಿರ್ಮುಕ್ತಾನಪಿ ಚ ನಿರಯಾಂತರ್ನಿಪತತೋ
ನರಾನಂಬ ತ್ರಾತುಂ ತ್ವಮಿಹ ಪರಮಂ ಭೇಷಜಮಸಿ.
ಸ್ವಭಾವಸ್ವಚ್ಛಾನಾಂ ಸಹಜಶಿಶಿರಾಣಾಮಯಮಪಾ-
ಮಪಾರಸ್ತೇ ಮಾತರ್ಜಯತಿ ಮಹಿಮಾ ಕೋಽಪಿ ಜಗತಿ.
ಮುದಾಯಂ ಗಾಯಂತಿ ದ್ಯುತಲಮನವದ್ಯದ್ಯುತಿಭೃತಃ
ಸಮಾಸಾದ್ಯಾದ್ಯಾಪಿ ಸ್ಫುಟಪುಲಕಸಾಂದ್ರಾಃ ಸಗರಜಾಃ.
ಕೃತಕ್ಷುದ್ರೈನಸ್ಕಾನಥ ಝಟಿತಿ ಸಂತಪ್ತಮನಸಃ
ಸಮುದ್ಧರ್ತುಂ ಸಂತಿ ತ್ರಿಭುವನತಲೇ ತೀರ್ಥನಿವಹಾಃ.
ಅಪಿ ಪ್ರಾಯಶ್ಚಿತ್ತಪ್ರಸರಣಪಥಾತೀತಚರಿತಾ-
ನ್ನರಾನೂರೀಕರ್ತುಂ ತ್ವಮಿವ ಜನನಿ ತ್ವಂ ವಿಜಯಸೇ.
ನಿಧಾನಂ ಧರ್ಮಾಣಾಂ ಕಿಮಪಿ ಚ ವಿಧಾನಂ ನವಮುದಾಂ
ಪ್ರಧಾನಂ ತೀರ್ಥಾನಾಮಮಲಪರಿಧಾನಂ ತ್ರಿಜಗತಃ.
ಸಮಾಧಾನಂ ಬುದ್ಧೇರಥ ಖಲು ತಿರೋಧಾನಮಧಿಯಾಂ
ಶ್ರಿಯಾಮಾಧಾನಂ ನಃ ಪರಿಹರತು ತಾಪಂ ತವ ವಪುಃ.
ಪುರೋ ಧಾವಂ ಧಾವಂ ದ್ರವಿಣಮದಿರಾಘೂರ್ಣಿತದೃಶಾಂ
ಮಹೀಪಾನಾಂ ನಾನಾತರುಣತರಖೇದಸ್ಯ ನಿಯತಂ.
ಮಮೈವಾಯಂ ಮಂತುಃ ಸ್ವಹಿತಶತಹಂತುರ್ಜಡಧಿಯೋ
ವಿಯೋಗಸ್ತೇ ಮಾತರ್ಯದಿಹ ಕರುಣಾತಃ ಕ್ಷಣಮಪಿ.
ಮರುಲ್ಲೀಲಾಲೋಲಲ್ಲಹರಿಲುಲಿತಾಂಭೋಜಪಟಲೀ-
ಸ್ಖಲತ್ಪಾಂಸುವ್ರಾತಚ್ಛುರಣವಿಸರತ್ಕೌಂಕುಮರುಚಿ.
ಸುರಸ್ತ್ರೀವಕ್ಷೋಜಕ್ಷರದಗರುಜಂಬಾಲಜಟಿಲಂ
ಜಲಂ ತೇ ಜಂಬಾಲಂ ಮಮ ಜನನಜಾಲಂ ಜರಯತು.
ಸಮುತ್ಪತ್ತಿಃ ಪದ್ಮಾರಮಣಪದಪದ್ಮಾಮಲನಖಾ-
ನ್ನಿವಾಸಃ ಕಂದರ್ಪಪ್ರತಿಭಟಜಟಾಜೂಟಭವನೇ.
ಅಥಾಽಯಂ ವ್ಯಾಸಂಗೋ ಹತಪತಿತನಿಸ್ತಾರಣವಿಧೌ
ನ ಕಸ್ಮಾದುತ್ಕರ್ಷಸ್ತವ ಜನನಿ ಜಾಗರ್ತು ಜಗತಿ.
