ಲಲಿತಾ ಅಪರಾಧ ಕ್ಷಮಾಪಣ ಸ್ತೋತ್ರ

ಕಂಜಮನೋಹರಪಾದಚಲನ್ಮಣಿನೂಪುರಹಂಸವಿರಾಜಿತೇ
ಕಂಜಭವಾದಿಸುರೌಘಪರಿಷ್ಟುತಲೋಕವಿಸೃತ್ವರವೈಭವೇ.
ಮಂಜುಲವಾಙ್ಮಯನಿರ್ಜಿತಕೀರಕುಲೇಚಲರಾಜಸುಕನ್ಯಕೇ
ಪಾಲಯ ಹೇ ಲಲಿತಾಪರಮೇಶ್ವರಿ ಮಾಮಪರಾಧಿನಮಂಬಿಕೇ.
ಏಣಧರೋಜ್ವಲಫಾಲತಲೋಲ್ಲಸದೈಣಮದಾಂಕಸಮನ್ವಿತೇ
ಶೋಣಪರಾಗವಿಚಿತ್ರಿತಕಂದುಕಸುಂದರಸುಸ್ತನಶೋಭಿತೇ.
ನೀಲಪಯೋಧರಕಾಲಸುಕುಂತಲನಿರ್ಜಿತಭೃಂಗಕದಂಬಕೇ
ಪಾಲಯ ಹೇ ಲಲಿತಾಪರಮೇಶ್ವರಿ ಮಾಮಪರಾಧಿನಮಂಬಿಕೇ.
ಈತಿವಿನಾಶಿನಿ ಭೀತಿನಿವಾರಿಣಿ ದಾನವಹಂತ್ರಿ ದಯಾಪರೇ
ಶೀತಕರಾಂಕಿತರತ್ನವಿಭೂಷಿತಹೇಮಕಿರೀಟಸಮನ್ವಿತೇ.
ದೀಪ್ತತರಾಯುಧಭಂಡಮಹಾಸುರಗರ್ವನಿಹಂತ್ರಿ ಪುರಾಂಬಿಕೇ
ಪಾಲಯ ಹೇ ಲಲಿತಾಪರಮೇಶ್ವರಿ ಮಾಮಪರಾಧಿನಮಂಬಿಕೇ.
ಲಬ್ಧವರೇಣ ಜಗತ್ರಯಮೋಹನದಕ್ಷಲತಾಂತಮಹೇಷುಣಾ
ಲಬ್ಧಮನೋಹರಸಾಲವಿಷಣ್ಣಸುದೇಹಭುವಾ ಪರಿಪೂಜಿತೇ.
ಲಂಘಿತಶಾಸನದಾನವನಾಶನದಕ್ಷಮಹಾಯುಧರಾಜಿತೇ
ಪಾಲಯ ಹೇ ಲಲಿತಾಪರಮೇಶ್ವರಿ ಮಾಮಪರಾಧಿನಮಂಬಿಕೇ.
ಹ್ರೀಂಪದಭೂಷಿತಪಂಚದಶಾಕ್ಷರಷೋಡಶವರ್ಣಸುದೇವತೇ
ಹ್ರೀಮತಿಹಾದಿಹಾಮನುಮಂದಿರರತ್ನವಿನಿರ್ಮಿತದೀಪಿಕೇ.
ಹಸ್ತಿವರಾನನದರ್ಶಿತಯುದ್ಧಸಮಾದರಸಾಹಸತೋಷಿತೇ
ಪಾಲಯ ಹೇ ಲಲಿತಾಪರಮೇಶ್ವರಿ ಮಾಮಪರಾಧಿನಮಂಬಿಕೇ.
ಹಸ್ತಲಸನ್ನವಪುಷ್ಪಸರೇಕ್ಷುಶರಾಸನಪಾಶಮಹಾಂಕುಶೇ
ಹರ್ಯಜಶಂಭುಮಹೇಶ್ವರಪಾದಚತುಷ್ಟಯಮಂಚನಿವಾಸಿನಿ.
