ಸಂಗೀತ ಜ್ಞಾನದ ಸರಸ್ವತೀ ಸ್ತೋತ್ರ

ಶಾರದಾಂ ಚಂದ್ರವದನಾಂ ವೀಣಾಪುಸ್ತಕಧಾರಿಣೀಂ .
ಸಂಗೀತವಿದ್ಯಾಧಿಷ್ಠಾತ್ರೀಂ ನಮಸ್ಯಾಮಿ ಸರಸ್ವತೀಂ ..

ಶ್ವೇತಾಂಬರಧರೇ ದೇವಿ ಶ್ವೇತಪದ್ಮಾಸನೇ ಶುಭೇ.
ಶ್ವೇತಗಂಧಾರ್ಚಿತಾಂಘ್ರಿಂ ತ್ವಾಂ ನಮಸ್ಯಾಮಿ ಸರಸ್ವತೀಂ ..

ಯಾ ದೇವೀ ಸರ್ವವಾದ್ಯೇಷು ದಕ್ಷಾ ಸಂಗೀತವರ್ತಿನೀ .
ಯಾ ಸದಾ ಜ್ಞಾನದಾ ದೇವೀ ನಮಸ್ಯಾಮಿ ಸರಸ್ವತಿ ..

ಶಾರದೇ ಸರ್ವವಾದ್ಯೇಷು ದಕ್ಷಂ ಮಾಂ ಕುರು ಪಾಹಿ ಮಾಂ .
ಸಿದ್ಧಿಂ ದೇಹಿ ಸದಾ ದೇವಿ ಜಿಹ್ವಾಯಾಂ ತಿಷ್ಠ ಮೇ ಸ್ವಯಂ ..

ಜ್ಞಾನಂ ದೇಹಿ ಸ್ವರಸ್ಯಾಪಿ ಲಯತಾಲಗುಣಂ ಮಮ .
ಭಕ್ತಿಂ ಚ ಯಚ್ಛ ಮೇ ನಿತ್ಯಂ ಸರಸ್ವತಿ ನಮೋಽಸ್ತು ತೇ ..

ವಿದ್ಯಾಂ ಬುದ್ಧಿಂ ಚ ಮೇ ದೇವಿ ಪ್ರಯಚ್ಛಾಽದ್ಯ ಸರಸ್ವತಿ .
ಯಶೋ ಮೇ ಶಾಶ್ವತಂ ದೇಹಿ ವರದಾ ಭವ ಮೇ ಸದಾ ..

ಪ್ರಣಮಾಮಿ ಜಗದ್ಧಾತ್ರೀಂ ವಾಗೀಶಾನೀಂ ಸರಸ್ವತೀಂ .
ಸಂಗೀತೇ ದೇಹಿ ಸಿದ್ಧಿಂ ಮೇ ಗೀತೇ ವಾದ್ಯೇ ಮಹಾಮತಿ ..

ಸರಸ್ವತ್ಯಾ ಇದಂ ಸ್ತೋತ್ರಂ ಯಃ ಪಠೇದ್ಭಕ್ತಿಮಾನ್ ನರಃ .
ಸಂಗೀತಸ್ವರತಾಲೇಷು ಸಮವಾಪ್ನೋತ್ಯಭಿಜ್ಞತಾಂ ..