ನಗೇಭ್ಯೋ ಯಾಂತೀನಾಂ ಕಥಯ ತಟಿನೀನಾಂ ಕತಮಯಾ
ಪುರಾಣಾಂ ಸಂಹರ್ತುಃ ಸುರಧುನಿ ಕಪರ್ದೋಽಧಿರುರುಹೇ.
ಕಯಾ ವಾ ಶ್ರೀಭರ್ತುಃ ಪದಕಮಲಮಕ್ಷಾಲಿ ಸಲಿಲೈ-
ಸ್ತುಲಾಲೇಶೋ ಯಸ್ಯಾಂ ತವ ಜನನಿ ದೀಯೇತ ಕವಿಭಿಃ.
ವಿಧತ್ತಾಂ ನಿಃಶಂಕಂ ನಿರವಧಿ ಸಮಾಧಿಂ ವಿಧಿರಹೋ
ಸುಖಂ ಶೇಷೇ ಶೇತಾಂ ಹರಿರವಿರತಂ ನೃತ್ಯತು ಹರಃ.
ಕೃತಂ ಪ್ರಾಯಶ್ಚಿತ್ತೈರಲಮಥ ತಪೋದಾನಯಜನೈಃ
ಸವಿತ್ರೀ ಕಾಮಾನಾಂ ಯದಿ ಜಗತಿ ಜಾಗರ್ತಿ ಜನನೀ.
ಅನಾಥಃ ಸ್ನೇಹಾರ್ದ್ರಾಂ ವಿಗಲಿತಗತಿಃ ಪುಣ್ಯಗತಿದಾಂ
ಪತನ್ ವಿಶ್ವೋದ್ಧರ್ತ್ರೀಂ ಗದವಿಗಲಿತಃ ಸಿದ್ಧಭಿಷಜಂ.
ಸುಧಾಸಿಂಧುಂ ತೃಷ್ಣಾಕುಲಿತಹೃದಯೋ ಮಾತರಮಯಂ
ಶಿಶುಃ ಸಂಪ್ರಾಪ್ತಸ್ತ್ವಾಮಹಮಿಹ ವಿದಧ್ಯಾಃ ಸಮುಚಿತಂ.
ವಿಲೀನೋ ವೈ ವೈವಸ್ವತನಗರಕೋಲಾಹಲಭರೋ
ಗತಾ ದೂತಾ ದೂರಂ ಕ್ವಚಿದಪಿ ಪರೇತಾನ್ ಮೃಗಯಿತುಂ.
ವಿಮಾನಾನಾಂ ವ್ರಾತೋ ವಿದಲಯತಿ ವೀಥಿರ್ದಿವಿಷದಾಂ
ಕಥಾ ತೇ ಕಲ್ಯಾಣೀ ಯದವಧಿ ಮಹೀಮಂಡಲಮಗಾತ್.
ಸ್ಫುರತ್ಕಾಮಕ್ರೋಧಪ್ರಬಲತರಸಂಜಾತಜಟಿಲ-
ಜ್ವರಜ್ವಾಲಾಜಾಲಜ್ವಲಿತವಪುಷಾಂ ನಃ ಪ್ರತಿದಿನಂ.
ಹರಂತಾಂ ಸಂತಾಪಂ ಕಮಪಿ ಮರುದುಲ್ಲಾಸಲಹರಿ-
ಚ್ಛಟಾಚಂಚತ್ಪಾಥಃಕಣಸರಣಯೋ ದಿವ್ಯಸರಿತಃ.
ಇದಂ ಹಿ ಬ್ರಹ್ಮಾಂಡಂ ಸಕಲಭುವನಾಭೋಗಭವನಂ
ತರಂಗೈರ್ಯಸ್ಯಾಂತರ್ಲುಠತಿ ಪರಿತಸ್ತಿಂದುಕಮಿವ.
ಸ ಏಷ ಶ್ರೀಕಂಠಪ್ರವಿತತಜಟಾಜೂಟಜಟಿಲೋ
ಜಲಾನಾಂ ಸಂಘಾತಸ್ತವ ಜನನಿ ತಾಪಂ ಹರತು ನಃ.
ತ್ರಪಂತೇ ತೀರ್ಥಾನಿ ತ್ವರಿತಮಿಹ ಯಸ್ಯೋದ್ಧೃತಿವಿಧೌ
ಕರಂ ಕರ್ಣೇ ಕುರ್ವಂತ್ಯಪಿ ಕಿಲ ಕಪಾಲಿಪ್ರಭೃತಯಃ.