ಹಂಸಪದಾರ್ಥಮಹೇಶ್ವರಿ ಯೋಗಿಸಮೂಹಸಮಾದೃತವೈಭವೇ
ಪಾಲಯ ಹೇ ಲಲಿತಾಪರಮೇಶ್ವರಿ ಮಾಮಪರಾಧಿನಮಂಬಿಕೇ.
ಸರ್ವಜಗತ್ಕರಣಾವನನಾಶನಕರ್ತ್ರಿ ಕಪಾಲಿಮನೋಹರೇ
ಸ್ವಚ್ಛಮೃಣಾಲಮರಾಲತುಷಾರಸಮಾನಸುಹಾರವಿಭೂಷಿತೇ.
ಸಜ್ಜನಚಿತ್ತವಿಹಾರಿಣಿ ಶಂಕರಿ ದುರ್ಜನನಾಶನತತ್ಪರೇ
ಪಾಲಯ ಹೇ ಲಲಿತಾಪರಮೇಶ್ವರಿ ಮಾಮಪರಾಧಿನಮಂಬಿಕೇ.
ಕಂಜದಲಾಕ್ಷಿ ನಿರಂಜನಿ ಕುಂಜರಗಾಮಿನಿ ಮಂಜುಲಭಾಷಿತೇ
ಕುಂಕುಮಪಂಕವಿಲೇಪನಶೋಭಿತದೇಹಲತೇ ತ್ರಿಪುರೇಶ್ವರಿ.
ದಿವ್ಯಮತಂಗಸುತಾಧೃತರಾಜ್ಯಭರೇ ಕರುಣಾರಸವಾರಿಧೇ
ಪಾಲಯ ಹೇ ಲಲಿತಾಪರಮೇಶ್ವರಿ ಮಾಮಪರಾಧಿನಮಂಬಿಕೇ.
ಹಲ್ಲಕಚಂಪಕಪಂಕಜಕೇತಕಪುಷ್ಪಸುಗಂಧಿತಕುಂತಲೇ
ಹಾಟಕಭೂಧರಶೃಂಗವಿನಿರ್ಮಿತಸುಂದರಮಂದಿರವಾಸಿನಿ.
ಹಸ್ತಿಮುಖಾಂಬವರಾಹಮುಖೀಧೃತಸೈನ್ಯಭರೇ ಗಿರಿಕನ್ಯಕೇ
ಪಾಲಯ ಹೇ ಲಲಿತಾಪರಮೇಶ್ವರಿ ಮಾಮಪರಾಧಿನಮಂಬಿಕೇ.
ಲಕ್ಷ್ಮಣಸೋದರಸಾದರಪೂಜಿತಪಾದಯುಗೇ ವರದೇ ಶಿವೇ
ಲೋಹಮಯಾದಿಬಹೂನ್ನತಸಾಲನಿಷಣ್ಣಬುಧೇಶ್ವರಸಂಯುತೇ.
ಲೋಲಮದಾಲಸಲೋಚನನಿರ್ಜಿತನೀಲಸರೋಜಸುಮಾಲಿಕೇ
ಪಾಲಯ ಹೇ ಲಲಿತಾಪರಮೇಶ್ವರಿ ಮಾಮಪರಾಧಿನಮಂಬಿಕೇ.
ಹ್ರೀಮಿತಿಮಂತ್ರಮಹಾಜಪಸುಸ್ಥಿರಸಾಧಕಮಾನಸಹಂಸಿಕೇ
ಹ್ರೀಂಪದಶೀತಕರಾನನಶೋಭಿತಹೇಮಲತೇ ವಸುಭಾಸ್ವರೇ.
