Navagraha Dhyana Stotram

प्रत्यक्षदेवं विशदं सहस्रमरीचिभिः शोभितभूमिदेशम्।
सप्ताश्वगं सद्ध्वजहस्तमाद्यं देवं भजेऽहं मिहिरं हृदब्जे।
शङ्खप्रभमेणप्रियं शशाङ्कमीशानमौलि- स्थितमीड्यवृत्तम्।
तमीपतिं नीरजयुग्महस्तं ध्याये हृदब्जे शशिनं ग्रहेशम्।
प्रतप्तगाङ्गेयनिभं ग्रहेशं सिंहासनस्थं कमलासिहस्तम्।
सुरासुरैः पूजितपादपद्मं भौमं दयालुं हृदये स्मरामि।
सोमात्मजं हंसगतं द्विबाहुं शङ्खेन्दुरूपं ह्यसिपाशहस्तम्।
दयानिधिं भूषणभूषिताङ्गं बुधं स्मरे मानसपङ्कजेऽहम्।
तेजोमयं शक्तित्रिशूलहस्तं सुरेन्द्रज्येष्ठैः स्तुतपादपद्मम्।
मेधानिधिं हस्तिगतं द्विबाहुं गुरुं स्मरे मानसपङ्कजेऽहम्।
सन्तप्तकाञ्चननिभं द्विभुजं दयालुं पीताम्बरं धृतसरोरुहद्वन्द्वशूलम्।
क्रौञ्चासनं ह्यसुरसेवितपादपद्मं शुक्रं स्मरे द्विनयनं हृदि पङ्कजेऽहम्।
नीलाञ्जनाभं मिहिरेष्टपुत्रं ग्रहेश्वरं पाशभुजङ्गपाणिम्।
सुरासुराणां भयदं द्विबाहुं शनिं स्मरे मानसपङ्कजेऽहम्।
शीतांशुमित्रान्तक- मीड्यरूपं घोरं च वैडुर्यनिभं विबाहुम्।
त्रैलोक्यरक्षाप्रदमिष्टदं च राहुं ग्रहेन्द्रं हृदये स्मरामि।
लाङ्गुलयुक्तं भयदं जनानां कृष्णाम्बुभृत्सन्निभमेकवीरम्।
कृष्णाम्बरं शक्तित्रिशूलहस्तं केतुं भजे मानसपङ्कजेऽहम्।

pratyakshadevam vishadam sahasramareechibhih' shobhitabhoomidesham.
saptaashvagam saddhvajahastamaadyam devam bhaje'ham mihiram hri'dabje.
shankhaprabhamenapriyam shashaankameeshaanamauli- sthitameed'yavri'ttam.
tameepatim neerajayugmahastam dhyaaye hri'dabje shashinam grahesham.
prataptagaangeyanibham grahesham simhaasanastham kamalaasihastam.
suraasuraih' poojitapaadapadmam bhaumam dayaalum hri'daye smaraami.
somaatmajam hamsagatam dvibaahum shankhenduroopam hyasipaashahastam.
dayaanidhim bhooshanabhooshitaangam budham smare maanasapankaje'ham.
tejomayam shaktitrishoolahastam surendrajyesht'haih' stutapaadapadmam.
medhaanidhim hastigatam dvibaahum gurum smare maanasapankaje'ham.
santaptakaanchananibham dvibhujam dayaalum peetaambaram dhri'tasaroruhadvandvashoolam.
kraunchaasanam hyasurasevitapaadapadmam shukram smare dvinayanam hri'di pankaje'ham.
neelaanjanaabham mihiresht'aputram graheshvaram paashabhujangapaanim.
suraasuraanaam bhayadam dvibaahum shanim smare maanasapankaje'ham.
sheetaamshumitraantaka- meed'yaroopam ghoram cha vaid'uryanibham vibaahum.
trailokyarakshaapradamisht'adam cha raahum grahendram hri'daye smaraami.
laangulayuktam bhayadam janaanaam kri'shnaambubhri'tsannibhamekaveeram.
kri'shnaambaram shaktitrishoolahastam ketum bhaje maanasapankaje'ham.

Ramaswamy Sastry and Vighnesh Ghanapaathi

Other stotras