ಇಮಂ ತ್ವಂ ಮಾಮಂಬ ತ್ವಮಿಯಮನುಕಂಪಾರ್ದ್ರಹೃದಯೇ
ಪುನಾನಾ ಸರ್ವೇಷಾಮಘಮಥನದರ್ಪಂ ದಲಯಸಿ.
ಶ್ವಪಾಕಾನಾಂ ವ್ರಾತೈರಮಿತವಿಚಿಕಿತ್ಸಾವಿಚಲಿತೈ-
ರ್ವಿಮುಕ್ತಾನಾಮೇಕಂ ಕಿಲ ಸದನಮೇನಃಪರಿಷದಾಂ.
ಅಹೋ ಮಾಮುದ್ಧರ್ತುಂ ಜನನಿ ಘಟಯಂತ್ಯಾಃ ಪರಿಕರಂ
ತವ ಶ್ಲಾಘಾಂ ಕರ್ತುಂ ಕಥಮಿವ ಸಮರ್ಥೋ ನರಪಶುಃ.
ನ ಕೋಽಪ್ಯೇತಾವಂತಂ ಖಲು ಸಮಯಮಾರಭ್ಯ ಮಿಲಿತೋ
ಯದುದ್ಧಾರಾದಾರಾದ್ಭವತಿ ಜಗತೋ ವಿಸ್ಮಯಭರಃ.
ಇತೀಮಾಮೀಹಾಂ ತೇ ಮನಸಿ ಚಿರಕಾಲಂ ಸ್ಥಿತವತೀ-
ಮಯಂ ಸಂಪ್ರಾಪ್ತೋಽಹಂ ಸಫಲಯಿತುಮಂಬ ಪ್ರಣಯ ನಃ.
ಶ್ವವೃತ್ತಿವ್ಯಾಸಂಗೋ ನಿಯತಮಥ ಮಿಥ್ಯಾಪ್ರಲಪನಂ
ಕುತರ್ಕೇಶ್ವಭ್ಯಾಸಃ ಸತತಪರಪೈಶುನ್ಯಮನನಂ.
ಅಪಿ ಶ್ರಾವಂ ಶ್ರಾವಂ ಮಮ ತು ಪುನರೇವಂ ಗುಣಗಣಾ-
ನೃತೇ ತ್ವತ್ಕೋ ನಾಮ ಕ್ಷಣಮಪಿ ನಿರೀಕ್ಷೇತ ವದನಂ.
ವಿಶಾಲಾಭ್ಯಾಮಾಭ್ಯಾಂ ಕಿಮಿಹ ನಯನಾಭ್ಯಾಂ ಖಲು ಫಲಂ
ನ ಯಾಭ್ಯಾಮಾಲೀಢಾ ಪರಮರಮಣೀಯಾ ತವ ತನುಃ.
ಅಯಂ ಹಿ ನ್ಯಕ್ಕಾರೋ ಜನನಿ ಮನುಜಸ್ಯ ಶ್ರವಣಯೋ-
ರ್ಯಯೋರ್ನಾಂತರ್ಯಾತಸ್ತವ ಲಹರಿಲೀಲಾಕಲಕಲಃ.
ವಿಮಾನೈಃ ಸ್ವಚ್ಛಂದಂ ಸುರಪುರಮಯಂತೇ ಸುಕೃತಿನಃ
ಪತಂತಿ ದ್ರಾಕ್ ಪಾಪಾ ಜನನಿ ನರಕಾಂತಃ ಪರವಶಾಃ.
ವಿಭಾಗೋಽಯಂ ತಸ್ಮಿನ್ನಶುಭಮಯಮೂರ್ತೌ ಜನಪದೇ
ನ ಯತ್ರ ತ್ವಂ ಲೀಲಾದಲಿತಮನುಜಾಶೇಷಕಲುಷಾ.
ಅಪಿ ಘ್ನಂತೋ ವಿಪ್ರಾನವಿರತಮುಶಂತೋ ಗುರುಸತೀಃ
ಪಿಬಂತೋ ಮೈರೇಯಂ ಪುನರಪಿ ಹರಂತಶ್ಚ ಕನಕಂ.
