ಶಾರದಾ ಪದಪಂಕಜ ಸ್ತೋತ್ರ
ಮಾತಸ್ತ್ವತ್ಪದಪಂಕಜಂ ಕಲ್ಯತಾಂ ಚೇತೋಽಮ್ಬುಜೇ ಸಂತತಂ
ಮಾನಾಥಾಂಬುಜಸಂಭವಾದ್ರಿತನಯಾಕಾಂತೈಃ ಸಮಾರಾಧಿತಂ .
ವಾಂಛಾಪೂರಣನಿರ್ಜಿತಾಮರಮಹೀರುಡ್ಗರ್ವಸರ್ವಸ್ವಕಂ
ವಾಚಃ ಸೂಕ್ತಿಸುಧಾರಸದ್ರವಮುಚೋ ನಿರ್ಯಾಂತಿ ವಕ್ತ್ರೋದರಾತ್ ..
ಮಾತಸ್ತ್ವತ್ಪದಪಂಕಜಂ ಮುನಿಮನಃಕಾಸಾರವಾಸಾದರಂ
ಮಾಯಾಮೋಹಮಹಾಂಧಕಾರಮಿಹಿರಂ ಮಾನಾತಿಗಪ್ರಾಭವಂ .
ಮಾತಂಗಾಭಿಮತಿಂ ಸ್ವಕೀಯಗಮನೈರ್ನಿರ್ಮೂಲಯತ್ಕೌತುಕಾ-
ದ್ವಂದೇಽಮಂದತಪಃಫಲಾಪ್ಯನಮನಸ್ತೋತ್ರಾರ್ಚನಾಪ್ರಕ್ರಮಂ ..
ಮಾತಸ್ತ್ವತ್ಪದಪಂಕಜಂ ಪ್ರಣಮತಾಮಾನಂದವಾರಾನ್ನಿಧೇ
ರಾಕಾಶಾರದಪೂರ್ಣಚಂದ್ರನಿಕರಂ ಕಾಮಾಹಿಪಕ್ಷೀಶ್ವರಂ .
ವೃಂದಂ ಪ್ರಾಣಭೃತಾಂ ಸ್ವನಾಮ ವದತಾಮತ್ಯಾದರಾತ್ಸತ್ವರಂ
ಷದ್ಭಾಷಾಸರಿದೀಶ್ವರಂ ಪ್ರತಿದಧತ್ಷಾಣ್ಮಾತುರಾರ್ಚ್ಯಂ ಭಜೇ ..
ಕಾಮಂ ಫಾಲತಲೇ ದುರಕ್ಷರತತಿರ್ದೈವೀ ಮಮಾಸ್ತಾಂ ನ ಭೀ-
ರ್ಮಾತಸ್ತ್ವತ್ಪದಪಂಕಜೋತ್ಥರಜಸಾ ಲುಂಪಾಮಿ ತಾಂ ನಿಶ್ಚಿತಂ .
ಮಾರ್ಕಂಡೇಯಮುನಿರ್ಯಥಾ ಭವಪದಾಂಭೋಜಾರ್ಚನಾಪ್ರಾಭವಾತ್
ಕಾಲಂ ತದ್ವದಹಂ ಚತುರ್ಮುಖಮುಖಾಂಭೋಜಾತಸೂರ್ಯಪ್ರಭೇ ..
ಪಾಪಾನಿ ಪ್ರಶಮಂ ನಯಾಶು ಮಮತಾಂ ದೇಹೇಂದ್ರಿಯಪ್ರಾಣಗಾಂ
ಕಾಮಾದೀನಪಿ ವೈರಿಣೋ ದೃಢತರಾನ್ಮೋಕ್ಷಾಧ್ವವಿಘ್ನಪ್ರದಾನ್ .
ಸ್ನಿಗ್ಧಾನ್ಪೋಷಯ ಸಂತತಂ ಶಮದಮಧ್ಯಾನಾದಿಮಾನ್ಮೋದತೋ
ಮಾತಸ್ತ್ವತ್ಪದಪಂಕಜಂ ಹೃದಿ ಸದಾ ಕುರ್ವೇ ಗಿರಾಂ ದೇವತೇ ..
ಮಾತಸ್ತ್ವತ್ಪದಪಂಕಜಸ್ಯ ಮನಸಾ ವಾಚಾ ಕ್ರಿಯಾತೋಽಪಿ ವಾ
ಯೇ ಕುರ್ವಂತಿ ಮುದಾನ್ವಹಂ ಬಹುವಿಧೈರ್ದಿವ್ಯೈಃ ಸುಮೈರರ್ಚನಾಂ .
ಶೀಘ್ರಂ ತೇ ಪ್ರಭವಂತಿ ಭೂಮಿಪತಯೋ ನಿಂದಂತಿ ಚ ಸ್ವಶ್ರಿಯಾ
ಜಂಭಾರಾತಿಮಪಿ ಧ್ರುವಂ ಶತಮಖೀಕಷ್ಟಾಪ್ತನಾಕಶ್ರಿಯಂ ..
ಮಾತಸ್ತ್ವತ್ಪದಪಕಜಂ ಶಿರಸಿ ಯೇ ಪದ್ಮಾಟವೀಮಧ್ಯತ-
ಶ್ಚಂದ್ರಾಭಂ ಪ್ರವಿಚಿಂತಯಂತಿ ಪುರುಷಾಃ ಪೀಯೂಷವರ್ಷ್ಯನ್ಯಹಂ .
ತೇ ಮೃತ್ಯುಂ ಪ್ರವಿಜಿತ್ಯ ರೋಗರಹಿತಾಃ ಸಮ್ಯಗ್ದೃಢಾಂಗಾಶ್ಚಿರಂ
ಜೀವಂತ್ಯೇವ ಮೃಣಾಲಕೋಮಲವಪುಷ್ಮಂತಃ ಸುರೂಪಾ ಭುವಿ ..
ಮಾತಸ್ತ್ವತ್ಪದಪಂಕಜಂ ಹೃದಿ ಮುದಾ ಧ್ಯಾಯಂತಿ ಯೇ ಮಾನವಾಃ
ಸಚ್ಚಿದ್ರೂಪಮಶೇಷವೇದಶಿರಸಾಂ ತಾತ್ಪರ್ಯಗಮ್ಯಂ ಮುಹುಃ .
ಅತ್ಯಾಗೇಽಪಿ ತನೋರಖಂಡಪರಮಾನಂದಂ ವಹಂತಃ ಸದಾ
ಸರ್ವಂ ವಿಶ್ವಮಿದಂ ವಿನಾಶಿ ತರಸಾ ಪಶ್ಯಂತಿ ತೇ ಪೂರುಷಾಃ ..
Other stotras