ಹಾರ್ದತಮೋಗುಣನಾಶಿನಿ ಪಾಶವಿಮೋಚನಿ ಮೋಕ್ಷಸುಖಪ್ರದೇ
ಪಾಲಯ ಹೇ ಲಲಿತಾಪರಮೇಶ್ವರಿ ಮಾಮಪರಾಧಿನಮಂಬಿಕೇ.
ಸಚ್ಚಿದಭೇದಸುಖಾಮೃತವರ್ಷಿಣಿ ತತ್ತ್ವಮಸೀತಿ ಸದಾದೃತೇ
ಸದ್ಗುಣಶಾಲಿನಿ ಸಾಧುಸಮರ್ಚಿತಪಾದಯುಗೇ ಪರಶಾಂಬವಿ.
ಸರ್ವಜಗತ್ಪರಿಪಾಲನದೀಕ್ಷಿತಬಾಹುಲತಾಯುಗಶೋಭಿತೇ
ಪಾಲಯ ಹೇ ಲಲಿತಾಪರಮೇಶ್ವರಿ ಮಾಮಪರಾಧಿನಮಂಬಿಕೇ.
ಕಂಬುಗಲೇ ವರಕುಂದರದೇ ರಸರಂಜಿತಪಾದಸರೋರುಹೇ
ಕಾಮಮಹೇಶ್ವರಕಾಮಿನಿ ಕೋಮಲಕೋಕಿಲಭಾಷಿಣಿ ಭೈರವಿ.
ಚಿಂತಿತಸರ್ವಮನೋಹರಪೂರಣಕಲ್ಪಲತೇ ಕರುಣಾರ್ಣವೇ
ಪಾಲಯ ಹೇ ಲಲಿತಾಪರಮೇಶ್ವರಿ ಮಾಮಪರಾಧಿನಮಂಬಿಕೇ.
ಲಸ್ತಕಶೋಭಿಕರೋಜ್ವಲಕಂಕಣಕಾಂತಿಸುದೀಪಿತದಿಙ್ಮುಖೇ
ಶಸ್ತತರತ್ರಿದಶಾಲಯಕಾರ್ಯಸಮಾದೃತದಿವ್ಯತನುಜ್ವಲೇ.
ಕಶ್ಚತುರೋಭುವಿ ದೇವಿಪುರೇಶಿ ಭವಾನಿ ತವ ಸ್ತವನೇ ಭವೇತ್
ಪಾಲಯ ಹೇ ಲಲಿತಾಪರಮೇಶ್ವರಿ ಮಾಮಪರಾಧಿನಮಂಬಿಕೇ.
ಹ್ರೀಂಪದಲಾಂಚಿತಮಂತ್ರಪಯೋದಧಿಮಂಥನಜಾತಪರಾಮೃತೇ
ಹವ್ಯವಹಾನಿಲಭೂಯಜಮಾನಕಖೇಂದುದಿವಾಕರರೂಪಿಣಿ.
ಹರ್ಯಜರುದ್ರಮಹೇಶ್ವರಸಂಸ್ತುತವೈಭವಶಾಲಿನಿ ಸಿದ್ಧಿದೇ
ಪಾಲಯ ಹೇ ಲಲಿತಾಪರಮೇಶ್ವರಿ ಮಾಮಪರಾಧಿನಮಂಬಿಕೇ.
ಶ್ರೀಪುರವಾಸಿನಿ ಹಸ್ತಲಸದ್ವರಚಾಮರವಾಕ್ಕಮಲಾನುತೇ
ಶ್ರೀಗುಹಪೂರ್ವಭವಾರ್ಜಿತಪುಣ್ಯಫಲೇ ಭವಮತ್ತವಿಲಾಸಿನಿ.
ಶ್ರೀವಶಿನೀವಿಮಲಾದಿಸದಾನತಪಾದಚಲನ್ಮಣಿನೂಪುರೇ
ಪಾಲಯ ಹೇ ಲಲಿತಾಪರಮೇಶ್ವರಿ ಮಾಮಪರಾಧಿನಮಂಬಿಕೇ.