ವಿಹಾಯ ತ್ವಯ್ಯಂತೇ ತನುಮತನುದಾನಾಧ್ವರಜುಷಾ-
ಮುಪರ್ಯಂಬ ಕ್ರೀಡಂತ್ಯಖಿಲಸುರಸಂಭಾವಿತಪದಾಃ.
ಅಲಭ್ಯಂ ಸೌರಭ್ಯಂ ಹರತಿ ಸತತಂ ಯಃ ಸುಮನಸಾಂ
ಕ್ಷಣಾದೇವ ಪ್ರಾಣಾನಪಿ ವಿರಹಶಸ್ತ್ರಕ್ಷತಹೃದಾಂ.
ತ್ವದೀಯಾನಾಂ ಲೀಲಾಚಲಿತಲಹರೀಣಾಂ ವ್ಯತಿಕರಾತ್
ಪುನೀತೇ ಸೋಽಪಿ ದ್ರಾಗಹಹ ಪವಮಾನಸ್ತ್ರಿಭುವನಂ.
ಕಿಯಂತಃ ಸಂತ್ಯೇಕೇ ನಿಯತಮಿಹಲೋಕಾರ್ಥಘಟಕಾಃ
ಪರೇ ಪೂತಾತ್ಮಾನಃ ಕತಿ ಚ ಪರಲೋಕಪ್ರಣಯಿನಃ.
ಸುಖಂ ಶೇತೇ ಮಾತಸ್ತವ ಖಲು ಕೃಪಾತಃ ಪುನರಯಂ
ಜಗನ್ನಾಥಃ ಶಶ್ವತ್ತ್ವಯಿ ನಿಹಿತಲೋಕದ್ವಯಭರಃ.
ಭವತ್ಯಾ ಹಿ ವ್ರಾತ್ಯಾಧಮಪತಿತಪಾಖಂಡಪರಿಷತ್
ಪರಿತ್ರಾಣಸ್ನೇಹಃ ಶ್ಲಥಯಿತುಮಶಕ್ಯಃ ಖಲು ಯಥಾ.
ಮಮಾಪ್ಯೇವಂ ಪ್ರೇಮಾ ದುರಿತನಿವಹೇಷ್ವಂಬ ಜಗತಿ
ಸ್ವಭಾವೋಽಯಂ ಸರ್ವೈರಪಿ ಖಲು ಯತೋ ದುಷ್ಪರಿಹರಃ.
ಪ್ರದೋಷಾಂತರ್ನೃತ್ಯತ್ಪುರಮಥನಲೀಲೋದ್ಧೃತಜಟಾ-
ತಟಾಭೋಗಪ್ರೇಂಖಲ್ಲಹರಿಭುಜಸಂತಾನವಿಧುತಿಃ.
ಬಿಲಕ್ರೋಡಕ್ರೀಡಜ್ಜಲಡಮರುಟಂಕಾರಸುಭಗ-
ಸ್ತಿರೋಧತ್ತಾಂ ತಾಪಂ ತ್ರಿದಶತಟಿನೀತಾಂಡವವಿಧಿಃ.
ಸದೈವ ತ್ವಯ್ಯೇವಾರ್ಪಿತಕುಶಲಚಿಂತಾಭರಮಿಮಂ
ಯದಿ ತ್ವಂ ಮಾಮಂಬ ತ್ಯಜಸಿ ಸಮಯೇಽಸ್ಮಿನ್ಸುವಿಷಮೇ.
ತದಾ ವಿಶ್ವಾಸೋಽಯಂ ತ್ರಿಭುವನತಲಾದಸ್ತಮಯತೇ
ನಿರಾಧಾರಾ ಚೇಯಂ ಭವತಿ ಖಲು ನಿರ್ವ್ಯಾಜಕರುಣಾ.
ಕಪರ್ದಾದುಲ್ಲಸ್ಯ ಪ್ರಣಯಮಿಲದರ್ಧಾಂಗಯುವತೇಃ
ಪುರಾರೇಃ ಪ್ರೇಂಖಂತ್ಯೋ ಮೃದುಲತರಸೀಮಂತಸರಣೌ.
ಭವಾನ್ಯಾ ಸಾಪತ್ನ್ಯಸ್ಫುರಿತನಯನಂ ಕೋಮಲರುಚಾ
ಕರೇಣಾಕ್ಷಿಪ್ತಾಸ್ತೇ ಜನನಿ ವಿಜಯಂತಾಂ ಲಹರಯಃ.
ಪ್ರಪದ್ಯಂತೇ ಲೋಕಾಃ ಕತಿ ನ ಭವತೀಮತ್ರಭವತೀ-
ಮುಪಾಧಿಸ್ತತ್ರಾಯಂ ಸ್ಫುರತಿ ಯದಭೀಷ್ಟಂ ವಿತರಸಿ.
ಶಪೇ ತುಭ್ಯಂ ಮಾತರ್ಮಮ ತು ಪುನರಾತ್ಮಾ ಸುರಧುನಿ
ಸ್ವಭಾವಾದೇವ ತ್ವಯ್ಯಮಿತಮನುರಾಗಂ ವಿಧೃತವಾನ್.
ಲಲಾಟೇ ಯಾ ಲೋಕೈರಿಹ ಖಲು ಸಲೀಲಂ ತಿಲಕಿತಾ
ತಮೋ ಹಂತುಂ ಧತ್ತೇ ತರುಣತರಮಾರ್ತಂಡತುಲನಾಂ.
ವಿಲುಂಪಂತೀ ಸದ್ಯೋ ವಿಧಿಲಿಖಿತದುರ್ವರ್ಣಸರಣಿಂ
ತ್ವದೀಯಾ ಸಾ ಮೃತ್ಸ್ನಾ ಮಮ ಹರತು ಕೃತ್ಸ್ನಾಮಪಿ ಶುಚಂ.
ನರಾನ್ ಮೂಢಾಂಸ್ತತ್ತಜ್ಜನಪದಸಮಾಸಕ್ತಮನಸೋ
ಹಸಂತಃ ಸೋಲ್ಲಾಸಂ ವಿಕಚಕುಸುಮವ್ರಾತಮಿಷತಃ.
ಪುನಾನಾಃ ಸೌರಭ್ಯೈಃ ಸತತಮಲಿನೋ ನಿತ್ಯಮಲಿನಾನ್
ಸಖಾಯೋ ನಃ ಸಂತು ತ್ರಿದಶತಟಿನೀತೀರತರವಃ.
ಯಜಂತ್ಯೇಕೇ ದೇವಾನ್ ಕಠಿನತರಸೇವಾಂಸ್ತದಪರೇ
ವಿತಾನವ್ಯಾಸಕ್ತಾ ಯಮನಿಯಮರಕ್ತಾಃ ಕತಿಪಯೇ.
ಅಹಂ ತು ತ್ವನ್ನಾಮಸ್ಮರಣಕೃತಕಾಮಸ್ತ್ರಿಪಥಗೇ
ಜಗಜ್ಜಾಲಂ ಜಾನೇ ಜನನಿ ತೃಣಜಾಲೇನ ಸದೃಶಂ.
ಅವಿಶ್ರಾಂತಂ ಜನ್ಮಾವಧಿ ಸುಕೃತಜನ್ಮಾರ್ಜನಕೃತಾಂ
ಸತಾಂ ಶ್ರೇಯಃ ಕರ್ತುಂ ಕತಿ ನ ಕೃತಿನಃ ಸಂತಿ ವಿಬುಧಾಃ.
ನಿರಸ್ತಾಲಂಬಾನಾಮಕೃತಸುಕೃತಾನಾಂ ತು ಭವತೀಂ
ವಿನಾಽಮುಷ್ಮಿಂಲ್ಲೋಕೇ ನ ಪರಮವಲೋಕೇ ಹಿತಕರಂ.
ಪಯಃ ಪೀತ್ವಾ ಮಾತಸ್ತವ ಸಪದಿ ಯಾತಃ ಸಹಚರೈ-
ರ್ವಿಮೂಢೈಃ ಸಂರಂತುಂ ಕ್ವಚಿದಪಿ ನ ವಿಶ್ರಾಂತಿಮಗಮಂ.
ಇದಾನೀಮುತ್ಸಂಗೇ ಮೃದುಪವನಸಂಚಾರಶಿಶಿರೇ
ಚಿರಾದುನ್ನಿದ್ರಂ ಮಾಂ ಸದಯಹೃದಯೇ ಶಾಯಯ ಚಿರಂ.
ಬಧಾನ ದ್ರಾಗೇವ ದ್ರಢಿಮರಮಣೀಯಂ ಪರಿಕರಂ
ಕಿರೀಟೇ ಬಾಲೇಂದುಂ ನಿಯಮಯ ಪುನಃ ಪನ್ನಗಗಣೈಃ.
ನ ಕುರ್ಯಾಸ್ತ್ವಂ ಹೇಲಾಮಿತರಜನಸಾಧಾರಣತಯಾ
ಜಗನ್ನಾಥಸ್ಯಾಯಂ ಸುರಧುನಿ ಸಮುದ್ಧಾರಸಮಯಃ.
ಶರಚ್ಚಂದ್ರಶ್ವೇತಾಂ ಶಶಿಶಕಲಶ್ವೇತಾಲಮುಕುಟಾಂ
ಕರೈಃ ಕುಂಭಾಂಭೋಜೇ ವರಭಯನಿರಾಸೌ ಚ ದಧತೀಂ.
ಸುಧಾಧಾರಾಕಾರಾಭರಣವಸನಾಂ ಶುಭ್ರಮಕರ-
ಸ್ಥಿತಾಂ ತ್ವಾಂ ಯೇ ಧ್ಯಾಯಂತ್ಯುದಯತಿ ನ ತೇಷಾಂ ಪರಿಭವಃ.
ದರಸ್ಮಿತಸಮುಲ್ಲಸದ್ವದನಕಾಂತಿಪೂರಾಮೃತೈ-
ರ್ಭವಜ್ವಲನಭರ್ಜಿತಾನನಿಶಮೂರ್ಜಯಂತೀ ನರಾನ್.
ಚಿದೇಕಮಯಚಂದ್ರಿಕಾಚಯಚಮತ್ಕೃತಿಂ ತನ್ವತೀ
ತನೋತು ಮಮ ಶಂತನೋಃ ಸಪದಿ ಶಂತನೋರಂಗನಾ.
ಮಂತ್ರೈರ್ಮೀಲಿತಮೌಷಧೈರ್ಮುಕುಲಿತಂ ತ್ರಸ್ತಂ ಸುರಾಣಾಂ ಗಣೈಃ
ಸ್ರಸ್ತಂ ಸಾಂದ್ರಸುಧಾರಸೈರ್ವಿದಲಿತಂ ಗಾರುತ್ಮತೈರ್ಗ್ರಾವಭಿಃ.
ವೀಚಿಕ್ಷಾಲಿತಕಾಲಿಯಾಹಿತಪದೇ ಸ್ವರ್ಲೋಕಕಲ್ಲೋಲಿನಿ
ತ್ವಂ ತಾಪಂ ತಿರಯಾಧುನಾ ಮಮ ಭವಜ್ವಾಲಾವಲೀಢಾತ್ಮನಃ.
ದ್ಯೂತೇ ನಾಗೇಂದ್ರಕೃತ್ತಿಪ್ರಮಥಗಣಮಣಿಶ್ರೇಣಿನಂದೀಂದುಮುಖ್ಯಂ
ಸರ್ವಸ್ವಂ ಹಾರಯಿತ್ವಾ ಸ್ವಮಥ ಪುರಭಿದಿ ದ್ರಾಕ್ ಪಣೀಕರ್ತುಕಾಮೇ.
ಸಾಕೂತಂ ಹೈಮವತ್ಯಾ ಮೃದುಲಹಸಿತಯಾ ವೀಕ್ಷಿತಾಯಾಸ್ತವಾಂಬ
ವ್ಯಾಲೋಲೋಲ್ಲಾಸಿವಲ್ಗಲ್ಲಹರಿನಟಘಟೀತಾಂಡವಂ ನಃ ಪುನಾತು.
ವಿಭೂಷಿತಾನಂಗರಿಪೂತ್ತಮಾಂಗಾ ಸದ್ಯಃಕೃತಾನೇಕಜನಾರ್ತಿಭಂಗಾ.
ಮನೋಹರೋತ್ತುಂಗಚಲತ್ತರಂಗಾ ಗಂಗಾ ಮಮಾಂಗಾನ್ಯಮಲೀಕರೋತು.
ಇಮಾಂ ಪೀಯೂಷಲಹರೀಂ ಜಗನ್ನಾಥೇನ ನಿರ್ಮಿತಾಂ.
ಯಃ ಪಠೇತ್ತಸ್ಯ ಸರ್ವತ್ರ ಜಾಯಂತೇ ಸುಖಸಂಪದಃ.